Kultura 2010-08-20 16:04

Jaiak ospatuko ditu asteburuan Gorlizko Urezarantza auzoak

Erabiltzailearen aurpegia Ukberri Larunbat honetan, abuztuak 21, Gorlizko Urezarantza auzoko jaiak batuko zaizkie Leioako San Bartolome auzoko zein Lemoizko Andra Mari festei eta Plentziako Antolintxu Egunari. Horrenbestez, goizeko 10etan hasita, koadrilen arteko futbol 7 txapelketaren finala, luncha, tortilla eta tute lehiaketak, umeentzako ikuskizuna, Arantz dantza taldearen dantzaldia... izango dira bihar paraje horretan. Bestalde, DJ Xaiborren eskutik etorriko da disko gaua, 20:30ean hasita (23:30ak arte). Tartean, suzko zezena izango da. Igandean, berriz, sukalki txapelketa izango da ardatza, Okarantxun. Hala ere, aurreko eguneko tortilla txapelketan bezala, barbakoak eta gas suteak soilik erabili ahal izango dira. Egurrik ez. Argazkian, Leioako San Bartolome auzoan bezala, Urezarantzan ere egongo da gozatzeko aukera.
  Kultura 2010-08-18 18:35

Empordako Ganbera Orkestrak kontzertua eskainiko du Gorlizen

Erabiltzailearen aurpegia Ukberri Ostiral honetan, abuztuak 20, IX. Udako Musika Jaialdiaren azken kontzertua egingo dute Gorlizko Andra Maria Sortzez Garbiaren elizan. Emanaldia 20:30ean hasiko da. Bertan, Empordako (Herrialde Katalanak) Ganbera Orkestrak bere 20. urteurreneko errepertorioa eskainiko du. Barroko garaiko musikatik gaur egungora errepaso bikaina egingo dute, tokiko iturriek zehaztu dutenez. Sarrera dohainik izango da, ohi den bezala. Bestalde, larunbatera arte, hilak 21, egongo dira ikusgai Gorlizko udal erakusketa aretoan, Carlos Arrolaren arte lanak. Artista horrek espresionismo abstraktu, collage, pop art eta street art estiloak ditu oinarri. "Arte kritikoa gizakia eta gizartearekiko eskaintzen du. Komunikabideak, publizitatea, argazkigintza, hiriko artean inspiratuta, Carlos Arrolak artearen bidez bizitzaren ikuspen kritikoa eskaintzen du", tokiko kultur iturriek azaldu dutenez. Erakusketan Critical t-shirts delako esparrua ere egongo da, Carlos Arrolak eta beste artista kolaboratzaile batzuk diseinatutako kamiseta ezberdinak agertuz. Argazkian, Gorlizko Andra Mari Sortzez Garbiaren eliza / © Gorliz.net.
  Kultura 2010-08-17 20:17

Gorlizko kiroldegi berrian horma-irudia margotu du Paul Ygartuak

Erabiltzailearen aurpegia Ukberri Paul Ygartua nazioarteko artista oso sortzaile originala da eta lan bikain eta aintzatetsia ekoitzi du. Ingalaterrako Liverpool hiritik hurbil jaio zen, herri txiki batean. Bere aita euskalduna zen, Gorlizkoa, eta bere ama ingelesa. Liverpooleko arte eskola ospetsuan ikasi zuen, John Lennonen ondoan, 60ko hamarkadaren hasieran, eta egunero entzuten zuen The Beatles taldea The Cavern pubean, eguerdi partean. Ygartuak trebetasun berezia du tamaina handiko margo lanak zuzen zuzenean eta proiektorerik gabe egiten. Horrek, noski, muralgile ospe handia eman dio, eta bere lanek urrunetik ere bere artea ikustera datozen pertsonen arreta harrapatzen dute. Herriak biziberritzeko hainbat proiektutan egin du lan. Egitasmo ofizialen artean aipatzekoa da Vancouverreko mundu mailako erakusketan, Nazio Batuen Erakundearen pabilioirako sortutako horma-irudia: “Mundu batua” izenekoa. Erakusketako hamar lan onenen artean izendatu zuten hori. Ahal duen guztietan, Gorlizera, bere herri maitagarrira, etortzen da artista; eta bertan ere erakusgai ditu bere margo lanak. Horiek horrela, Gorlizko Udalak akordioa lortu zuen Ygartuarekin, etorkizunerako geratuko den obra handi bat egin dezan, non eta egin asmo duten udal kiroldegian. Dagoeneko, gai bereko bi koadro eginda ditu herrian, eta bi udal-eraikinetan kokatuta daude: udaletxean eta kultur etxean, hurrenez hurren. Argazkian, kiroldegia izango den udal-pabilioia egokitzeko obrak irailaren bukaerarako amaitzea aurreikusi dute eta dagoeneko bertan dago ikusgai Ygartuaren horma-irudia / © Gorliz.net.
  Kultura 2010-08-14 14:35

