Ekonomia 2009-10-27 19:57

Berangoko eskola amerikarrean gose greba abiatu du enpresario txiki batek

Erabiltzailearen aurpegia Ukberri Petro Cires Kantabriako (Espainia) enpresa txiki bateko jabeak zor dizkioten lanak kobratu arteko gose greba egiteari ekin dio gaur. Espainiako "El Diario Montañes"-ek zabaldu duenez, protesta egiteko Berangoko American School Of Bilbao izeneko eskola aukeratu du Ciresek. Izan ere, pasa den urtean bertako eraikina erabat zaharberritzeko lanak egin zituen bere enpresak, sozietate batek azpikontratatuta. Baina, eskolak zor guztiak kitatu bazituen ere, dirua jaso zuen enpresak berari ez ziola ordaindu salatu du enpresa-gizonak, guztira 44.000 euroko zorra aldarrikatzen duela. Ciresek langileei kobratu behar zuten dirua aurreratu zien eta bitartean berea zena eskatu zuen, behin eta berriro. Horrela darama urte oso bat, lanak amaitu zituenetik. Etengabe aitzakiak eta "datorren astean ordainduko dizugu" esaldia baino ez dituela entzun salatu du. Tartean, eskolak Halloween jaialdia antolatu du iganderako. Argazkian, ikastetxeko fatxada / © American School Of Bilbao.
  Ekonomia 2009-10-23 00:20

Leonardo Da Vinci beketarako hitzarmena sinatu dute EHUk eta Getxok

Erabiltzailearen aurpegia Ukberri Leonardo Da Vinci izeneko beken deialdiari buruz informazioa zabaltzeko hitzarmena sinatu berri dute Getxoko Udalak eta Euskal Herriko Unibertsitateak. Beka horiek lehen esperientzia profesionala Espainiatik kanpoko Europako enpresetan burutu nahi duten gazte titulatu berriei zuzenduta dago eta sinatutako hitzarmenaren bidez, Getxo udalerrian horien berri emango du Getxolan Ekonomia Sustapenerako eta Enplegu Zerbitzuak. Lankidetza hitzarmena zenbait ekintzen bidez gauzatuko da, esaterako, programa zabaltzea, hautaketa-prozesuan parte hartzea eta Curriculum Vitae programaren eskakizunetara egokitzeko orientazioa ematearen bidez. Beken deialdi honetan 45 beka emango dira guztira eta lehen esperientzia profesionala Espainiatik kanpoko Europako enpresetan burutu nahi duten gazte titulatu berriei zuzenduta dago. Destinoko herrialdeak Ipar Euskal Herria, Alemania, Frantzia, Italia, Portugal, Erresuma Batua eta Txekiar Errepublika izango dira. Izen-ematea azaroaren 2tik abenduaren 4ra egin beharko da Bizkaiko Campuseko Enplegu Zentroan, edo webgunearen bidez: ehu.es/enplegugunea. Irudian bekak iragartzeko kartela.
  Ekonomia 2009-10-22 21:08

Alakranaren tripulazioa "ahalik eta lasterren" bueltatzea eskatu du Udalarrantzek

Erabiltzailearen aurpegia Ukberri Alakrana atunontziaren askatasuna aldarrikatzeko mobilizazioa izango da bihar eguerdian Bermeoko udaletxearen aurrean. Eta elkarretaratze horrekin bat egin du gaur Udalarrantz Bizkaia eta Gipuzkoako udal arrantzaleen sareak, Europa Press albiste agentziak zabaldu duenez. Udalarrantz sarean, Lemoiz ez ezik Bermeo, Elantxobe, Getaria, Hondarribia, Lekeitio, Mundaka, Mutriku, Ondarroa, Orio, Pasaia, Santurtzi, Zierbena eta Zumaiako udalak ere badaude. Alakranaren tripulazioa "ahalik eta lasterren" etxeratzeko desioa islatu du Udalarrantzek. Bide horretan, "egoera behin betiko konpontzeko" har daitezkeen neurriei babesa eman diete, "kaltetutako arrantza-sektorea" udaletako "gizarte eta ekonomia kolektibo garrantzitsua" izanik. Era berean, "auzokide arrantzaleen" egoeragatik kezka agertu eta elkartasuna adierazi diete bahituen senide eta urkoei.
  Ekonomia 2009-10-22 18:51

Bihar banatuko dituzte Lur Barriak sariak

Erabiltzailearen aurpegia Ukberri Ostiral honetan, urriak 23, Lur Barriak sarien banaketa ekitaldia egingo dute, eguerdiko 12:30etik aurrera, Leioako Mendibile Jauregian. Erandio, Getxo, Leioa, Uribe Kosta, Bermeoaldea, Mungialdea eta Txorierriko Behargintza zentroek urtero antolatzen dute sariketa, kultura ekintzailea eta enpresen sorrera bultzatzeko asmoz, udal leioaztarreko iturriek zehaztu dutenez. Sariak honako hauek izango dira: lehenengo saria, 6.000 euro eskudirutan. Bigarren sariak, berriz, enplegu zentro bakoitzak ematen ditu. Beraz, tokian tokiko zazpi sari izango dira guztira; sari bat Behargintza bakoitzeko. 2.500 euroko sariak izango dira. Amaitzerakoan, luncha egongo da bertan bildutakoentzat eta ondoren txakolin dastaketa egin ahal izango dute. Argazkian, Leioako Andoni Arestiren dantza eskolak eskuratu zuen iaz Lur Barriak lehiaketaren lehen saria / © Leioa.net.
  Ekonomia 2009-10-07 16:38

Indarrean sartu da gaur langabetuak kontratatzeko Getxo Udaleko laguntzen deialdia

Erabiltzailearen aurpegia Ukberri Atzo argitaratu zen Bizkaiko Agiri Ofizialean Getxoko Udalak bertoko enpresek eta saltokiek udalerriko langabetuak kontrata ditzaten deitutako ez ohiko diru-laguntzen iragarkia (pdf). Hortaz, itzuli beharrik gabeko laguntzak gaurtik aurrera eska daitezke, 300.000 euroko funtsak agortu edo azaroaren 20ra arte. Orotara, ehun lagun baino gehiago laneratzea aurreikusten dute tokiko arduradunek. Pasa den irailaren 25ean, Imanol Landa alkateak laguntzak aurkeztu zituenean esan zuenez (mp3), “helburu nagusia Getxon dagoen langabezi tasa -gaur egun %10,1ekoa- murriztea da; baita bertoko merkataritza eta enpresa jarduera sustatzea ere”. Sei hilabete edo gehiagoko kontratuentzat, 4.000 euroko subentzioa emango dute. Hiru hilabeteko edo gehiagoko kontratuentzat, berriz, 1.500 euro lanaldi osoko lanpostu berri bakoitzerako. Kopuru horiek % 10 igoko dira (4.440 euroraino edo 1.650 euroraino), baldin eta emakumezkoak edo 45 urtetik gorako pertsonak badira kontratatutakoak. Argazkian, Aitor Soloeta Sustapen Ekonomikorako zinegotziarekin batera aurkeztu zituen diru-laguntzak Landa alkateak, joan den ostiralean.
  Ekonomia 2009-10-01 19:53

EHUk administrazio eta zerbitzuetarako 111 lanpostu berri sortuko ditu

Erabiltzailearen aurpegia Ukberri Administrazio eta zerbitzuetarako beste 108 lanpostu sortzea erabaki du gaurko bilkuran EHUko Gobernu Kontseiluak. Beraz, sortuko den lanpostu kopurua guztira 111koa izango da, unibertsitateko arduradunen hitzetan, "beste hiru plaza kentzearen ondorioz hiru lanpostu berri sortu direla kontuan hartuta". Neurri horrekin, bere "kudeaketa egitura indartzeko asmo handiko proiektua" jarri du abian EHUk. Proiektu horren lehenengo gertaera gogoangarria aurtengo otsailean izan zen, 71 lanpostu sortu baitziren, Erreferentziazko Plantila izeneko dokumentuan jasotako aurreikuspenen harira. Kudeaketa lanak egiteko eta irakasleei eta ikertzaileei laguntzeko administrazio eta zerbitzuetako langileen taldean, eta bereziki, prestakuntza handieneko mailetan, historikoki egon den langile faltari aurre egiteko ahaleginari erantzuten dio neurriak, tokiko iturrien arabera. Orain bi urte Gobernu Kontseiluak onartutako 2007-2011 aldirako Plan Estrategikoak hala nabarmendu zuen: "Bada defizit kroniko bat laguntzeko pertsonal teknikoaren alorrean; gainera, kualifikazio handiko eskakizuna duten postuen ehunekoa txikia da". Argazkian, Leioa eta Erandioko campuseko hainbat fakultate.
  Ekonomia 2009-10-01 09:24

