Kultura 2005-06-01 20:21

Musika Eskolan matrikulatzeko epea zabalik dago Erandion

Erabiltzailearen aurpegia Ukberri Erandion musikaz gozatzera animatzen diren ikasle berriek gaurtik aurrera zabalik dute Erandioko Musika Eskolan izena emateko epea. Hauxe da Musika Eskolan jendea hartzeko ordutegia: goizez, astelehen, asteazken eta ostiraletan, 10:00etatik 12:00etara. Arratsaldez, astelehen, astearte, asteazken eta ostegunetan 17:00etatik 19:00etara. Ikasleen adinaren eta egiten dituzten jardueren araberakoak dira matrikularen eta hileroko ordainketen zenbatekoak. Herriko ikastetxe guztietan daude gaiari buruzko argibideak dituzten orriak. Ekainaren 17an amaituko da izena emateko epea.
  Ekonomia 2005-06-01 20:13

Erandiok milioi bat eurotan murriztu du kobratzeke dituen zergen zenbatekoa

Erabiltzailearen aurpegia Ukberri Derrigorrezko zerga-bilketaren bidez iazko urtean kobratzeke geratu ziren zergen zenbatekoa milioi bat eurotan murriztea lortu zuen Erandioko Udal Zerga-Bilketa Bulegoak, udal arduradunek jakinarazi dutenez. 2003ko urtealdia itxi zenean, 5 milioitik gora euro geratu ziren kobratzeke eta 2004ko urtealdia itxi zenean, 4 milioi euro. Udalak kobratu ez duen diru gehiena, %80 baino gehiago, honako zerga eta tasei dagokie: ibilgailuen zerga, San Jose Udal Egoitzako tasak, ekonomia jardueraren gaineko zerga, ondasun higiezinen gaineko zerga eta estolderia.
  Ekonomia 2005-06-01 20:06

Erandioko 32 langabetu Auzolan Programan ari dira lanean

Erabiltzailearen aurpegia Ukberri Erandioko 32 langabetu sartu dira oraingoan Auzolan programan eta lau lantalde egin dituzte bi jarduera desberdinetan aritzeko: landabideen garbiketan eta hiriguneetako ikuskatzailetzan. Programan sartu diren 32 pertsona horiek 8 pertsonako lau taldetan banatu dira. Hauen kontratuak 2005eko maiatzaren 3tik azaroaren 2ra artekoa izango da.
  Ekonomia 2005-06-01 20:01

Langabeziari dagokionez, Bizkaiko batez bestekoarekiko aldea murriztu da Erandion

Erabiltzailearen aurpegia Ukberri Erandioko langabezia-tasa %8,10koa izan zen joan den martxoaren amaieran, udal arduradunek emandako datuen arabera. 847 pertsona dira herrian langabeak. "Bizkaiko langabezia-tasarekiko zegoen alde negatiboa murriztu egin da azken hiruhilekoan", aipatu dutenez. Enplegurik gabeko pertsona gehienak 44 urtetik gorakoak dira, datuen arabera, eta horien ondoren, 25 eta 34 urte bitartekoak. Halaber, gaur egun Erandion enplegu bila dabiltzanetatik 440 emakumezkoak dira eta 407 gizonezkoak.
  Jendartea 2005-05-31 19:43

Merkataritza jasangarria du ardatz Erandioko Aste Berdeak

Erabiltzailearen aurpegia Ukberri Merkatalgune handiak alde batera utziz, tokian tokiko saltokien alde egitea hartzen du helburutzat Erandioko Aste Berdeak. Hori dela eta, Udalak berak antolatutako Merkataritza Jasangarriaren aldeko Jardunaldien barruan kokatzen da ekimena. Horren gaineko lehenengo hitzaldia atzo bertan egin zen Altzagan; gaur errepikatuko da Astrabuduako Josu Murueta Kultur Gunean, 19:30ean. Parte hartzen dutenei eguneroko erosketetan behin eta berriro erabili ahal izateko kotoizko poltsa oparituko diete. Bihar, berriz, merkatariei egongo da zuzendua Josu Muruetan egingo den hitzaldia; merkataritza eta ingurumena eta birziklapenean dendariek zelan lagundu dezaketen jorratuko dira, 20:15etik aurrera.
  Jendartea 2005-05-30 23:01

