Kultura 2006-07-07 13:46

"Aupa Etxebeste!" filmea egongo da ikusgai gauean Gorlizen

Erabiltzailearen aurpegia Ukberri Gaur, uztailak 7, aurtengo Udako Zinea Plazan kanpaina hasiko da Gorlizen, bertoko kultur iturriek jakinarazi dutenez. Guztira, lau filme egongo dira ikusgai uda honetan, bi euskaraz eta bi erderaz, Eliz Plazan, 22:30ean uztailean eta 22:00etan abuztuan eta irailean, ordurako arinago egingo delako ilun. Filmeen izenburuak hauek dira: uztailaren 7an, "Aupa Etxebeste!"; abuztuaren 14an, "Robots"; abuztuaren 27an, "Zientzia fikzioa"; eta, azkenik, irailaren 8an, "Mi mejor amigo". Bertan 200 aulki jarriko dituzte, eta euria bada bertan dagoen pilotaleku estalia izango litzateke zinemalekua. Argazkian, "Aupa Etxebeste!" filmeko irudia.
  Kultura 2006-07-03 22:40

WIFI gune irekia sortu dute Gorlizko kultur etxeko eraikinean

Erabiltzailearen aurpegia Ukberri Sistema honekin, kultur etxeko erabiltzaileek ordenagailu eramangarriak, PDAk edo WIFI teknologia duten sakelako telefonoak badituzte, dohainik sartu ahal izango dira Internetera eraikineko edozein lekutan egonda ere. Nabigatzen hasteko, erabiltzaileak doako bonoa eskatu beharko du liburutegiko harreragunean, Krutzeta kaleko 5. zenbakian. Bonoak erabiltzaile‑izena eta pasahitza jasoko ditu. Identifikazio horrekin, ordubeteko saioa egin ahal izango du sarean.
  Jendartea 2006-06-14 21:57

Gorlizek azken hondartza denboraldia izango du aurten, obrei ekin aurretik

Erabiltzailearen aurpegia Ukberri Uda hau berezia izango da gorliztarrentzat, hondartza egungo egoeran ikusiko duten azken aldia izango baita. Izan ere, Espainiako Ingurumen Ministerioak hala onetsita, uda amaitzean hasiko dira hondartza antolatu eta egokitzeko lanak. Gauzak horrela, Gorlizko hondartzaren erabiltzaileek hainbat zerbitzu izango dituzte ekainaren 15etik irailaren 15era, besteak beste, hiru informazio-elementu, 12 dutxa, 5 iturri, oinak garbitzeko beste bost eta komunen 3 modulu. Horretaz gain, bainu-hartzaileak jagoteko, Gurutze Gorriko bost sorosle tituludun egongo dira eta hondartza udaltzaingoko laguntzaile-unitate batek zainduko du.
  Ekonomia 2006-06-14 21:15

Gorlizen 18 langabetu kontratatu dituzte udako beharrizanak estaltzeko

Erabiltzailearen aurpegia Ukberri Gorlizko Udalak 18 langabetu kontratatu ditu aldi baterako "udako biztanle‑kopuruaren igoerak dakartzan beharrizanak estaltzeko". Bertoko biztanleen kopurua 5.000 ingurukoa bada ere, udan laukoiztu egiten da, 20.000 lagun inguru izateraino. Javier Garrido Herri Lan eta Zerbitzuetako zinegotziak esan bezala, langile horien eginkizuna "hondartzen inguruan kokatuko da: udal‑kiroldegiko mantentze‑lanak egingo dituzte, Mantentze Lanetako Brigada indartuz". Gainera, "laster batean, udaltzaingoan ere, denboraldirako kide berriak sartuko dira", gaineratu duenez. Kontratatutako 18 langabetuetatik gehienek hondartzako hiru aparkalekuetan egingo dute lan. Argazkian, Astondo hondartza.
  Jendartea 2006-06-06 22:21

Gorlizek auzo berria izango du Andra Mari Axpen

Erabiltzailearen aurpegia Ukberri Gorlizko Udalak Andra Mari Axpe sektorearen urbanizazioa onetsi du. Jarduketa horren helburu nagusien artean San Jose auzoaren ingurua sustatzea dago –esparru berean kokatuta dagoena-, kontuan hartuta auzo horretan etxebizitza gehiegi ez ezik, nahiko narriatuta ere badaudela "1960 inguruan eraiki zirelako", Patxo Igartua alkateak (argazkian) adierazitakoaren arabera. Jarduketa horretan ezarri da besteak beste galtzada, aparkaleku, espaloi, oinezkoentzako sare eta banaketa sareak zolatuko direla. Halaber, 9.486 metro koadro egongo dira berdegune eta oinezkoentzat, 1.724 metro koadro ikastetxeetarako eta 4.013 metro koadro kirol ekipamenduetarako, udal iturriek zehaztu dutenez. Obra hauek bukatu ondoren, bigarren fasean, 125 etxebizitza eta adosatu eraikiko dira.
  Jendartea 2006-05-29 19:52