Bertoko langabetuen kontratazioa sustatzeko, enpresak diruz laguntzeko 300.000 euro jarriko ditu Getxoko Udalak

Erabiltzailearen aurpegia Ukberri Getxoko Udalak 300.000 euro emango ditu, itzuli beharrik gabeko diru-laguntzetan, bertoko enpresek eta saltokiek udalerriko langabetuak kontrata ditzaten. Orotara, ehun lagun baino gehiago laneratzea aurreikusten dute tokiko arduradunek. Imanol Landa alkatearen arabera, “helburu nagusia Getxon dagoen langabezi tasa -gaur egun %10,1ekoa- murriztea da; baita bertoko merkataritza eta enpresa jarduera sustatzea ere”. Sei hilabete edo gehiagoko kontratuentzat, 4.000 euroko subentzioa emango dute. Hiru hilabeteko edo gehiagoko kontratuentzat, berriz, 1.500 euro lanaldi osoko lanpostu berri bakoitzerako. Kopuru horiek % 10 igoko dira (4.440 euroraino edo 1.650 euroraino), baldin eta emakumezkoak edo 45 urtetik gorako pertsonak badira kontratatutakoak. Lanaldi partzialetarako diru-laguntzen zenbatekoa, berriz, proportzionalki murriztuko dute. Subentziorik ezingo dute eskuratu ohiko lanaldiaren %50 baino gutxiagoko lanaldia duten kontratazioek. Argazkian, Aitor Soloeta Sustapen Ekonomikorako zinegotziarekin batera aurkeztu zituen diru-laguntzak Landa alkateak, joan den ostiralean.
  Ekonomia 2009-09-30 00:04

Barrikako nagusien egoitzaren laneko segurtasun neurrien gaineko azalpenak eman beharko ditu bihar Aldundiak

Erabiltzailearen aurpegia Ukberri Barrikako Elorduy nagusien egoitza-ospitaleak arrisku biologikoen prebentzioaren arloan daukan egoerari buruzko azalpenak eman beharko ditu asteazken honetan, irailak 30, Juan Mari Aburto diputatuak, Gizarte Gaietarako batzordean. Uztailaren 21ean Ana Telleria Ezker Batuko Bizkaiko batzarkideak azaldu bezala (pdf), aipatu hilaren erdialdean kaleratu zuten "irregulartasunak" salatu zituen langilea. ELA sindikatuak azaldu zuenez, bere bost lankide bakteria batekin kutsatu zirela jakinarazi zion Osalan Lan Osasun eta Segurtasuneko Institutuari beharginak. Hala ere, mobilizazioak bertan behera utzi zituen ELAk, Elorduy egoitzako zuzendaritzak langilea berriro hartuko zuela adierazi ostean. EBren arabera, CCOO sindikatuak ere aurtengo otsailetik zeukan salaturik egoera horrelakoa zela. Osalanek apirilaren 27an eman zuen txostenean berretsi zuen hori, eta azaleratu egin zuen "segurtasun eta osasun irregulartasunak" zeudela. Hori guztiori kontuan harturik, Aburto batzordean agertzea eskatu zuen Telleriak, uste dutelako "Aldundiak egindako ikuskaritzen emaitzek egoitzaren egoera zein den argitu dezaketela". Argazkian, Barrikako Elorduy nagusien egoitza.
  Ekonomia 2009-09-22 19:48