Erandioko enpresa batean kalte handiak izan dira sute baten ondorioz

Erabiltzailearen aurpegia Ukberri Asuako Carretillas 2000 enpresak su hartu du 16:00ak aldera, olio-bidoi batzuk erre direnean, Ertzaintzak jakinarazi duenez. Lehenengo informazioen arabera, ez dago zauriturik, baina sortu den ke beltza handiaren eraginez Asua-Erletxes kaleko etxebizitzen auzokideak desalojatu behar izan dituzte. Era berean, enpresa trenbidearen ondoan kokatuta dagoenez, Bilbo eta Txorierriren arteko zerbitzua eten du Euskotrenek. BI-634 errepidea ere moztu dute, Sangoronizko gurutzebidearen altueran, Vasco Press agentziak jakinarazi duenez.
  Kultura 2005-05-27 10:28

Erandio Goikoan ere badira jaiak

Erabiltzailearen aurpegia Ukberri Atzo eman zitzaien hasiera Erandio Goikoan ospatzen diren Gorpuzti jaiei eta igandera arte, maiatzak 29, luzatuko dira. Kresala taldearen eskutik izan zuten lehenengo gaupasa egiteko aukera bertan bildutakoek. Izan ere, auzo horretako Gorpuzti jaietako gaupasak ezagunak dira eta jende ugari biltzen da bertara, batez ere eguraldiak laguntzen badu. Bitartean, saiheski errea dastatzeko aukera egongo da gaur 19:00etatik aurrera; igel, futbolin eta zaku lehiaketak egingo dituzte gainera. 23:30ean, berriz, Amaiur taldeak eskainiko du erromeria eta, ondoren, disko gaua egongo da.
  Ekonomia 2005-05-20 23:00

'Expovacaciones' azokan izandako parte hartzea "arrakastatzat" jo dute Erandion

Erabiltzailearen aurpegia Ukberri Maiatzaren 12tik 15era bitartean, Bilbao Exhibition Centren egin zen "Expovacaciones" azokan lortutako emaitzak "pozez" hartu dituzte Erandio (argazkian, Mikel Arieta-Araunabeña udalburua), Barakaldo, Santurtzi eta Trapagarango alkateek. Lau udalerri horiek "Minervion" izeneko erakustoki berezian bat egiten zuten bertan. Uribe Kostako herrian gaur goizean emandako prentsaurrekoan jakinarazi dutenez, 1.845 lagun parte hartu zuten standean egindako zozketetan, Erandioko Tahona Uribek 800 bat txorizo-mokadu eman zituen, 980 bisitarik parte hartu zuten sardina eta txakoli dastaketan, beste 1.225ek jan zuten marmitakoa, 640k euskal pastela eta, azkenik, 1.340 pertsonek gozatu zuten indaba-janaz.
  Kultura 2005-05-20 13:13

Bertso-trama egongo da gaur iluntzean Astrabuduan

Erabiltzailearen aurpegia Ukberri Erandioko Udaleko Euskara Zerbitzuak antolatuta, bertsotan arituko dira gaur, Astrabuduako Josu Murueta Kultur Gunean, Jon Maia zumaiarra eta Unai Iturriaga eta Igor Elortza (argazkian Bizkaiko txapela buruan, Xabi Paia algortarra atzean dagoela / Anboto) durangarrak. ETB1eko "Hitzetik Hortzera" saioa aurkezten duen Josu Goikoetxeak izango du ekitaldia zuzentzeko ardura, arratsaldeko zazpi t'erdietatik aurrera. Antolatzaileek jakinarazi dutenez, sartzea doakoa da, auditorioa bete bitartean.
  Ekonomia 2005-05-19 22:28