Udako zinema eskainiko dute abuztuko bi asteburutan Gorlizen

Erabiltzailearen aurpegia Ukberri Abuztuaren 15ean eta 28an, udako zinema eskainiko dute Gorlizko Eliz plazako pilotalekura joaten den ororentzat. Igande honetan, "Koruko mutilak" izeneko filma eskainiko dute euskaraz. Hilaren 28an, larunbatarekin, berriz, "Spanish movie" pelikula jarriko dute, oraingoan espainolez. Bi filmak gaueko 10etan proiektatuko dira eta sarrera doakoa izango da bertaratzen den jende guztiarentzat. Argazkian, "Koruko mutilak" filma / cc-by-sa dpcom.fr.
  Kultura 2010-08-11 23:09

Jazz kontzertua izango da ostiralean Gorlizko elizan

Erabiltzailearen aurpegia Ukberri Ostiral honetarako, abuztuak 13, jazz kontzertua antolatu dute Gorlizko Andra Mari Sortzez Garbiaren elizan arratsaldeko 8:30ean. Musika saioan Mikel Andueza Quartet laukotea arituko da. Taldea, logikoa denez, lau musikariz osatuta dago: Mikel Andueza saxoa jotzen, Hasier Oleaga bateriarekin, Miguel Salvador gitarran eta Jon Piris kontrabaxuarekin. Emanaldiaz goza nahi duen oro elizara bertaratu daiteke eta dohain jazz musikaz gozatu. Argazkian, Gorlizko Andra Mari Sortzez Garbiaren eliza / © Gorliz.net.
  Kirolak 2010-08-10 10:40

Bizikletak mailegatzeko toki berria jarri dute Gorlizen

Erabiltzailearen aurpegia Ukberri Dagoeneko martxan dago Gorlizko hirugarren Bizimeta puntua. Horrenbestez, aurrerantzean Urezarantzan, Kilimanjaro garagardotegiaren aurrean, egongo da bizikletak mailegatzeko aukera. Gogoratu abuztuaren 2tik aurrera ordainpekoa dala aipatu zerbitzua, Creditrans, Gizatrans eta Hirukotrans txartelekin. Ordainketa Bizipuntu guztietan jarri diren txartelak baliogabetzeko makinen bitartez egingo da. Maileguak ezberdinak izango dira, bizikletaren arabera. Bizikleta arrunta hartuz gero, zerbitzua 0,15 eurokoa izango da eta elektrikoa izanez gero 0,30 eurokoa. Erabilera bakoitza gehienez bi ordukoa izango da. Creditrans txartela kiosko, Bizkaibus eta metro geltokietan eta BBK kutxazainetan eros daiteke 5, 10 eta 15 eurotan. Gizatrans, berriz, 65 urtetik gorakoentzat, %65 edo gehiagoko ezintasuna dutenentzat eta erabateko ezintasun iraunkorra edo balioezintasun handia dutenei zuzendutako txartela da. Eta Hirukontrans familia ugarientzat da. Argazkian, Sopelako Bizimeta puntu bat / © Joseba Zubiaur - Sopelako Udala.
  Politika 2010-08-10 01:51

Gorlizen presoen alde batutakoei "ETA goratzea" egotzi die Alianza Nacionalek

Erabiltzailearen aurpegia Ukberri "El Mundo" eta "El Correo Español" egunkariak izan ziren lehenengoetarikoak, joan den igandean, Gorlizko hondartzan, euskal preso politikoen aldeko elkarretaratzea egongo zela haizatzen. Bilbon, Etxeraten izenean agertutako kartelak izan zituzten hizpide kazeta espainolek. Iragarpenak iragarpen, urtero bezala, hareatza gorliztarrera ez ezik, euskal kostaldeko txoko ugaritara ere zabaldu zen gatibuen eskubideen aldeko aldarria. Ereaga, Barinatxe, Arriatera eta Atxabiribil hondartzetara ere dozenaka uribekostar gerturatu ziren. Oraingoan, baina, Alianza Nacional alderdi ultraeskuindarreko Vascongadas atalak hartu die lekukoa aipatu egunkariei. Tasio Erkizia ezker abertzaleko militante historikoa Gorlizko kontzentrazioan egon zela aitzakiatzat hartuta (eta "El Correo Español" egunkariak plazaratutako argazkia erabiliz), "ETAren aldeko ekitaldia" egitea egotzi diete bertan bildutakoei, erakunde armatuaren aldeko "gorak" barne, faxisten hitzetan. Argazkian, presoen alde Algortako kirol portuan / cc-by-sa Etengabe.
  Kirolak 2010-08-09 21:37

Koadrilen arteko futbito txapelketa egingo dute Gorlizen

Erabiltzailearen aurpegia Ukberri Abuztuaren 16tik 21era bitartean, koadrilen arteko futbito txapelketa jokatuko dute Gorlizko Kirol Sozietatearen instalazioetan. Txapelketa lau kategoria ezberdinetan banatuko da jaiotegunaren arabera. Lehenengoan 2002 eta 2001 urteetan jaiotakoak arituko dira, bigarrenean 2000 eta 1999koak, hirugarrenean 1998 eta 1997koak eta laugarrenean 1996 eta 1995ekoak. Aurkeztutako taldeek 7 eta 14 jokalari artean izan beharko dute. Izena emateko, talde bakoitzak 10 euro ordaindu beharko ditu. Abuztuaren 11 baino lehen egin beharko da inskripzioa arantza[abildua]copenor.e.telefonica.net-en. Txapelketa horren kolaboratzaileak Gorlizko Kultur Etxea, Gorliz Kirol Elkartea, Gorlizko Udala, Athletic Fundazioa eta Gorlizko Merkatariak dira. Argazkian, gazte batzuk futbolean jolasten / © Bizkerre futbol taldea.
  Jendartea 2010-07-29 01:37

Neska gazte bat larriki zauritu da Gorlizko kai-mutur batetik erortzean

Erabiltzailearen aurpegia Ukberri Gorlizko olatu-horma batetik erorita, 19 urteko neska bat larriki zauritu da gaur arratsaldean, Herrizaingo Sailak zabaldu duenaren arabera. Ezbeharra arratsaldeko 5:20ak aldera jazo da Barrika Baso mendi ondoan dagoen San Balentin haitzean, kostaldean. Bertan, ustekabeko une batean, jende gehiagorekin zegoen neska kai-muturreko harrien gainera erori da, oraindik ezagunak ez diren arrazoiak direla medio. Kolpeak sortutako kalte larrien ondorioz, gaztea Gurutzeta ospitalera eraman behar izan dute anbulantziaz osasun zerbitzuetako beharginek. Sukarrietan ere, 60 urteko andra bat eraman behar izan dute Usansoloko ospitalera, beste erorketa baten ondorioz. Argazkian, Barrika Baso, dikea eta San Balentin haitza / cc-by-sa Ketari.
  Jendartea 2010-07-26 21:23

Gazte bat atxilotu dute Gorlizen lapurretan zebilelakoan

Erabiltzailearen aurpegia Ukberri Joan den larunbatean, hilaren 24ean, 17 urteko gizon bat atxilotu zuen Ertzaintzak goizaldean, diru-zorroak eta poltsak lapurtzen zebilelakoan. Goizeko 4ak aldera, Gorlizko Santiago jaietan, pertsona batek Ertzaintza informatu zuen gazte bat atxikita zeukala, zorroa eta argazki kamara bat lapurtu zizkiolakoan, Eusko Jaurlaritzaren Herrizaingo Sailak zabaldutakoaren arabera. Poliziek adingabekoa atxilotu eta lapurreta falta bat egotzi zioten.
  Kultura 2010-07-23 16:56

Hastear dira Gorlizko Santiago jaiak

Erabiltzailearen aurpegia Ukberri Dagoeneko jai giroa sumatzen da Gorlizko kaleetan. Izan ere, Eliz plazan pregoia irakurri eta txupina bota, 19:30ean, eta koadrilen jaitsierarekin emango diete hasiera, gaur arratsaldean, Santiago jaiei. Gainera, aurretik elkarrekin bazkaltzeko elkartu dira lagun taldeak. Lau egunez, hau da, astelehenera arte, egongo da zertaz gozatu: nekazaritza azoka, bertso saioa, bigantxak, eskulangintza azoka, bakailao txapelketa... izango dira egunean zehar egongo diren ekitaldietako batzuk. Gauez, dantza egiteko aukera egongo da Novato & Mad Muasel, Haxotz, Luhartz eta hainbat Dj-ren eskutik. Argazkian, umeak dantzan Gorlizen / © Gorliz.net.
  Kultura 2010-07-19 21:13

Paul Saitua margolariaren lanak ikusgai jarri dituzte Gorlizen

Erabiltzailearen aurpegia Ukberri Gaurtik larunbatera arte, hilak 24a, Paul Saitua Iribar Ibarrangeluko pintorea eta institutu irakaslearen arte lanak ikusgai egongo dira Gorlizko Udal Erakusketa Aretoan. Saituak 1990 urtetik hona ia urtero egin du erakusketaren bat Euskal Herriko zenbait aretotan, eta oraingoan "aukera paregabea izango dute ingurukoek" bere arte lanak Gorlizen ikusteko, tokiko iturriek adierazi dutenez. Gorlizko Udal Erakusketa Aretoa Eloisa Artaza kaleko 3. zenbakian dago eta erakusketa 19:00ak eta 21:00ak bitartean bisita daiteke egunero. Argazkian, graffiti tailerra Gorlizen / © Gorliz.net.
  Politika 2010-07-14 21:33

Tortura salaketa berretsi du Xabier de la Maza gorliztarrak

Erabiltzailearen aurpegia Ukberri Xabier de la Maza gazte gorliztarrak atzo berretsi zuen tortura salaketa Alacanteko Auzitegian (Herrialde Katalanak), "Gara" egunkariak zabaldu duenez. De la Maza 2009ko abenduaren 18an atxilotu zuen Espainiako Polizia Nazionalak, bere etxetik gertu zela, Segi "erakunde terroristako kide" izatea egotzita. Hiru egunez Espainiako Polizia Nazionalaren eskuetan inkomunikatuta egon eta espetxera sartu ostean, "etengabeko irainak eta mehatxuak" jasan zituela salatu zuen mutilak. Testigantza horretan azaltzen denez, hiru egun horietan "bere burua erruduntzat jotzea bilatzen zuten mehatxuez" aparte, gazteak "galdeketa ilegalak" jasan zituen. Gorlizetik Bilborako trasladoan, poliziek Sopelako hondartzara eramatearekin mehatxatu zutela salatu zuen, "bertan inor ez zegoelako eta berarekin nahi zutena egingo zutelako". Gaztearen testigantza konfirmatu ostean, De la Mazak ziurtatu zuen bera mehatxatu zuten agenteak identifikatu ahal izango zituela. Argazkian, Xabier de la Maza eskuinean, azken Korrikan / © Plentzia, Gorliz eta Lemoizko ezker abertzalea.
  Kultura 2010-07-13 20:40

Bihar jarraituko dute Gorlizko Musikaldia Uda 2010 jardunaldiek

Erabiltzailearen aurpegia Ukberri Joan den asteburuan hasi ziren Gorlizko Musikaldia Uda 2010 jardunaldiak. Bi kontzertu egin zituzten Andra Mari Sortzez Garbiaren elizan. Hirugarrena, berriz, igande honetan (hilak 18) izango da, arratsaldeko zortzietan, "Euskal kantu liriko berriak” lelopean. Bertan parte hartuko dute Charo Pikazo sopranoak, Alberto Nuñez tenoreak eta, pianoa jotzen, Juan Jose Ortega arituko da. Kontzerturako lagungarri gisa, asteazken honetan, hilak 14, hitzaldia eskainiko du Sabino Lopez de Gereñok. Solasaldia Gorlizko udaletxeko bilkura aretoan izango da, eta antolatzaileek adierazi dutenez, "bertara pertsona guztiak daude gonbidatuta, batez ere lirika adituak zein zaleak". Argazkian, Gorlizko Andra Mari Sortzez Garbiaren eliza / © Gorliz.net.
  Politika 2010-07-10 14:55

Alderdi Eguna ospatuko dute gaur Gorlizko jeltzaleek

Erabiltzailearen aurpegia Ukberri Tokiko Alderdi Eguna ospatuko dute gaur Gorlizko Euzko Alderdi Jeltzaleko kide eta zaleek. Izan ere, horretara deitu ditu alderdi horretako bertako Uri Buru Batzarrak, "Deia" egunkariak jakinarazi duenez. Jelkideak, azken hauteskundeetatik oposizioan daudenak, 13:00etan abiatuko dute festa, batzokiko ikurrina goratuz. Protokolo ekimenaren ostean, Bizkai Buru Batzarreko burukide batek hitzaldi politikoa eskainiko du batzokiko terrazatik bertatik. 14:30ean, berriz, herri bazkariari ekingo diote, leku berean. Bazkalostea patxadaz hartuta, arratsaldeko 6etan disko-festa egitea aurreikusi dute eguneko antolatzaileek, 20:00ak arte iraungo dena. Argazkian, Patxo Igartua EAJren bozeramailea eta alkate ohia.
  Kultura 2010-07-06 21:48

Bisita gidatuak izango dira Gorlizko bazterrak ezagutzeko

Erabiltzailearen aurpegia Ukberri Gorlizko Turismo Bulegoak eguneroko bisita gidatuen zerbitzua martxan jarri du aurten ere, uda irauten duen bitartean. Txangoak ordu beteko iraupena izango dute, zehaztu dutenez. Horrenbestez, Andra Mari Sortzez Garbiaren elizaren plazan hasiko dira bisitak. "Udalerriko zenbait toki interesgarri ezagutzeko aukera ezin hobea ematen dute", kultur iturriek gaineratu dutenez. Ordutegia ezberdina izango da egunaren arabera. Astelehena, asteazkena, osteguna eta ostiraletan goizeko 11etan izango dira. Asteartetan, berriz, 16:15ean. Bisita gidatuen prezioa euro batekoa izango da eta taldeak 4 eta 20 pertsonen artekoak izango dira. Jaiegun eta asteburuetan zerbitzurik ez dela egongo jakinarazi du Gorlizko Udalak. Argazkian, Andra Mari Sortzez Garbiaren eliza / © Gorliz.net.
  Kultura 2010-07-02 20:36

Mariachiak ibiliko dira bihar Gorlizko kaleetatik

Erabiltzailearen aurpegia Ukberri Larunbat honetan, uztailak 3, 20:00etatik aurrera, mariachi talde bat ibiliko da Gorlizen zehar, "kalitate turistikoa sustatzen", udal iturriek zabaldutakoaren arabera. Tokiko arduradunek azaldu dutenez, 10 establezimendu turistiko gorliztarrek parte hartu dute aurten "Praktika onak" izeneko egitasmoan. "Guzti horiek kalitate-agiria lortuko dute hilabete honetan, eta haien lana eskertzeko eta sustatzeko, mariachiak izango dira kaleetan zehar, jendeari informazio hori helaraziz", azaldu dutenez. Datorren urtean, talde berri bat sortzeko asmoa daukate. Parte-hartzeko interesa duten Gorlizko taberna, jatetxe, ostatu eta enpresa turistikoek Gorlizko Turismo Bulegoan eman beharko dute izena, hilabetea bukatu aurretik. Argazkian, mariachi bat / cc-by-nc-nd bill_bly_ca.
  Jendartea 2010-06-30 23:06

