Akordio horretan, Udalbatzak onartu zuen aipatutako plazari Txikia deitzea, lehenago Viviendas de Vizcaya (jendearentzat Las Uves) bezala ezaguna zena.
Bozeramaileen Batzordean alkateak aipatu du plaza horren izena aldatuko dela eta eredu bat proposatu du izen berria ipintzeko. Landak azaldu duenez, kale eta gune publikoen izena erabakitzeko alderdi guztiek, oro har, adostutako erreferentzia bietako baten arabera sortu beharko da plazaren izen berria: inguruko toponimoren bategaz lotutako izena hartuko du edo emakume baten izena.
Landak esan duenez, proposamenak jaso ondoren, plazaren inguru hurbileneko auzotarrakaz kontsultatuko da. Azkenik, alkateak berak erabakiko du izena, indarrean dagoen legerian ezarritako eskumenekin bat etorriz, eta auzotarren iritzia aztertuta.
Alderdien erreakzioak
PPk positiboki baloratu du sententzia ez errekurritzeko erabakia, baina deitoratu du plazaren izena epai horren ondorioz gertatu izana. EH Bilduk, bestalde, bere desadostasuna agertu du. PSE-EE helegitea jartzearen aurka agertu da, baita diktaduraren erdi-erdian jazotako gertaera batzuen gaineko interpretazio edo bertsio interesatu eta guztiz testuinguruz kanpoko bat egitearen aurka ere. Azkenik, Guk Getxo eta Ciudadanos egindako proposamenaren alde agertu dira.
Iñaki Gamero PPko bozeramaileak iragarri duenez, "ETAko talde terroristari eskainitako plaza honek Terrorismoaren Biktimen Errekonozimendurako Legea hausten du, horien duintasuna eta ohorea kaltetzen duelako, eta helegitea aurkezteak biktimen mina areagotzea baino ez du ekarriko".