Gazteok 2007-03-21 16:17

Barakaldoko Dorretxea gaztetxearen eraispena salatzeko mobilizazioetan parte hartzera deitu du Itzubaltzeta gaztetxeak

Erabiltzailearen aurpegia Ukberri Goizean Barakaldoko Dorretxea gaztetxea hustu eta bota egin dutela salatzeko protestetan parte hartzeko deia egin du Itzubaltzeta / Romoko Itzubaltzeta gaztetxeak. Zentro autogestionatuak salatu du Ertzaintzak gazteen aurka oldartu, herria okupatu eta pertsona bat atxilotu izana. Era berean, salatu du hainbat zauritu egotea, haietako bat hondeamakina batek oina zapaldu diona, gaztetxetik hainbat gauza berreskuratzen saiatzen ari zela. Izan ere, Dorretxeko gazte asanbladak nabarmendu du ez dela "inolako segurtasun neurrik" erabili eraikina botatzeko. Goizeko 11:30erako Dorretxea gaztetxea hondakin pila baino ez zen. Bestalde, bi dira gaurko zabaldu diren deialdiak, lehenengoa, Gaztesareak iragarria, 19:30ean Bide Onera plazan; eta Itzubaltzeta gaztetxeko kideek jakinarazitakoa, ordu erdi beranduago Zaballa kalean, Barakaldoko metro geltokiko Elkano kaleko irteera ondoan. Era berean, larunbat honetan ere manifestazioa egongo da, arratsaldeko 8etan eta datorren larunbatean martxa izango da, Ezkerraldeko eta Olabeagako zentro autogestionatuen defentsan. Argazkian, 2005eko irailaren 6an Dorretxeko kideek kanporaketa saiakera baten ostean emandako prentsaurrekoa. Gai honi buruzko berri gehiagorako: Gaztesarea.
  Gazteok 2007-03-16 13:49

Leioako Gazte Eguna ospatuko dute martxoaren 24an

Erabiltzailearen aurpegia Ukberri "Gazteok autogestioaz... Leioa berria" lelopean, martxoaren 24rako IV. Gazte Eguna antolatu du Leioako Gazte Asanbladak. Goizeko 11etan hasita, gazte olinpiadak, azoka, haurrentzako jolasak, txalaparta tailerra, hankapaluak eta puzgarriak izango dira Tigre plazan. 14:30ean, berriz, bazkari herrikoia egingo dute eta 17:00etatik aurrera herri txikiteo musikatua. Ondorengo ekitaldian Plaza Gorrian izango dira, bertan izango baitira kontzertuak. "Paregabeko eguna hortaz gazteon artean igarotzeko", diotenez. Gazteriari, egunaren prestaketan eta egunean bertan parte hartzeko deia egin dio gazte asanbladak. Argazkian, igaz izan zen Gaztetxe Martxa Leioara heltzen.
  Gazteok 2007-03-14 21:54

Gazte Plana onartu du Erandioko Udalak

Erabiltzailearen aurpegia Ukberri Erandiok bere lehenengo Gazte Plana egin du. Udalak konpromisoa hartu du "gazteek dituzten beharrei erantzuteko" ekintza multzo bat gauzatzeko eta, besteak beste, honako neurri hauek finkatu ditu: etxebizitzak eraikitzeko erraztasunak eman eta alokairu sozialeko eskaintza publikoa sortzea, gazteentzako alokairuzko pisuak bermatzea (gutxienez %25a), enpresekin informazio bide berriak ireki eta herriko pertsonak kontratatzeko hitzarmenak sinatzea, Udal Eskola Kontseilua eratzea, Altzagako azoka zaharra kultur etxe modura sustatzea, herriko plazetan eta zabalguneetan kirol zelai txikiak taxutzea, dauden kirol instalazioak hobetzea, euskal taldeen musika kontzertuak ugaritzea, herriko eta inguruko musika taldeen emanaldiak bultzatzea.
  Gazteok 2007-03-13 13:15

