AAEAMk gogora ekarri duenez, Goieaskoetxeak eta Zobaranek lagun eta senideen bisitei uko egiten jarraitzen dute, isolamendu-ziegaren barruan, "urruntzea eta preso politikoen sakabanatzea salatzeko". Horren ondorioz, astean telefono dei bakarra egin dezakete eta egunean ordubete baino ez dute patiora ateratzeko. Gainontzeko denbora guztia ziegan ematen dute. "Borrokaldi gogorra burutzen ari dira biak", amnistiaren aldeko eragilearen arabera.
Valenceko kartzela Euskal Herritik 962 kilometrora dago eta, AAEAMk salatutakoaren arabera, "oso garraio-lotura txarrak ditu eta benetako odoluste ekonomikoa suposatzen du senideentzat. Gainera, Valenceko kartzela espetxe eredu baten esperientzia pilotua da, gerora Europa osora zabaldu nahi izango dutena, sarraski espetxe 'finduaren' prototipoa delarik. Azpimarratu nahiko genuke burutzen ari diren borroka ez dela soilik bizi duten egoera salatzeko baizik eta etorkizunean beste preso politiko batzuekin horrelako esperimentuak egiteari marra gorriak ezartzeko".