Udaberrian zeharkatuko ditu Korrikak Euskal Herri osoko bideak eta errepideak, martxoaren 30etik apirilaren 9ra arte; Otxandiotik Iruñera joko du euskararen aldeko lasterketaren 20. edizioak, AEK-k jakitera eman duenez. Uribe Kostari dagokionez, apirilaren 6an, eguena, zabalduko dituzte eskualdeko herriak euskarazaleek; beste urte batez, ez da Lemoiztik igaroko. Korrikari behar bezalako harrera egiteko bihar, martitzena, hasi dira lanean tokian tokiko batzordeak. Besteak beste, material-salmenta egingo dute Itzubaltzeta/Romoko Santa Eugenia plazan, zapatu honetan, otsailaren 25ean. Goizeko 10:00etatik 14:00etara egongo dira bertan.
Datorren otsailaren 25ean eta 26an, III. In Motion Zurrumurrurik Ez Akzio Topaketak egingo dituzte Algortako Fadura kiroldegian. Horren helburua da Zurrumurrurik Ez Estrategiaren barneko heziketa eta sareak sendotzea. Antolatzaileek jakinarazi dutenez, oraingo honetan lau kolektibok parte hartuko dute: gazteek, pertsona nagusiek, eskoletako gurasoen elkarteek eta etorkinek.
Inauteriak ospatzen lehenengoak izango dira Itzubaltzeta/Romoko auzokideak, zapatuan hasiko dira eta ekitaldiak.
"Teresa eta Galtzagorri", adiskidetasunaren magia izenburuko pelikula ikusteko aukera egongo da Urdulizko kultur etxean, zapatu honetan, otsailaren 25ean. Agurtzane Intxaurragak (Orozko, 1966) idatzitako ipuin-bilduman oinarritua dago istorioa. Hitzordua arrastiko 06:00etan ipini dute; sarrerak 3,50 euroan daude salgai.
Blas Fernández bateria-jotzaileak kontzerta emango du, Areetako Andrés Isasi musika-eskolan, zapatu honetan, otsailaren 25ean. Emanaldia 19:30ean izango da. Bertan aurkeztuko du bere lehenengo diskoa, "Urbanetniko"; eta, horregaz, Neguko Bidaia zikloari amaiera emango zaio. Sarreraren prezioa 5 eurokoa da.
Laugarren urtez, Leioako Udal Liburutegiak antolatuko du Euskara Irakurle Kluba. Aurreko urteetako mekanika jarraituz, literaturazaleak hilabete bakoitzeko hirugarren asteazkenean bilduko dira Kultur Leioako lehenengo solairuko hemerotekan, 19:30ean. Urriaren 19an izango da lehenengo saioa, Alaine Agirreren "X hil da" liburuaren gainean berba egiteko.
Urtarrilaren 21etik otsailaren 25era bitartean, Neguko Bidaia izeneko kontzertu-zikloaren bederatzigarren edizioa egingo dute, zapatuero, 19:30ean, Areetako Andrés Isasi musika-eskolan. Emanaldi bakoitzeko sarreraren prezioa 5 eurokoa (ikasleentzat 3 euro) izango da, eta 25 eurokoa saio denetarako bonua. Hala, lehenengo kontzertua Trio Argixe taldeak eskainiko du; klarinete, txelo eta piano hirukoteak Brahms eta Piazzollaren obrak interpretatuko ditu. Ziklo honetan ohikoa denez, kontzertu bakoitzaren ostean, entzuleen eta musikarien arteko solasaldia egongo da.
Hitzen Ahairea, zeri kantatzen diogu euskaldunok? Horixe bera aztertuko dugu Gotzon Barandiaran eta Rafa Ruedarekin batera otsailaren 1etik martxoaren 10era. Ikastaroak 6 asteko iraupena izango du eta 2 orduko saioak izango dira, asteazkenero (martxoak 10 osteguna da) 19:00etatik 21:00etara Algortako Villamonte kultur etxean. Ikastaroaren prezioa: Bizarra Lepoaneko bazkideek 10 euro eta ez bazkideek 15 euro Ikastaroan izena emateko sartu gure webgunera: www.bizarralepoan.eus
Iazko udan, "Erandiok Erabakia" adierazpenarekiko herri-babesa ikustarazteko sinadura-bilketa abiatu zuen Erandioko Gure Esku Dago taldeak. Erabakitzeko eskubidearen aldeko plataformak zabaldu duenez, otsail honetan ere erandioztarren atxikimenduak batzen segituko du, gerora testua Udalbatzan mozio gisa aurkezteko.
Neguriko Jolaseta kirol-klubean jokatuko da Bizkaiko Tenis Txapelketa, bariku honetan hasi eta otsailaren 26ra bitartean. Jolasetako iturriek baieztatu dutenez, bertako pistetan ikusi ahal izango dira emakumezkoen eta gizonezkoen norgehiagokak honako mailetan: 2007ra artera jaiotako benjaminak, 2003ra arteko umeak, eta 1999ra arteko gazteak.
Garizumaren aurreko festa heldu da berriro ere. Hala, Barikutik domekara Inauteriak ospatuko dituzte Altzagan, Astrabuduan eta Erandiogoikoan.
Sopelako kuadrillak prest daude mozorrotzeko, zoratzeko, ospatzeko... Izan ere, bazkaria (14:30) eta mozorro-desfilea (17:00) antolatu dituzte; zapatu honetan izango dira, otsailaren 25ean, Ander Deuna ikastolan. Egitarauari jarraituz, arrastiko 07:00etatik aurrera, poteoa egingo dute kalez kale, Polekelele elektro-txarangagaz. Hala, bazkarirako txartelak Sopelako Laiak tabernan eta Larrabasterrako Ugari supermerkatuan eros daitezke, 10 euroan. Historia da mozorrotzeko aukeratu duten gaia.
Nagusiki, herriko txikientzat izango dira aurtengo aratusteak, udal-iturriek adierazi dutenez. Ospakizunei hasiera emateko, gehienbat txikiei zuzendutako jarduerak egingo dituzte, Ikea Barri plazan, zapatu honetan, otsailaren 25ean. Arrastiko 05:00etatik aurrera, puzgarriak, umeentzako ikuskizuna, mozorro-jaia eta animazioa egongo dira. Gauean, ostera, Trikizio erromeria-taldeak joko du.