Barakaldoko Dorretxea gaztetxea desalojatzen saiatu direla bolo-bolo ibili da

Erabiltzailearen aurpegia Ukberri Barakaldoko Dorretxea gaztetxea desalojatzen ari direla salatu du SMS baten bitartez Euskal Herriko Gaztetxe eta Gazte Asanbladen Koordinadorak gaur goizeko 11:30ak aldera. UKBERRI.NETek koordinadoraren prentsa batzordearekin jarri da harremanetan, baina bertako kideek aitortu dute Dorretxea gaztetxetik bidalitako mezua berbidaltzea baino ez dutela egin eta saiatu arren, ez dutela lortu Barakaldoko zentro sozial okupatuaren kideekin hitz egitea. Gaztesareak, berriz, ezeztatu du kontua: "antza alarma faltsua izan omen da, jende dezente agertu da berria jakitean, baina Ertzaintzak alde egin du, hori da esan digutena. Hala ere, mehatxuak bertan dirau, eta gaurkoa ikusita, baliteke egun hauetako batean izatea desalojoa". Argazkian, 2005eko irailaren 6an Dorretxeko kideek kanporaketa saiakera baten ostean emandako prentsaurrekoa.
  Gazteok 2007-03-12 22:57

Gazteriaren gehiengoa gaztetxeen aldekoa dela gogorazi diote Arrueri

Erabiltzailearen aurpegia Ukberri Martxoaren 5ean Marisa Arrue Getxoko PPko presidente, zinegotzi bozeramaile eta alkategaiak egindako adierazpenei erantzunez, oharra kaleratu du gaur Itzubaltzetako Gazte Asanbladak (IGA). Arruek Errekagane kaleko tailerren aurrean, Itzubaltzeta gaztetxetik gertu, prentsaurrekoa ematea "bitxia" iruditu zitzaien bertoko neska-mutilei. Hain zuzen, bertan "balizko zaharberritze proposamena" azaldu izana, gune autogestionatuaren aurkako "eraso berri baten hastapena" ez al den izango galdetu diote ordezkari popularrari. Horrenbestez, inkestak baliatuz burututako ikerketa jarri du mahai gainean IGAk, "gazteriaren gehiengoa espazio autogestionatuen aldekoa" dela gogoratzeko Arrueri. Argazkian, gaztetxeko kideak Arruerekin hizketan.
  Gazteok 2007-03-06 22:32

Itzubaltzeta gaztetxea parke bihurtu nahi dute Zarraoak eta bere inguruak

Erabiltzailearen aurpegia Ukberri Iñaki Zarraoa Getxoko alkateak Errekagane parkea egun dagoen Itzubaltzeta gaztetxera zabaldu nahi du, "El Correo Español" egunkariari egindako adierazpenetan irakur daitekeenez. Marisa Arrue zinegotzi popularrak atzo proposaturiko mozioari erantzun dio horrela alkateak. Bere ustez, atzo Arruek esandakoa, gaztetxea bota eta gazteentzako udal tailerrak eraikitzea, alegia, ezinezkoa litzateke: "Erreka eta Ibaien Legearen arabera, ezin dugu ezer egin Gobelatik 10 metrora, eta hortaz, ez dago lekurik gazte lokalak eraikitzeko". Horren aurrean eta gaztetxea botatzeko Getxoko PPrekin ados egonda, Arruek egindako berdeguneen beste proposamenarekin bat etorri da, popularra aipatu gabe: "gure asmoa Errekagane parkea luzatzea da". Hori bai, alkateak ez du zehaztu "gure" asmo hori EAJ, EA eta Ezker batuak osatzen duten Udal Gobernuarena, bere ingurukoena edo Imanol Landa alkategai izango duen EAJrena den.
  Gazteok 2007-03-05 17:33

