Pozik hartuko zenuen lehiaketa irabazi izana, ezta?
Bai, noski! Aurkeztu nintzenean argi neukan proposamen gehiago egongo zirela; beti pentsatu izan dut besteen proposamenak nireak baino hobeak direla. Oraingoan, nirea aukeratu dute aurkeztutakoen artean.
Pablo Astrainek iaz egindako lanaren jarraipena da zuk aurkeztutakoa?
Laguna daukat Pablo getxoztarra; "Aztarna" muralarekin irabazi zuen berak Mendibile Jauregiak antolatutako lehenengo lehiaketa; ondoko horma pintatzea egokitu zait niri. Hala, teknikari dagokionez, jarraikortasun bat eman nahi izan diot Astrainen lanari, tonalitateei eta irudien trataerari dagokienez, gehienbat.
Hala ere, hainbat berrikuntza sartu dituzu zure lanean.
Bai. Sarrerako eskaileren alboko horma margotu behar dut nik. Lehenik eta behin, amarru bat erabiltzea pentsatu nuen, jauregia ikusgarriago egiteko. Horma horrek nahikotxo estaltzen du eraikina. Hori dela-eta, etxearen aurrealdearen zuri koloreak eta leihoek horma horretan isla eduki behar zutela erabaki nuen. Bestalde, eskailerak mahastia balira bezala imajinatu nituen.
Akabera bitxia emango diozu zure horma-irudiari, orduan.
Horrela da. Paul Cezanne-ren "Karta-jokalariak" koadroan oinarritu naiz nire horma-irudiaren amaierako zatirako. Artelan horretan, bi lagun agertzen dira kartetan, mahaigainean ardo botila bat daukatela. Mahatsaren jaiotza eskaileretako mahastian egongo litzateke; eta heriotza, ardo bilakatuta, gizon horien eztarrian barrena.