Gazteok 2009-07-10 20:59

Txipioko jaia ospatzen ari dira gaur gazteen bultzadaz

Erabiltzailearen aurpegia Ukberri Goizeko 10etatik aurrera bere aurtengo jai aroa zabaldu du gaur Plentziak, Plentzia eta Gorlizko Gazte Asanbladari esker. Izan ere, Plentziako Udalarentzat gaur Gatzamine auzoko San Cristobalen omenezko eguna bada ere, gazteek Txipioko jaia antolatu dute gaur, "Gazteok batu, gaztetxea lortu!" lelopean eta padurarekin gogoratuz. Esan bezala, buruhandiak izan dira gaur goiztiarrenak Plentziako metro geltokiaren ondoan. Ondoren ume eta gaztetxoen txanda iritsi da, jolasak lagun. Bitartean, koadrilen eta bestelako taldeen ohore jokoan egon da, paellarik goxoena nork aurkeztuko zuen argitze aldera. Beti legez, aurreikusita baino beranduago abiatu da herri bazkaria eta bazkalosteko garaian gaztetxearen oka jolasari eman diote paso. Kirol gogorragoetan aritzea ere izan da, Kakarraldo Rugby Taldeak antolatutako Seven txapelketa dela medio. 20:00etan triki-kalejira izango da, zintzurra bustitzeko beste aukera bat, alegia. Gaua hasteko, berriz, Itziarren Semeak, Emon eta DJ Kulo arituko dira oholtzan 22:30etik aurrera, eta kontzertua amaitzean, goizeko 3:30ak aldera, kulero eta galtzontzilo lasterketa irtengo da. Argazkian, iaz Leioako jaietan ere egin zuten kulero eta galtzontzilo lasterketa. Argazki gehiago ikusteko, sakatu hemen.
  Gazteok 2009-07-01 17:41

Frogarik ez izan arren Mentxakabarriko seien aurkako karguak mantendu ditu fiskalak

Erabiltzailearen aurpegia Ukberri Algortako sei gazte epaitu dituzte gaur goizean Bilbon, Mentxakabarri etxea okupatu eta gaztetxe bihurtu zutelakoan, usurpazio delitua egotzita. Haietariko bati, gainera, kaleratze egunean teilatura igo eta bertatik ez jaistearren Ertzaintzari erresistentzia egitea leporatu diote. Baina, gaur Bilboko 3. Zigor Auzitegian konprobatu ahal izan denez, 64/09 auziak "ez du ez hankarik ez bururik", Iñigo Santxo defentsako abokatuak UKBERRI.NETi adierazi dionez (mp3). Izan ere, Santxok gogoratu duenez, orain dela 3 urte, auzia hasi zenean, ez zegoen frogarik eta Fiskaltzak ez du akusatuen aurkako froga berririk aurkeztu. Gainera, akusazioaren lekuko bat, Mentxakabarri etxeko jabea, ez da agertu, 2.163 zenbakidun ertzainak ezeztatu du teilatura igo zen gazteak erresistentzia jarri izana eta beste ertzain batek, 2.461 zenbakiduna, egun horretan Mentxakabarrirekin zer ikusirik ez zuen istorioa kontatu du, epailearen harridurarako. Dena den, "kosta ahala kosta" fiskalak "zigor eredugarrien" alde temati jokatu du Santxoren ustez, eta gazte bakoitzeko 1.400 euroko isuna eskatu du, dagoeneko fidantza gisa gazteek aurreratu behar izan zuten dirua. Gainera, teilatuko gazteari sei hilabeteko espetxe zigorra jartzea eskatu du.
  Gazteok 2009-06-30 19:27

