Ekonomia 2009-11-18 23:08

Greba egingo dute bihar Gorlizko ospitaleko zerbitzari eta sukaldariek

Erabiltzailearen aurpegia Ukberri Osakidetzaren menpeko ospitaletako sukalde eta kafetegietan azpikontratazio bidez lanean ari diren beharginak grebara deitu dituzte ostegun honetan, azaroak 19, LAB, ELA, CCOO eta UGT sindikatuek. Horien lan baldintzak "Osakidetzako pertsonal laboralaren baldintzekin parekatzea" aldarrikatuko dute biharko geldialdien bitartez, "azpikontratatutakoen kolektiboak egun sufritzen diskriminazioari amaiera emateko". LABek aipatu duenez, langile horiek "sei urte baino gehiago" daramate hitzarmena eskatzen. Ondoko ospitaletako sukalde eta kafetegietan izango du eragina grebak: Basurtu, Gurutzeta, San Eloy, Gorliz, Zamudio, Santa Marina, Galdakao, Bermeo, Txagorritxu, Donostia, Zumarraga, Mendaro eta Bidasoa. Mobilizaio egunaren baitan sindikatuek elkarretaratzea egingo dute, 12:30ean, Eusko Jaurlaritzaren egoitza aurrean, Bilbon (Kale Nagusia, 85). Argazkian, Gorlizko ospitalea / cc-by Javier Mediavilla.
  Kultura 2009-11-13 19:00

Ipuin kontalari saioa izango da bihar Gorlizen

Erabiltzailearen aurpegia Ukberri Larunbat honetan, azaroak 14, ipuin kontalari saioa entzuteko aukera izango dute Gorlizen, 4 urtetik gorako ume eta gaztetxoek. Ekitaldia ikastetxean izango da, sarrera dohainik, 18:30etik aurrera. Gauzak horrela, orduan heltzea eskatu diete haur eta gurasoei tokiko arduradunek, ateak 18:40ean itxiko baitituzte. Bestalde, abenduaren 2an, asteazkenarekin, mitologia tailerra izango dute 6 eta 12 urte arteko neska-mutil gorliztarrek, Uribe Kostako Mankomunitateko Euskara Zerbitzuaren bitartez. Ordutegia, 16:30etik 18:30era jarri dute, Gorlizko ikastetxean. "Tailerrean euskal mitologia aberastuko dugu umeek sortutako kondaira berriekin", azaldu dute tokiko arduradunek. Izena eman nahi duena Gorlizko Kultur Etxera hurbildu beharko du, azaroaren 24a baino lehen. Tailer bera Urdulizko Kultur Etxean egingo dute abenduaren 3an, 16:30etik 18:30era, apuntatzeko muga hilaren 24a ere dela. Argazkian, ipuin kontalari saioa Gorlizen / © Gorliz.net.
  Jendartea 2009-11-09 18:22

Gorlizen izandako auto harrapaketa baten lekukoen bila dabil Ertzaintza

Erabiltzailearen aurpegia Ukberri Orain bi larunbat, urriaren 31n, kotxe istripua izan zen 20:00ak aldera, BI-220 errepidean, Gorliz eta Plentzia artean. Autoak 17 urteko gazte bat harrapatu eta ihes egin zuen, Eusko Jaurlaritzaren Herrizaingo Sailak adierazi duenez. Hori dela eta, balizko lekukoen laguntza eskatu du Ertzaintzak. Plentziako zubiaren igoeran (Plentziara bidean) gertatu zen ezbeharra, obretan dauden bi bidegurutzeren artean, herrian, Paulinaren aldapa izenarekin ezaguna den gunean, zehaztu dutenez. Biktima Gurutzetako ospitalera eraman zuten hanketan lesioak izan zitzakeelakoan. Ertzaintzak bere aldetik, istripua eragin eta alde egin zuen gidaria identifikatu eta gertaeraren arrazoiak argitzeko ikerketa bati ekin zion. Lan hori errazteko, ezbehar haren lekukoen bila dabiltza. Horren inguruko daturen bat eman dezakeen edonori eskatzen zaio, hortaz, Getxoko ertzain-etxeko atestatu taldearekin harremanetan jar dadila, 944 063 420 telefono zenbakiaren bitartez. Argazkian, Ertzaintzaren trafiko kontrola.
  Ekonomia 2009-11-05 23:04