Bizkaiko Ogasuna autoen salmentan egindako ustezko iruzurra ikertzen ari da Erandion

Erabiltzailearen aurpegia Ukberri Bizkaiko Foru Aldundiko Ogasun eta Finantza Saileko ikertzaileek operazioa abiatu dute, Ertzaintzarekin batera, Mungian (Zabalondo poligonoan) eta Erandion (Makro supermerkatuaren aparkalekuetan). Ikerketa iturriek jakitera eman dutenez, hainbat hilabete daramatzate kasua aztertzen, ibilgailuen salmentan Balio Erantsiaren Zergarekin iruzurra egiten dutela uste baitute. Aipatutako bi toki horietako aparkalekuetan zilindrada handiko 100 bat auto egoten dira salgai eta ikerketa iturriek uste dute denbora luzez BEZarekin iruzurra egiten aritu direla saltzaileak.
  Jendartea 2005-05-17 22:05

Erandioko gizona atxilotu dute umetxoa altzoan zuen bere bikotekidea jotzeagatik

Erabiltzailearen aurpegia Ukberri Atzo gauean J.G.C. 32 urteko erandioztarra atxilotu zuen Ertzaintzak, ustez, bikotekidea jotzeagatik, amak altzoan umetxoa zuela. Eusko Jaurlaritzako Herrizaingo Sailak adierazitakoaren arabera, 22:00ak inguruan jakinarazi zitzaion polizia autonomikoari emakumea Erandioko udaltzainen komisarian aurkeztu zela, antza, gizonak tratu txarrak eman ostean. Zauriak zituen aurpegian andreak eta gorputzean ere mina zeukala zioen. Gizona polizi-etxean bertan zegoan eta orduan atxilotu zuten ertzainek, familia-esparruan tratu txar delitua egotzita. Bitartean, Bilboko erietxe batera eraman zuten emakumea.
  Kultura 2005-05-17 21:32

Aisialdi lanpostuetarako euskaldunen curriculumak jasoko ditu Erandioko Udalak

Erabiltzailearen aurpegia Ukberri Erandioko Udaleko Euskara Zerbitzuak "Berdinean euskaraz" ekimena bideratu du lagun euskaldunen curriculumak jaso eta zerrendak osatzeko ondoko lanbide hauetan jarduteko: umejagole, kirol begirale, aisialdiko begirale, aurkezle edo eskola partikularrak euskaraz emateko. Lan-poltsa "ireki eta malgua" osatu nahi dute horrela, udal arduradunek jakinarazi dutenez, gero, lan-poltsa hori ikastetxeei, elkarteei eta gurasoei eskaintzeko.
  Ekonomia 2005-05-13 15:32

Erandio, Expovacaciones azokan

Erabiltzailearen aurpegia Ukberri Erandioko Udalak turismorako lankidetza hitzarmena sinatu du Barakaldo, Santurtzi eta Trapagarango tokiko erakundeekin, aurten maiatzaren 12tik 15era Bilbao Exhibition Centre erakustazokan egiten ari den Expovacaciones azokan parte hartzeko. Lau udalerri horiek 300 metro koadrotik gorako erakustoki berezian bat egiten dute eta hainbat ekitaldi egiten ari dira bertan. Gaur bertan, Trabudu Dantzari Taldeak dantza erakustaldia dauka. Larunbatean, berriz, marmitakoa eta euskal pastela eskainiko zaie bisitariei eta munduko txapeldunak diren Erandioko Goiherri sokatira taldearen ekitaldia, harri-zulatzaileen erakustaldia, Malaka eta Danetarako Danok taldeen dantzaldia, eta Danok Bat fanfarrearen musika ere izango dira erakustokian bisitariak erakartzeko. (Argazkian, Martiartu dorretxea).
  Politika 2005-05-07 20:58

