Kirolak 2005-01-24 12:20

Herri Torrontegiri egin dio elkarrizketa 'Bizkaie'k

Erabiltzailearen aurpegia Ukberri Orain zortzi urte utzi zion eliteko motoziklismoan lehiatzeari Herri Torrontegik, baina oraindik zaletu guztien oroimenean daude gorliztarrak lortutako garaipenak. Bederatzi urterekin, Trialeko Euskadi eta Nafarroako txapelketa irabazi zuen eta hamabost denporalditan, 128 sari nagusitan eta mundialeko 12 lasterketatan parte hartu zuen, tartean sari nagusi bi irabazi eta sei podiumetan sartu zen; era berean, 80ko motorrarekin munduko hirugarrena izan zan 1989an. Oraintsu, Dani Pedrosak 250 kategorian Munduko Txapelketea irabazi zuen motorra probatzerako orduan sentitutakoa eta beste hainbat konturen berri emateko elkarrizketa egin diote Torrontegiri Bizkaie aldizkarikoek, 94. alean.
  Jendartea 2004-12-27 22:29

Otsailean abiatuko da Sahararako karabana

Erabiltzailearen aurpegia Ukberri Euskadiko Sahararen aldeko elkarteek saharaui errefuxiatuen kanpamenduetara janariak bidaltzeko karabana bateratua antolatzen ari dira. Otsailean abiatuko da, Euskadin bildutako atun latak, azukrea eta emakumeentzako konpresak eramateko. Aurretik, karabana betetzeko janariak batzen ari gara herririk herri.
  Kirolak 2004-11-23 18:36

Andorrara eskiatzera Gorlizetik

Erabiltzailearen aurpegia Ukberri Abenduaren 3tik 8ra bitartean, Pas de la Casan (Andorra) eskia praktikatzeko irteera antolatu du Gorlizko Kultur Etxeak. Salneurria 366,50 eurotakoa da, bidaiak ez ezik, ostatua, erremonteak eta asegurua ere tartean daudela. Dena den, 1974ko urtarrilaren 1etik 1989ko abenduaren 31ra bitartean jaio eta Gorlizen erroldatuta daudenek %20ko beherapena izango dute; hortaz, 293,5 eurotan aterako zaiei bidaia. Udalak gazteentzako antolatzen ari den kirol eta aisialdi jardueren artean kokatzen da irteera.
  Jendartea 2004-11-19 12:37

Gorliz Irratiak programazio berria aurkeztuko du gaur jai giroan

Erabiltzailearen aurpegia Ukberri Gaur gauean aurkeztuko du Gorliz Irratiak ikasturteko programazio berria. Gaueko 10etan jarri dute hitzordua emisorako esatari zein DJek, herriko New Tavern Club ostatuan. Bertan, DJen lanez aparte, opariak, luntxa eta musika ekitaldiak izango dira. Tartean, "Nobel Music" irratsaioaren esatariak diren Arturo eta Tatianak abestuko dute, nahiz eta beste konpromezu batzuk direla-eta berandu helduko direla abisatu. Gorlizko udal irratiaren jaia irekia izango da eta gorliztar zein uribe kostako lagun guztiei bertaratzeko gonbita egin diete.
  Kirolak 2004-11-12 22:32

Juanito Urrutia zenari omenaldia egingo diote igandean

Erabiltzailearen aurpegia Ukberri Pilotazale handia eta herrian kirol horren bultzatzailea izan zen Juan Urrutia Arostegiri omenaldia egingo diote igande honetan Gorlizen. 12:30ean emango zaie hasiera ekitaldiei bertoko Pilota Eskolakoek jokatuko duten lehenengo partidarekin. Bide batez, denboraldi honetarako daukaten taldea aurkezteko aprobetxatuko dute. 13:00etan, berriz, Urrutiaren oroimenezko plaka desestaliko du Gorlizko pilotalekuan bere alargunak eta udal arduradunek hainbat oroitgarri emango dizkiete senideei.
  Kultura 2004-10-11 23:51