Gorlizko ospitalean erizainen faltan daudela salatu du SATSEk

Erabiltzailearen aurpegia Ukberri Gorlizko ospitalean “azpiegitura eta giza zein material baliabide arazo larriak” ematen ari direla salatu du gaur SATSE Euskadiko Erizainen Sindikatuak. Gauzak horrela, horiek konpontzeko exijitu diote osasun zentroko zuzendaritzari, “profesionalek arriskurik gabe lan egin eta gaixoek merezi duten arreta izan dezaten”. Txanda bakoitzeko erizain gehiago jar ditzatela eskatu du SATSEk, prentsara bidalitako oharrean. Adierazi dutenez, egun, Erizaintza bost unitate baino ez dago ospitalean, solairuka banatuta. Zaintza aringarrietako unitatean eta barne medikuntzan izan ezik, arratsaldez eta gauez erizain bana baino ez dago horietako bakoitzean, gaineratu dutenez. “Erizain bakoitzak 30 eta 35 paziente artean du bere kargura eta, hortaz, lana pilatzen zaio etengabe, gaixo guztiak ezin dituelako artatu”, salatu du langile erakundeak. Horretaz gain, gaueko txandan, “jagole, mantenu-langile eta garbitzailerik ere ez” dagoela aipatu du SATSEk. “Hori dela eta, lan gainkarga handiagoa izaten du erizainak, lan horiek ere egin behar dituelako”, kritikatu dutenez. Argazkian, Gorlizko ospitalea / cc-by-sa Wikimedia Commons.
  Kultura 2009-11-04 13:02

Seme-alabekin euskaraz jolasten irakatsiko diete aita-amei Gorlizen

Erabiltzailearen aurpegia Ukberri Uribe Kostako Mankomunitateko Euskara Zerbitzuaren bitartez, "Katramila" izeneko ikastaroa eskainiko die, 0 eta 6 urte bitarteko haurren guraso zein hezitzaileei, Gorlizko Udalak. Urtxintxa astialdiko eskolak berriki plazaratutako "Katramila, goizetik gauerako abesti-jolasak" liburu-diskoan bildutako euskal jolas eta kantak aita-amei eta irakasleei erakustea da ekimenaren helburua, umeekin euskaraz jolastu ahal izateko. Horrenbestez, 7 eta 20 lagun arteko taldea osatuko dute, bi orduko eskola emateko. Saioa azaroaren 27an, ostirala, izango da, 18:00etatik 20:00etara, Gorlizko kultur etxean; nola ez, euskaraz. Parte-hartzaileek 10 euroko matrikula ordaindu beharko dute. Interesatuta egonez gero, informazio eta izen-emate orria Uribe Kostako Mankomunitateko Euskara Zerbitzuan eta aipatu kultur etxean izango dira eskuragarri. Izena emateko epea hilaren 13ra arte egongo da zabalik. Argazkian, joan den ostegunean aurkeztu zuten "Katramila, goizetik gauerako abesti-jolasak" liburu-diskoa.
  Kultura 2009-10-30 20:44

Programazio berria aurkeztuko du bihar Gorliz irratiak

Erabiltzailearen aurpegia Ukberri Bihar, larunbatarekin, denboraldi berriko programazioa aurkeztuko du Gorliz Irratia Uribe FM-k. Baina, uhinetatik entzun beharrean irratiaren zaleek aurkezpen hori ikusi ahal izango dute. Izan ere, Taberne aurre kaleko egoitzaren ateak ireki eta estudiotik zuzenean iragarriko dituzte, jendaurrean, FMko 107.8n 2009/2010 denboraldian izango diren nobedade guztiak. Ospakizunaz gozatzeko arratsaldeko 6etan jarri dute hitzordua, ordu horretan saio berezia abiatuko dutela. Magazine hori Alain Lejarragak eta Iraide Talaverak gidatuko dute eta bertatik irratiaren esatari guztiak pasatuko dira, ahots bakoitzari aurpegi bat jartzeko aukera ematen. Gainera, musikari ere tarte berezia eskainiko diote, Manent taldeari elkarrizketa egingo diotela. Bandak, berriz, kontzertu akustikoa eskainiko du, zuzenean. Saioa 20 urtez darabilten FMko 107.8 ohiko frekuentzian jarraitu ahal izango da edo bestela Internet bidez. Argazkian, esatari bat Gorliz Irratiko estudioan / © Gorliz Irratia.
  Jendartea 2009-10-22 15:14

Lau lagun atxilotu dituzte Gorlizen justiziak bilatzen zituelakoan

Erabiltzailearen aurpegia Ukberri Ertzaintzak lau pertsona -bata adingabekoa- atxilotu zituen atzo goizean Gorlizen, espetxeratze aginduak zituztelakoan. Eusko Jaurlaritzaren Herrizaingo Sailak zabaldutakoaren arabera, "laurek zituzten bete gabeko kondenak eta aurrekari anitzez osatutako polizia fitxak, delitu gehienak ondasunaren aurkako delituen ingurukoak". Botola auzo gorliztarrean atzeman zituen goizeko lehen orduetan Ertzaintzak. Gizonezkoetako bat (39 urte) Basauriko espetxera eraman zuten eta Langraizera 37 eta 39 urteko beste emakumezko bi. 16 urteko adingabea, berriz, aske utzi zuten bere senideen zaintzapean. Era berean, ertzainek 15 urteko beste adingabeko bat ere topatu zuten atxilotuekin batera. Joan den irailaren 15etik Portugaleteko babes zentro batetik desagertua omen zegoen gazte hau. Dagoeneko bere legezko tutoreen esku jarri dute.
  Kultura 2009-10-07 21:50

Perretxikoen eguna izango da igandean Gorlizen

Erabiltzailearen aurpegia Ukberri Gorlizko Perretxikozale taldeak antolatuta, asteburu hau perretxikoei dedikatuko diete gorliztarrek. Izan ere, larunbatean Arabako Murgia herrira joateko autobus bat antolatu dute, bertako zelaietan onddo eta perretxiko bila aritzeko. Interesatuek izena eman beharko dute aurretik Argintxe kafetegian. Autobusa goizeko 7:30etan irtengo da eta 14:45etarako bueltatuko omen da. Larunbat arratsaldean batutakoa sailkatuko dute Jubilatuen Egoitzan. Hurrengo egunean, igandean, berriz, VIII. Perretxiko Jardunaldia ospatuko da Gorlizko Iberre auzoko San Pedro Plazan, goizeko 10:30etik eguerdiko 14:30etara. Bertan, aurreko egunekoa erakutsi eta 18 postu izango direla. Gainera, aurreko urtean bezala, aurten ere gazteentzako perretxiko lehiaketa izango da. Perretxikozaleek aipatu dutenez, "3.000 pintxo inguru dastatzeko aukera" izango da. Bestalde, umeek ere zertaz gozatu izango dute, goiz osoan zehar puzgarriak ere izango dituztela. Eguraldi ona eginez gero, Iberrebarri plazan egongo dira kokatuta eta euria izanez gero pilotaleku estalian. Argazkian, Euskal Herriko txoko askotan egiten dituzte perretxiko erakusketak, Aretxabalan tartean / Larrabetzutik Mundura.
  Kirolak 2009-09-18 01:28

Laster hasiko dira eskupilota eta pala eskolak Gorlizen

Erabiltzailearen aurpegia Ukberri Denboraldi berria gainean, eskupilota eta pala eskoletan izena emateko epea zabaldu du Gorlizko Portalena Esku Pilota Kirol Elkarteak. Ikasle bakoitzak 20 euroko kuota ordaindu beharko du eta jasotzen den dirua pilotari gazteentzako materiala erosteko izango da, udal gorliztarreko iturriek adierazi dutenez. Horrenbestez, kirol taldeak Gorlizko kultur etxean daukan bulegoan, gpepke[abildua]gmail.com e-posta bidez edo 692 731 963 telefono zenbakira deituz apunta daitezke neska-mutilak. Eskupilota eskolak (benjaminak eta kimuak) astearte eta ostegunetan izango dira, 17:45etik 19:00etara. Palan jokatzen (benjaminak eta kimuak) ere astearte eta ostegunetan ikasi ahal izango da, 19:00etatik 20:15era. Argazkian, bi gazte palan jokatzen.
  Kultura 2009-07-24 20:26

Hastear dira Gorlizko Santiago jaiak

Erabiltzailearen aurpegia Ukberri Dagoeneko jai giroa sumatzen da Gorlizko kaleetan. Izan ere, Eliz plazan pregoia irakurri eta txupina bota, 19:30ean, eta buruhandiak, erraldoiak, gaiteroak, dantzariak, trikitilariak, txarangak, koblakariak, fanfarreak, koadrilak eta festara batu nahi duen orok osaturiko jaitsiera nagusiarekin emango diete hasiera, gaur arratsaldean, Santiago jaiei. Gainera, aurretik elkarrekin bazkaltzeko elkartu dira gazte taldeak. Lau egunez, hau da, igandera arte, egongo da zertaz gozatu: nekazaritza azoka, bertso saioa, bigantxak, eskulangintza azoka, bakailao txapelketa... izango dira egunean zehar egongo diren ekitaldietako batzuk. Gauez, dantza egiteko aukera egongo da Momo (Queenen omenez), Akerbeltz, Joxpa eta beste hainbat taldeen eskutik. Argazkian, atzo Udako Euskararen Eguna ospatu zuten Gorlizen / © Gorliz.net.
  Kultura 2009-07-11 20:56

Gorlizko II Txakolin Eguna ospatu dute gaur

Erabiltzailearen aurpegia Ukberri Zuentzat Kultur Taldeak antolatuta, eta oposizioan dagoen Euzko Alderdi Jeltzaleak babestuta, Gorlizek bere bigarren Txakolin Eguna bizi du gaur goizean. Gauzak horrela, dozenaka lagunek gozatu dute hogei saltokitan prezio merkean eskainitako egungo ardo gozoenak dastatzen, bereziki Bizkaiko txakolinaren promozioa sustatu dela. Baina zintzur bustitzeaz gain, mokadua hartzeko aukera ere izan da, azokan eskainitako ogi, gazta, pate, pastela, barazki eta urdaitegiko produktuei esker. Eguneko helburua bikoitza da: Gorlizen udako jarduerak bultzatzea eta bertako kalitate handiko produktuak sustatzea. Dagoeneko hitzordua finkatu da eta zalantza bakarra da 2010ean uztailean ospatuko den aurten bezala edo abuztuan, iaz egin zen legez. Baina, jai giroa ez da amaitu gaurkoz Gorlizen. Izan ere, 20:00etatik aurrera Lirain tokiko abesbatzak ohiko udako kontzertua eskainiko du elizan. Sarrera doakoa da eta hurbiltzen direnek Nuria Orbea sopranoa eta Miguel N'Dong piano jolea ere entzuteko aukera izango dute. Argazkian, Txorierriko Larrabetzu herriak ere Txakolin Eguna antolatzen du urtero, apirila aldera / cc-by-nc Larrabetzutik.org.
  Kultura 2009-07-03 21:04

Hogeigarren urteurrena ospatuko du bihar Gorliz Irratiak

Erabiltzailearen aurpegia Ukberri Gorliz Irratia Uribe Kosta Irratik 20. urteurrena ospatzeko jaia antolatu du larunbat honetarako, uztailak 4, aipatu udalerriko Eliz plazan. Gauzak horrela, estudioa kalean jarri eta zuzenean emitituko ditu eguerdiko 12etatik gauerdira bitartean bertan izango diren ekitaldiak. Saioa FMko 107.8 frekuentzian jarraitu ahal izango da edo bestela Internet bidez. Hasteko elkarrizketa egingo diete hainbat laguni, tartean, 20 urte hauetan lankideak izan direnei eta Emma Calzada alkate gorliztarrari. 16:00etatik 18:00etara bitartean, berriz, aurpegia margotu eta musikaz gozatzeko aukera edukiko dute umeek. Horrekin batera, “La Flauta Magica” txotxongilo ikuskizuna antzeztuko du Kosiku taldeak. Haurrentzako jarduerak bukatuta, adinez nagusiagoak diren neska-mutilentzako diskoteka eskainiko du Gazte Gune taldeak. Horretaz gain, Alaskaren ordezkoak playbacka egingo du. 19:30etik aurrera, herriko hainbat musika taldek joko dute: Txarriboda Deluxe, Sor-presa, Reggae Burnin Etxea eta Luppulo, hurrenez hurren. Azkenik, DJ Mimoloco bilbotarraren doinuek emango diote bukaera festari, 22:30etik aurrera. Argazkian, esatari bat Gorliz Irratiko estudioan / Gorliz Irratia.
  Kirolak 2009-05-24 22:03

Gipuzkoarrak nagusitu dira Gorlizko Triatloian

Erabiltzailearen aurpegia Ukberri Aurretiaz iragarritako baldintza meteorologiko txarrak gauzatu direla, gaur goizean ehunaka kirolzale batu dira, eguraldi txarrari aurre eginez, Gorlizko Badiaren VII. Triatloi Sarian lehiatzeko. Bertan, Aihoa Murua triatloi olinpiko zarauztarra eta Peru Alfaro hernaniarra nagusitu dira. Parte hartzaileek 50 metro luzerako igeriketa saioa egin dute badian zehar, ondoren 23,3 kilometroko bizikleta ibilbide gogorrari aurre egin behar izan diotela, Orabile, Lemoiz, Andraka, Asteintza (Maruri), Butroe, Urduliz eta Plentzia igaroz, berriro Gorlizera bueltatzeko. Azken atalean, 5 kilometrotako oinezko lasterketari hasiera ema diote, Astondo Ibilbideari bi itzuli emanez. Alfarok 1:11'07"-ko denbora egin du eta Muruak 1:17'18". Taldeka, emakumezkoen proban Codeam Triatloi Elkarte zarauztarra izan da garailea. Gizonezkoenean, berriz, Donostiako Krafft-Atletiko taldea nagusitu da. Gorlizkoa 2009ko triatloi zirkuiturako bigarren proba puntuagarria da eta Sondikako Triatloi Taldeak eta Euskadiko Triatloi Federazioak antolatu dute. Argazkian, Ainhoa Murua, 2005ean Madrilen burutu zen Munduko Triatloi Txapelketan / Jandercito.
  Kirolak 2009-05-22 20:25

