Bihar ospatuko duten jaialdian Euskadiko Parke Teknologikoen Sareko enpresetan lan egiten duten pertsonek osatutako lau musika-taldek parte hartuko dute. Antolatzaileek adierazi dutenez, sarrera librea izango da eta ekitaldia 17:30ean hasiko da.
"Ipar eta Hego komunikabideak eta komunikazio hariak" solasaldia antolatuko du HIRUKA komunikazio-taldeak eguen honetarako, urriaren 20rako. Bertan, Ipar Euskal Herriko komunikabideen egoera eta erronkak zuzenean ezagutzeko aukera emango dute bi protagonistek: Pantxika Maitiak eta Pepe Aizpuruk. Berbaldia 18:30ean hasiko da Algortako Azebarri kultur elkartean, eta, bukatzean, garagardo-dastaketa egongo da Etxeandia garagardauaken eskumenez.
Getxo Eszena zikloaren 40. edizioa abiatuko du bihar, barikuan, Muxikebarri Antzokiak. Programa horrek Arte Eszenikoen Jardunaldien ibilbidea ordezkatuko du, eta, hilaren 23ra bitartean, askotariko 11 ikuskizun hartuko ditu. Gehienak euskal konpainia eta ekoizleek sortutakoak dira, eta, denak 19:30ean hasiko dira, haurrentzako lanak izan ezik, 18:00etan hasiko baitira. Sarrerak Kultur Etxeko ohiko kanaletan eros daitezke.
Seigarren urtez, Sopelako Udalak, Enplegu eta Ekonomi Sustapen Sailaren bitartez, Surf Business Meeting ekimena jarriko du abian, bertako profesionalak eta surfa eta irristatze kirolen sektoreko ekintzaileak inspiratzeko eta laguntzeko helburuagaz.