Marisa Arrueri Itzubaltzeta gaztetxeko proiektua azaldu egin diote

Erabiltzailearen aurpegia Ukberri Itzubaltzetako gazte asanbladako kideek Itzubaltzeta / Erromoko gaztetxea zertan den azaldu diote gaur goizean Espainiako Kongresuko diputatua, Getxoko PPko presidentea, zinegotzi bozeramailea eta alkategaia den Marisa Arrueri. Izan ere, gazteek Arruek ostiralean deitutako prentsaurrekoaz baliatu dira popularrarekin eta“El Correo Español”, “Deia”, “Getxoberri”, Getxo irratia eta UKBERRI.NET komunikabideekin hitz egiteko. Arrue goizeko 10:30ean heldu da, garaiz, prentsarekin Gobela kiroldegian jarritako hitzordura, berarekin alderdikide bat eta lau bizkartzain heldu direla. Itzubaltzeta gaztetxetik 25 bat metro eskasera, baina Gobela ibaia tartean, diputatuak azkar lan egiteko eskatu die kazetariei, “hemen denbora asko egotea ez baitzait gustatzen”. Tentsio giroan edo, gaztetxea eta “Arrue, ez zaitugu hemen nahi. Ez gaituzue geldituko. Gora Itzubaltzeta gaztetxea” pankarta atzean zeuzkala jarri da argazkietarako Arrue. “Errekaganeko tailerren” egoera “kaskarrari” erantzuna emateko Getxoko Udalak inguru guztia erostea eta berdeguneak edo tailer duinak jartzea martxoko Udal Batzarrean proposatuko duela esan du zinegotziak. Gazteek berriz argi utzi diote “proiektu autogestionaturik baino ez” dutela nahi. Argazkian, gaztetxeko kideak Arruerekin hizketan. Irudi gehiago ikusteko, sakatu hemen.
  Gazteok 2007-03-05 15:15

Itzubaltzeta / Erromori buruzko gazte ikerketa aurkeztu du gaztetxeak

Erabiltzailearen aurpegia Ukberri Itzubaltzetako gaztetxeko kideek herriko gazteriari buruz egin duten ikerketa (pdf) aurkeztu zuten pasa den larunbatean, martxoak 3, herriko 120 bat gazte eta bestelako auzokideen aurrean. Jendaurreko aurkezpena Itzubaltzeta / Erromoko Santa Eugenia plazan, iluntzean, egin zuten, umore handiz. Ekain Landa “Txispain” eta Xabier Otxoa Itzubaltzetako Bertso Eskolako kideek ireki zuten ekitaldia. Ondoren, gazte asanbladako kideek parodiatu zuten iazko maiatza, ekaina eta uztailean egindako lana, herriko 162 gazte eta 20 heldu elkarrizketatu zituztenean. Agurez, neskatoz edota umeen eleberrietako Teo elkarrizketa-egilez mozorrotuta, inkestan agertu diren hainbat esaldi sakon eta bitxiak orainera ekarri zituzten: Getxoko Udalak Itzubaltzeta / Erromo baztertzen duela edo gazteak drogamenpekoak baino ez direla, adibidez. Horren ostean, ikerketaren emaitzak laburbildu, gaztetxeak 2004ko ekainean abiatutako proiektu “bera” duela azaldu eta herri osoari bertan parte hartzeko gonbitea egin zioten. Gazte koadrilek zoriondu zituzten egindako “lan eskergagatik”.
  Gazteok 2007-03-03 20:49

Itzubaltzeta gaztetxearen eraikina eta inguruak “birgaitzeko” proposamen berria aurkeztuko du astelehenean Getxoko PPk

Erabiltzailearen aurpegia Ukberri Getxoko Alderdi Popularrak jakinarazi duenez, Marisa Arrue zinegotziak astelehenean, gozieko 10:30ean prentsaurrean aurkeztuko du “Errekaganeko tailerren zonaldea birgaitzeko” ekimena. Komunikabideei bidalitako prentsa oharrean, antzinako aroztegian bertan dagoen Itzubaltzeta gaztetxea aipatu gabe, popularrek kale zati hori “oso baldintza kaskarretan” dagoela salatzen dute eta Gobela kiroldegiko atean jarri dute hitzordua. Deialdia, gainera, gaztetxeak 200 inkesten gainean egindako gazte eta herri ikerketaren emaitzak gaur aurkeztuko dituenean egin dute. Dena dela, orain dela bi urte Itzubaltzeta gaztetxea bota eta Areetako skate pista bertara mugitzea eskatu zuen Getxoko PPk. Besteak beste, egun gaztetxeaz gain hainbat musika taldeen bi entsegu lokal, andra edadetu baten etxebizitza, bi gazte lonja eta autoa uzteko tokiak daude eraikinean. Argazkian, iaz egindako Gaztetxe Martxa Itzubaltzeta gaztetxearen aurrean.
  Gazteok 2007-02-21 22:11

Argazkilaritza digitala, tai ji, margoketa kalean eta astronomia ikasteko aukera emango du Getxoko Gazteria Zerbitzuak

