Zapatu honetan, otsailaren 3an, Blas Deuna jai egun tradizionala ospatuko dute Barrikan; goizeko 11:00etan hasiko dira ekitaldiak, Andra Mari elizan. Meza nagusia, hamaiketako herrikoia, trikitixa, erroskilla eta kordoi postuak... egongo dira. Arrastian, ostera, karameluak eta pastelak banatuko dituzte, Elorduy (17:00) eta Barrika Barri (17:30) nagusien egoitzetan.
"Jolastu, eraiki, parte hartu" goiburuagaz, Jenga eraikuntza-jolasa aukeratu du Herrigunek; jolasen beste ikuspegi bat aurkitzera bultzatu gura ditu leioaztarrak. Gauzak horrela, barikura arte, Jenga Truck kamioia Leioako kaleetan zehar ibiliko da, otsailaren 3ko Jenga Egunean izango duten erronka komunitariorako entrenatu ahal izateko. Denen artean ahalik eta dorrerik altuena eraiki gura dute zapatuan; 12:00etatik aurrera, Sabino Arana kalean.
Olga Revuelta sopranoak Schubert-en musika-lanen emanaldi monografikoa eskainiko du zapatu honetan, otsailaren 3an, Areetako Andrés Isasi musika-eskolan; Anus Cividian-ek eta Pia Rojasek pianoan lagunduko dute. Hala, kontzertua 19:30ean hasiko da; sarreran 5 euroan izango dira.
Sopela nazioarte mailan surfaren erreferentzia gisa ezartzeko xedez, bigarren urtez jarraian Surf Film Sessions jaialdia antolatu du Udalak, TAUI Media ekoizleagaz elkarlanean.
Martxoaren 18ra arte, Marta Zelaia Aranbaltza (Urduliz, 1962) sortzailearen "Sokatira 2014-2017" erakusketa ikusbide izango da Bilboko Rekalde Aretoan. Urduliztarragaz batera, bost artista gaztek parte hartuko dute Bizkaiko Foru Aldundiak sustatutako Barriek 2018 egitasmoan.
Zapatuan eta domeka hauetan jokatuko da Patinaje Artistikoko Getxo Hiria Nazioarteko V. Txapelketa, Fadurako kiroldegian. Show Getxo Patinaje Klubak antolatu du lehiaketa hori Getxo Kirolak udal-erakundeagaz lankidetzan; modalitate horretako 330 kirolarik hartuko dute parte; taliatik eta Estatu espainiarreko bederatzi autonomia-erkidegotatik etorriko dira kirolariak.