Kaleratutako langileak hartu beharko ditu Getxoko garabi enpresa berriak

Erabiltzailearen aurpegia Ukberri Getxoko Gobernu Taldeak gaur onartu du ibilgailuak garabiaz kaleetatik erretiratzeko zerbitzua enpresa berri bati emateko lehiaketa zabaltzea. Kontratuak lau urteko iraupena izango du eta aurrekontua urteko 170.000 eurokoa izango da (aurreko enpresarekin 244.000 urtekoa izan zen). Halere, baldintza-pleguan jasotzen denez, orain arte garabi zerbitzua ematen zuten 6 langileak (4 behin-betiko langile eta 2 behin-behinekoak) hartu beharko ditu enpresa berriak. Hain zuzen ere, hori zen oposizioko alderdiek eskatzen zuten baldintzetako bat. Getxoko PSE-EEk biharko osoko bilkurarako aurkeztu zuen auzi horren gaineko mozioa, tokiko arduradunei garabi zerbitzua "modu kaskarrean kudeatzea" egotziz. Dirudienez, udal batzarra egin baino egun bat lehenago erabakita utzi nahi izan dute gaia agintari jelkideek. Duela hiru urtetik zerbitzua zeraman enpresari maiatzean amaitu zitzaion kontratua. Hala ere, abuztuaren 21era arte arduratu zen garabiaz. Kontratua ez luzatzeko, enpresak eta Udalak hartutako erabakiak, kalean utzi zituen sei langileak. Ordutik, hainbat elkarretaratze egin dituzte udaletxe aurrean. ELAk salatu zuenez, Leioako garabia dabil orain Getxo udalerriko kaleetatik kotxeak eramaten. Argazkian, garabi bat autoa eramaten Leioan.
  Ekonomia 2009-09-18 17:40

Elikagaien erabiltzaile ikastaroak egingo dituzte Gorlizen eta Armintzan

Erabiltzailearen aurpegia Ukberri Datorren astean, elikagaien erabiltzaile txartela lortzeko ikastaroa egingo dute Gorlizko kultur etxean. Izena emateko epea zabalik dago jada. Jakin beharrekoa da ikastaroa sukaldari, zerbitzari eta txikizkako merkataritza langileei zuzenduta dagoela. Lapiko artean dabiltzanek hilaren 22an, asteartea, izango dute lehen eskola, 17:00etatik 20:00etara; eta bigarrena ostegunean, hilak 24, ordutegi berean. Zerbitzariek saio bakarra izango dute, ostegunean, 9:00etatik 12:00etara. Azkenik, txikizkako merkataritzako langileek hilaren 22an, asteartea, izango dute lehen saioa eta, bigarrena, bi egun barru. Biak ala biak 15:00etatik 16:30era izango dira. Gorlizko sukaldarien ikastaroa bete-beterik dagoela jakinarazi du Adesa trebakuntza zerbitzuak. Hala ere, interesa daukatenek Lemoizko kultur etxean, Armintzan, izango dute egiteko aukera, urriaren 20an eta 22an, 17:00etatik 20:00etara. Bertoko eskolak sukaldarientzat izango dira bakar-bakarrik. Argazkian, sukaldari bat lanean / cc-by Javi Vte Rejas
  Ekonomia 2009-09-12 17:22

Getxolanek langabetuentzat prestatutako katalogo berria aurkeztu du

Erabiltzailearen aurpegia Ukberri Ekonomia Sustapenerako zinegotzi Aitor Soloetak "Prestatu enplegurako, prestatu ekiteko" argitalpena aurkeztu zuen atzo prentsaurrekoan, Getxolanek (antzinako Behargintza) udalerriko langabetuentzat prestatutako formazio planaren katalogo berria, alegia. Getxolanetik 2009ko bigarren seihilekorako Prestakuntza Plana garatu du, eskaera anitzari erantzun egokia eta doitua emateko; baita lan-merkatuan sartu nahi duten udalerriko auzotarren beharrei erantzuteko ere, udal iturriek argitu dutenez. Plan horretan udalerriko 300 edo 400 bat pertsonak parte hartzea espero dute. Argazkian, asteazkenean aurkeztu zuten Getxolan Imanol Landa alkateak eta Aitor Soloeta Ekonomia Sustapenerako zinegotziak.
  Ekonomia 2009-09-09 21:56

Enplegua sustatzeko zerbitzuak uztartzeko asmoz, izena aldatu diote Getxoko Behargintzari

