Larunbata, urtarrilak 28

09:30

Txangoa Erandioko auzolandegietatik

Zapatu honetarako, urtarrilak 28, hainbat lagunek proposatu dute "2017a osasunez eta alaitasunez hasteko plan paregabea". Maitane Aragana antolakuntzako kideak azaldu duenez, Erandio zeharkatzeko "ibilbide zirkularra" egingo dute, Altzagatik Altzagara. Igaroko dituzten auzoetan "herriko ondarea, historia, kondairak" eta bestelakoak elkarregaz ezagutzeko aukera izango da. Txangoa 09:30ean hasiko dute itsasadarreko garabitik, horma-irudiaren alboan. Lau ordu pasatxoko ibilaldia Jado kalean amaituko dute, 14:00ak aldera. Ez dago aurretik izena eman beharrik.

10:00

Algortako Bilgune Feministaren topaketa

Bilgune Feministak 15 urte beteko ditu urte honetan. Hori dela eta, urtemuga hori ospatzeko, Algortako taldeak herriko topaketa feminista egingo du hilaren 28an, zapatuan, Algortan bertan, 10:00etatik aurrera. Antolatzaileek jakinarazi dutenez, topaketa horretan parte hartu gura duten guztiek aldez aurretik izena eman beharko dute, hilaren 26a baino lehenago, mezu elektroniko bat bidaliz.

19:30

Fetén Fetén izeneko folk-bikotearen kontzertua

Fetén Fetén izeneko folk-bikoteak kontzertu bat eskainiko du zapatu honetan, urtarrilak 28, Areetako Andrés Isasi musika-eskolan, Neguko Bidaia zikloaren barruan. Hitzordua 19:30ean jarri dute, eta sarreraren prezioa 5 eurokoa da (3 euro zentroko ikasleentzat).

Euskara Irakurle Kluba

Laugarren urtez, Leioako Udal Liburutegiak antolatuko du Euskara Irakurle Kluba. Aurreko urteetako mekanika jarraituz, literaturazaleak hilabete bakoitzeko hirugarren asteazkenean bilduko dira Kultur Leioako lehenengo solairuko hemerotekan, 19:30ean. Urriaren 19an izango da lehenengo saioa, Alaine Agirreren "X hil da" liburuaren gainean berba egiteko.

"Helmugak" margo-erakusketa

Endika Basaguren Ansoleaga artista berangoztarraren "Helmugak" margo-erakusketa joan den zapatuan, urtarrilak 7, zabaldu zuten, Algortako Torrene aretoan. Urtarrilaren 29ra arte, domeka, bisitatu ahal izango da; sarrera, doan. Ordutegia ondokoa izango da: eguaztenetik barikura, 11:00etatik 13:00etara eta 17:00etatik 20:00etara; zapatuetan, 12:00etatik 14:00etara eta 18:00etatik 21:00etara; eta domeketan, 12:00etatik 14:00etara.

19:30

19:30

Neguko Bidaia musika-zikloa

Urtarrilaren 21etik otsailaren 25era bitartean, Neguko Bidaia izeneko kontzertu-zikloaren bederatzigarren edizioa egingo dute, zapatuero, 19:30ean, Areetako Andrés Isasi musika-eskolan. Emanaldi bakoitzeko sarreraren prezioa 5 eurokoa (ikasleentzat 3 euro) izango da, eta 25 eurokoa saio denetarako bonua. Hala, lehenengo kontzertua Trio Argixe taldeak eskainiko du; klarinete, txelo eta piano hirukoteak Brahms eta Piazzollaren obrak interpretatuko ditu. Ziklo honetan ohikoa denez, kontzertu bakoitzaren ostean, entzuleen eta musikarien arteko solasaldia egongo da.

Tosu Betirako erresistentzia-kanpaldia

Mila lagunetik gora mobilizatu ziren joan den zapatuan, hilaren 21ean, Getxoko Ibarbengoako parkingaren kontra. Tosu Betirako taldeak deituta, manifestazioa egin zuten Algortako kaleetatik, "Andra Mari ez ikutu! Ibarbengoako parkingari ez!" lemapean.