Aztiak taldeak "Las herederas" antzezlana aurkeztuko du domeka honetan, otsailaren 11n, Areetako Andrés Isasi musika-eskolan. Hitzordua 19:00etan ipini dute; daborduko salgai daude sarrerak, 3 euroan. Galdakaoko Aztiak taldearen antzezlan honetan, aitaren hiletan topo egingo dute lau ahizpek. Ondasun materialez gainera, beste zerbait ere jarauntsi dute: urte askotariko mindurak, konpondu gabeko liskarrak, sekretuak, eta sendiaren zauri irekiak. Mertxe Fernández, Virtudes Nogales, Altami Torres eta Begoña Ibáñez artistek osatzen dute Aztiak taldea; Felipe Cuétara da zuzendaria.
Martxoaren 18ra arte, Marta Zelaia Aranbaltza (Urduliz, 1962) sortzailearen "Sokatira 2014-2017" erakusketa ikusbide izango da Bilboko Rekalde Aretoan. Urduliztarragaz batera, bost artista gaztek parte hartuko dute Bizkaiko Foru Aldundiak sustatutako Barriek 2018 egitasmoan.
Bariku honetatik aurrera, mozorroz eta kolorez beteko dira Uribe Kostako udalerrietako kaleak, Inauteriak tarteko. Eskola-umeak izango dira goiztiarrenak euren jantziak erakusten; ohi den legez, bihar goizean egingo dituzte tokian tokiko desfileak.