Kultura  Lemoiz 2016-11-30 10:21

Euskararen aldeko astean murgilduta dago Lemoiz

Euskararen Nazioarteko Eguna da abenduaren 3a. Hala, Lemoizko Udalak gure hizkuntzaren aldeko hainbat ekimen antolatu ditu egun horren atarian; eta astebeteko egitaraua osatu du, udalerriko neska-mutil zein heldu denen gozamenerako.

Euskararen aldeko astean murgilduta dago Lemoiz
"Akabuko martxea" dokumentala ikusi ahal izango da bihar. | Ikusi handiago | Argazki originala

Lehenengo jarduera astelehenean izan zen, hilaren 28an. Egun horretan, "Petresku etzi ez etsi" izeneko ikuskizuna egon zen gozagai Armintzako kultur etxean.

Gaur, azaroaren 30ean, eguaztenean, neska-mutil gaztetxoei zuzendutako ikuskizuna antolatu dute. Orduan, Monda Lironda pailazo-bikoteak "Apika" lana taularatuko dute Lemoizen. Hala, horretaz gozatu gura dutenek 17:30ean hurreratu beharko dute Urizarreko gelara.

Hurrengo egunean, abenduaren 1ean, Urizarreko gelan transhumantziaren inguruko dokumental bi proiektatuko dituzte: "Dominica" eta "Akabuko martxea". Lan horiek biak ikusi gura dituztenek, arrastiko 07:00etan egon beharko dute bertan.

Azkenik, abenduaren 3an, Euskararen Nazioarteko Egunean, jaialdia egingo dute, 18:00etatik aurrera, Armintzako frontoian; disko-festa egongo da eta txokolatea banatuko dute bertan.

2016/11/28

Lemoiz Lemoiz

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa