Kultura 2006-04-07 20:26

"Sua" filmaren akelarrea grabatuko dabe bihar Barrikan

Erabiltzailearen aurpegia Ukberri Larunbat honetan, apirilak 8, arratsaldetik hasita, "Sua" herri filmaren (argazkian) akelarrearen eszena grabatuko dogu, Barrikako Meñakoz senaian (hondartz zuloa). Horretarako, Sopelako udaletxe plazan alkartuko gara arratsaldeko 5etan, Meñakoz ezagutzen ez dutenentzat. Hondartzan ordu batzuk emongo doguz,koreografia lantzen –oso erreza–, jantziak hobetzen –garrantzi haundia daukie, tomak gertukoak izango baitira–, zeozer jaten, edaten, lagunartea haunditzen... giro ona sortzen. Gaberako, 11ak inguru, bukatuta egongo da eta jarraian Maruriko etxe batean jaia antolatu dogu DJ Bull-en musikaz alaiturik eta beste sorpresa batzuk tartean.
  Kultura 2006-04-04 22:05

"Sua" filmaren akelarrea grabatuko dabe zapatuan Barrikan

Erabiltzailearen aurpegia Ukberri Apirilaren 8an, larunbata, arratsaldetik hasita, "Sua" herri filmaren (argazkian) akelarrearen eszena grabatuko dogu, Barrikako Meñakoz senaian (hondartz zuloa). Horretarako, Sopelako udaletxe plazan alkartuko gara arratsaldeko 5etan, Meñakoz ezagutzen ez dutenentzat. Hondartzan ordu batzuk emongo doguz,koreografia lantzen –oso erreza–, jantziak hobetzen –garrantzi haundia daukie, tomak gertukoak izango baitira–, zeozer jaten, edaten, lagunartea haunditzen... giro ona sortzen. Gaberako, 11ak inguru, bukatuta egongo da eta jarraian Maruriko etxe batean jaia antolatu dogu DJ Bull-en musikaz alaiturik eta beste sorpresa batzuk tartean.
  Jendartea 2006-03-28 19:57

Hiru lagun atxilotu dituzte Barrikan etxe batean lapurtzea leporatuta

Erabiltzailearen aurpegia Ukberri Ertzaintzak 22 eta 29 urte arteko hiru lagun atxilotu zituen ostegun arratsaldean Barrikan, herri horretako etxe batean izandako lapurretaren ustezko egileak zirelakoan, Eusko Jaurlaritzako Herrizaingo Sailak jakinarazi duenez. Polizia iturrien arabera, hesiaren gainetik egin zuten salto etxera sartzeko eta, auzokoek aurre egin zietenean, oinez ihes egin zuten. Bertara joan ziren ertzainek lapurrak aurkitzeko operazioa abiatu eta ibilgailu bat atzeman zuten Goierriko bidegurutzean; hiru lagun zihoazen barruan. "Furgoneta miatu ostean, horrelako lapurretak egiteko erabili ohi diren tresnak aurkitu zituzten bertan, baita jatorri ezezaguneko objektuak ere", dio Herrizaingo Sailak helarazitako prentsa oharra.
  Kultura 2006-02-15 19:07

Antton Irustaren ipuinekin gozatzeko aukera egongo da larunbatean Barrikan

Erabiltzailearen aurpegia Ukberri Joan den urtarrilaren 28an, egun horietan izan ziren elurteen ondorioz bertan behera utzi behar izan ostean, larunbat honetan, otsailak 18, eskainiko du emanaldia Antton Irusta ipuin kontalari eta idazle ezaguna, Barrikako liburutegian. Goizean, 11:30etik aurrera, bertan batzen diren neska-mutilek "Han-hemengo Ipuinak" saiorekin gozatu ahal izango dute. Antton Irustak ipuin emanaldi bat bukatzen duen bakoitzean bertan entzuten dauden gurasoei eskari bat egiten die, gauero haurrak ohera sartu eta ipuin bat kontatzeko eskatzen dienean, gogo onez egiteko, zeren eta ipuinek, liluraz gain, bitamina ederrak dituzte, indarrak eta gogoa berpizten dituena. Argazkia: Galtzagorri elkartea.
  Kultura 2006-02-08 21:26

Apirilaren 3ra arte liburutegi zerbitzurik ez da egongo Barrikan

Erabiltzailearen aurpegia Ukberri Barrikako Udal Liburutegia Txintxilandiara lekualdatu dute, Udaletxeko bidea kaleko 2. zenbakian. Liburutegien Euskal Sistemaren barruan egongo da hemendik aurrera, kultur iturriek jakinarazi dutenez. "Horrek, erabiltzaileei garrantzizko zenbait abantaila ekarriko dizkie, hala nola, karnet digitala –Euskal Herriko liburutegi guztietarako eta administrazioko beste zenbait zerbitzuetarako baliagarria–, sareko 900.000 liburu-ondarearen berri izateko aukera... Hori dela eta, katalogazio lana behar den moduan egiteko, liburutegi zerbizuak ez ditu apirilaren 3ra arte ateak zabalduko. Bestalde, apirilaren 29an liburutegia itxita egongo da kulturekintzak egiteko. Udaletxean izango dira horiek, betiko moduan, liburutegi zaharrean.
  Jendartea 2006-01-17 19:12

"Informazioa isilean gordetzea" egotzi dio Barrikako Udalari Txipio Baik

Erabiltzailearen aurpegia Ukberri Barrikako Udalaren aurkako hiru helegite aurkeztu ditu Txipio Baik, elkarte naturistako kideen arabera, "Barrikabaso eta Bustu eremuen gaineko eraikuntza-egitasmoei buruzko datuak ukatu egin dizkigulako". Ekologistek gogoratu dutenez, bere garaian, "eztabaida handia" sortu zuen, 85 txalet altzatzeko asmoz, Barrikabaso birkalifikatzeko erabakia, aipatu zonaldea "babestuta zegoelako eta ezin zelako bertan eraiki". Orduan ere errekurtsoa aurkeztu zuen Txipio Baik eta Barrikako kostaldeko 65 hektaretako lur-eremuan eraikitzea ahalbidetzen zuen erabakia baliogabetu zuen EAEko Justizia Auzitegi Nagusiak. Bizkaiko Foru Aldundiak, aldiz, epaiaren aurkako helegitea aurkeztu zuen Espainiako Auzitegi Gorenean eta, gaur egun, afera aztertzen ari dira. Hala ere, "hamalau txalet egin dituzte bertan eta beste hainbat altzatzen ari dira", Txipio Baik salatu duenez. Argazkian, Barrikabasoko San Telmo aldea ikus daiteke atzealdean.
  Kultura 2005-11-29 00:43

Ander Deunaren ospakizunetan parte hartzera deitu du Barrikako Udalak

Erabiltzailearen aurpegia Ukberri Barrikako Udalak bertako auzokide guztiak zein nahi duten kanpotarrak datorren asteazkenean ospatuko den Ander Deunako ekitaldietan parte hartzera gonbidatu ditu. Goierri auzoan burutuko den jaia txistularien ibilbidearekin hasiko da. Ondoren, 11:30ean, meza izango da eta Jaungoikoaren hitza entzun ostean Gregorio Larrañaga "Mañukorta" eta Xabier Zeberio bertsolarien doinuak entzungai izango dira, tartean hamaiketakoaz gozatu ahal izango dela. Irudian, Gregorio Larrañaga "Mañukorta"k Megustasmucho.com webgunera bidalitako argazkia.
  Jendartea 2005-11-24 23:34

Emakumeenganako indarkeriaren kontrako elkarretaratzea egingo dute ostiral honetan Barrikan, Aintzane Garai zenaren herrian

Erabiltzailearen aurpegia Ukberri Ostiral honetan, azaroak 25, Emakumeenganako Indarkeriaren Kontrako Eguna dugu nazioarte mailan. Uribe Kosta eskualdeko punta batetik bestera ere ugariak izango dira emakumeek sufritzen dituzten tratu txarrak eta bortizkeria salatzeko antolatutako hitzaldi, antzerki saio, filme proiekzio, elkarretaratze eta manifestaldiak, hainbat eragilek deituta. Baina benetan hunkigarria izango da Barrikan, Aintzane Garai (argazkian) zenaren herrian, egingo den kontzentrazioa. Izan ere, oraindik oso gertu daukate bere bikotekide ohiak eraildako 27 urteko neskaren senide, lagun eta auzokideek urriko egun ilun horietan bizi izandako samina. Elkarretaratzea 19:00etan izango da, udaletxe aurrean. Ordubete lehenago, "Victimas de la violencia de genero" hitzaldia eskainiko du liburutegian, Eider Diaz Olabarri abokatuak.
  Kultura 2005-11-18 20:18

Ipuinak eta txotxongiloak izango dira larunbat honetan Barrikako liburutegian

Erabiltzailearen aurpegia Ukberri Batez ere, 3 eta 8 urte bitarteko neska-mutilentzako ekitaldia antolatu du larunbat goizerako Barrikako liburutegiak. Hain zuzen ere, "Show Collage" ipuin kontalari saioaz eta Rosa Maria Martinezen (argazkian) "Printzesa Sagutxoa" txotxongilo ikuskizunaz gozatzeko aukera izango dute, 11:30etik aurrera, bertan batzen diren umeek. Artisten hitzetan, "hitzak, ipuina, txotxongiloak, mugimenduak, soinuak eta haurren berezko fantasia izango dira berriro ere protagonistak". “Show-collage” munduko beste toki batzuei buruz dihardu, batzuk urrunak eta besteak hurbilagoak. Irudimenari esker, hegan egitera, adiskide bati laguntzera, erraldoi bihurtzera... egiten die gonbitea neska-mutilei. Bestalde, "Printzesa Sagutxoa" ikuskizunean, printzesaren aita den saguen erregea munduko pertsonairik boteretsuenaren bila abiatuko da, bere alabarekin ezkon dadin.
  Jendartea 2005-11-04 19:49

Aintzane Garai zenaren senideek jasotako laguntza eskertu dute publikoki

Erabiltzailearen aurpegia Ukberri Jose Maria Ezpeleta Barrikako alkatea, Aintzaneren neba eta ama, David Garai eta Yolanda Lopez (ezkerretik eskumara, argazkian) eta Zuriñe Garai ahizpak prentsaurrekoa eskaini dute gaur goizeko 12:00etan Barrikako udaletxean. Bertan, Lopezek Aintzaneren bilaketan eta gorpua aurkitu ondoren ertzainek, Babes Zibilak, Barrikako Udalak eta herriak, Bakioko alkateak eta herriak, prentsak eta ezagutzen ez duten jendeak eskaini dizkieten babesa, laguntza eta errespetua eskertu ditu "ama naizen aldetik". Emozio handiz irakurri du amak aurretik prestatuta zeukan deklarazioa eta, ondoren, negar artean, bere "errespetua eta maitasun sakona" agertu die emakumeen kontrako erasoak direla eta, bere alabak galdu dituzten beste ameei, eta bereziki oraindik alabaren gorpua aurkitu ez dutenei zein erailketaren arduraduna oraindik ezagutzen ez dutenei.
  Jendartea 2005-10-24 15:39

Larunbateko sutea nahita piztua izan zela diote adituek

Erabiltzailearen aurpegia Ukberri Joan den larunbatean, Barrikako Kurtzio auzoan (argazkian), Meñakotz hondartza ondoko zelai batean izandako sutea nahita piztua izan zela baieztatu dute, tokian bertan gertaeraren zergatiak aztertzen egon diren adituek. Sua aldi berean hiru tokitan hasi zela diote. Gainera, azken bi astetan, antzeko hainbat sute amatatu behar izan dituzte Kurtzio inguruan suhiltzaileek. Larunbatekoa, 5:30ean piztu zuten eta, ondorioz, inguruan dagoen txaletetik atera behar izan zituzten bertan bizi diren Domingo Aldaiturriaga eta Itziar Ruiz de Meñika senar-emazteak. Bertara joandako Getxoko suhiltzaile-etxeko bi taldeen laguntzari eta haizea hego-ekialdera aldatu zelari esker, etxea inguratzen duten zuhaixkaren batzuk baino ez ziren erre.
  Jendartea 2005-10-23 00:18

Barrikan eraikin bat jendez hustu dute bertan izandako sute bat dela eta

Erabiltzailearen aurpegia Ukberri Barrikako Kurtzio auzoan, Meñakotz hondartza ondoko zelai batean piztutako sutea dela eta eraikin bat jendez hustu behar izan dute goizaldean, Ertzaintzak jakitera eman duenez. Sutea 05:30ean piztu da eta 08:30ak arte etxetik alde egin behar izan duten bizilagunak ezin izan dira etxera itzuli.
  Jendartea 2005-10-20 21:39

Aintzane Garairen ustezko hiltzailea espetxeratu dute

Erabiltzailearen aurpegia Ukberri Aintzane Garairen mutil-lagun ohia eta ustezko hiltzailea espetxean sartu dute Gernikako Instrukziorako 1.go epaitegiko magistratuak arratsaldean horrela erabaki eta gero, Ertzaintzak jakinarazi duenez. M.H.B. 24 urteko gazteak iragan ostiralean desagertu eta astelehenean hilik topatu zuten Aintzane Garairen (argazkian) hilketaren inguruan sei orduz deklaratu du epailearen aurrean. Hainbat komunikabidek filtratu dutenez, badirudi M.H.B.-k Gernika-Lumoko ertzain-etxean Aintzaneren hiltzailea izatea aitortu zuela. Dena den, Ertzaintzak ez du gaztea epailearengana eraman legeak baimentzen duen 72 orduko epea agortu gabe. Bestalde, eitb24.com-en informazioen arabera, Herrizaingo Saila M.H.B.-k Bilbon duen lonja batean aurkitutako urpekaritza-labana Aintzane Garairen hiltzaileak erabilitakoa ote den ikertzen ari da.
  Jendartea 2005-10-20 00:21

Barrikako Andra Mari eliza txiki geratu da Aintzane Garairi azken agurra emateko

Erabiltzailearen aurpegia Ukberri Mila lagun inguru hurbildu da gaur Barrikako Andra Mari elizara Aintzane Garairen hileta-elizkizunean. Hasi baino 15 minutu lehenago heldu dira senitartekoak, malkoak begietan. Ama bereziki saminduta agertu da eta David hildako neskaren anaiak errespetua eskatu die han bildutako kazetariei. Amaitu eta berehala, elizaren ondoan dagoen hilerrian lurperatu dute gaztearen gorpua, familiaren asmoa erraustea bazen ere. Izan ere, auzia daraman epaileak hilotza ez erretzeko gomendatu die senitartekoei, udal arduradunek jakinarazi dutenez. Aintzane Garairen senide eta lagunekin batera, Jose Maria Ezpeleta Barrikako alkatea, Txomin Rementeria Bakiokoa eta Imanol Garai Sopelakoa izan dira bertan. Azkenik, 20:00etan elkarretaratzea egin dute Udaletxe plazan, elizaren ondoan.
  Jendartea 2005-10-19 23:33

Aintzane Garairen mutil-lagun ohiak neska hil zuela aitortu du

Erabiltzailearen aurpegia Ukberri Ikerketa iturriak aipatuz hainbat komunikabidek jakinarazi dutenez, Aintzane Garairen hilketaren egilea dela aitortu du, gaur arratsaldean, haren mutil-lagun izandako 24 urteko M.H.B.k. Antza, gazteak hasieratik emandako bertsioak ezin izan dio eutsi gorpua agertu zen unetik pilatutako ebidentziei. Hedabideen esanetan, erabakiorra izan da M.H.B.ren autoan odol arrastoak aurkitu izana, garbitu zuen arren, eta hasieran zuen koartada deseginda geratu da. Beraz, Aintzane Garairen hilketa erabat argituta gelditu daiteke datozen orduetan, bere mutil-laguna izandakoak epailearen aurrean deklaratzen duenean. Oraingoz, ikerketak sekretupean jarraitzen du eta M.H.B. Gernikako ertzain-etxean jarraitzen du.
  Jendartea 2005-10-18 23:10

Ehunka pertsona izan dira Barrikako kontzentrazioan Aintzane Garairen familiarekin elkartasunean

Erabiltzailearen aurpegia Ukberri Arratsaldeko 20:00etarako Barrikako Udalak deitutako kontzentrazioak Udaletxeko plaza bete jende utzi du. Bertaratutako lagun eta auzokideek, haietako askok ere plazan sartzeko aukerarik ez dutela izan, isiltasun osoz eman dituzte elkarretaratzeak iraun dituen 15 minutuak. Izan ere, soilik familiako lagun batzuk plaza erdira kandela batzuk uztera hurbildu direnean apurtu egin da isilunea, jendeak emozio handiz txalotu baitu. Lelorik eta pankartarik gabe, Udaletxe plazan Barrikako Udal Korporazioa laguntzen izan dira, besteak beste, Javier Madrazo EAEko Etxebizitza eta Gizarte Gaietako sailburua, Juana Iturmendi PPko legebiltzarkidea Gasteizen, Imanol Garai eta Txomin Renteria, Sopela eta Bakioko alkateak, Gemma Zabaleta PSE-EEko exekutibako kidea, Jone Goirizelaia Batasunakoa eta Israel Brull Bizkaiko EAko Antolaketarako idazkaria.
  Jendartea 2005-10-18 17:34

Eusko Jaurlaritzak bere dolumina agertu dio Aintzane Garairen familiari

Erabiltzailearen aurpegia Ukberri Eusko Jaurlaritzak "samina eta kezkarekin" bizi izan du Aintzane Garairen hilketa "ulergaitza" eta "onartezina" eta espero du Ertzaintzak "datozen orduetan" argitzea, gaur goizean Gasteizen publiko egin den deklarazioan jasotzen denez. Testua gobernu bileran hartutako erabakien artean onartu da eta bertan Aintzane Garairen familiari "elkartasuna eta babesa" azaldu diote. Aipatzekoa da deklarazioan ez dela genero indarkeriari buruzko inolako aipamenik egiten. Argazkian, Miren Azkarate Kultura sailburua eta Eusko Jaurlaritzako bozeramailea.
  Jendartea 2005-10-18 17:26

Aintzane Garairen erailketa gaitzesteko elkarretaratzea deitu dute arratsalderako Barrikan

Erabiltzailearen aurpegia Ukberri Jose Maria Ezpeleta alkatea buru zela, Barrikako udalbatza osatzen duten zinegotzi guztiek eman diote babesa David Garai Aintzane zenaren anaiari, gaur ordu batetan, komunikabideen aurrean egindako agerraldian. Ertzaintza, Babes Zibil eta Bakio eta Barrikako Udalei eskerrak ematearekin batera, "sufrimendu eta atsekabe handiko momentu hauetan", eraildako 26 urteko neskaren "senide eta lagunak errespetu osoz tratatzea" eskatu die hedabideei, uneotan, guzti horien zama bizkarrean hartu duen gazteak. "Nahiko larrituta gaude jada", gaineratu du. Begoña Lekanda Emakume Gaietarako zinegotziak, berriz, udalerriko alderdi politiko guztiek onetsitako adierazpena eman du ezagutzera, herritarrak, gaur arratsaldeko zortzietan, Udaletxe plazan egingo den kontzentrazio isilean parte hartzera deituz. Bitartean, ikurrina haga erdian eta xingola beltzarekin jarri dute udaletxean.
  Jendartea 2005-10-18 16:40

Eusko Legebiltzarreko kideek Aintzane Garairen hilketa salatu dute

Erabiltzailearen aurpegia Ukberri Gasteizko legebiltzarkideek eta Eusko Legebiltzarreko langileek kontzentrazioa burutu dute goizeko 12:00etan Aintzane Garai barrikoztarraren hilketa gaitzesteko. Ekintza horretan, Legebiltzarreko mahaiak adostutako testua irakurri dute, non hilketa "etxeko indarkeritzat" jo ostean Aintzane Garairen senide eta lagunei "sostengua helarazi" dieten. Era berean, Gasteizko Legebiltzarrak gogoratu du "Aintzaneren heriotza genero-indarkeriaren adierazpiderik larriena" izan bada ere, "egunez egun asko direla emakumeen kontra zuzentzen diren jarrerak eta adierazpenak". Ildo horretan, azpimarratu dute kontzentratuek, "guztiak" dira "gaitzestekoak eta arbuiatzekoak". Gainera, "bizitzak suntsitzeaz gain, genero-indarkeriak murriztu egiten du emakumeek kolektibo bezala alor publikoan izan behar duten parte-hartzea", eta horregatik hiritar guztiei emakumeen kontrako adierazpideen aurkako eta biktimen aldeko jarrera hartzeko eskatu diete. Legebiltzarreko kideek bertako Mahaiak egindako deialdiari erantzunez burutu dute elkarretaratzea. Argazkian, Izaskun Bilbao Eusko Legebiltzarreko presidentea / 20minutos.es (CC lizentziapean).
  Jendartea 2005-10-18 14:23

Atxilotuta jarraitzen du Aintzane Garairen mutil-lagun ohiak

Erabiltzailearen aurpegia Ukberri Ertzain-etxean dago oraindik M.H.B. 24 urteko gernikarra, "Aintzane Garairen hilketarekin zerikusia duelakoan" atzo arratsaldean atxilotua izan ostean, polizia iturriek baieztatu dutenez. Bien bitartean, ordu honetan Barrikako neskaren gorpuaren autopsia egiten ari dira; Bakio inguruan, itsaslabarren gune batean, aurkitu zuten hilotza, indarkeria eta sexu erasoaren arrastoekin. Auzitegiko medikuen lehenengo azterketen arabera, aurpegian kolpeak eta lepoan eta bularrean labankadak zituen gazteak. Gernika-Lumoko Instrukziorako epaitegiak du kasuaren ardura.

Nabarmenak

Zorion agurrak