Ehunka auzokidek ongi etorria eman diote Aiboa Casaresi

Erabiltzailearen aurpegia Ukberri Astrabuduako eta eskualdeko ehunka lagunek Aiboa Casares Segiko kideari ongi etorri ekitaldia egin zioten atzo, Astrabuduako Josu Murueta plazan. Ekitaldian gogoratu bezala “hiru urtetik gora espetxeratuta eduki dute” Casares eta atzo “geure artean nahi dogula” esan nahi izan zioten. Aiboaren bitartez ere, “preso eta iheslari guztiei besarkada bero bana eta txalo zaparrada bidali” zizkieten, “bereziki Mila, Lurdes eta Jon erandioztarrei”. Ekitaldian, Segiko kide batek, Astrabuduako ezker abertzaleko bi ordezkarik eta Aiboa Casares berak hitz egin zuten. Gainera, Brievako espetxeko euskal preso politikoen gutuna irakurri zen. Ongi etorriaren ostean, 300 bat pertsonako manifestazioa burutu zen herrian zehar. Ospakizuna herri afariarekin amaitu zen.
  Kultura 2005-05-06 22:29

Abuztua kenduta, dantzaldiak egongo dira azarora arteko igandeetan Erandion

Erabiltzailearen aurpegia Ukberri Aurreko urteetako arrakasta ikusita, orkestraz lagundutako dantzaldiak eskainiko ditu aurten ere Erandioko Udalak. Maiatza, ekaina, iraila eta urriko igande guztietan izango dira, 18:00etatik 21:00etara lehenengo bi hilabetetan eta 17:30etik 20:30era azkeneko bietan. Begibistakoa denez, abuztuan oporrak hartuko dituzte. Dantzaldiak ohiko lekuetan egingo dira. Horrela, bestelako premiaren bat sortu eta Kultura Arloak kontrakoa erabakitzen ez badu, honako bi leku hauetan egingo dira dantzaldiak, txandaka: irailaren 23a plazan, Erandio Bekoan (argazkian); eta Astrabuduako Josu Murueta plazan.
  Kultura 2005-05-06 22:07

Maiatzaren 9tik 14ra ospatuko da Erandioko II. Film Laburren Zinemaldia

Erabiltzailearen aurpegia Ukberri Apirilaren 19ra arte jasotako 122 filmeetatik finalean egongo diren lanak aukeratu ditu jada txapelketako antolatzaile eta laguntzaileez eta zinemagintzan ospea handiko lagunez osatutako epaimahaiak. Laburmetrai horiek Josu Murueta kultur etxean ikusi ahal izango dira maiatzaren 9tik 14ra, arratsaldeko 19:30etik aurrera, larunbatean izan ezik. Izan ere, azken egun horretan 17:00etan hasiko da emanaldia. Hain zuzen ere, amaiera ekitaldian banatuko dira sariak. Horiei dagokionez, umorezko film laburrik onenari 1.700 euro emango dizkiote, dokumental laburrik onenari beste horrenbeste eta ikus-entzunezko eskoletako metraje laburreko film onenari 1.000 euro.
  Politika 2005-05-05 16:28

Bihar egingo diote ongi etorria Aiboa Casaresi

Erabiltzailearen aurpegia Ukberri Bihar, ostirala, iluntzeko 20:00etan egingo diote ongi etorri ofiziala Jarrai, Haika eta Segiren inguruko 18/01 sumarioagatik 3 urte preso eman dituen Aiboa Casares Segiko kideari. Ekitaldia Astrabuduako Josu Murueta plazan egingo da eta ondoren herri afaria izango da Ignacio Aldekoa ikastetxean. Afarirako izena Astrabudua, Erandio eta Itzubaltzeta / Erromoko herriko tabernetan eman daiteke aurretik. Ekitaldiko antolatzaileek esan dutenez, Udalari ongi etorriaren berri eman badiote ere "zinegotziren bat maila pertsonalean" baino ez dela agertuko uste dute. Iragan den otsailaren bukaeran Mikel Arieta-Araunabeña Erandioko alkatea eta EAJ eta EA alderdien zinegotziek Jon Bilbao Moro preso astrabuduarraren etxeratzea eskatu zuten agiri baten bitartez, Bilbao "aparteko ankerkeria" pairatu duela salatuz. Gainera, Aiboa Casares, Mila Etxebarria eta Lurdes Cerratori buruzko "gure interesa handituko dugu, Erandioko hiritarrak diren neurrian" adierazi zuten EA eta EAJkoek sinatutako testuan.
  Jendartea 2005-05-03 23:00

