Gazteok 2006-09-26 16:50

Bi urte beteko dituela ospatuko du ostiraletik aurrera Itzubaltzeta gaztetxeak

Erabiltzailearen aurpegia Ukberri

"2 urtez zirikatzen… eta urte askotarako!" lelopean ospatuko du Itzubaltzeta gaztetxeak bere bigarren urteurrena. Izan ere, ostiral honetan aterako dira kalera Itzubaltzeta / Erromoko zein inguruko gazteak, lortutakoa aldarrikatzera: lehenengo aldiz Getxoko udalerrian gaztetxe batek bi urtez zutik eta bizirik mantentzea. Hitzordua Santa Eugenia plazan izango da, 21:00etan. Manifestazioaren ondoren, luntx batetaz gozatu ahal izango da gaztetxean. Hurrengo astean, berriz, mota askotako ekitaldiak izango dira herriko plazan zein gaztetxean, gazte, heldu eta umeentzat, tartean larunbateko kontzertua Txapel Punk, Macarrada eta Okupando Rom@ taldeekin. Argazkian, bigarren urteurrena aurkezteko Itzubaltzeta gaztetxeak emandako prentsaurrekoa.

  Gazteok 2006-09-23 01:34

Alderdi Eguneko kanpaldia abiatu du EGIk

Erabiltzailearen aurpegia Ukberri “Bide berriak, helburu berbera: independentzia!” lelopean, arratsaldeko 8etan abiatu du Euzko Gaztedik Forondako zelaietan asteburuan zehar EAJko Alderdi Egunaren inguruan egiten ohi duen kanpaldia. Gaueko hamarretan, berriz, ekitaldi ofiziala izan da, non, Herrialde Katalanetako, Galizako eta Saharako hainbat ordezkari lagun izan direla, Jesus Galindez EAJko eta FBIko kideari omenaldia egin zaion eta aurreskuaren ondoren ikurrina altxatu den. Gaua hasteko, Kresala taldeak eta Eneko DJk bere doinuak jarriko ditzute Forondan. Bihar, berriz, egun estua izango dute EGIzaleek. Hamaiketakoa 12:00etan gosalduta, ez omen dute aitzakiarik izango ordu bat beranduago Josu Jon Imazen esku izango den ekitaldi poIitikoan egoteko. Badaezpada, 15:00etan indarrak berreskuratzeko aukera izango dute 10 euro balio duen herri bazkaria dela medio. Bazkari ostean, ohikoa denez, bazkalostekoak: kantak eta euskal dantzak. Eguna bukatzeko, aldiz, doinu berriagoak izango dira Etxe, Sustrai eta Joxeina Etxeberriaren eskutik. Argazkia: EGI.
  Gazteok 2006-09-20 23:38

EAEko Gazte Kontseiluak begirale ikastaroetan matrikulatzera deitu du

Erabiltzailearen aurpegia Ukberri Araba, Bizkaia eta Gipuzkoako Gazte Kontseiluak (EGK) irailaren amaiera edo urriaren hasiera arte matrikula epea zabalik daukaten astialdirako begirale edo zuzendari izateko ikastaroetan izena ematera deitu du. Horrela, eta bakerako heziketa, partaidetza, ingurumenarenganako errespetua, elkarbizitza, euskararenganako motibazioa, genero berdintasuna, kulturartekotasuna baloreak indartzeko asmoz, EAEko hainbat astialdi eskolekin batera ikastaroak prestatu ditu EGKk. Bizkaian, Iturralde), Gaztetxoak), Urtxintxa), EDE) Fundazioa, Kurkudi eta Gazteen Gurutze Gorria) dira EGKrekin batera ikastaroak emango dituzten elkarteak.
  Gazteok 2006-09-20 21:07

