Denok Baterak "Urduliz, Berango eta Sopela berri eta hobeagoen eraikuntzan parte hartu" gura du. Horretarako, Ahal Dugu alderdiaren bertako taldeetatik "auzokideez osatutako hautagaitza plural eta irekia" bultzatu dute. Espero dute "biztanleen zati garrantzitsu bat" ordezkatzea. Izan ere, DBko hautagaiek "gure bizi-kalitatea eta ongizatea hobetzeko konponbideak aurkitzeko bidean guztiok, ilusioz eta determinazioz, parte hartu dezagun helburu eta konpromiso sendoa izango dute".
Parte-hartzea oinarri
Auzokideakaz komunikazioa berreskuratzea beharrezkoa iruditzen zaienez, hautagaitzak herritar denentzat "parte-hartze bide irekiak" sustatuko ditu, "bai kanpainan eta baita lau urteko legegintzaldian ere", administrazio lokaletik herri kontsulten edota kezken erantzun azkarra eta efizientea ahalbidetuz, "inolako zentsurarik gabe".
Zerrendak aldarrikatzen dituen beste oinarri ideologiko batzuk dira: giza eskubideenganako errespetua, gardentasuna, ustelkeriaren aurkako borroka, baliabideen kudeaketa arduratsua eta eraginkorra, herriko ekonomia eta lana bultzatzea, hezkuntza eta osasun publikoak, euskara, kultura eta kirola bultzatzea eta iraunkortasuna sustatzea.
Denok Baterak agindu du ez duela hauteskunde osteko itunik egingo "programan hartutako konpromisoak desitxuratzen dituzten alderdi politikoakaz". Horren ordez, "beti auzokide guztien interesak defendatzen" ibiliko direla diote, "edozein motako alderdi agintaldiren aurka" jardunez. Azaldu dutenez, "herritarrei beraien erabakiak hartzeko aukera eman" gura diete: "herritarrak baliabide publikoen jabe izatea nahi dugu gure gizartea eraldatzeko eta parte hartzaileagoa, demokratikoagoa, gardenagoa eta eraginkorragoa bihurtzeko".