Politika  Gorliz 2015-06-13 08:40

GIT eta EH Bilduk Udal Gobernua partekatzeko akordioa sinatu dute

Gorlizko Independente Taldeak eta EH Bildu koalizioak "Gorlizko Udalbatzaren funtzionamenduari buruzko hitzarmena" izeneko testua sinatu zuten pasa den ostegunean. Akordioan, Gobernu Batzordea, Udal Lan Batzordeak eta Uribe Kostako Mankomunitatean Gorlizi dagokion ordezkaritza banatzea jaso dute. Gauzak horrela, gaur eguerdian, EH Bilduk (3 zinegotzi) babes lezake Mari Carmen Basabe (GIT, 4 zinegotzi), alkate izan eta agirian jasotako neurriak bete ditzan. EH Bilduk atzo iluntzean izan zuen asanblada Sertutxenan, baina ostean ez du erabakitakoaren berri eman. EAJk irabazi zituen hauteskundeak, 6 zinegotzi eskuratuta, baina beste bi indarrek uka diezaiokete alkatetza, gehiengo osoa osa baitezakete. Sinatutako agiria Gorlizko EAJri ere eskaini zion EH Bilduk baina jeltzaleek ez zuten sinatu.

GIT eta EH Bilduk Udal Gobernua partekatzeko akordioa sinatu dute
GITek eta EH Bilduk sinatutako akordioa. | Ikusi handiago | Argazki originala

Osteguneko dokumentuan, "Udalbatzarrak gehiengoz onarturiko mozio guztiak ahalik eta epe laburrenean" betetzeko konpromisoa hartu dute bi indarrek, Alkatetzari konpetentziak kentzea adostuta. Azkenik, "Osoko Bilkurari eskumenak kentzen dizkioten" lege neurriak ez aplikatzean bat etorri dira.

Erantzunak

Erabiltzailearen aurpegia Gabi de la Maza Erantzuna | #1

Ez dakit nondik ataratzen duzue GITri babesa eman diezaiokegunik, eta beste aukera ez duzue jartzen, haiek gu. Sinatu duguna argi dago, baina pakturik gabe.

Erabiltzailearen aurpegia Iñigo FM Erantzuna | #2

Kaixo, Gabi.

Akordio programatikorik gabe, Udalbatza, Udal Gobernua, Lan Batzordeak eta Mankomunitateko ordezkaritza arautzeko eta partekatzeko hitzarmena izan liteke (ala ez) nahikoa sinatzaile batek bestea alkatetzan jarri eta praktikan jartzeko; jeltzaleak batuko liratekeen (ala ez) gerora utzita.

Izan zitekeen, zuk diozun legez, GITek EH Bilduri botoa ematea, baina, alde batetik, biok sinatutako akordioan independenteek Udal Gobernuan EH BIlduk baino ordezkaritza gehiago izatea (GITEk 2 eta EH Bilduk 1) onartu zenutenez eta, beste aldetik, eta batez ere, atzo Gorlizko Independente Taldeak EH Bilduk egitekoa zuen batzarra erabakitzailea izango zela argi utzi zuenez (GITek botoak emateko prest egongo bazen ez zen horrela izango), aukerarik egingaitza zirudien.

Erabiltzailearen aurpegia Gabi de la Maza Erantzuna | #3

Azken parrafoan dago albistearen arazoa, independienteen azken idatzian. Guk independienteekin izan ditugun hiru bileretan eta EAJrekin izandako beste hiruretan, argi eta garbi utzi genien gure postura: botoa bai ala bai, gure buruari emango geniola.
Gure azken asanblada informatiboa zen, baina GIkoek gu baldintzatzen saiatu egin ziren. Eta egindakoa oso itsusia zela jakinarazi genien.
Dena den, asteazken-ostegun arte beste bi indarren jarrera guk ez jakitea nahaste horrekin amaitzea ulertzen dugu.
Mila esker egin duzuen jarraipenagatik. Jarraitu horrela.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa