Gazteok  Getxo 2015-09-24 15:25

Itzubaltzeta gaztetxearen 11. urteurrena ospatzen hasiko dira bihar

Itzubaltzeta gaztetxearen 11. urteurrena ospatzen hasiko dira bihar

Itzubaltzeta/Romoko gazteek Errekagane kaleko 1-5 zenbakiko eraikina bere egin zutenetik 11 urte igaro dira; 11 urte fabrika zahar hura ametsez eta kolorez betetzen, auzoa isiotzen eta "herritarren mesederako lan egiten". Eskualdeko gaztetxerik zaharrenetarikoa izanda, Itzubaltzeta gaztetxea erreferente bihurtu da egiteko horretan. 2004ko irailaren 30ean okupatu zuten eraikina, Ertzaintzak Santa Eugenia kalean zegoen gaztetxea hustu eta hiru egunera. Egun hori gogoratzeko eta 11 urteak ospatzeko urteurrena abiatuko dute bihar, barikuan.

  Jendartea  Getxo 2015-09-16 12:40

Gobela ibaiko aldameneko espazio publikoa berriro zabalik, Errekagane inguruan

Gobela ibaiko aldameneko espazio publikoa berriro zabalik, Errekagane inguruan

URA Uraren Euskal Agentziak Gobela ibaiaren aldameneko espazio publikoa jendarteari "itzuli" dio Errekagane inguruan, Itzubaltzeta/Romon; Cristobal Valdes hustubidetik Avanzadarainoko tartean. Izan ere, azken bi urteetan zehar, URAk espazio hori okupatuta izan du, Gobela ibaiaren hobetze hidraulikorako lanak egin ahal izateko: ibilgua berriztatzea ur-goraldietako urak husteko ahalmena lortzeko, eta, hartara, inguruan uholdeak saihesteko, alegia.

  Politika  Getxo 2015-07-24 15:30

Getxoko Udalbatzak 95.000 euroko kreditua onartu du Errekaganeko pabiloiak berritzeko

Getxoko Udalbatzak 95.000 euroko kreditua onartu du Errekaganeko pabiloiak berritzeko

Getxoko Udalak 95.000 euroko kreditua onartu du Itzubaltzeta/Romoko Errekaganeko pabiloien berritze-proiekturako. Horren alde agertu dira EAJ, EH Bildu, GUK eta PSE-EE. PPk neurri horren kontra bozkatu du eta Ciudadanoseko zinegotzia abstenitu egin da. Udal iturriek azaltzen dutenez, PP eta Ciudadanos ez ezik, talde politiko guztiak agertu dira pabiloi horien berritzearen alde, “gazteen eta bere erabilpenerako aurkeztuko diren kolektiboen jarduera errazteko”. Gobernu Taldeak gogoratu duenez, bere egunean adostu ziren hurrengo konpromisoak: pabiloi horiek berreskuratzea, lurzoru horiek desjabetzea eta auzoaren esku jartzea, Itzubaltzeta/Romon horrelakoen eskaera zabala dagoelako. Egitura hori erabiltzen zuen gazte mugimenduagaz adostu zituen Udalak konpromisoak. Horiekaz hitzarmen bat sinatu zuen Ezekiel Agirre kaleko etxetxo batera joateko berritutako eraikinera itzuli ahal izan arte.

  Gazteok  Erandio  Getxo 2015-04-15 16:20

IGAk Erandioko gaztetxean egingo ditu iaz bertan behera utzitako kontzertuak

IGAk Erandioko gaztetxean egingo ditu iaz bertan behera utzitako kontzertuak

Zapatu honetan, hilak 18, Itzubaltzetako Gazte Asanbladak jaialdia egingo du Erandioko Kalezulo gaztetxean, 21:00etatik aurrera. Bertan, "Har ezazu gaztetxearen giltza" goiburupean izango dira Iheskide, Siroka eta Guda Dantza musika taldeak; sarrera 5 eurotan eskuratu ahal izango da. Iaz Itzubaltzeta gaztetxearen 10. urteurreuna ospatzeko jaialdiko kontzertuak bertan behera gelditu behar izan zituzten elektrizitateagaz izandako arazoen ondorioz. Hori dela eta, orduan egitekoak ziren kontzertuak zapatu honetan berreskuratuko dituzte, aipatutako Erandioko eraikin autogestionatuan.

  Gazteok  Getxo 2015-04-15 10:30

Auzoko lanketan parte hartzeko deia luzatu dio gazteriari Itzubaltzetako Gazte Asanbladak

Itzubaltzetako Gazte Asanblada auzoko prekarietatea ikertzeko eta hori azaleratzeko lanketan murgilduta dago. 2014-2015 ikasturtearen hasieran, galdetegi bat zabaldu zuten auzoko neska-mutilen artean Itzubaltzeta / Romoko gazteriaren egoeraren inguruko datuak jasotzeko asmoagaz. “Hasiera izan duen eta luzerako den prekarietatearen inguruko borroka honek 'moskeo' kanpaina bategaz hasi zen”, azaldu dute gazte asanbladako kideek. Ondoren, auzoan zehar informazioa zabaltzen hasi ziren. Gazteriari “prekarietatearen aurpegi guztiak erakutsi” ostean, galdetegian jasotako datuak kaleratzen hasi dira IGAko kideak.

  Gazteok 2014-11-07 18:49

Mendira joko du bihar Itzubaltzetako Gazte Asanbladak

Erabiltzailearen aurpegia Ukberri

Biharko, larunbata, Ganekogortako mendilerrora joateko txangoa antolatu du Itzubaltzetako Gazte Asanbladak. IGAko neska mutilek Bizkaia eta Araba arteko mugan diren Ganekogorta eta Pagasarri mendietako gainetara igoko dira, hurrenez hurren 998 eta 673 metrora daudenak. Gazteek zabaldu dutenez, goizeko 9etan Itzubaltzeta / Romoko San Jose elizaren atarian lotu dira, bertatik abiatzeko. Ohartarazi dutenez, norberak bere bazkaria eraman beharko du. Aipatu ekimena IGAk darabilen "aisialdi alternatiboan" kokatzen da, "eredu propioa sortu" nahi duena. Argazkian, behi bat Ganekogorta eta Pagasarri arteko bidean, bisitariei so / cc-by Egizu! Getxo Euskaldun.

  Gazteok 2014-10-04 17:19

Hamargarren urteurrena ospatzen dabil Itzubaltzeta gaztetxea

Erabiltzailearen aurpegia Ukberri

Itzubaltzeta Gazte Asanbladak antolatuta, "Ausartu, Sortu, Sartu! 10 urte, 10 egun, 11 ekimen" lelopeko jardunaldiak bizitzen ari da egunotan Itzubaltzeta / Romo herria. Santa Eugenia plazan jarritako karpa erdigunea bilakatuta, sorkuntza, kultura eta jendarte arazoei arreta egiteko aukera izan dute auzokideek, beti ere gazteen ikuspegitik. Bihar amaiera emango diote urtemuga borobilari, bitartean gaur 15:00etan, herri bazkaria; 17:00etan, mus txapelketa; 19:00etan, batukada; eta 21:0etan Iheskide eta Siroka taldeen kontzertua zein bihar, 20:00etan, kantautoreen emamaldia oraindik gozatzeko dituztela. Horietara auzokide guztiak gonbidatu dituzte, baina IGAk deialdi berezia egin die Itzubaltzeta gaztetxea orain dela 10 urte, 2004ko irailaren 30ean okupatu zuten neska-mutilei zein azken hamarkadan gazte zein beste auzotarrentzako topagunea sortzen lan egin dutenei. Gonbidapen horretan, jakina, ez dituzte ahaztu 2004ko irailaren 27an, Santa Eugenia kalean zegoen aurreko gaztetxea defendatzean Ertzaintzak jipoitutako guztiak. Argazkian, Maria Rivero Siroka taldeko abeslaria.