Bordatxu gazte txokoa, berriz zabalik

Erabiltzailearen aurpegia Ukberri Erandioko Bordatxu gazte txokoak bere ateak berriz zabaldu zituen pasa den irailaren 15ean. Iaz bezala, 12 eta 16 urte bitarteko gazteei zuzendutako lokala ostiral eta larunbatetan egongo da irekita urtean zehar, arratsaldeko bostetatik bederatzietara bitartean. Berrikuntza moduan, urritik aurrera igandeetan ere zabalik egongo da Bordatxu. Lokalean lagunekin egoteko, musika entzuteko, interneten nabigatzeko, ekitaldiak antolatzeko eta euskaraz egiteko aukera izango dute gazteek. Argazkian, neska koadrila bat Bordatxun.
  Gazteok 2006-09-11 19:52

Gaur eta atzoko 200 eskaut batu ditu Algortako Scout Taldeak

Erabiltzailearen aurpegia Ukberri Basagoiti etorbideko egoitzaren 30. urteurrena aitzakiatzat hartuta, lehengo Etorkizunak edo gaurko Algortako Scout Taldeak beren 50 bat urteko ibilbideko kideak batu zituzten pasa den larunbatean. Azkenean, argazki erakusketa eta bazkaria Bihotz Alai plazan burutu ziren eta bertan adin guztietako 180 bat lagunek parte hartu zuten “giro ezin hobean”, taldeko kideen iritziz. Irudian, larunbatean egindako talde argazkia / Nahikari Ayo.
  Gazteok 2006-09-03 21:53

Algortako Scout Taldearen egoitzako 30. urteurrena aitzaki herri bazkaria izango da datorren larunbatean

Erabiltzailearen aurpegia Ukberri Algortako Scout Taldeak hogeita hamar urte betetzen ditu aurten Basagoiti etorbideko 69. atarian ezarri zenetik. Urteurrena ospatzeko, bazkari bat egingo du datorren larunbatean, irailak 9, Algortako San Nikolas Plazan. Eskautetatik pasatu den jende guztia mahaiaren inguruan batzeko asmoa daukate oraingo taldekideek. Horregatik, bazkarian parte hartzera dei berezia egin dute, bazkarira apuntatzeko telefono zenbaki honetara deitzeko baino ez dela egin behar: 658713428 (Nahikari). Bestalde, oraingo egoitzak 30 urte bete baditu ere, Algortako Scout Taldearen sorrera 60. hamarkadaren bukaeran koka dezakegu. Elkartearen lehen egoitza, gazteek egindako “txabola” bat izan zen eta geroago egun Aldai Patronatua dagoen lurretan kokatu zen. Argazkian, taldeko hainbat kide Donostiako izotz-pistara 2006ko otsailaren 12an egindako txangoan / Nahikari Ayo.
  Gazteok 2006-09-03 13:05

Kurtsoa hasteko batzarra egingo du asteazkenean Itzubaltzeta gaztetxeak

Erabiltzailearen aurpegia Ukberri Datorren asteazkenean, irailak 6, arratsaldeko 8etan, Itzubaltzeta gaztetxeak kurtso berria hasteko batzarra burutuko du. Batzarra horretara gonbidatuta daude gaztetxea erabiltzen duten kolektibo, kuadrila eta tailer guztiak zein interesa duen pertsona oro. Besteak beste, aurtengo tailerrak, eta lehenengo hilabeteen nondik norakoak zehaztuko dira bertan. Asteazkenera arte! Argazkian, Gaztetxe Martxa Itzubaltzeta / Erromon sartzen.
  Gazteok 2006-09-01 20:24

