Jostailuak eta maketak erabiliz, Steven Spielberg zinema-zuzendari ospetsuaren "Jurassic Park" filma birsortu gura izan du Ander Pardo Hormazak. "Overrum" gaztelaniaz egindako film laburra bere amaren jaioterrian, Plentzian, estreinatuko du. Hitzordua bariku honetan izango da, azaroaren 17an, 19:00etan, Goñi Portalen. Euskal aktore ezaguna den Mario Pardok ere parte hartu du pelikulan; Ander Pardo zinemagile gaztearen aita da bera.
Azaroan bete-betean sartuta gaudela, hilabeteko egitarau berria prestatu du Getxoko Ingurumen Aretoak. Hala, hilaren akabura bitartean, askotariko jarduerak egongo dira bertan. Saio denak doakoak izango dira.
Bihar hasiko dira Getxoko EH Bilduk antolatu dituen hiru eguneko Etxebizitza Jardunaldiak. Horietan, "etxebizitzaren gaineko problematikari aurre egiteko dauden askotariko ereduak eta politikak" ipiniko dituzte mahaigainean. Hala, topaketa horietan, hainbat eredu ezagutu ahal izango dira, beste leku batzuetan garatzen dabiltzanak, esaterako Errenterian, Gasteizen, Bilbon, Durangon eta Bartzelonan. Egun bakoitzean gai bana jorratuko dute: eguenean, etxebizitza eta gazteak; barikuan, etxebizitza ereduak; zapatuan, etxebizitza politikak.