Jendartea 2008-05-14 15:33

Ekainaren 10ean egingo dute guraso berrientzako hurrengo hitzaldia Barrikan

Erabiltzailearen aurpegia Ukberri "Umeskola" izenburupean, atzo egin zen Barrikako udaletxean, Ana Bacigalupek guraso berriei emango dien hitzaldietatik lehena. Euren seme-alabez lagundurik, sei amek (argazkian) esku hartu zuten Kultur Sailak antolatutako ekintzan. Hurrengo saioa ekainaren 10ean, asteartearekin, izando da 10:00etatik 12:00etara, eta hiru gaietan oinarrituko da: umeen elikadura, edoskitzaroa eta titia kentzea. “Hainbat gai eta zalantza sortu dira, horrexegatik proposatu dugu hiru hauetaz mintzatzea soilik. Etorkizunean beste hitzaldiren bat antolatzen bada falta diren gaiaz hitzegingo dugu”, azaldu du Bacigalupek.
  Jendartea 2008-05-14 15:19

Barrikako hondartzako eskaileratan haitzetarako babes hezia jarri dute

Erabiltzailearen aurpegia Ukberri Eusko Jaurlaritzaren laguntzaz, hondartzan erortzen diren haitzetatik babesteko pantaila dinamikoa jarri du Barrikako Udalak. Eskaileren barruko aldean erantsita dago hesia, erortzen diren harriak bertan kateatuta geldi daitezen, tokiko iturriek zehaztu dutenez. Hezia egoera onean dagoela ziurtatzeko, aldian-aldiko ikuskaritzak egingo dira. Behar izanez gero, bertan pilatutako haitzak ere kenduko dira, segurtasunari ez eragiteko. Iazko abuztuan izandako arazoarengatik erabaki dute hori jartzea. Gainera, udari begira, udalerriko hiru hondartzetan (Muriola, Barrika eta Meñakoz) dutxa zerbitzua eta iturriak jarriko dituzte sarbideetan, eta hondartzainek zainduko dituzte hiru eremuok.
  Kirolak 2008-04-30 19:04

Eskola-umeei piraguan ibiltzen irakatsiko diete Barrikan

Erabiltzailearen aurpegia Ukberri Eskola kirolaren helburu garrantzitsuenetarikoak "kirolari bakoitzaren heziketa osatzea eta norbanakoen beharrak asetzea" direla uste du Barrika Piragua Taldeak. Horri helduz, azken bost urteetan 600 ume baino gehiagok parte hartu dute piraguismo ikastaroetan. Aurten ere neska-mutilei zuzendutako kurtsoak egingo dituzte maiatzetik aurrera. "Prestakuntza, heziketa eta jolasa uztartuko dituzte ikastarook. Kirolariari joko garbiaren printzipioak, kidetasuna eta bizitza osasuntsuaren praktikak erakutsiko zaizkie parte hartzaileei", nabarmendu dute klubeko arduradunek. Halaber, dopinga, indarkeriaren aurkako jarrera eta talde-kideen integrazioa izango dituzte hizpide. Hori bai, horietan esku hartzeko igeri egiten jakitea guztiz beharrezkoa dela gogoratu dute. Informazio gehiagorako blogbpt[abildua]telefonica.net e-posta helbidera idaztea badaukate interesdunek. Argazkian, ikasle eta begilareak aurreko ikastaro batean.
  Jendartea 2008-04-25 00:03

Parekidetasunerako Europako Kartarekin bat egin du Barrikako Udalak

Erabiltzailearen aurpegia Ukberri Barrikako Udalaren osoko bilkurak aho batez onartu zuen, aparteko bilkuran, "Tokian Tokiko Bizitzan Emakume eta Gizonen arteko Berdintasunari buruzko Europako Karta". Karta hori Araba, Bizkaia eta Gipuzkoako udalerrien elkartea den Eudelek Emakumeen Nazioarteko Eguneko Adierazpen Instituzionalean hartu zuen hizpide. “Udal bizitzan gizonen eta emakumeen berdintasun arauak ezartzeko konpromiso ofiziala har dezaten tokiko eta herrialdeetako gobernuak animatzea" du helburu 2006an egindako Berdintasunerako Europako Kartan. Era berean, "beren eskumen eta zerbitzuen barruan berdintasuna bultzatzeko, bizitzako esparru guztietan genero berdintasuna sustatzeko eta, era berean, genero estereotipoei aurre egiteko eta genero diskriminazioaren kontra borrokatzeko ekintza planak prestatu eta aplikatu ditzaten" eskatzen die aipatu erankundeei. Argazkian, Juan Jose Ezpeleta Barrikako alkatea.
  Jendartea 2008-04-15 20:25

Guraso berrientzako hitzaldiak antolatu dituzte Barrikan

Erabiltzailearen aurpegia Ukberri Barrikako Udalak 3 urtetik beherako seme-alabak dituzten aita-amentzako hitzaldiak antolatu ditu. Ana Bacigalupek gidatuta, maiatzean 13an ekainaren 11an izango dira solasaldiak, biak ala biak goizez. "Senitartekoen artean lotura sendoagoak eta osasuntsuak sortzeko asmoz, umeak hazteko moduak ezagutzea eta guraso berriek eduki ditzaketen zalantzak eta kexkak apur bat argitzea" dira ekimenaren helburuak, tokiko arduradunek zehaztu dutenez. "Ume eskola maitasuna, errespetua eta laguntasuna bultzatzeko espazioa da", gaineratu dute. Parte hartzeko Barrikako kultur etxean eman beharko da izena, 946 775 163 telefono zenbakira deituz.
  Jendartea 2008-03-19 21:29

"Bost minutuko kontua" izan zela dio afaldu artean seme-alabak autoan utzi zituen aita barrikoztarrak

Erabiltzailearen aurpegia Ukberri Sestaoko Udaltzaingoak berak zabaldu zuen atzo, jatetxe batean afaltzen zuen bitartean, 18 hilabete, 4 eta 6 urteetako hiru seme-alabak martxan zegoen auto baten barruan utzi zituen gizona, barrikoztarra dela. Gaurkoan, egunkarietako orrialdeak bete ditu horrek. Are gehiago, laguna 38 urteko X.E.G. dela gaineratu du "El Correo Español"ek. Bada, ustez, salatua izan den gizonak albistearen berri izan duenean, Radio Euskadira deitu du "harridura eta haserrea" agertzeko eta Poliziaren bertsioa gezurtatzeko. Adierazi duenez, "bost minutuko kontua izan zen eta hotza egiten zuelako zegoen autoa martxan". Hala ere, onartu egin du "logikoa" dela "autoa ikusi zutenean datuak hartzea, baina aitaren bertsioa entzunda" beste modu batera jokatu beharko luketela iruditzen zaio gizonari. Dena den, eta medioetan honen inguruko informazio asko agertu den arren, salaketarik ez duela jaso ziurtatu du. Udaltzaingoak, baina, azaldu du gertakaria Bizkaiko Foru Aldundiko haurren sailari igorri diotela.
  Politika 2008-03-09 23:00

Barrikan abstentzioa izan da nagusi

Erabiltzailearen aurpegia Ukberri Espainiako hauteskundeen emaitzak %100ean zenbatu dira dagoeneko Barrikan eta orain dela lau urte ez bezala abstentzioak irabazi egin du, 437 hautesle (%38,74) etxean gelditu direla. Aukera horren ostean gelditu da EAJ 331 botoekin. Jeltzaleek 117 boto galdu dituzte 2004tik ona, baina badute ere pozteko motiboa, udal hauteskundeetatik (243 atera zuten) hona 88 boz errekuperatu baitituzte. Barrikan jausi handia egin duena PSE-EE da 2004an 70 boto, 2007an 90 eta gaur 137 batu dituztenak. PP, Ezker Batua eta Aralarrek hainbat boto galdu dituzte lau urtetan. Bestalde, Eusko Alkartasunak bere egoera hobetu du, 37tik 46ra pasatu baita, baina ez du lortu udal hauteskundeetako 124 botoak mantentzen, EAJren hainbat boto emaile eskuratu zuenean. Aipagarria da UPDk 9 boto lortu dituela eta Partido Familia y Vida eskuin muturreko alderdiak barrikoztar bat konbentzitzea lortu duela. Hauteskundeen emaitzak eskualdean (pdf). Argazkian, Barrikako udaletxea.
  Kultura 2008-03-05 11:00

Emakumeen Eguna dela eta antzerkia izango da bihar Barrikan

Erabiltzailearen aurpegia Ukberri Martxoaren 8ko Emakumeen Nazioarteko Eguna dela eta, urtero bezala, hainbat kultur ekitaldi antolatu du Uribe Kostako Zerbitzu Mankomunitateak. Ekintzak aste hasieran abiatu ziren Plentzian, astelehenera bitartean Goñi Portal kultur etxean ikusgai egongo den Euskal Herriko feminismoaren historiari buruzko kartel erakusketaren bitartez. Egunotan, hitzaldia, antzerkia eta ipuin kontaketa izan dira Berangon eta Sopelan, baina oraindik badago zerekin gozatu. Besteak beste, Barrikan ostegun honetan, hilak 6, hasiko dira ekintzak, "La Trouppe de Mercedes" antzezlanarekin (argazkian) eta ondoren egingo den kafe-tertuliarekin, 18:00etan udaletxean. Komedia horretan, Salva Alonso, Mentxu del Cid, Begoña Hernandez eta Vevi Mateos aktoreak euren artean erabat desberdinak diren lau emakumeen bizitzaz mintzatuko dira. Andreek, eguneroko gauzak ezartzen eta agintzen zaizkien moduaz gogaituta, lagun talde bat bahitzea erabakitzen dute euren kexak norbaitek entzun ditzan.
  Hezkuntza 2008-02-15 11:17

Asteartean abiatuko dituzte ikasleentzako aholkularitza saioak Barrikan

Erabiltzailearen aurpegia Ukberri Otsailaren 19an eta 21ean, "Aukera-tu" izeneko ikasleei zuzenduriko aholkularitza zerbitzua abian jarriko du Barrikako Udalak. Horren bitartez, 14 eta 18 urte bitarteko gazteek ikasketei buruzko zalantzak galdetzeko aukera izango dute, tokiko iturriek zehaztu dutenez. Lehenengo saioa, asteartekoa, unibertsitateko karrerei buruzkoa izango da eta; ostegunekoa, berriz, Batxilergoari eta Erdi eta Goi Mailako ikasketen gainekoa. Saioetan esku hartzeko kultur etxean hitzordua eskatu beharko da. Argazkian, hainbat gazte ikasketa aretoan azterketak prestatzen.
  Politika 2008-02-13 11:27

"Terrorismoaren biktimei dagokien kalte-ordaina jasotzeko" Barrikan taxia erre izana leporatu diote bere jabeari

Erabiltzailearen aurpegia Ukberri Iturri "fidagarrietan" oinarrituz "El Correo" egunkariak atzo baieztatutakoaren arabera, urtarrilaren 31eko gauean Barrikan lanerako autoa erre izana aitortu zuen, ertzain etxean, joan den ostegunean, U. Z. 29 urteko taxilari bilbotarrak. "Autoz aldatu nahi zuen zeukana nahikotxo matxuratzen zelako eta azken aldian arazo asko ematen zizikiolako", azaldu zuen hedabideak, ondoren, "koartada asmatu" zuela gaineratuz, "aseguaren dirua kobratu eta, agian, balizko terrorismoaren biktimei dagokien kalte-ordaina eskuratzeko". Ostegun horretan bertan, lehergaiez betetako ontzia aurkitu zuten Getxoko Diliz estratan. Hala ere, Ertzaintzak hasieratik esan zuen "ezer baztertzen ez duen arren, taxi lapurra delitugile arrunta zela" uste zuela. Bitartean, taxilari bilbotarraren abokatuak gogoratu du epailearen erabaki sendorik egon artean "hipotesiak baino ez" direla, baita "norberaren autoa erretzea gaztigagarria ez" dela. Argazkian, ertzainak Dilizen / Imanol Landa.
  Kultura 2008-02-07 23:01

Haur eta emakumeentzako jarduera ugari izango dira hurrengo hilabetetan Barrikan

Erabiltzailearen aurpegia Ukberri Barrikako Udal Kultur Sailak hainbat jarduera antolatu ditu datorren hilabeteetarako. Pasa den otsailaren 2an jaioberriei masajeak egiten ikasteko tailerra abiatu zen; hilaren 9, 16 eta 23an jarraituko du martxoaren 1ra arte, 11:00etatik 13:00etara. Izen-emate eta ordainketa kultur etxean egin beharko dira. Otsailaren 19an eta 21ean, berriz, ikasketa aholkularitza saioak izango dira, 14 eta 18 urte bitarteko neska-mutilei zuzenduak (hitzordua kultur etxean eskatu behar da). Bestalde, martxoaren 8ko Emakumeen Nazioarteko Eguna dela eta hainbat ekintza antolatu dituzte. Besteak beste, martxoaren 6an "La Trouppe de Mercedes" antzezlana egongo da ikusgai, 18:00etan. Ondoren kafe-tertulia egingo dute. Martxoaren 8an Uribe Kostako Mankomunitateko Emakumeen Txapelketa Kirol Anitza garatuko da padel pistetan, 9:00etatik 14:00etara. Gainera, 11:30ean "Uraburutarrak" izeneko umeentzako jarduerak izango dira. Hilaren 14an, "Kandelen argipean" helduentzako ahozko narrazioa egingo dute, 18:00etan. Azkenik, 29an, txotxongiloak izango dira 12:00etan Mari Teatroaren eskutik. Argazkian, umeentzako eta Emakumeen Astearen ekintza guztiak udaletxean izango dira (liburutegi zaharrean).
  Kultura 2008-02-06 20:04

Sarean dira Barrikako San Blasetako hainbat argazki

Erabiltzailearen aurpegia Ukberri Bertoko zein inguruko herrietatik joandako dozenaka lagunek ospatu zuten, joan den ostiralean, San Blas eguna, Barrikan. Goizeko 11etan meza nagusia egin eta, ondoren, aurreskua, trikitixa eta hamaiketakoa eskaini zitzaien Andra Mari elizara bertaratutakoei. Gainera, bedeinkatutako kordoiak eta gozokiak ere salgai egon ziren. Arratsaldean, ohiko gozokien banaketa egin dute Elorduy nagusien egoitzan. Asteleheneran, berriz, inauterietako mozorroen jaia zeukaten. 17:30etan hasita, Oliver magoa ikuskizuna izan zen udaletxean, hau da, liburutegi zaharrean. Ostean, askaria eskaini zitzaien neska-mutil zein gurasoei. Argazkian, astelehenera arte itxaron beharrean, San Blas egunean mozorrotu zen baten bat ere izan zen Barrikan, udal webgunean argitaratutako irudietan ikus daitekeen moduan.
  Kirolak 2008-02-06 19:37

Padelera jokatzeko federazio lizentziak bideratzen dabiltza Barrikan

Erabiltzailearen aurpegia Ukberri Orain dela gutxi padelera ere jokatzeko aukera eskaintzen hasi zen Barrikako Abaroa tenis taldea, "arrakasta izugarria lortuz", tokiko iturriek adierazi dutenez. Hori dela eta, federazioan alta eman eta otsailean horren gaineko lizentziak bideratzeari ekin dio klubak. Lizentziok hainbat onura ematen dituzte: lesionatuz gero arreta medikua edukitzeko, federatutako klubek antolatzen dituzten txapelketetan lehiatzeko eta martxoan egiten hasiko diren sailkapenean esku hartzeko aukerak, besteak beste. Interesatuek 655 709 693 (Alberto) edo 607 669 073 (Nicolas) telefono zenbakietara dei dezakete informazio gehiago eskatzeko. Argazkian, padelean jokatzen Barrikan.
  Kultura 2008-01-30 15:49

San Blas eguna ospatuko dute igandean Barrikan

Erabiltzailearen aurpegia Ukberri Inauteriak iristear daude. Hori dela eta hainbat jarduera antolatu dituzte Barrikako Udalak eta Kultur Etxeak. Igandean, otsailak 3, San Blas eguna ospatuko dute: goizeko 11etan meza nagusia egingo da Andra Mari elizan. Ondoren, aurreskua, trikitixa eta hamaiketakoa eskainiko zaie bertan bildutakoei. Gainera, bedeinkatutako kordoiak eta gozokiak ere salgai egongo dira. Arratsaldean, ohiko gozokien banaketa egingo dute Elorduy nagusien egoitzan. Astelehenerako, berriz, mozorroen jaia antolatuko dute. 17:30etan hasita, Oliver magoa ikuskizuna izango da udaletxean, hau da, liburutegi zaharrean. Ostean, askaria eskainiko da. Parte hartu nahi dutenek mozorrotuta joan beharko dute, udal iturrien arabera.
  Kirolak 2008-01-28 11:50

Gabonetako tenis eta padel txapelketetako argazkiak jarri dituzte Barrikako udal webgunean

Erabiltzailearen aurpegia Ukberri Barrikako Abaroa taldeak Gabonetako Tenis eta Padel txapelketak egin zituen abenduaren 22tik 31ra bitartean, 93 jokalari biltzea lortuz eta 100 partidatik gora jokatuz. Guztira, 27 sari banatu ziren. Tenisean parte-hartze handia izan zen, gaztetxo eta helduen artean. Padelari dagokionez, "lehen biltzarra izan zela aintzat hartuta, gizonezkoetan parte-hartzea bikaina izan zen", Alberto Vidal Landa antolatzaile eta tenis taldeko prestatzailearen arabera. Federatutako Teniseko emaitzei dagokienez Peio Ortegak Markel Garcia-ri irabazi zion, 6-2 eta 7-6, gizonezko helduen mailan; emakumezko helduen mailan, Leire Alberdik Maitane Pernauti irabazi zion, 6-4 eta 6-2; eta haurretan Iñigo Aldekoa izan zen garaile, Cristian Gonzalez-i 6-3 eta 6-1 irabazita. Gorka Quemadak Adrian Amori irabazi zion 5-3 eta 4-0, federatu gabeko gazteen artean; eta Mikel Lopez izan zen haurren mailako saritua. Bestetik, padelean, helduen mailan Javier Garcia eta Peio Ortega izan ziren txapeldun, Miren Larreategi eta Mariano Hormazari 6-1 eta 6-1 irabazita. Emakumezkoetan, Paloma Rojas eta Paloma Apraiz bikoteak Nerea Lopez eta Aintzane Zuñedari 6-3 eta 6-1 irabazi zieten. Horrenbestez, horien guztien argazkiak Barrikako udal webgunean argitaratu dituzte orain.
  Jendartea 2008-01-12 13:25

Hilaren 21ra arte dute barrikoztarrek haurrentzako masaje ikastaroan izena emateko

Erabiltzailearen aurpegia Ukberri Haurrentzako masaje ikastaroa eskainiko dute Barrikan, otsailean zehar, 2 eta 12 hilabete arteko umetxoak dituzten gurasoei zuzendua. Guztira, bost saio izango dira, seguruenik larunbatetan, 11:00etatik 13:00etara. Barrikako udal iturriek jakinarazi dutenez, bi zatitan banatuko da tailerra: batean, masajeei buruzko teoria eta praktika emango dute; eta bestean, hitzaldiak izango dira funtsa, negarra, logalea edota ukipenaren garrantzia aztertuz. Ikastaroaren helburua "gurasoen eskuetan tresna bat jartzea da, seme-alaben beharrei erantzuteko, komunikazioan oinarritutako harremana sortu asmoz", tokiko iturrien arabera. Sei eta hamar haur artean joatea beharrezkoa izango da ikastaroa egin ahal izateko. Interesatuek Barrikako kultur etxean eska dezakete informazioa, 10:00etatik 13:30era eta 16:30etik 18:00etara, baita 946 775 163 telefono zenbakira deituz edota liburutegia[abildua]barrika.net posta elektronikoan ere. Urtarrilaren 21era arte egongo da zabalik izena emateko epea.
  Kirolak 2008-01-09 19:40

Ia ehun jokalari izan dira Barrikako Gabonetarako tenis eta padel txapelketetan

Erabiltzailearen aurpegia Ukberri Barrikako Abaroa taldeak Gabonetako Tenis eta Padel txapelketak egin zituen abenduaren 22tik 31ra bitartean, 93 jokalari biltzea lortuz eta 100 partidatik gora jokatuz. Guztira, 27 sari banatu ziren. Alberto Vidal Landa antolatzaile eta tenis taldeko prestatzaileak adierazi duenez, "urteko asterik gogorrenetakoa izan da, kirolari dagokionez, hainbeste jokalari ez genuelako inoiz jaso". Tenisean parte-hartze handia izan zen, gaztetxo eta helduen artean. Padelari dagokionez, "lehen biltzarra izan dela aintzat hartuta, gizonezkoetan parte-hartzea bikaina izan da", esan du Vidalek. Federatutako Teniseko emaitzei dagokienez Peio Ortegak Markel Garcia-ri irabazi zion, 6-2 eta 7-6, gizonezko helduen mailan; emakumezko helduen mailan, Leire Alberdik Maitane Pernauti irabazi zion, 6-4 eta 6-2; eta haurretan Iñigo Aldekoa izan zen garaile, Cristian Gonzalez-i 6-3 eta 6-1 irabazita. Gorka Quemadak Adrian Amori irabazi zion 5-3 eta 4-0, federatu gabeko gazteen artean; eta Mikel Lopez izan zen haurren mailako saritua. Argazkian, irabazleak.
  Jendartea 2007-12-27 12:45

Haurrentzako masaje ikastaroa emango dute otsailean zehar Barrikan

Erabiltzailearen aurpegia Ukberri Haurrentzako masaje ikastaroa eskainiko dute Barrikan, otsailean zehar, 2 eta 12 hilabete arteko umetxoak dituzten gurasoei zuzendua. Guztira, bost saio izango dira, seguruenik larunbatetan, 11:00etatik 13:00etara. Barrikako udal iturriek jakinarazi dutenez, bi zatitan banatuko da tailerra: batean, masajeei buruzko teoria eta praktika emango dute; eta bestean, hitzaldiak izango dira funtsa, negarra, logalea edota ukipenaren garrantzia aztertuz. Ikastaroaren helburua "gurasoen eskuetan tresna bat jartzea da, seme-alaben beharrei erantzuteko, komunikazioan oinarritutako harremana sortu asmoz", tokiko iturrien arabera. Sei eta hamar haur artean joatea beharrezkoa izango da ikastaroa egin ahal izateko. Interesatuek Barrikako kultur etxean eska dezakete informazioa, 10:00etatik 13:30era eta 16:30etik 18:00etara, baita 946 775 163 telefono zenbakira deituz edota liburutegia[abildua]barrika.net posta elektronikoan ere.
  Politika 2007-12-19 23:12

Luis Echave-Sustaeta Barrikako hautetsi popularra mehatxatu dutela salatu du PPk

Erabiltzailearen aurpegia Ukberri Luis Enrique Echave-Susaeta hautetsi popularrak mehatxuak pairatu dituela salatu du EAEko Auzitegi Goreneko Fiskaltzaren aurrean Bizkaiko Alderdi Popularrak. Ustezko mehatxuak pasa den azaroaren 21ean gertatu ziren, Barrikako Udalaren informazio batzorde batean. Echave-Susaetak batzorde horretan azken hauteskundeetan ilegalizatutako Eusko Abertzale Ekintzaren zerrendako kide bat zegoela salatu ondoren, EAEko lagun batek PPko kidea "hatzamarrez seinalatu eta 'zu kontuz ibili, kontu handiz ibili, inoiz baino kontu handiagoz ibili' ohartarazi zion", beti ere PPk zabaldutakoaren harira. Antonio Basagoiti (argazkian) Bizkaiko PPren presidentearen aburuz, "zoritxarrez, ohikoa bilakatzen ari da" Barrikan gertaturikoa eta horren errua bota dio PSOEko Gobernuari. Luis Echave-Susaeta PPk Barrikan duen zinegotzi bakarra da, Espainiako Alderdien Legeari esker lortutakoa, gainera.
  Kirolak 2007-12-13 19:58

Urteari agur esateko Butroe itsasadarra jaitsiko dute Barrikako piraguistek

Erabiltzailearen aurpegia Ukberri Barrika Piragua Taldeak aurten ere jaitsiera antolatu du Butroe itsasadarrean zehar, 2007a agurtzeko. Partaideak abenduaren 30ean klubean bildu beharko dira, goizeko 10:30ean. Baldintza bakarra mozorrotuta agertzea da. Gainera, berrikuntza lez, saria emango diete mozorroarekin jantsita gehien irauten dutenei; baita originalenei ere. Helduen ibilbidea, itsasadarra igotzea eta jaistea izango da; baina gazteenek jaitsi egin beharko dute soilik. Proba eguerdian bukatuko da klubean antolatutako hamaiketakoarekin. Bestalde, Barrika Piragua Taldeak blog berria zabaldu du: http://barrikapiraguataldea.blogspot.com. Bertan, eduki eguneratuak, turismoa, estropadak, palariak eta entrenamendu atalak, ekintzen egutegia, argazki eta bideo galeriak edo beste blog-ak ezagutzeko loturak aurki daitezke, besteak beste. Erdaraz bakarrik dago, baina. Argazkian, taldekideak.

Nabarmenak

Zorion agurrak