Presoek eta punk eta hardcore doinuek hartuko dute gaur Txorimalo gaztetxea

Erabiltzailearen aurpegia Ukberri Getxoko Txorimalo gaztetxeak presoen bizibaldintzei eta musika gogorrari egingo die lekua gaur. Algortako Gazte Asanbladak publikoki jakinarazi duenez, arratsaldeko 6etan bi presoren amek egindako adierazpenak biltzen dituen bideo bat proiektatuko dute. Bizipenak azalduko dituzten senideak Xose Tarrio "eraildako" presoaren eta Gabriel Pombo Da Silva "bahitutakoaren" amak dira. Era berean, arratsaldeko 8etan Deskiziadxs Leioako punk taldeak, Madrilgo Antitedax hardcore bandak eta Txaunis Bomb Band taldeak kontzertua emango dute. Sarrerak gaztetxean bertan salduko dira 3 euroen truke. Gaurkoaz gain, hamaika ekitaldi antolatu ditu Txorimalo gaztetxeak irailean zehar, batez ere ekologiari, zinemari, eutogestioari eta musikari lotuak. Argazkian, Topo, Deskiziadxs taldeko baxu-jolea.
  Gazteok 2006-08-30 15:23

Bihar da azken eguna Euskal Herriko III. Graffiti Lehiaketan izena emateko

Erabiltzailearen aurpegia Ukberri Bihar, abuztuaren 31, bukatuko da Euskal Herriko III. Graffiti Lehiaketan izena emateko epea. Duda-mudan dauden 15 urtetik gorako sprayzale euskaldunek parte hartzeko aukera daukate oraindik, Euskara Elkarteen Topaguneak Abadiñon duen egoitzara egin nahi duten graffitiaren zirriborroa bidaltzen badute, gaur edo bihar askoz jota. Jasotako zirriborroen artean, epaimahaiak hamar aukeratuko ditu, eta horiek izango dira irailaren 16an marraztuko direnak, Tolosan egingo den gazteen sormena eta ekoizpen artistikoa sustatzeko lehiaketa honen finalean.
  Gazteok 2006-08-11 19:33

Uribe Kostako Aralarrek Sopelako gaztetxea itxi izana salatu du

Erabiltzailearen aurpegia Ukberri Sopelako Ganebarri gaztetxea hustu izana salatu du Uribe Kostako Aralarrek. Alderdiak uztailaren 21ean kaleratutako prentsa oharrean nabarmendu zuen "eskualde horretako gazteak elkartzeko leku barik geratu direla". Era berean, Aralarrek kritikatu zuen "Sopelako Udalak ez dituela gazteek euren gestionatuko dituzten lokalik egokitu, hala eskatu arren. Eta gainera, eskariei kasu egin beharrean, gaurko egunean gazteek zuten elkartzeko leku bakarra ixtea erabaki duela Udalak". Horren aurrean, Uribe Kostako Aralarrek "gazteentzako lokalak egoki ditzala eskatzen dio Sopelako Udalari, hori baita bere egitekoa, herritarrei behar dituzten zerbitzuak egokitzea. Hori dela eta Sopela eta Urdulizko Gazte Asanbladaren eskariarekin bat egiten dugu eta Udalak hartu duen erabakia salatzen dugu". Argazkian, SUGAko kideak Sopelako udaletxeko teilatuan egindako protestan.
  Gazteok 2006-07-26 18:22

Ostiralean Sopelako udaletxean gertatutako liskarrei buruz balorazio kontraesankorrak dituzte alkateak eta SUGAk

Erabiltzailearen aurpegia Ukberri Ostiral goizean, Ganebarri gaztetxea Ertzaintzak hartuta zegoela ikusi ondoren, Sopela eta Urdulizko gazteek Sopelako udaletxearen kanpoaldean ordu erdiz kontzentratu ostean eraikinean sartu izana erabat gaitzetsi du Udal Gobernuak. EAJko politikarien aburuz, “kontrolatu gabeko talde bat” udaletxea “inbaditu” zuen eta Udaltzaingoko kide batzuei “eraso” egin zien. Sopela eta Urdulizko Gazte Asanbladak (SUGA), berriz, salatu du kontrakoa: “gazte asanbladako kide batzuk barrura sartzen ahalegindu direnean desalojoa salatzeko asmoz, txakur udaltzain batek gazte bat eraso du, biak lurrean jira-biraka ibili direlarik”. UKBERRI.NETek, funtsean, SUGAk esandakoa berretsi behar du: lasai asko sartu egin ziren gazteak udaletxera, udaltzain batek gazte informaziorako lehiatilaren aurrean gazte bat lurrera bota eta besoarekin lepoa estutu arte. Ondoren, gazteak polizia gainetik kendu zuen eta giroa berotu zen, beste udaltzainak bere kidea babesteko erasotzailea eta gazteen artean jarri zirela (argazkian). Une horretan, enfrentamendua bultzadetara eta oihuetara mugatu zen, nahiz eta bigarren udaltzain batek borra atera eta gazteek berau ebatsi.
  Gazteok 2006-07-26 14:32