Nafarroa Oinezerako autobusa jarri dute Gorliztik

Erabiltzailearen aurpegia Ukberri "lizarran@euskaraz.bai" lelopean, igande honetan (urriak 17) ospatuko da Lizarran Nafarroa Oinez 2004, bertako ikastolak antolatuta. Hain zuzen ere, bertara joateko autobusa antolatu du Gorlizko Kultur Etxeak. Urriaren 14ra arte egongo da izena emateko epea, 94 677 40 00 telefono zenbakira deituta.
  Kultura 2004-10-08 22:47

Perretxikoak ikusi eta dastatzeko aukera egongo da igandean Gorlizen

Erabiltzailearen aurpegia Ukberri Plentziako Perretxiko Elkarteak antolatuta, Gorlizko III. Perretxiko Jardunaldia ospatuko da igande honetan, 8:00etatik 14:00etara, herri horretako Iberre auzoan. Bitarte horretan, mota askotako perretxiko, ziza eta onddoak egongo dira ikusgai. Igaz 300etik gora perretxiko mota egon ziren ikusgai. Horietako batzuk dastatzeko aukera ere edukiko dute bertara joaten direnek. Gainera, umeentzako lehiaketa prestatu dute, perretxiko bakoitzaren izena igartzeko gai diren.
  Kultura 2004-09-30 22:41

Kilometroak 2004rako autobusa Gorlizetik

Erabiltzailearen aurpegia Ukberri "Olatu berria" lelopean, igande honetan Orion eta Zarautzen ospatuko den Kilometroak 2004ra joateko autobusa antolatu du Gorlizko Kultur Etxeak. Izen eman nahi duten guztiek 94 677 40 00 telefono zenbakira deitzea besterik ez dute.
  Kultura 2004-09-13 21:58

Ikastaroak Gorlizen

Erabiltzailearen aurpegia Ukberri Irailaren 20ra arte egongo da zabalik Gorlizko Kultur Etxeak antolatutako ikastaroetan izena emateko epea. Besteak beste, pintura, eskulanak, zeramika, grafopsikologia, hunkipen adimena, xakea, joskintza, yoga, antzerkia, tenis, argazkigintza, sukaldaritza, musika... eta emakumeentzako ikastaroak dohainik (sukaldaritza, xakoli-ardo kata, hirugarren adinekoei laguntza, nekazalturismoa, denboraren kudeaketa...) egongo dira. Informazio gehiago eskuratzeko 94 677 40 00 telefono zenbakira deitzea badago.
  Kultura 2004-08-27 19:51

Hareazko gazteluen haurrentzako lehiaketa egingo da bihar Gorlizeko hondartzan

Erabiltzailearen aurpegia Ukberri Larunbat honetan, hareazko gazteluen haurrentzako txapelketako zortzigarren edizioa ospatuko da Gorlizeko hondartzan (Astondon), 11:00etatik aurrera. Horrela, Sopelan eta Bakion jada egin eta gero, aurtengo lehiaketa errondari emango zaio bukaera. Gorlizeko Kultur Etxearekin batera, Onda Cerok, BBKk eta beste hainbat erakundek lagundu dute antolakuntzan. Hainbat opari eta sari banatuko dituzte hauek.
  Kultura 2004-07-22 22:29

Baionako Xaramela Abesbatzak emango dio hasiera Gorlizko Habanera Jaialdiari

Erabiltzailearen aurpegia Ukberri Lau taldek hartuko dute parte ostiral honetan Iberrebarri Plazan ospatuko den Habaneren eta Euskal Polifoniaren Jaialdiaren hamargarren edizioan, Gorlizko Udaleko iturriek jakinarazi dutenez. Gaueko 23:00etan hasita, Baionako Xaramela Abesbatzak, Bilboko Euzkeria Sozietate Koralak, Galdakaoko Usansolo Orfeoiak eta Gorlizko Lirain Abesbatzak abestuko dute.
  Kultura 2004-07-16 19:06