Igandean jokatuko dute Gorlizko triatloia

Erabiltzailearen aurpegia Ukberri Igande honetan, maiatzak 24, triatloiaren zazpigarren edizioa hartuko du Gorlizek. Sondikako Triatloi Taldeak eta Euskadiko Triatloi Federazioak antolatuko dute eta esprint distantzian jokatuko da, 2009ko triatloi zirkuiturako bigarren proba puntuagarria izanik. Lasterketa 10:00etan hasiko dute emakumeek eta hogei minutu beranduago gizonek. Probaren muina Gorlizko hondartzako parkingean egongo da, boxak bertan kokatuko baitira, federazioak zehaztu duenez. Lehendabizi, 750 metro luzerako igeriketa saioa egin beharko dute kirolariek badian zehar: hiruki formakoa izango da ibilbidea, irteera eta helmuga hareatzan izanik. Lehenengo trantsizioaren ondoren, triatletek 23,3 kilometroko bizikleta ibilbide gogorrari aurre egin beharko diote, Orabile, Lemoiz, Andraka, Asteintza (Maruri), Butroe, Urduliz eta Plentzia igaroz, berriro Gorlizera bueltatzeko. Bigarren trantsizioaren ondoren, azken atalari, hau da, 5 kilometrotako oinezko lasterketari hasiera emango diote, Astondo Ibilbideari bi itzuli emanez, hondartzan bertan egongo baita helmuga. Argazkian, triatletak uretatik irteten / Triatloi eta duatloiak.
  Jendartea 2009-05-13 19:58

Udan saharar umeak ekartzeko familien bila dabiltza Gorlizen

Erabiltzailearen aurpegia Ukberri Beste urte batez, “Oporrak bakean” ekimenarekin bat egin du Gorlizko Udalak. Horren bidez, Saharako umeei aukera eman nahi zaie udako hilabeteak gure artean egin ditzaten. Hori dela eta, udaldian 7 eta 12 urte bitarteko neska-mutil sahararren bat etxean hartu nahi dituzten familiei dei egin diete izena ematera. “Haurrok basamortu idorretik ateratzea da asmoa, uda sasoian 50 graduko tenperaturara ere iristen baita termometroa Sahara aldean”, adierazi dute udal arduradunek. Maiatzaren 25era arte dago izena emateko aukera. Joan-etorria, asegurua eta begiraleen gastuak Udalak berak ordainduko ditu eta umeak hartzen dituzten familiek horien mantenuaz baino ez dira arduratu beharko. Mediku araketak, berriz, Eusko Jaurlaritzako Osasun Sailak egingo ditu. Etxean saharar haurren bat hartu nahi duten sendiek udaletxera jo beharko dute. Han emango zaizkie xehetasun guztiak. Argazkian, udan Getxora heldutako Saharako umeak.
  Gazteok 2009-04-07 20:32

Patinaje ikastaroa antolatu dute Gorlizen

Erabiltzailearen aurpegia Ukberri Maiatzaren 9tik ekainaren 27ra arteko larunbatetan, patinatzen ikasteko aukera egongo da Gorlizko kiroldegian, bertoko Gazte Informazio Gunearen eskutik. Adinaren araberako hiru ordutegi izango dira: 12:00etatik 13:00etara, 4 eta 7 urte bitarteko neska-mutilei emango diete ikastaroa; 13:00etatik 14:00etara, 8 eta 11 urte bitartekoei; eta azkenik, 12:00etatik 14:00etara, 12 urtetik gorakoei. Horrenbestez, apirilaren 17ra arte egongo da zabalik izena emateko aukera. 11 urte arteko umeek 26 euro ordaindu beharko dituzte, 12 urtetik gorakoek 42 euro; eta 14 eta 30 urte bitarteko gorliztarrek azken horren erdia, 21 euro. Azken bi kasu horietan, DNI edo familia liburuaren fotokopia aurkeztu beharko dute, Gazte Informazio Gunea, Gorlizen erroldatuta ez dauden guztiek. Udal iturriek adierazi dutenez, beharrezkoa da bakoitzak patinak, belaun-babesa eta eskumuturrekoak jartzea. Argazkian, Gorlizen emandako patinaje ikastaroa.
  Kultura 2009-03-18 21:03