Ganebarriren desalojoa salatzeko kanpaldia kentzera behartu du Ertzaintzak

Erabiltzailearen aurpegia Ukberri Ostiralean Sopela eta Urdulizko Gazte Asanbladak (SUGA) udaletxe ondoko parkean jarritako kanpaldi mugagabea kentzera behartu du gaur goizean EAEko Poliziak. Goizeko 8:30ean heldu dira brigada higikorreko “beltzak”, kalez jantzitako poliziak eta uniformedun ertzainak, guztira 25 bat polizi, une horretan zeuden dozena bat gazte desalojatzera. Kalez jantzitako polizia batek, “polizia onaren planta eginez” gazte bat identifikatu du eta kanpaldia kentzeko agindu judiziala erakutsi arren ez die eman, SUGAko kideek jakinarazi dutenez. Identifikazioaz gain ez da bestelako gertakizunik egon. Gazteek kanpin dendak kendu dituzte baina bertan jarraitzen dute, “beltzen” furgoneta baten ondoan. Arratsaldeko 7etan batzarra egingo du SUGAk. Argazkian, SUGAko bi kide kanpaldiko materiala zaintzen, atzean "beltzak" dituztela.
  Gazteok 2006-07-21 14:11

Sopelako udaletxeko teilatura igo dira Ganebarriko gazteak

Erabiltzailearen aurpegia Ukberri Behin ordu erdiko elkarretaratzea bukatuta, Sopelako udaletxera sartu dira Ganebarri gaztetxea hustu izana salatzen ari ziren neska-mutilak. Orduan hasi dira liskarrik gogorrenak: lau udaltzain gazteei bidea mozten saiatu dira eta bost minutu luzez egon dira bultzadak, irainak, eta abar. Bitartean, beste hainbat gazte kalejiran abiatu dira udaletxean barrena, alkatetza eta idazkaritzatik igaroz. Halabaina, biak ala biak itxita zeuden. Ondoren, teilatura igo, "Ganebarri desalojatuta. PNV, hurrengoa zuena" lelopeko pankarta eskegi eta goian jarraitzen dute neska-mutilak. Bitartean, megafoniaz, gaur 20:00etan, udaletxe aurrean kazerolada egitera deitzen ari da Sopela eta Urdulizko Gazte Asanblada; eta bihar, ordu eta leku berean, manifestazioa izango da.
  Gazteok 2006-07-21 13:32

Sopelako udaletxe aurrean jarri dute hitzordua arratsaldean

Erabiltzailearen aurpegia Ukberri Hogei bat gazte dago kontzentratuta orain Sopelako udaletxe aurrean, Ertzaintzak Ganebarri gaztetxea hustu izana salatzeko. Udaltzainen burua ere atera zaie, bertara sartzeko oztoporik jar ez dezatela eskatuz. Tartean, "alkateak eta beste guztiek udaletxetik ihes egin dute", Sopela eta Urdulizko Gazte Asanbladako (SUGA) kideek UKBERRI.NETi adierazitakoaren arabera. Hainbat pankarta ere egiten jardun dira neska-mutilak. Horietako batean, "Ganebarri desalojatuta. PNV, hurrengoa zuena" irakur daiteke. Tirabirarik ere ez da falta izan udaletxera sartu nahi zuten herritarren eta gazteen artean; laupabost udaltzainen eskuhartzea eragin du horrek, baina inguruan dabiltzan ertzainak hurbildu ere ez dira egin. Tirabirak gora behera bertan ordu erdiz kontzentratuta egotea adostu dute tokiko poliziekin. Bestalde, arratsaldeko 8etarako mobilizazioa deitu dute udaletxe aurrean.
  Gazteok 2006-07-21 12:20