Miguel Angel Morillo margolari sevillarraren artelanak ikusgai Gorlizen

Erabiltzailearen aurpegia Ukberri Bihartik uztailaren 24ra arte, bere azken lanak jarriko ditu ikusgai, Gorlizko Udal Erakusketa Aretoan, Angel Morillo margolari sevillarrak. Olio-pinturek, akuarelek eta luma-muturrez eginiko margolanek osatuko dute erakusketa. Itsasoa eta bestelako hurbileko gaiak erakusten dituzten obrak dira. Pintore sevillarrak familia eta lagunak ditu Euskal Herrian, eta, urtean bi alditan gutxienez, hemen erakusten ditu bere artelanak.
  Jendartea 2004-07-15 21:48

Gorlizko "Kzgunea" itxi behar izan dute bertan egondako lapurretengatik

Erabiltzailearen aurpegia Ukberri Udaletxeko azken solairuan dagoen "Kzgunea" iztea erabaki du Gorlizko Udalak, "informatika gailuen hainbat lapurreta" gertatu direlako bertan, Patxo Igartua alkateak adierazitakoaren arabera. Euro Press agentziak jakinarazi duenez, urte hasieran hasi omen ziren arazoak, zentroko ardura zeukan begiralea, bertan egunero egon beharrean, astean behin joan zedila erabaki zuenean Eusko Jaurlaritzak. Horrek Gorlizko Independienteen kritikak eragin ditu. Alderdi horren esanetan, "harrigarria da lapurretak udaletxean bertan gertatzea, Udaltzaingoa egonik. Are gehiago, Kzgunean begiralea egoteko "exijitzeko gaitasunik eza" kritikatu du GIek. Hala ere, hartutako neurria "denbora baterako baino ez" dela adierazi du alkateak, "lapurtutako gailuak berriz jarri eta zentroa segurtasun osoz irekitzeko irtenbidea aurkitu arte".
  Kultura 2004-07-12 22:20

Oraindik dago ikusgai Gorlizen "Ertibil Bizkaia 04" erakusketa ibiltaria

Erabiltzailearen aurpegia Ukberri Datorren uztailaren 16ra arte egongo da ikusgai, Gorlizko Erakusketa Aretoan, "Ertibil" Bizkaiko artista gazteen erakusketa ibiltariaren XXI. edizioa. Hilaren 6an zabaldu zen herrian eta bertan 20 artista baino gehiagoren lanak aurkezten dira. Pilar Mur, Begoña Zubero eta Leire Bergarak osatutako epaimahaiak hautatutakoak. Deialdian 60 sortzailek hartu zuten parte, 89 lanekin guztira. Izan ere, artista bakoitzak lan bat edo bi aurkeztu ditzake. Hain zuzen ere, Kepa Garraza gazte berangoztarra izan zen 3.600 euroko lehenengo sariaren irabazlea, “No-one gets out alive from here” izenburuko aluminio gaineko argazkiarekin. Honekin batera, Ibon Garagarza ("Nuevo Orden 2" marrazkia eta collagea) eta Aida Ulibarri ("Equilibrio Bipolar" eskultura) Getxo udalerriko bizilagunak eta Amara Brea ("El espacio compartido - Jersey I" argazkia) berangoztarra izan ziren aukeratuak erakusketan parte hartzeko.
  Jendartea 2004-07-10 16:51

Saharako umeak Gorlizera heldu dira

Erabiltzailearen aurpegia Ukberri Gure artean dira dagoeneko Said, Mohamed Lamin, Tfarrah, Saleh eta Molud, Gorlizen eta inguruko herrietan oporrak igarotzeko asmoz. Uztailaren 2an eta 3an heldu ziren kanpalekuetatik Gorlizera. Fronte Polisarioak antolatutako "Oporrak bakean" programaren baitan ekarri ditu Gorlizko sahararren aldeko taldeak, Udalarekin elkarlanean, hartu dituzten familien ezinbesteko laguntza ahaztu barik. Opor zoriontsuak eta osasuntsuak opa dizkiegu eta gure artean neba-arrebak bezala hartuko ditugu. Ondo pasa!
  Kultura 2004-07-08 21:16