Gorlizko Fauna Basatia Sendatzeko Zentroa handitzea aztertzen ari da Aldundia

Erabiltzailearen aurpegia Ukberri Bizkaiko Foru Aldundiko Nekazaritza Saila Gorlizen dagoen Fauna Basatia Sendatzeko Zentroa handitzeko aukera aztertzen ari da. Horrek helburu bikoitza du: alde batetik osasun-instalazio gisa duen eraginkortasuna areagotzea, eta bestetik, gizartera dibulgazioko zentro gisa zabaltzea, foru iturriek adierazi dutenez. Gaur egun, zentro horren lehentasuna sendatutako animaliak haien habitat naturalera itzultzea da. Horretaz aparte, osasun-zaintza lanak ere egiten dituzte, kontrol epidemiologikoan oinarrituta. Etorkizunerako, zentroaren gaitasuna indartu nahi du Aldundiak, ingurumen-gela eta kontzientzia pizteko zentroa bihur dadin. Hori lortzeko, egungo zentroaren instalazioak handituko dituen proiektua aztertzen ari dira. Argazkian, 2010eko maiatzaren 14an hainbat hegazti askatu zituzten Gorlizko Fauna Basatia Sendatzeko Zentroan / © Bizkaia.net.
  Kultura 2010-06-16 15:38

Udako Euskararen Eguna egingo dute larunbatean Gorlizen

Erabiltzailearen aurpegia Ukberri Larunbat honetarako, ekainak 19, Udako Euskararen Eguna antolatu du Gorlizko Udalak. Gauzak horrela, 11:00etatik 13:00etara, puzgarriak eta jolasak izango dituzte txikiek, "Euskaraz olgetan" ekimenaren barruan. Eguerdiko ordu batetan, berriz, “Irriparra barra-barra” ikuskizuna eskainiko du Azkona pailazo taldeak, 2 eta 12 urte arteko neska-mutilei zuzenduta. Arratsaldeko txalaparta tailerrari dagokionez, 5 eta 14 urte arteko umeentzat izango da, 17:00etatik 19:00etara. Hori bukatuta, dantzaldia eskainiko du Auskalo Non taldeak. Udal iturriek zehaztu dutenez, ekintza guztiak Iberrebarri plazan izango dira eta euria bada, pilotalekuan. Bestalde, Araba Euskaraz jaialdira joateko autobusa jarri du Gorlizko Kultur Etxeak. Ikastola arabarren festa handia igande honetan, hilak 20, izango da Agurainen. Argazkian, Auskalo Non erromeria taldeak alaituko du Udako Euskararen Eguna / © Auskalo Non.
  Jendartea 2010-05-30 13:41

Bi pertsona atxilotu dituzte Gorlizko merkataritzagune batean lapurreta egotzita

Erabiltzailearen aurpegia Ukberri Ertzaintzak 33 eta 37 urteko bi gizonezko atxilotu zituen pasa den ostiralean Getxo udalerrian. Atxilotuei orain dela aste batzuk Gorlizko merkataritzagune batean izandako lapurreta saiakera egotzi diete. Izan ere, maiatzaren 10eko goizaldeko 2:30ak aldera, Gorlizko merkataritzagune bateko alarma piztu zen eta Ertzaintzaren hainbat patruila-auto bertaratu ziren. Poliziek teilatutik bulegoetara zihoazen bi zulo topatu zituzten. Gainera, hainbat bulego hankaz-gora zeuden eta alarma zein telefonia sistemen kutxak kalteak zituzten eta kableak moztuta zeuden, Herrizaingo Sailak zabaldu duenez. Dena den, merkataritzaguneko zuzendaritzak jarritako salaketaren arabera, lapurreta ez zen gauzatu, seguru aski alarmak jota lapurrek ihesaldiari ekin ziotelako. Hainbat ikerketaren ostean, pasa den ostiral goizean ustezko lapurrak atxilotu zituzten Getxo udalerrian, indarrezko lapurreta egotzita, ondoren epailearen esku uzteko.

Nabarmenak

Zorion agurrak