Algortako sei gazte epaituko dituzte bihar Mentxakabarri okupatzea egotzita

Erabiltzailearen aurpegia Ukberri Algortako Gazte Asanbladak (AGA) jakinarazi duenez, sei gazte algortar epaituko dituzte bihar, asteazkena, goizeko 11etan, Bilboko Buenos Aires kalean dagoen Bizkaiko Lurralde Auzitegian. Horietako bat 2006ko martxoaren 7an atxilotu zuen Ertzaintzak, Mentxakabarri gaztetxea husten ari zirela teilatura igo eta suhiltzaileek jaitsi zutenean. Beste lau aurretik, 2005eko abenduaren 3an, identifikatu zituen polizia autonomikoak, doako bideo emanaldi batera joan ostean, aipatu gune autogestionatutik irteten ari zirela. Azken gaztea etxearen jabeak pertsonalki salatu zuen. Hala ere, abokatuetako batek UKBERRI.NETi adierazi dionez, jabea baztertu egin da kausatik, eta, hortaz, ez du zigorrik eskatzen, lekuko bezala agertu beharko badu ere. "Usurpazio" delitua egotzita, lau hilabeteko isuna -12 euro eguneko- eskatzen diote gazte bakoitzari. Horretaz gain, teilatura igo zen mutilari sei hilabeteko kartzela zigorra jarri nahi diote, "erresistentzia" delitua leporatuta. Bitartean, AGAk "gogor" salatu du sei gazteen kontrako auzia, baita Mentxakabarri hustu zuten egunean "Ertzaintzak izandako jarrera oldarkorra" eta "urteetan zehar okupazioaren mugimenduaren aurka hartutako neurri errepresiboak" ere.
  Gazteok 2009-06-16 19:49

Ia mila gaztek parte hartuko dute Leioan udarako antolatutako hainbat ekimenetan

Erabiltzailearen aurpegia Ukberri Gazteen artean kirola, kultura eta aisialdi osasuntsua sustatzeko eta gurasoei laguntzeko asmoz, Leioako Udalak hainbat egitasmo prestatu ditu udarako. Guztira, 3 eta 17 urte bitarteko ia 1.000 neska-mutilek parte hartuko dute, uztailan izango diren ekimen desberdinetan. Alde batetik, UDA 09 kanpainan, 7 eta 13 urte bitarteko 800 umek esku hartuko dute. Udal iturrien azaldu dutenez, "hain arrakastatsua izan da beti programa hau orain arte parte hartzeko eskaeren kopurua handiegia zela, eta hauetariko askok kanpoan geratzen zirela". Hori dela-eta, aurten Kultura eta Kirol Arloak galdeketa bat egin du ia 500 gurasoen artean, ekimena hamabostaldietan banatzeko aukera eskainiz; eta horrela tokiak bikoiztu. Gehiengoak baiezko botoa eman zuen, tokiko arduradunek diotenez, eta hori horrela UDA 09 txanda bitan banatuko da aurten: alde batetik, uztailaren 1etik 15era ,400 umek hartuko dute parte; eta hilaren 15etik 30era, beste horrenbeste. Horrela, eskaera kopuruari aurre egingo zaio eta izena eman duten ume guztiek parte hartu ahal izango dute. Ume horiekin lan egiteko 45 begirale kontratatu dituzte, guztiak elebidunak. Argazkian, guraso eta seme-alabek elkarren arteko ekintzak egin zituzten orain bi asteburutako Familien Topagunean.
  Gazteok 2009-06-12 19:35