Erabiltzailearen aurpegia Ukberri Getxoko Udaleko Gazteria Zerbitzuak martxotik maiatzera bitartean izango diren ikastaroen eskaintza ezagutzera eman du. Berritasunen artean argazkilaritza digitala, tai ji, margoketa kalean eta astronomia (Galeatik behaketa zuzenarekin) egongo dira. Elena Coria Gazteria zinegotziak gaur azaldutakoaren arabera, “iaz 12 eta 30 urte arteko 173 gaztek parte hartu zuten 15 tailerretan. 2004tik hona, hau da. ekimena martxan jarri zenetik izandako partaidetzaren eboluzioa oso positiboa izan da. Orduan antolatutako 6 tailerretan 16 gaztek hartu zuten parte eta 2005ko 15 tailerretan 147 gaztek”. Lehendabiziko aldiz, udal web gunearen bidez ere izena eman ahal izango dute interesatuek (horretarako sakatu hurrengo loturan: tailerra). Argazkian, aurreko ekinaldian egin zen blues eta jazz inprobisazio ikastaroa.
  Gazteok 2007-01-29 21:47

Informazio eske 466 gaztek jo dute kultur etxera Gorlizen

Erabiltzailearen aurpegia Ukberri Gune hau herriko eta inguruko gazteei eskainita dago ondorengo gaiei buruzko informazioa eta laguntza eskatu ahal izateko: lan eskaintzak, bekak, ikastaroak, lehiaketak, kirolak, bidaiak eta astero eguneratzen diren gainerako proposamenak. Emakumeak izan dira kontsulta gehin burutu dituztenak, bisitari gehienak 16 eta 30 urte bitartekoak izanik, Gorlizko Udalak emandako datuen arabera. Informaziorik eskatuena turismoarekin zerikusirik duena izan da (eskuorri turistikoak, kale-izendegia…) aktibitate desberdin eta kurtsoekin jarraituz. "Atal honetan zehaztu beharra dago, Gazte Informazio Guneak turismo bulegoarekin lokal bera konpartitzen duela, hain zuzen. Azkenik esan, kontsulta gehienak bulegoan burutu direla, telefonoa, posta elektroniko eta arrunta bezalako euskarriez jarraituz", azaldu dute. Gazte Informazio Gunearen emaitzak kontutan izanda arduradunak pozik daude eskainitako zerbitzuarekin. Argazkian, kultur etxeko eraikinean dago Gazte Informazio Gunea, Krutzeta kaleko 5. zenbakian.
  Gazteok 2007-01-29 19:36

Guatemalarako kooperazio egitasmoa prestatzen dabiltza Berangoko gaztelekuan

Erabiltzailearen aurpegia Ukberri Berangoko gaztelekuan abendutik daramate lanean Guatemalarekin kooperazio egitasmoa burutzeko, Erdialdeko Amerikako herrialde honetako ama gazteei laguntzeko asmoz. Ahaleginean PTM Mundu Bat gobernuz kanpoko erakundearen laguntza ari dira jasotzen, eta 13 eta 18 urte arteko 10 neska-mutil dabiltza esku hartzen, gehienak neskatoak. Egitasmoaren ardatzak finkatu eta diseinatzen ari dira une honetan. Horretarako ostegunero elkartzen dira gaztelekuan, arratsaldeko 18:00tan. Bertan eztabaidatzen dituzte helburuak eta finantzazioa lortzeko moduak. Gazte berangoztarrek herri guztiak parte hartzea nahi dute, beraien adin bereko gazteak batik bat, “egitasmoaren motorea” hori dela uste baitute. Argazkian, lankide boluntario bat Guatemalan / UNEX.
  Gazteok 2007-01-16 21:32

Drogen inguruko solasaldia egingo du ostiralean SUGAk

Erabiltzailearen aurpegia Ukberri Sopela eta Urdulizko Gazte Asanbladak (SUGA) antolatuta, solasaldia izango da ostiral honetan, urtarrilak 19, drogen inguruan. SUGAko kideeekin batera, gura duen gazte orok drogen inguruan hausnartzeko aukera izango du: droga motak, gazteongan eta gazte mugimenduan duen eragina, menpekotasuna, kontsumitzeko arrazoiak... Askagintza droga-menpekotasunen fenomenoaren normalizazioaren aldeko herri erakundea SUGAko kideekin batera parte hartuko du mahai inguruan eta bi erakundeek Uribe Kosta eskualdeko gazteek bertan parte hartzeko deia luzatu dute. Solasaldia arratsaldeko 7etan hasiko da, Sopelako kultur etxeko hirugarren solairuan.
  Gazteok 2007-01-16 12:33

