Barrikabasoko kalifikazioak ontzat hartzen zituen foru-agindua atzera botatzeak eragindako kalteengatik, Astarloa 91, Arne Muriola eta Abandonada Muriola enpresek 24,6 milioi euroko kalte-ordaina eskatu zuten. Halere, Auzitegi Gorenak onartutako kalte-ordaina txikiagoa izan da: 1,5 milioi eurokoa, 230.631 euro Muriola sektoreko kalteengatik eta beste 1.290.033 euro San Telmokoengatik.
"Hilabete biko negoziaketa-epea zabaldu da. Gainera, kalte-ordain osoa instituzioetako batek ordaintzea eskatu dezakete enpresa sustatzaileek", azaldu du Asier Garcia EH Bilduko zinegotziak. Dioenez, Aldundiak "bideak ditu" zorrari aurre egiteko, "egia da ardura instituzio bietakoa dela, baina kalte-ordaina Barrikako Udalaren urteko aurrekontua baino handiagoa da, eta ezin dugu Udalaren jarraikortasun-ekonomikoa hipotekatu EAJren inkonpetentziagatik", deitoratu du.
Heri Lago-Lekue Orain Barrika taldeko zinegotziak, bere aldetik, adierazi du alkatearen eta alkateordearen dimisioa eskatuko dutela.