Ganebarri hustu izana salatzeko Sopelako udaletxe aurrean kontzentratzera deitu dute

Erabiltzailearen aurpegia Ukberri Sopelako Ganebarri gaztetxe ingurura bertaratutako UKBERRI.NETeko kazetariari baieztatu diotenez, barruan gazterik ez zegoen 7:30ak aldera Ertzaintza heldu denean eta, hortaz, "liskarrik eta atxiloturik ez da egon", polizia autonomikoek zein neska-mutilek baieztatu dutenez. Hala ere, agindua zein epaitegitik heldu den "ezin" dutela esan adierazi dute ertzainek. Langileek etxea ixten dabiltzan bitartean, gero eta gehiago dira Ganebarri inguruetara –Brigada Higikorreko bi furgoneta eta beste hainbat polizi gaztetxera hurbiltzea oztopatzen ari dira– hurbiltzen ari diren gazteak. Dagoeneko, Uribe Kosta eskualdeko txoko ugaritatik joandako hogei bat neska-mutil dago bertan eta Sopelako udaletxe aurrean kontzentratzera deitu du Sopela eta Urdulizko Gazte Asanbladak (SUGA). Argazkian, bi langile Ganebarriko leihoak ixten.
  Gazteok 2006-07-21 11:20

Ganebarri gaztetxea desalojatzen ari da Ertzaintza

Erabiltzailearen aurpegia Ukberri Sopelako Ganebarri gaztetxea hustu du Ertzaintza goizean goiz irekitako operazio baten bidez. Sopela eta Urdulizko Gazte Asanbladako (SUGA) kideek esan bezala, une honetan ez dago gazterik gaztetxearen barruan eta inguruan bildu diren dozenaka gazte "oso urrun" daude, Brigada Higikorreko "pila bat" polizi Ganebarrira hurbiltzea eragozten diela. SUGAko kideen arabera, zonaldea kalez jantzitako ertzainez eta "beltzez josita dago". Dena den, deia egin dute jendea bertaratzeko ahalik eta arinen "Bumbo aldera". Bitartean, etxeko jabeak kontratatutako langileek ekin diote Ganebarri gaztetxea ixteari. Argazkian, ertzainek "segurtasun" eremua jarri dute Igeltsera gaztetxe ohiaren parean.
  Gazteok 2006-07-13 20:24

Bizikleta bira mundiala izango da bihar Algortan eta Getxon

Erabiltzailearen aurpegia Ukberri Algortako Karrika gazte konpartsak antolatuta, egunpasa ederra egin ahal izango dute bihar Algortako eta inguruko gazteek. Gazteek beraiek euren aisialdi alternatiboa sortzeko asmoz eta Bizikletada Mundiala izenpean benetako triatloia antolatu du Karrika konpartsak: 11:00etan Txiki eta Otaegi plazan bizikletei tunning-a egin ostean, bizikleta birari ekingo diote, ondoren, 12:30ak aldera, Azkorrin igeri egiteko parada izango dela. Horrezkero, boleibol txapelketa burutuko dute eta kirolari amaiera emanez eta indarrak berreskuratzeko asmoz, Azkorritik Txorimalo gaztetxera hurbilduko dira, eta bertan parrilladaz gozatuko dute, arratsaldeko 3etatik aurrera. Ondoren jolasean tartea izango da, twister erraldoia dela medio. Argazkian, Gaztetxe Martxa Algortan.
  Gazteok 2006-07-07 19:36

