UK aldizkariko langile ohien oharra
UK Uribe Kostako aldizkariko langile ohiek elkartasun osoa adierazten diogu Dogan Güzel marrazkigile kurduari
Martitzenean Turkiak itxitako "Özgür Gündem" egunkariko lanbide kideei eta atxilotutako bertako kazetariei zein Dogan Güzel marrazkigileari elkartasun osoa adierazi gura diogu UK aldizkariko lankide izandakook. Modu berean, Adierazpen Askatasunaren eta Prentsa Askatasunaren kontrako Turkiako Estatuaren erasook salatu gura ditugu Euskal Herritik.
Dogan Güzelek urte askotan jardun zuen UK aldizkarian komikigile eta karikaturagile; aldizkariaren azken orrialdea irudikatu zuten hamabostero umore, aldarrikapen, salaketa zein hausnarketa eragiten zuten bere marrazkiek, Sevillatik edo Istanbuletik Uribe Kostara heltzen zitzaizkigun arima kurdudun tinta-irudiek.
Herri kurduaren eskubideak defendatzen dituen egunkarian ziharduen azken boladan Doganek, kurduen gatazkari oihartzuna eta arreta eskaintzen dion plaza bakarrenetakoan. Ez da lehenengo aldia "Özgür Gündem"-ek Turkiaren halako jazarpena jasaten duena, ezta Dogan Güzelek ere ez; beste behin ere, halakoen aurka agertzen gara, Adierazpen Askatasunaren eta Prentsa Askatasunaren izenean, eta lanbideko zein lankideekiko elkartasuna adierazten dugu.
Doganen zein gainontzekoen egoeraren aurrean senide eta lagunen ezinegona gure egiten dugu; gertatutakoa salatzeaz gainera, Turkiari egunkariaren jarduna berriro abiatzea eta atxilotuak askatzea aldarrikatuz, Euskal Herritik bihotzezko besarkada helarazten diogu Dogani.
UK Uribe Kostako aldizkaria zenaren langileen izenean,
Jokin Aspuru
Maitane Nerekan
Irantzu Sagarminaga
Dogan Guzelen atxiloketa, Istanbulen. CC-BY-NC-ND BERRIA