Euskara ikasten eskarmentua

Tartean eta azken urte hauetan uda aldean aste beteak eman izan ditut Zornotza eta Etxalar barnetegian. Nire ustez euskara ikasteko modu egokiena, euskara eguneroko bizitzan barneratzean datza. Hori lortzeko, besteak beste, hilero euskaraz eleberri bat irakurtzeko ohitura daukat baita noiz behin artikuluren bat euskal aldizkarietan idazten saiatu ere baina garrantzitsuena nire ustetan mintza-praktika da. Horrela bada, gure euskaltegian mintza-praktika talde bi ditugu, bertan euskaldun berriez gain, euskaldun zaharrak daude eta guztiok elkarrekin hizketan aritzen gara, inolako azterketa prestatu beharraren presiorik gabe, euskaraz elkarrekin mintzatuz, lagun berriak eginez, edozelako gairi buruz mintzatzen, eta hala, giro ederra sortu dugu irakasle eta ikaskideen artean. Horrez gain, Berbalaguna ekimenean ere parte hartu ohi dut. Izan ere bi talde ezberdinetan nago eta Egizuk antolatzen dituen ekintzetan ere izaten naiz, hala nola, txangoak, euskal tailerrak, euskal bazkaria, etorkinen afaria, Berbodromoa eta enparauak. Hori gutxi balitz, Donostiako Udalak antolatutako Mintzanet.net programan ere parte hartzailea naiz hasiera hasieratik. Gaur egun ere Mintzaneten gustura jarraitzen dut, astero hiru pertsonekin euskaraz hizketan arituz, Skyperen bitartez, ordubete bat bakoitzarekin, Algortako Jon Ariñorekin, Donostiako Ana Ursularekin eta Argentinako Valeria Garciarekin, beraz, etxetik irten gabe, lasai asko, munduko edozein tokitako euskara zaleekin. Bukatzeko, ez dakit azken urteotan euskara asko edo gutxi ikasi dudan, baina saiatzen eta saiatuko naiz euskaraz bizitzen eta euskaraz erosotasunez jarduten, hori baita nire helburua.