Zortzi hedabideri gazteria kriminalizatzea egotzi die Itzubaltzetako Segik

Erabiltzailearen aurpegia Ukberri Itzubaltzeta / Erromoko Segi gazte erakundeak hainbat komunikabideri euskal gazteria kriminalizatzea egotzi die eta beraien jarrera jendaurrean salatu du gaur goizean. Areetako Xake plaza eta Itzubaltzeta / Erromoko Santa Eugenia kalearen artean zabaldutako pankarta erraldoi baten bidez, Espainiako Auzitegi Nazionalak ilegalizatutako erakundeak zortzi hedabideren kontra egin du. Horrela, “ABC”, “El Correo”, “El Mundo” eta “Deia” egunkariak, Cope irratia eta TVE, EITB eta Antena 3 telebistek ez engainatzeko deia egin diete Itzubaltzeta / Erromoko eta Areetako auzokideei.
  Gazteok 2006-07-07 17:39

Sopelako gaztetxearen desalojoari data jarri diote filtrazioek

Erabiltzailearen aurpegia Ukberri Ganebarri Sopelako gaztetxea hilaren 19a baino lehen desalojatzeko asmoa daukate Ertzaintzak eta Udalak, Sopela eta Urdulizko Gazte Asanbladako (SUGA) kideek UKBERRI.NETi jakinarazi diotenaren arabera. Gainera, litekeena da operatiboa uztailaren 13an izatea, Larrabasterrako jaien hasierarekin batera. Ganebarri gaztetxea hartzen duen Elorriagane etxearen jabeak leihoen neurriak hartu zituen pasa den asteartean, balizko desalojoaren osteko adreilu hormak egiteari begira. Izan ere, Ertzaintzak, EAEko Herrizaingo Sailak eta Sopelako Udalak ez dituzte bere gain hartu lan horiek. Informazio hori jabearen senideen gertu dauden informazio iturrietatik eskuratu du SUGAk. Bestalde, Imanol Garai Sopelako alkatearen ingurukoek adierazi diete EAJko burukideak udalerri berean ospatzen diren Larrabasterrako jaien lehenengo egunean egin nahi duela desalojoa. Tartean, SUGAk ekimenak antolatzen jarraituko du. Besteak beste, igande honetan Ikasle Abertzaleek Eskola Ibiltaria ekimena aurkeztuko dute 19:00etan eta asteartean Lur Zati Planari buruzko hitzaldia izango da ordu berean. Ganebarri gaztetxetik 72 ordutan irteteko agindua ekainaren 14 eta 20 bitartean jaso zuten abokatuak eta eraikinaren inguruan otsailean identifikatutako 3 gaztek.
  Gazteok 2006-06-20 04:48

Debekuari aurre eginez Autogestio Eguna ospatu dute Itzubaltzetan

Erabiltzailearen aurpegia Ukberri

Aurretik agindu bezala, Itzubaltzeta gaztetxeak aurre egin zion larunbatean Autogestio Egunaren aurka Getxoko Udalak jarritako debekuari. Egun osoan zehar udaltzainen eta ertzainen presentzia herrian nabarmena izan arren, ia ekitaldi guztiak burutzea lortu zuten gaztetxeko kideek. Goizean, udaltzainek arropa azokako dozenaka praka, kamiseta eta jantzi eraman zituzten (argazkian), 25 bat gazteek eskuan zituzten kartelen bidez debekua salatzen zuten eta ehun bat auzokideek poliziei "lapurrak", "lotsagabeak", "alferrak" eta antzeko irainak botatzen zizkieten bitartean. Gauean ere, 23:15ean, udaltzainak gaztetxetik igaro ziren kontzertua bertan behera uzteko. Gaztetxeko kideek jakinarazi zieten kontzertua gaueko 12etan bukatuko zela, “auzokideekin horrela hitzartuta dugulako”. Horrezkero, udaltzainek alde egin zuten, baina lehenago Itzubaltzeta gaztetxearen kontrako salaketa bat jarriko dutela iragarri zuten. Era berean, auzokide bat salatu dute “mehatxuak egiteagatik”.