Umeentzako ipuinak eta zinea izango dira asteburuan Gorlizen

Erabiltzailearen aurpegia Ukberri Gorlizko Kultur Etxeak antolatuta, larunbat honetan, martxoak 21, ipuin kontalari saioa eskainiko du Ixabel Millet-ek. Ekitaldia 18:30etik aurrera izango da, Gorlizko herri ikastetxean, 4 urtetik gorako ume eta gazteei zuzenduta. Saioa dohainik izango da. Hala ere, orduan agertzea eskatu dute tokiko kultur arduradunek, ateak 18:40ean itxiko baitira. Bestalde, igandean, hilak 22, "Hiru mosketariak" marrazki bizidun filma ikusteko aukera edukiko dute neska-mutil gorliztarrek. Proiekzioa arratsaldeko 5etatik Eloisa Artaza kaleko erakusketa gelan. Argazkian, "Hiru mosketariak" filma.
  Kultura 2009-02-20 15:49

Euskal inauteriak ospatuko dituzte bihar Gorlizen

Erabiltzailearen aurpegia Ukberri Larunbat honetan, otsailak 21, euskal inauteriak ospatuko dituzte Gorlizen, Aratz dantza taldearen eskutik. 18:00etan kalejira egingo da zanpantzarrekin eta, Eliz plazan, Miel Otxin erre egingo dute. Horren ondoren txokolatada, eta jarraian trikitilariak ibiliko dira kaleetatik. Igande eguerdian, Orabai izeneko perkusio taldea ibiliko da kaleetatik. Iberrebarrin, berriz, ogi-torrada txapelketa eta dastatzea egongo da. Astelehenean, 11:00etatik 13:00etara, inauterietako ludoteka egongo da kultur etxean eta, arratsaldean, mozorro txapelketa eta txokolatada Iberrebarrin, 17:00etatik 19:00etara. Azkenik, asteartean ere inauterietako ludoteka egongo da goizez, eta arratsaldean mozorro tailerra eta umeentzako dantzaldia pilotalekuan, 17:00etatik 19:00etara. Argazkian, bihar erreko dute Miel Otxin Gorlizen.
  Kultura 2008-12-23 21:03

Olentzero eguna ospatzeko antzezpena egingo dute Gorlizen

Erabiltzailearen aurpegia Ukberri Asteazken honetan, abenduak 24, ehun lagunek baino gehiagok parte hartuko dute Olentzero egunerako prestatutako antzerki saioan. Gauzak horrela, lehenengo zatia, "Jentilak" izenekoa, 17:30etik aurrera egingo dute, Laubideta plazatxoan. Bertan, makil-dantza, txotxongilo dantza, musika eta kantak izango dira. Bigarren zatia, “Herritarrak”, berriz, Jose Antonio Agirre plazatxoan egingo dute. Zapatarien dantza, jorrai dantza, musika, txistua eta kantak ere izango dira bertan. Azkenik, kale nagusitik kalejiran joango dira guztiak, Eliz plazaraino, Olentzerorekin egoteko. Mari Domingik Gorlizko emakumeen zapia eramango du buruan.
  Jendartea 2008-12-17 20:04

Kontsumo jasangarriari buruzko hitzaldia izango da bihar Gorlizen

Erabiltzailearen aurpegia Ukberri "Eguberri jasangarriagoen alde" lelopean, ostegun honetarako, abenduak 18, hitzaldia antolatu du, Gorlizen, Uribe Kosta Mankomunitateko Ingurumen eta Kontsumo Sailak. Kontsumo jasangarriari buruzko solasaldiak Gabonetan ingurumena errespetatzea eta zaintzea duen garrantziaz jabearaztea du helburu, Gorlizko Udalak adierazi duenez. Hori dela eta, energia eta ura aurreztu, garraioak, erosketak, kontsumoa eta hondakinen birziklapenerako oinarrizko arauak emango dituzte. Hitzaldi dinamikoa izango da (egunez egun kontutan hartzeko aholkuekin) eta, gutxi gora behera, ordu t' erdiko iraupena izango du. Biharko saioa 19:00etatik aurrera izango da, Gorlizko udaletxeko batzar aretoan. Argazkian, beharginak gabon argiak jartzen.

Nabarmenak

Zorion agurrak