Erdi Aroako giroan murgilduko da Gorliz asteburu honetan

Erabiltzailearen aurpegia Ukberri Antzinako garaietara eramango dituen jai giroaz gozatu ahal izango dute, asteburu honetan, gorliztarrek zein beste hainbat tokietatik joandako bisitariek. Izan ere, ostiralean hasi eta igandera bitartean, Erdi Aroko Azokaren lehendabiziko edizioa ospatuko dute Gorlizen. Besteak beste, malabaristek, zangaluzeek, bufoiek eta abarrek beteko dituzte kale bazterrak. Gainera, txikienek toki berezia izango dute azokan, eurentzako bereziki prestatutako sormen-tailerrak, jokoak eta ipuin-kontalariak egongo baitira.
  Ekonomia 2004-07-05 22:59

Langile bat zauritu da Gorlizen aldamio batetik lurrera erortzean

Erabiltzailearen aurpegia Ukberri Langile bat zauritu da gaur eguerdian Gorlizen lanean ari zela, bi metro eta erdiko altueran zegoen aldamio batetik lurrera erortzean, DYAk jakinarazi duenez. Lan istripua 12:55ean gertatu da, Gorlizko Itxas Bide kalean, argitu gabe dauden arrazoiengatik langilea erori denean. DYAren anbulantzia bat ezbeharraren tokira joan da eta Gurutzetako Ospitalera eraman du zauritua, Bilboko auzokidea den 27 urteko A.U.C. gizonezkoa, alegia.
  Kultura 2004-06-28 22:56

San Pedro eguna ospatuko dute bihar Gorlizko Iberre auzoan

Erabiltzailearen aurpegia Ukberri Astearte honetan San Pedro eguna ospatuko dute Gorlizko Iberre auzoan, arratsalde eta gauean izango diren hainbat ekitaldiren bidez. Besteak beste, 18:00etatik aurrera, auzuneko txoko guztiak musikarekin beteko ditu herriko Udalaitz txistulari taldeak alaitutako kalejirak. Ondoren, euskal dantza emanaldia eskainiko dute Getxoko Itxas Argia eta Gorlizko Aratz taldeek, San Pedro plazan. Azkenik, sandin jana herrikoia egingo da, "El Charro y sus Mariachis" taldearen erritmo mexikarrez lagunduta.
  Kultura 2004-06-18 17:28

Udalekuak egingo dituzte uztailean Gorlizen

Erabiltzailearen aurpegia Ukberri Bartzelonako Forumera bidaia antolatu du Kultur Etxeak

Uztailaren 5etik 23ra bitartean, 6 eta 12 urte bitarteko neska-mutilentzako udalekuak antolatu ditu Gorlizko Kultur Etxeak. Herrian bertan egingo dira, hemeretzi egunetan zehar, 11:00etatik 14:00etara ordutegian. Izena emateko, 75 euro ordaindu beharko dute Gorlizen erroldatutakoek eta 117 euro kanpokoek. Horretarako, ekainaren 30era arte egongo da zabalik epea.
  Jendartea 2004-05-19 21:12

Txirrindulari bat larriki zauritua Gorlizen izandako trafiko istripuan

Erabiltzailearen aurpegia Ukberri Plentziako 57 urteko txirrindulari batek zauri larriak jasan zituen atzo goizean Gorlizen izandako trafiko istripuan, Ertzaintzaren iturriek jakinarazi dutenez. Ezbeharra 10:00ak aldera gertatu zen BI-2122 errepidean, Fiat Dobló auto batek eta txirrindulariak alboz jo zutenean aipatutako herriko Gandias bidegurutzean.

Nabarmenak

Zorion agurrak