Gaztetxeak kaleak hartuko ditu bihar Leioan

Erabiltzailearen aurpegia Ukberri Udondo gaztetxeak egun berezia prestatu du larunbat honetarako, ekainak 13. "Leioako kaleak berreskuratu" nahian jarduera ugari egingo dituzte bihar, 11:00etatik aurrera, Boulevardean. Besteak beste, xakea, eskalada, malabarismoa, globoflexia, "hacktibismo"-a, txapak egiteko makina, txalaparta, serigrafia, Amazonaseko objektuen erakusketa, eta abar luze bat izango dute aukeran bertan batzen direnek. Indarrak hartzeko, berriz, bazkari begetarianoa egingo dute; baita belarriak gozatzeko olerki errezitaldia ere. Amaitzeko, alboka, soinu, pandero eta bakoitzak jotzen dakienaz alaitutako kalejira egingo dute herrian zehar. Izan ere, "azken urteotan, bizitzarik gabeko herria bihurtu da Leioa", Udondo gaztetxeko neska-mutilen ustez. Hori dela eta, gune autogestionatuan dituzten "tailer, aktibitate eta kezkak" kalera aterako dituzte, "karriketan barrena bizitza hedatuz", Koska irratiko "Koskaberri" albistegiari adierazi (mp3) bezala. "Denon konpromisoarekin, gure gauzetan lan egiten eta autogestioaz, gizarte honek inposatzen duen aisialdi motatik ihes egin eta honi planto egin ahal diogula erakutsiko dugu", adierazi dutenez. Argazkian, mutil bat eskalada egiten Udondo gaztetxean.
  Gazteok 2009-06-04 01:39

“Norabide guztiak” izenburuko dokumentalak irabazi du Wanted lehiaketa

Erabiltzailearen aurpegia Ukberri Gazteak eta kulturartekosunari buruzko “Norabide guztiak” izenburuko dokumentalak irabazi du Getxoko Udalaren Gazteria Arloak deitutako “Wanted” ideien lehiaketa. 13 proiektu aurkeztu dira aurten eta hori izan da guztien artean hautatua. Bigarren saria “Decoracion urbana audiovisual” ekimenarentzat izan da eta hirugarrena “Giza Art” proposamenarentzat. Koldo Iturbe zinegotziak (mp3) deialdiaren arrakasta azpimarratu du, “aurkeztu diren proiektuen kopuruagaitik eta euren kalitateagaitik. Halaber, oraingo honetan, aukeratutako gazteek euren proiektuak hobetzeko aholkularitza profesionala izan dutela zehaztu du, baita parte hartzaileek "aukera hori oso ondo baloratu" dutela ere. Argazkian, saritutako lanen egileetako batzuk, Koldo Iturbe zinegotzia eta Unai Amezaga Gazteria teknikariarekin.
  Gazteok 2009-06-03 15:04

Bapirukeren udalekuetarako izen-emate berezia egingo dute bihar

Erabiltzailearen aurpegia Ukberri Bapiruke aisialdi programa euskaldunak 5 eta 12 urte bitarteko 337 ume eta gaztetxori jolasez, kirolez eta euskaraz beteriko uda pasatzeko aukera emango die. Alabaina, Bizarra Lepoan Getxo udalerriko euskara elkarteak kudeatutako udaleku irekietan oraindik oraindik beste 93 haur eta neraberentzako tokia dago. Hori dela eta, ohiko izen-emate egunak bukatuta, bihar, ostegunarekin, matrikulazio berezia egingo dute. Aipatu leku libreak zortzi udalekutan daude, eta hortaz aukera dago uztaila osoan zehar San Martin, Zabala, Zubileta edota Romo eskoletako jardueretan parte hartzeko. Dena den, matrikulazio epe berezia izan arren, zerbitzuak, prezioak eta baldintzak ohikoak dira. Adibidez, udalekuetan umeek arazorik gabe goza dezatela ziurtatzeko, haurrek "euskaraz ondo egiteko" kapazak izan behar direla gogoratu du euskara elkarteak. Dena dela, azken urteko ildoari jarraikiz, euskarara hurbiltzeko, lagun euskaldunak egiteko eta integrazio bidetik hasteko aukera emango zaie "euskaraz komunikatu ezin diren" 4 umeri.
  Gazteok 2009-05-29 20:21