Gizon bat atxilotu dute Erandion neskato bati genitalak erakutsi dizkiolakoan

Erabiltzailearen aurpegia Ukberri Ertzaintzak 36 urteko FJ.H.J erandioztarra atxilotu zuen atzo exhibizionismo delitua egitea egotzita. Gertaera atzo goizean izan zen, 11:30ean, Erandion, Ategorri Berria auzunean. Dirudienez, etxerako bidean zihoan 13 urteko neskato bati hurbildu zitzaion atxilotutakoa eta genitalak erakutsi zizkion, Eusko Jaurlaritzako Herrizaingo Sailak jakinarazi duenez. Ondoren, ikusitakoa gustatu ote zitzaion galdetu zion, antza. 13 urteko neskatoa korrika joan zen gertakariaren tokitik. 12:00ak baino lehen, gaztearen senide batek salaketa jarri zuen gertutakoa azalduz. Handik gutxira, Ertzaintzak ustezko exhibizionista atxilotu zuen.
  Politika 2005-04-28 20:47

Gaur erabakiko dute Aiboa Casaresi ongi etorria noiz egingo dioten

Erabiltzailearen aurpegia Ukberri Astrabuduako Amnistiaren Aldeko Mugimenduak UKBERRIri jakinarazi dionez gaur iluntzean erabakiko da atzo askatasunean utzitako Aiboa Casares Segiko kideari ongi etorri ofiziala noiz egingo dioten, baina litekeena da maiatzaren 8an edo 9an izatea. Bestalde, gaur goizeko 2:25ak aldera heldu da Casares Arrigorriagako gasolindegira non Astrabuduako eta eskualdeko 50 bat lagun zituen zain. Harrera egin ostean autokarabana osatuz Astrabuduara abiatu dira. Bertan, herriari bira eman ondoren, herriko tabernan bere argazkia kendu eta gertaera ospatu dute ordu txikietaraino. Argazkian, gaur goizean Astrabuduako herriko tabernan zegoen giroaren irudi bat. Casares erdian dago, lepoko horiarekin.
  Politika 2005-04-28 03:26

Arrigorriagako gasolindegian itxaroten dute Aiboa Casares 2:00etarako

Erabiltzailearen aurpegia Ukberri Aiboa Casares eta Boceguillasen batutako beste 23 auziperatuk senide eta lagunekin ospatu dute ia guztien askatasuna. Aldiz, Aiora Epelde eta Arkaitz Rodriguez ez ezik Navalcarnerotik irten behar ziren bi lagunak ere ez dira atera espetxetik. Boceguillasen inguruan Guardia Zibilaren presentzia handia izan da, 24:00ak aldera 18/01 sumarioko gazteak eta beren senide eta lagunak hortik Euskal Herrira abiatu bitartean, Koska irratiko kazetari batek jakinarazi duenez. Berriz, Casaresen lagun batek UKBERRIri esan dionagatik 2:00ak eta 2:30ak bitartean helduko litzateke gaztea Astrabuduara. Azkenean, Erandioko Amnistiaren Aldeko Mugimenduak Arrigorriagako gasolindegian prestatu du hitzordua eta bertara abiatu dira Astrabuduako herriko tabernan itxaroten ari ziren guztiak, baita eskualdeko beste herri batzuetako lagunak ere. Une horretan 50 bat pertsona daude Arrigorriagan Aiboa Casaresen zain, kotxe karabanan Astrabuduaraino laguntzeko asmoz.

Nabarmenak

Zorion agurrak