Eragileak deialdi zuzena egin die oraindino sinatu ez duten erandioztarrei: "ados bazaude arrazoiekin eta zertarako biltzen ari garen sinadurak, etorri sinatzera ondoko egunetan". Herritarrei kanpainan laguntzeko aukera ere eman diete.
Hitzorduak
GEDk honako hitzorduak ipini ditu sinatu ahal izateko:
- Otsailak 5, domeka, 11:00etatik Apurtuarteren eta Erandioren arteko derbia amaitu arte, Erandiogoikoko Arteaga futbol-zelaian.
- Otsailak 12, domeka, 13:00etatik aurrera, Astrabuduko Josu Murueta plazan.
- Otsailak 19, domeka, 13:00etatik aurrera, Altzagako Jado kalean.
- Otsailak 26, domeka, 13:00etatik aurrera, Altzagako Jado kalean.
Pasa den maiatzaren 20an "adin, pentsaera eta izaera desberdinetako" Erandioko hainbat auzotarrek abiatu zuten "Erandiok Erabakia" izeneko adierazpena. Erandioko Gure Esku Dago taldeak testuaren aldeko 2.500 sinadura batu gura ditu, udalerriko erroldaren %10 bat. Horretarako, GEDk hainbat mahai ipini zuen udako jaietan eta Gabonetan.
Sinadurak batzeko kanpainarako GEDk zabaldutako oharra:
Erabakitzeko eskubidearen aldekoak gara honako arrazoiengatik:
- Eskubide hau aldarrikatzen dugunean inongo bitartekaririk gabe herritarroi zuzenean dagokigun eskubide bat gauzatzeaz ari gara.
- Demokrazia gure bidea eta gure helmuga da, garrantzitsua kontsultatuak izatea baita, ez emaitza.
- Bizikidetza arerioarekiko errespetuaren ondorio baino ezin da izan, ez eredu zehatz baten inposizioarena, eta zentsu honetan, bide demokratikoetatik proiektu politiko oro defendatzea eta gauzatzeak zilegi behar du izan.
- Gure etorkizunaren aktore izan nahi dugu, ez ikusle hutsak.
Gure ustez eskubide hau gauzatzeko giltza jendartearen aktibazioan datza, "gure esku dagoela" uste dugu, eta oraingo honetan zure sinadura eske gatoz jarraian azaltzen dugun honetarako:
- Erabakitzeko eskubidearen aldeko zure atxikimendua adieraz dezazun.
- Erandioko Gure Esku Dago elkarteak sustatuko adierazpena babestu dezazun. Adierazpen hau, herri babesaren erakusgarri berau sinatzen duten erandioztarren sinadurekin batera Erandioko udalean aurkeztuko dugu, instituzio honek jasotako erabakitzeko eskubidearen aldeko moziotzat onar dezan.
Sinadura-orriaren testua:
2016ko maiatzaren 20an, Erandioko adin, pentsaera, eta izaera desberdinetako auzotarrok bildu ginen Pertsonen Erabakitzeko Eskubidearen inguruan berba egiteko eta bertan adostu genituen ideiak gure auzokide guztiei zabaldu nahi dizkiegu:
- Herri bat gara, erabakitzeko eskubidea dugu, herritarron garaia da.
- Gure estatus politikoa eta gure etorkizuna erabakitzeko kontsultatuak izateko eskubidea dugu euskal herritarrok.
- Dagokigun eskubide hori gauzatzea lortu arte ilusioz lan egiteko konpromisoa hartzen dugu, hau sinatzen dugun erandioztarrok.
- Ezinbestekotzat jotzen dugu akordio plurala lortzea erabakitzeko eskubidea bideratzeko.
Erandioko bizilaguna naizenez eta aurretik aipatutako ideiekin bat natorrenez gero, sinatzen dut adierazpen hau.