Koadrilen Eguna ospatuko dute bihar Sopelan

Erabiltzailearen aurpegia Ukberri Larunbat honetarako, maiatzak 30, Koadrilen Eguna antolatu du Sopelako Kolektiboen Koordinadorak. Goizeko 10etan, mendi martxan batekin hasiko dute jardunaldia, udaletxetik abiatuta. Ondoren, pintxoak dastatzeko aukera egongo da, 13:30ean, udaletxeko plazan. Izan ere, "menditik etorri ostean pilak kargatu egin behar dira", aipatu dutenez. Horretarako, musika ere izango dute lagun. Toki berean, herri bazkaria egingo dute 15:00etan eta, horren ostean, koadrilen arteko jolasak. Oturuntzarako txartelak ohiko lekuetan daude salgai, 6 eurotan. Bukatzeko, arratsaldeko 19:00etan, Orkresta taldeak alaitutako poteoa egingo dute herriko taberna ezberdinetatik. Argazkian, biharko eguna iragartzeko kartela.
  Gazteok 2009-05-22 20:55

Musika eta futbola eskainiko dute asteburuan eskualdeko gaztetxeek

Erabiltzailearen aurpegia Ukberri Itzubaltzeta / Romoko Itzubaltzeta gaztetxeak kirol hitzordua jarri die biharko, larunbata, herriko gazteei. Izan ere, goizeko 9:30ak aldera, herriko koadrilen arteko III. futbito txapelketari emango diote hasiera Artatza-Romo ikastetxean. Oraindik orain, izena eman ez duten koadrilek honako lekuetan daukate aukera: gaztetxean zein Romo Tavern, West Side, Anaiak, Baste, Koldo, Aida, Andros, Branka, Kandi eta Arotza tabernetan. Gauean, berriz, goizeko sari banaketa eta kirolarien goatekea egingo dute gaztetxean bertan, 21:00etatik aurrera. Ordu bat lehenago, baina Getxoko Txorimalo gaztetxean, Ukabilkada, Agressive Combat eta Mad Skins taldeek kontzertua emango dute. Sarrera hiru eurotan erosi ahal izango da gaztetxeko atean bertan. Azkenik, asteartean, hilak 26, "El estado penal y el negocio de las macrocarceles" hitzaldia eskainiko du Itzubaltzeta gaztetxean Cesar Manzanos Salhaketako kidea, 20:00etan. Argazkian, Itzubaltzeta / Romoko koadrilen arteko I. Futbito Txapelketaren irudi bat.
  Gazteok 2009-05-20 19:42

Grebara deitu du Plentzia eta Gorlizko gazte mugimenduak

Erabiltzailearen aurpegia Ukberri Plentziako Gazte Abertzaleek eta Plentzia eta Gorlizko Gazte Asanbladak (PGGA), biharko, Hego Euskal Herriko gehiengo sindikalak deitutako graba orokorrean parte hartzera deitu ditu aipatu bi udalerrietako neska-mutilak. Helarazitako prentsa oharrean aipatzen dutenez, "Plentzia eta Gorlizko gazte mugimenduak herriko gazteoi greba babestera eta greba egunean borrokarako deialdia luzatzen dizue, euren krisian ito ez gaitezen!". Euren hitzetan, "krisiaren aurrean gazteak ez gaude salgai!". Hartara, biharko greba egunean "borrokara" deitu dituzte Plentzia eta Gorlizko gazteak. Argazkian, PGGAk jarritako grebaren aldeko parkarta / Gaztesarea.
  Gazteok 2009-05-12 20:21