Bi pankarta erre dituzte asteburuan Itzubaltzeta gaztetxean

Erabiltzailearen aurpegia Ukberri Itzubaltzeta Gazte Asanbladak pasa den larunbata eta igandea bitarteko gauean hainbat ezezagunek gaztetxeko fatxadan esekita zeuden bi pankarta erre izana salatu du. "Erabat arbuiatzen dugu ekintza hori. Alde batetik, Amnistiaren Aldeko Mugimenduaren zein Herri Norte Taldearen adierazpen askatasuna erasotzen du eta, bestetik, suak egurrezkoa den eraikin osoa har zezakeelako, gaztetxearentzat zein eraikin berean bizi diren auzokideentzat izugarrizko hondamendia bilakatuz", azaldu dute gazteek. Zorionez, sua berez amatatu zen. Beste alde batetik, biharko, urtarrilak 17, Sare Antifaxistak eta Itzubaltzetako Gazte Asanbladak "Fascismo en Euskal Herria" mahai-ingurua antolatu dute gaztetxean. Argazkian, Gonzalo Peña Gumucio Gorlizko PPko hautagai ohia bihar ikusgai egongo den "Guerra sucia: el regreso de los falangistas" bideoaren irudi batean.
  Gazteok 2007-01-11 19:26

Aisialdiari buruzko "aholkua" eskatzen ari zaie gazteei Sopelako Udala

Erabiltzailearen aurpegia Ukberri Sopelako Gazteen Informazio Bulegoa 14 eta 30 urte bitarteko gazteei zuzendutako jarduerak prestatzen dabil. Hori dela eta, neska-mutilek bete beharreko galdetegia osatu dute tokiko arduradunek, "ahal dela antolaturiko ekintzak zuon interesekin bat etor daitezen eta zuon gustuak ezagutzeko". Besteak beste, ondorengo jarduerak "egokiak izan daitezkeela" uste dute Udalean: argazki (kamera digitalarekin) eta eskalada (praktikak murruan eta Santa Mariñeko haitzetan izango lirateke) ikastaroak, kirol bereziak (haize-tunela, spinning-goming, minigolf, air sports -air football, basket y tenis-, bungy jumping, on line patinak...), jarduera anitzeko (kayak, rafting, hydro-speed, paint-ball...) eta elurretara irteerak, eta abar. "Hauek guztiak zuek proposatutakoei gaineratuko ditugu", adierazi dure. Gazteek otsailaren 2ra arte izango dute proposamenak aurkezteko epea, mezua oij[a bildua]sopelana.net helbidera bidaliz, 944 065 519 telefonora deituz edo Gazteen Informazio Bulegotik igaroz. Argazkian, gazte bat eskalatzen.
  Gazteok 2006-12-19 20:21

"Herritarren parte-hartzeko prozesu baten emaitza" bezala aurkeztu dute Algortako gaztelekuaren proiektua

Erabiltzailearen aurpegia Ukberri Gau-egun izena edukiko duen Getxo udalerriko lehenengo gaztelekuak 2007 urtearen bukaeran irekiko ditu ateak. "Herritarren parte-hartzeko prozesu baten ostean ateratako ondorioetan oinarrituta egongo da. Prozesu horretan, zentru hau martxan jartzeko beharrezkoak diren talde guztiek hartu dute parte: nerabeek, gurasoek, hezitzaileek eta Gazteria, Euskara, Gizarte Zerbitzuak, Immigrazioa eta Berdintasuna arloen udal teknikariek", Imanol Landak zinegotziak adierazitakoaren arabera. Lokal berri horrek 300 metro koadro izango ditu, eta Algortako Urgul kaleko udal eraikinaren hirugarren solairuan egongo da. Aixerrota etxea bota zutenean hainbat orduz gaztetxe bilakatu ziren aipatu lokalak. Hain zuzen ere, gaztelekuaren proiektua ez du inoiz ere begi onez ikusi Algortako Gazte Asanbladak (AGA). Argazkian, Urgul kaleko antzineko kultur etxea.
  Gazteok 2006-12-11 19:59