  Gazteok 2014-10-01 03:45

Itzubaltzeta gaztetxea erosteko 1,5 milioi gorde ditu Getxoko Udalak

Erabiltzailearen aurpegia Ukberri

Itzubaltzeta / Romoko Errekagane kaleko Itzubaltzeta gaztetxearen lurrak Gobela ibaiko lanak bukatu ondoren erostea onartu du bart Getxoko Udalbatzak. EAJ, EH Bildu eta PSE-EE bat etorri dira 1.501.000 euroko kreditua agintzen, Udalak zentro soziala bereganatu eta erabilpen publikoa eman diezaion. PP bakarrik gelditu da "okupen" aurkako gurutzadan. Eskuratu eta zahar-berritze lanak egin ondoren, eraikina Itzubaltzetako Gazte Asanbladaren esku geldituko da, ezusterik ezean. Halere, ez da era esklusiboan izango. Getxoko Udalak atea ireki dio eraikinaren zatiren bat berarentzat gordetzeari eta, bestalde, gazteek herriko beste elkarteekin partekatu beharko dute, Koldo Iturbe Gazteria zinegotziak azaldu duenez. Udalak eta Itzubaltzeta gaztetxea kudeatzen duen elkarteak "oso aurreratuta" dute hitzarmena, etorkizunean udal eraikinaren erabilera eta auzokideekiko elkarbizitza arautuko duena. Argazkian, Itzubaltzetako Gazte Asanbladaren agerraldi bat, artxiboko irudian.

  Jendartea 2014-06-12 20:09

URAk Gobela ibaiaren ibilgu berria "egituratzen" dihardu Errekaganen

Erabiltzailearen aurpegia Ukberri

Eusko Jaurlaritzaren menpeko URA Uraren Euskal Agentziak gaur zabaldu duenez, "Gobela ibaiaren zabaltze-lanak nabarmen handituko dute ibaiaren aldamenean bizi diren bizilagunen segurtasuna ur goraldiei dagokionez, ibaiaren ur-hustuketarako ahalmena handitu eta ibilgu berriari 100 urteko itzultze aldiko ur-goraldien emaria eusteko ahalmena ematen baitzaio". Ibaia estu inguratzen duen hiri-bilbe dentsoa kontuan izanda, URAk ibaiaren ur-hustuketarako ahalmena handitzen dihardu, ibilguaren zabalera egungo 6 metrotik 11 metrotara handituz. "Hau da, ibilgua zabaltzen ari gara ur handien emariak ibilguan kabi daitezen, eta, ondorioz, atzerantz eraman ditugun ertzen ormak sendotu behar izan ditugu", prentsa ohar bidez azaldu dutenez. Horretarako, Gobela ibaiaren ibilgu berrian pantailak jarri dituzte Itzubaltzeta / Romoko Errekagane kalean, Kiroldegitik Avanzadaraino doan tartean, ibai ertzen arteko luzera 11 metro izateko. Aldi berean, ibai ibilgu berriaren hondoan harlauzak jartzen dihardute, ibaiari behin-betiko forma berria emanez. Ibilguari zabalera berria eman ahal izateko, 276 pantaila eraiki dira Errekaganeko eremuan. Orotara, 768 metro lineal pantaila dira, ertzen euskarri.

  Jendartea 2014-04-22 14:57

URAk 400 metrotako hodia jarri du Itzubaltzetan

Erabiltzailearen aurpegia Ukberri

URA Uraren Euskal Agentziak ordezkatu ditu behin-behineko ur ponpaketa sistemak Gobela ibaiko Errekagane kaleko antzinako ibilguan, Itzubaltzeta / Romon. Horien ordez, Cristobal Valdes eta La Bolako gainezkabideen artean ur desbideratze bat ireki du, Cristobal Valdeseko gainezkabidetik uretan beherako ibilguan ur emari egonkorra ahalbideratze aldera, Eusko Jaurlaritzaren menpeko erakundeak baieztatu duenez. Gainezkabide bi horien artean 400 metrotako luzera duen hodi bat jarri dute, uren ponpaketarako sistema barne. "Izan ere, orain, Errekaganeko eremuan ibaiaren estaldura eraisteko lanak bukatzear dira, eta beraz, ez dute gehiago oztopatzen behin-behineko hodi hori jartzea", azaldu du URAk. 2013an Errekaganen lanak hasi zituztenetik honako hauek egin dira: ibai ibilgua zabaltzea ahalbidetuko duten 227 pantailak (jarriko direnen %82a) eraiki dira, La Bolako gainezkabidetik desbideratu da ura, eremuko arrain fauna tokiz aldatu da, Errekaganeko ibilgu hondoaren zorua egin da eta urbanizazio lanei ekin zaie. Argazkia: © URA.