Bapirukeko udaleku irekietarako izen-ematea zabalik dago dagoeneko

Erabiltzailearen aurpegia Ukberri Bapiruke aisialdi programa euskaldunak 5 eta 12 urte bitarteko 430 ume eta gaztetxoei jolasez, kirolez eta euskaraz beteriko uda pasatzeko aukera emango die,. Izan ere, Bizarra Lepoan Getxo udalerriko euskara elkarteak dagoeneko abiatu du udaleku irekietarako izen-ematea. Horiek ekainaren 24a eta uztailaren 30a bitartean, burutuko dira Itzubaltzeta / Romon eta Algortan bederatzi toki eta txandatan. Udalekuetan umeek arazorik gabe goza dezatela ziurtatzeko, haurrek "euskaraz ondo egiteko" kapazak izan behar direla gogoratu du euskara elkarteak. Dena den, azken urteko ildoari jarraikiz, euskarara hurbiltzeko, lagun euskaldunak egiteko eta integrazio ildotik hasteko aukera emango zaie "euskaraz komunikatu ezin diren" 43 umeei, ingurune euskalduna eskainiz. Ume hauek, txanda guztietan banatuko dira, beti haur eta gaztetxoen %10 osatuz. Lehenengo txandan, 30 ume izango dira Algortako Aldai Patronatuan, ekainaren 24tik 30era. Uztailaren bi hamabostaldietan, berriz, launa udaleku izango dira, Romo, Zabala, San Martin eta Zubileta ikastetxeetan. Txanda guztietan, 9etatik 13:30ak arte izango da ordutegia, irteera dutenean 17:00ak arte luzatuko dena. Izena ematea atzo abiatuko zen elkarteko bazkideentzat eta satorren astelehenean irekiko da bazkideak ez direnei, Goizane Miruri Bizarra Lepoaneko dinamizatzaileak esan bezala (mp3). Argazkian, Bapirukeko umeak magia saio batean adi-adi.
  Gazteok 2009-05-06 20:26

Jarrai sortu eta 30 urtera independentzia aldarrikatu dute campusean

Erabiltzailearen aurpegia Ukberri 1979ko maiatzaren lehenengo astean Koordinadora Abertzale Sozialistako Gazteriak (KAS Gazteriak) eta hainbat gazte independentista batu ziren Leioa eta Erandioko campusean erakunde gaztea, abertzalea eta sozialista bat martxan jartzeko. Elkarrizketa horien emaitza, 1979ko maiatzaren 10ean Bilbon jendaurrean aurkeztuko zen Jarrai-KAS erakundea izango zen. Erreferente hori Euskal Herriko Gazte Mugimenduaren sorreratzat hartuz, gaur Gazte Independentisten hainbat ordezkarik agerraldia egin dute campus berean. Gazteek igaro diren hiru hamarkadetan izandako lorpen eta kostuak balantzan jarri dituzte eta Espainia eta Frantziako estatuek zein Eusko Jaurlaritzak erabilitako errepresioa nabarmendu badute ere, Euskal Herriaren alde eta independentziaren aldeko konpromisoarekin jarraitzea eskatu diete belaunaldi berriei. Argazkian, gaurko ekitaldia / Gaztesarea.
  Gazteok 2009-05-04 21:08

Gaur zortzi zabalduko dute Bapirukeko udaleku irekietan izena emateko epea

Erabiltzailearen aurpegia Ukberri Bapiruke aisialdi programa euskaldunean izena emateko aukera datorren astelehenean, maiatzak 11, zabalduko da. 5 eta 12 urte bitarteko 430 ume eta gaztetxoei jolasez, kirolez eta euskaraz beteriko uda pasatzeko aukera emango die Bapirukek. Izan ere, Bizarra Lepoan Getxo udalerriko euskara elkarteak dagoeneko jendaurrean aurkeztu ditu udan, ekainaren 24a eta uztailaren 30a bitartean, Itzubaltzeta / Romon eta Algortan burutuko dituen 9 udaleku irekiak. Udalekuetan umeek arazorik gabe goza dezatela ziurtatzeko, haurrek "euskaraz ondo egiteko" kapazak izan behar direla gogoratu du euskara elkarteak. Dena den, azken urteko ildoari jarraikiz, euskarara hurbiltzeko, lagun euskaldunak egiteko eta integrazio ildotik hasteko aukera emango zaie "euskaraz komunikatu ezin diren" 43 umeei, ingurune euskalduna eskainiz. Ume hauek, txanda guztietan banatuko dira, beti haur eta gaztetxoen %10 osatuz. Lehenengo txandan, 30 ume izango dira Algortako Aldai Patronatuan, ekainaren 24tik 30era. Uztailaren bi hamabostaldietan, berriz, launa udaleku izango dira, Romo, Zabala, San Martin eta Zubileta ikastetxeetan. Txanda guztietan, 9etatik 13:30ak arte izango da ordutegia, irteera dutenean 17:00ak arte luzatuko dena. Esan bezala, izen-ematea maiatzaren 11an abiatuko da elkarteko bazkideentzat. Aste bat beranduago ez bazkideentzat, Goizane Miruri Bizarra Lepoaneko dinamizatzaileak esan bezala (mp3). Bestalde, Leioako Euskara Zerbitzuak antolatutako Txilinbueltakarekin maiatzaren 22tik 22ra Pasaiara joateko izen-ematea etzi, asteazkenean, itxiko da. Argazkian, Bapirukeko umeak magia saio batean adi-adi.
  Gazteok 2009-04-29 21:25