Ezkutuko bideozaintza kamera bat topatu dute Getxoko Txorimalo gaztetxeari begira

Erabiltzailearen aurpegia Ukberri Algortako Gazte Asanbladak jakinarazi duenez, pasa den abenduaren 4an gazteek Getxoko Txorimalo gaztetxeari begira zegoen bideozaintza kamera bat topatu zuten auto baten barruan ezkutatuta. Gazteek salatu dute initimitatearen aurka “indar errepresiboek” egindako erasoa eta kokatu dute polizia ezberdinek gazteria eta gaztetxeen kontra diharduten errepresioan. AGAren arabera, 200 pertsona baino gehiago agertuko lirateke hartutako irudietan, Azkorri Komandoen 10. urteurrena ospatzeko egindako jaialdiaren harira. Era berean, Txorimalo gaztetxearen proiektua aurrera eramateko asmoa berrestu egin dute eta, era berean, azpimarratu dute gazteek ez dutela “inon ezkutatzeko beharrik, gure proiektu eta borroka legebidezkoa dela dakigulako”.
  Gazteok 2006-11-16 20:32

Kontzertu batekin emango diote bukaera larunbatean Udondo gaztetxeko seigarren urteurrenari

Erabiltzailearen aurpegia Ukberri Bideo-forum eta ekitaldi anitzez jantzi dute astea Leioako Udondo gaztetxean. Izan ere, aipatu gune autigestionatua sortu zenetik sei urte bete dira jada. Ospakizunei amaiera bikaina emateko, kontzertua antolatu dute larunbat honetarako, azaroak 18. Bertan izango dira Los Vibradores (Bilbo), Paralitikos (Santander) eta Paniks taldeak, 20:00etatik aurrera. Sarrera 3 eurotan jarri dute. Argazkian, Udondo gaztetxearen bosgarren urteurrena.
  Gazteok 2006-11-15 20:49

Gazte-elkarte getxoztarrei emango diete hitza ostiral eta larunbatean Algortan

Erabiltzailearen aurpegia Ukberri Gazteshowa izenburupean, gazteekin jarduten diren edo horiei zuzenduta dauden udalerriko elkarteen arteko topaketak antolatu ditu, azaroaren 17 eta 18rako, Getxoko Gazteria Zerbitzuak; taldeek beraiek dituzten proiektuak, zailtasunak, ideiak edota proposamenak ezagutzera eman ditzaten. Jardunaldiak Algortako Getxo Antzokian izango dira eta sarrera doakoa. “Udalerrian elkarte multzo oparoa eta anitza daukagula ezagutzera ematea da asmoa, herritarrak animatuz kolektibo horietan parte hartzera. Bestalde, taldeak elkar ezagutu eta euren artean sare moduko lana sustatu nahi dugu; aldi berean elkarteetan eta udalerriko gazteengan eragina duten gaien ganeko eztabaida eraginez eta proposamenak batuz” adierazi du gaur goizeko prentsaurrekoan Imanol Landa Gazteria zinegotziak. UKBERRI ere izango da Gazteshowan. Argazkian, Unai Amezaga -atzean- eta Imanol Landa -aurrean- Gazteshowaren aurkezpenean.
  Gazteok 2006-11-06 22:46

Gazte parte-hartzea bultzatzeko “Emazu pausua” kanpaina abiatu dute

Erabiltzailearen aurpegia Ukberri Euskadiko Gazteriaren Kontseiluak eta Boluntak, boluntariotza eta elkarteentzako Bizkaiko agentzia, “Emazu pausua” kanpaina abiarazi dute gaur goizean. Ekimenak partaidetza eta elkartasunaren baloreak aldarrikatzeaz gain, gazteen parte-hartzea sustatzea eta ahalbidetzea ere nahi du, gazteek gizartean duten rol aktiboaz jabetuz. Bizkaiko gazte, heldu zein eragileei zuzendutako kanpaina hau hilaren 22ra arte luzatuko da eta berari buruzko hainbat datu www.emazupausua.org bitakoran topa daitezke. Bestalde, zapata berdeak izango dira 15.000 esku-orritan zabalduko den kanpainaren irudia. Minerva Leonek eta Arantza Santistebanek (argazkian) jakinarazi dutenez, 2004an 200 bat gazte elkarte zeuden eta gazteen herena elkarteren batean aritu izan da edo aritzen da.