Erabiltzailearen aurpegia Ukberri Getxolan marka berria aurkeztu dute gaurko prentsaurrekoan Imanol Landa alkateak eta Aitor Soloeta Ekonomia Sustapenerako zinegotziak, hemendik aurrera Udalak alor horretan eskaintzen dituen zerbitzuak batzen dituena, alegia. Hartara, Enplegu eta Ekonomia Garapenerako Bulegoa (Behargintza) Getxolan deituko da aurrerantzean. Pertsona eta enpresei enplegu eta ekonomi sustapeneko zerbitzuak eskaintzen dizkieten eragileak anitzak direla ohartuta eta dauden baliabideak eskuratzea errazagoa egin aldera sortu dute marka berria, udal agintariek aipatu dutenez. Landaren hitzetan, ekimen honen helburua zerbitzu horiek bultzatu eta herritarren eskura ipintzea da, bereziki ekonomiak beheraldia bizi duen honetan. “Herritarrengana hurbildu nahi dugu 'leihatila bakarra' delakoaren bitartez, baita udalerrian ekonomi sustapen eta enpleguaren esparruan erreferente izatea ere. Hitz batean esanda, izen propioa sortu dugu, grafismo bereziarekin, eta berariazko eta egungoarekin bat ez datorren funtsarekin, zerbitzuaren publiko objektiboak-bezeroek erraz identifika dezaten”, esan du alkateak. Argazkian, Landa eta Soloeta Getxolan aurkezten.
  Ekonomia 2009-09-04 13:13

Bertan behera utzi du greba Autobuses Vascongadosek

Erabiltzailearen aurpegia Ukberri Gaurtik astelehenera bitartean deitutako egun osoko lanuzteak bertan behera uztea erabaki zuten atzo Autobuses Vascongados enpresan, Zuzendaritzak eta UGT Euskadi nagusi den langileen batzordeak aurrehitzarmena adostu ostean. Besteak beste, Gernika, Zornotza, Bermeo, Mungia eta Derio EHUko Leioa eta Erandioko campusarekin lotzen ditu aipatu garraio zerbitzuak, Bizkaibusekin daukaten hitzarmenari esker. Ikasleen errektore ordeari kaltetutako unibertsitarioei azterketak atzeratzea eskatua zion jada Lurgorri Ikasle Elkarteak (EAJren ingurukoa). Izan ere, Araudian ikaslearen eskubide hori batzen da, euren hitzetan. Hala ere, ez da beharrezkoa izango. Autobuses Vascongadoseko beharginei dagokienez, lan hitzarmen berriak bi urte iraungo du, eta, besteak beste, %4ko soldata igoera jasotzen du aurtengorako. Argazkian, Bizkaibuseko garraioak Leioako campuseko geralekuetako batean / cc-by-nc-sa jmendicute.
  Ekonomia 2009-09-02 00:40

Artean irekiko duten denda berri baterako langile bila dabiltza

Erabiltzailearen aurpegia Ukberri Kiabi izeneko frankizia frantziarrak denda berri bat irekiko du Leioako Artea merkataritza gunean. Bertan lan egiteko pertsonak behar dira eta ez da inongo perfilik bete behar, Leioako Enplegu eta Ekonomia Garapenerako Zentroak jakinarazi duenez. Interesa duten guztiek tokiko Behargintzara (Mendibile, 3. Telefono zenbakia: 944 004 195. Faxa: 944 022 541. E-posta: behargintza[abildua]leioa.net) bertara bidali edo eraman dezakete curriculuma. Horretarako azken eguna heldu den asteazkena, irailak 2, izango da. Argazkian, Kiabi frankizia frantziarraren beste saltoki bat / © Leioa.net.
  Ekonomia 2009-09-01 13:15

Sasymak langile bat kaleratu izana "baliogabetzat" jo du epaileak

Erabiltzailearen aurpegia Ukberri Bilboko Lan Arloko 5. zenbakiko Epaitegiak "baliogabetzat" jo du Erandioko Axpe auzoko Sasyma enpresak Toribio Romero CCOO-Euskadi sindikatuko ordezkaria kaleratu izana eta langilea "berehala" berrartzea agindu du. Romero pasa den apirilaren 20an kaleratu zuten, Sasyma eta Machin enpresek hiru lankide errumaniarrekin erabilitako demaseko jokaerak edo "esklabotza baldintzak" salatu eta aste batera. Lan Ikuskaritzak salaketa aintzat hartu eta 2.800 euroko isun bana jarri zizkien enpresei. Epaiketa uztailaren 23an burutu zen, enpresak bitartekaritza guztiak ukatu ondoren. Berriro hartzeaz gain, langileari kaleratu zuten egunetik kobratu beharreko soldata eta "eragindako kalteengatik" 2.500 euro ematea agindu dio Sasymari epaileak. Bitartean, Asuako Befesa enpresako langileek protesta egin zuten atzo ostiralean langile batek bizia galdu izana salatzeko. Argazkian, Sasymako langileek egindako mobilizazioetako bat.