Gaztetxearen beharra aldarrikatuko dute larunbatean Erandion

Erabiltzailearen aurpegia Ukberri Egun osoko egitaraua antolatu du larunbat honetarako, maiatzak 2, Erandioko Gazte Asanbladak, bi urte egiten dituztela ospatzeko. Joan den astean egindako okupazio sinbolikoarekin "borrokatzeko eta antolatzeko" duten ahalmena erakutsi zutela adierazi dute neska-mutil erandioztarrek. Urteurren eguneko kalejiran ere gaztetxearen beharra aldarrikatuko dute beste behin ere. Azaldu dutenez, "orain, udalaren zein udaltzaingoen jarrerari erantzuna emateko aukera daukagu. Froga diezaiegun, herri honetan gazteok antolatzeko eta borrokatzeko daukagun ahalmena". Erandioko Gazte Asanbladako kideak joan den asteazkenean sartu ziren Altzagako Tartanga kaleko 30. zenbakiko lokal publikora. Hurrengo egunean, ordea, udaltzainak joan zitzaizkien bertatik kanporatzera. Tokiko poliziek agertutako "harrokeria" eta "modu txarrak" salatu zituzten neska-mutilek.
  Gazteok 2009-04-24 16:02

Gaztetxea hustean udaltzainek izandako jarrera salatu du Erandioko Gazte Asanbladak

Erabiltzailearen aurpegia Ukberri Erandioko Gazte Asanbladako kideek salatu egin dute atzo gaztetxearen desalojoan Erandioko udaltzainek agertutako "harrokeria" eta "modu txarrak". Atzo gauean Koska irratiko "Koskaberri albistegia"ri egindako adierazpenetan (mp3), gazteek adierazi zuten egunean zehar udaltzainek bi aurpegi oso bestelakoak erakutsi zituztela. Goizean, identifikatu egin zituzten, baina gutxienez tratua zuzena izan zela diote EGAkoek. Arratsaldean, berriz, egun batez gaztetxea izan zen Altzagako Tartanga kaleko 30. zenbakiko lokal publikora hurbildu eta atean zegoen gaztea bultzatuz eta "epailearen agiririk gabe" sartu ziren 10 bat udaltzain. Gazteen arabera, bertan zeudenei okupazioaren erantzukizun guztia sartuko zietela mehatxatu egin zieten tokiko poliziek, une oro "jabeak balira" eta "gu baino gorago egongo balira" bezala ibili zirenak. Gauzak horrela, atzo EGAk egindako bat-bateko asanbladan adostu bezala, gaurko deituta zegoen kalejira bertan behera utzi dute gazteek, eta Gazte Asanbladaren III. urteurrena ospatzeko lanetan jarraituko dute, gogo handiarekin. Hortaz, maiatzaren 2ko hitzordura deitu dute, bertan Udala eta Udaltzaingoari gazteen erantzuna emateko.