Zer dela-eta sortu duzue Sorzain?
Mitxelko Uranga Álvarez: Biok liburugintzarekin lotura daukagu. Hutsune bat ikusten genuen, horrelako libururik ez delako egiten.
Santi Lapatza-Gortazar Dobaran: Euskarazko liburugintzan ez da egiten elkarrizketa formatuko libururik pil-pilean dauden gaiei buruz. Baina irakurleak askoz errazago hartzen du elkarrizketa formatua, saiakera sakona edo filosofia liburuak baino. Horrelakoak profil jakin bateko irakurleei zuzenduta daude.
M.U.: Santiri otu zitzaion izaki mitologikoaren izena erabiltzea. Sorginari merezi edo zor zaiona eskaini diogu, bera izango da sorkuntzaren zaintzaile.
Asmoa da gogoeta eragitea, ezta?
S.L.: Euskara, politika zein kulturan pil-pilean dauden gaiak hurbildu gura dizkiogu jendeari, hizkuntza errazean.
M.U.: Gainera, argitaletxeak izan behar du eragile sozio-politiko-kulturala. Asmoa ez da liburuak plazaratu eta kitto, ez; hausnarketa piztea baizik. Herritarrak xaxatu gura ditugu, gabezia hori ikusten dugulako. Saiakera asko argitaratzen dira, baina oso gutxi irakurtzen dira. Agian, modu xume eta errazean, lor daiteke irakurleengana iristea; eta eragitea lortuz gero, gu pozik!
S.L.: Liburua eraldaketa tresna gisa erabiltzea, kontzientziak pizteko.
M.U.: Irabazi-asmo bako egitasmoa da, ez dugu sosik ikusiko. Banaketa guk egingo dugu, Internetez eta liburu-denda jakinetan salduko dugu. Bitartekaritzan aurrezten dugun dirutik ehuneko handia egileari dagokio; normalean %10 izaten da, baina dezente gehiago eskaini gura genieke. Copylefta erabiliko dugu; asmoa da liburuak ahalik eta gehien zabaltzea.
Liburu bi prestatzen zabiltzate, ezta?
S.L.: Bai, maketazio-prozesuan daude.
M.U.: Bata da Erabakitzeko eskubidea, burujabetasuna eta botere eragilea. Gaia pil-pilean dago: Gure Esku Dago ekimena, Katalunia... Zenbait aditu batu ditugu eta euretako bakoitzak bere ikuspegia eman du.
S.L.: Bigarrena da Pott Bandari buruzkoa; izan ere, 2017an 40 urte beteko dira haren sorreratik eta Sarri pil-pilean dago. Jon Kortazar EHUko Euskal literatura katedradunari proposatu genion proiektua. Zera egiten saiatu gara: Pott Bandako partaideen eta ondorengo idazle-belaunaldien artean elkarrizketa moduko bat. Horrez gain, bestelako idazle, bertsolari, irakasle edo kritikari batzuek omenaldi modukoa egin dute, Pott Bandak euskal literaturan eta kulturan izan duen garrantzia azalduz; euren jardueran utzitako orbaina azaldu dute.
Zelan finantzatuko dituzue?
M.U.: Beste argitaletxeak diru-laguntza publikoetan oinarritzen dira. Baina, guk argi geneukan erakundeen laguntza barik egin behar genuela, proiektua bideragarria izango bada; horien menpeko ez izateko. Crowdfundingaren ideia otu zitzaigun.
S.L.: Gainera, ez ditugu betetzen laguntza publikoak jasotzeko baldintzak. Autogestioaren bitartez, mugarik badago, guk ipinitakoak izango dira. Goteo gunean abiatuko dugu Crowdfundinga, abenduaren 5ean.