"Azken hilabetetan agerikoak izan dira UPV eta Ertzaintzaren arteko elkarlanaren adierazpenak. San Mames eta Gasteizko irudiak oraindik bezperan ditugunean, UPVk campusean sartzeko baimena eman dio berriz Ertzaintzari. Guzti honek agerian utzi du berriro, Bolognaren aplikazio garaian ikusi moduan, ereduen arteko talka honetan UPVk noren alde jarduten duen. Talka gero eta gordinagoa da. Orain arte ikasleok jasan ditugun erasoetan UPVk erantzukizun zuzena izateaz gain, gaur, Ertzaintza ikasleen aurka oldartzen zen bitartean, Errektoreordetza lotsarik gabe parean egon da begira", salatu du Ikasle Abertzaleak erakundeak.
Hain zuzen ere, gaurko manifestazioa azkenaldian eman diren "ikasleen aurkako erasoak" salatzeko deituta zeukan Leioako IAk. Izan ere, Ikasle Abertzaleak (IA) taldearen arabera, Euskal Herriko Unibertsitateak (EHU) jarritako ikasleen aurkako diziplina-espedienteak eta salaketak areagotu egin ziren martxoan. Gauzak horrela, bost eskaera egiten dizkiote unibertsitateko arduradunei: San Mameseko ikasleei diziplinazko espedientea ez irekitzea; Gasteizko ikasleen kontrako salaketak eta gainontzeko neurriak atzera botatzea; Leioako ikasle inputatuaren aferan esku hartu eta bere egoera konpontzea; EHUra Ertzaintza sar ez dadin behin-betiko neurriak hartzea; eta campusetan dauden "indar polizialak" kanporatzea. Apirilaren 14an eta 19an, Leioako campuseko sarrerak itxi zituzten ikasleek, "bost exigentziak" berresteko, eta Errektoretzari horiek bete zitzala exijitzeko. Gaurko manifestazioa deituta zeukaten.
