Udalerria "pertsona nagusientzako hiri atsegina" bihurtzea gura du Getxoko Udalak. Horretarako, Getxo Lagunkoi izeneko proiektua jarri dute martxan. Hala, prozesu parte-hartzaile bat abiatuko dute, pertsona nagusientzat lagunkoia izango den hiria diseinatzeko ideiak zehazten laguntzeko.
Bariku honetan, otsailak 17, garatzen dabilen ikerketa-kazetaritza proiektuaren aurkezpena egingo du Igor Meltxorrek, Sopelako Kurtzio kultur etxean. Hitzordua 19:00etan ipini dute; sarrera, doan.
Euskal presoen dispertsioaren aurka lan egiten jarraitzen du Berangoko Sare taldeak. Joan den urtarrilaren 14an milaka gizon-emakumek Bilboko kaleak bete zituzten, dispertsio-politikaren ondorioak salatzeko. Horren ostean, herrira bueltatu eta behar horretan jarraitzeko ardura hartu zuten, herriz herri. Hala, berangoztarrek hurrengo hitzordua bariku honetan ipini dute, hilaren 17an: berbaldia antolatu dute, Berangoko kultur etxeko areto nagusian.
Hitzordu garrantzitsuz betetako hilabetea da oraingoa barrikoztarrentzat; San Blas Eguna, Agate Deunaren bezpera... Eta bariku honetan, hilaren 17an, Talo Eguna antolatuko dute. Ekimena Barrikako Emakumeen Hitza elkarteak prestatu du. Bertan, taloak egin, horiek dastatu eta sorpresa gehiago izango dituztela jakinarazi dute antolatzaileek. Den-dena Gure Ixerdia izeneko klubean egingo dute. Horregaz hitzordua arrastiko 07:30ean ipini dute, eta ekimen gastronomiko horretan parte hartu gura duten guzti-guztiak ekitaldira gonbidatu dituzte antolatzaileek.
Ion Martinez Esnaola (Donostia, 1980) umorezko bakarrizketak egiten dabil 2002tik; antzerki-munduan ere murgilduta dago. Oraingo honetan, "Barrez blai" ikuskizuna eskainiko du, Plentzia eta Gorlizko euskara agenda bateratuaren barruan. Saioa bariku honetan, otsailak 17, izango da, 19:30ean, Gorlizko Sertutxena aretoan; sarrera, doan.
Musika Gertu zikloaren barruan, Dead Combo bikote portugaldarrak kontzertua eskainiko du, Kultur Leioako edaritegian, bariku honetan, otsailaren 17an. Pedro Gonçalves (gitarra, kontrabaxua eta ahotsa) eta Tó Trips (gitarra) musikariek 21:00etatik aurrera joko dute; sarrerak 5-10 euroan daude salgai.
Laugarren urtez, Leioako Udal Liburutegiak antolatuko du Euskara Irakurle Kluba. Aurreko urteetako mekanika jarraituz, literaturazaleak hilabete bakoitzeko hirugarren asteazkenean bilduko dira Kultur Leioako lehenengo solairuko hemerotekan, 19:30ean. Urriaren 19an izango da lehenengo saioa, Alaine Agirreren "X hil da" liburuaren gainean berba egiteko.
Urtarrilaren 21etik otsailaren 25era bitartean, Neguko Bidaia izeneko kontzertu-zikloaren bederatzigarren edizioa egingo dute, zapatuero, 19:30ean, Areetako Andrés Isasi musika-eskolan. Emanaldi bakoitzeko sarreraren prezioa 5 eurokoa (ikasleentzat 3 euro) izango da, eta 25 eurokoa saio denetarako bonua. Hala, lehenengo kontzertua Trio Argixe taldeak eskainiko du; klarinete, txelo eta piano hirukoteak Brahms eta Piazzollaren obrak interpretatuko ditu. Ziklo honetan ohikoa denez, kontzertu bakoitzaren ostean, entzuleen eta musikarien arteko solasaldia egongo da.
Hitzen Ahairea, zeri kantatzen diogu euskaldunok? Horixe bera aztertuko dugu Gotzon Barandiaran eta Rafa Ruedarekin batera otsailaren 1etik martxoaren 10era. Ikastaroak 6 asteko iraupena izango du eta 2 orduko saioak izango dira, asteazkenero (martxoak 10 osteguna da) 19:00etatik 21:00etara Algortako Villamonte kultur etxean. Ikastaroaren prezioa: Bizarra Lepoaneko bazkideek 10 euro eta ez bazkideek 15 euro Ikastaroan izena emateko sartu gure webgunera: www.bizarralepoan.eus
Iazko udan, "Erandiok Erabakia" adierazpenarekiko herri-babesa ikustarazteko sinadura-bilketa abiatu zuen Erandioko Gure Esku Dago taldeak. Erabakitzeko eskubidearen aldeko plataformak zabaldu duenez, otsail honetan ere erandioztarren atxikimenduak batzen segituko du, gerora testua Udalbatzan mozio gisa aurkezteko.
Neguriko Jolaseta kirol-klubean jokatuko da Bizkaiko Tenis Txapelketa, bariku honetan hasi eta otsailaren 26ra bitartean. Jolasetako iturriek baieztatu dutenez, bertako pistetan ikusi ahal izango dira emakumezkoen eta gizonezkoen norgehiagokak honako mailetan: 2007ra artera jaiotako benjaminak, 2003ra arteko umeak, eta 1999ra arteko gazteak.