Gorlizko Udalak ibilgailuen udal-zerga onartu berri du

Erabiltzailearen aurpegia Ukberri Gorlizko Udalak gaur onartu du 2006. urteari dagokion Ibilgailuen Udal-Zergaren Errolda, eta beraz, udalerri bizkaitar honetako auzokideek ekainaren 8tik uztailaren 20ra bitartean ordaindu beharko dituzte tasak BBKn. Gainera, Gorlizko Udaletik prentsa-ohar bidez adierazi dutenez, oraindik zorren bat ordaintzeke dutenek ez dituzte inprimakiak jasotzeko aukerarik izango eta udaletxean bertan kokaturik dauden bulegoetara jo beharko dute. Azken hauetan, jendearentzako arreta ordutegia 9:00etan hasten da eta 13:00etan bukatu.
  Jendartea 2006-05-24 11:57

Neska gazte bat zauritu zen igandean Gorlizen auto istripu batean

Erabiltzailearen aurpegia Ukberri Neska gazte bat zaurituta suertatu zen igandean Gorlizko Urresaranse bidean izandako auto istripuaren ondorioz. Ertzaintzak jakinarazi duenez, igandeko goizean gertatu zen istripua, 10ak aldera, Nafarroako matrikula duen Opel Kadett modeloko auto bat errepidetik atera zenean. Gertaera zerk eragin zuen jakin ez badaki ere, EAEko Herrizaingo Sailak argitu du autoa irauli zela eta horren ondorioz T.M.A. 19 urteko neska autoaren azpitik harrapatuta gelditu zela suhiltzaileek bertatik atera arte. Neska larriki zaurituta eraman zuten Gurutzetako ospitalera. Bestalde, asteburuan zehar Ertzaintzak pertsona bana atxilotu du Gorliz eta Sopelan, autoa alkoholaren eraginpean gidatzen zutelakoan.
  Jendartea 2006-05-22 22:41

Espainiako Ingurumen Ministerioak zazpi milioi euro inbertituko ditu Gorliz eta Plentziako hondartzetan

Erabiltzailearen aurpegia Ukberri Kosta Zuzendaritza Nagusiaren bitartez, Gorliz (argazkian, erietxea atzealdean eskuinera ikusten dela) eta Plentziako hondartzak egokitu eta berrantolatzeko lanak enkantean jarri berri ditu Espainiako Ingurumen Ministerioak. Zati batean bada ere, areatzen ezaugarri naturalak berreskuratzea da asmoa, "mende hasieratik hona hainbat eraikuntzek hartuta egon direlako; aparkalekuak, errepidea edota erietxea, hurrenez hurren". 7.101.368 euroko aurrekontua eta 18 hilabeteko denbora epea dute obrek.
  Jendartea 2006-05-19 21:04

Udan saharar umeak hartzeko familien bila dabil Gorlizko Udala

Erabiltzailearen aurpegia Ukberri Güerako saharar errefuxiatu-kanpamentua eta Gorliz senidetzeko 2001eko martxoan hartutako erabakiarekin batera martxan jarritako egitasmoen artean, aurten ere "Oporrak Bakean" izeneko kanpaina eramango du aurrera herri horretako Udalak. Hori dela bide, 6 eta 12 urte bitarteko neska-mutilak ekarriko dituzte uztailean eta abuztuan familia gorliztarrekin udaldia igaro dezaten. “Haurrok basamortu idorretik ateratzea da asmoa, uda sasoian 50 gradoko tenperaturara ere iristen baita termometroa Sahara aldean”, adierazi du Blanca Fernandez Gizarte Ekintza zinegotziak. Argazkian, Saharar Errepublika Demokratikoaren (SEAD) aldarrikapenaren 30. urteurrenarekin bat eginez, bandera sahararra jaso zuten ikurrinarekin batera Gorlizko udaletxean, otsailaren 27an.
  Kultura 2006-04-26 12:24

Trikitilari topaketak antolatu dituzte larunbaterako Gorlizen

Erabiltzailearen aurpegia Ukberri Egun osoan zehar trikiti eta pandero doinuek alaituko dute Gorliz, apirilaren 29an, larunbata, eta Eliz plazako frontoia izango da topaleku nagusia, udal iturriek adierazi dutenez. Egitarauari dagokionez, 9:30etik aurrera, pelota partiduak, kalejira, bazkaria, erromeria... iragarri dituzte eta trikitia edota pandero baten zozketa egingo dutela jakinarazi dute. Roberto Etxebarriaren Jira Eskolak antolatu ditu topaketak, eskolako ikasleek eta lagunek osatutako Ahaire kultur elkartearen laguntzaz. Ekimena prestatzen duten hirugarren urtea da aurtengoa. Iaz Meñakan egin zuten eta aurrekoan Loiun. Antolatzaileen esanetan, 120-140 trikitilari inguru batuko dira Gorlizen, hileko azkenen zapatuan.
  Kirolak 2006-04-25 19:03

Mendibike elkarteak eta Bizkaiko Federazioak txirrindularitza jardunaldiak antolatu dituzte bihar eta etzirako Gorlizen

Erabiltzailearen aurpegia Ukberri Mendibike elkarteak eta Bizkaiko Txirrindularitza Federakundeak kirol horren inguruko bi jardunaldi antolatu dituzte bihar eta etzirako, Gorlizko Ikastetxean. Eskola-umeei zuzenduta dago ekimena eta "kulunkak, konoak eta zubiak dituen gynkana batean datza, hezkuntza zentroko jolastokian jarriko dena, zirkuito hau egiteko lau mendi-bizikletekin batera", adierazi du Jon Gonzalez federakunde bizkaitarreko ikasle-arduradunak. Apirilaren 26ko saioa 9:00etatik 13:30era izango da eta 27koa ordu berean hasi eta 12:30ean bukatuko da. Parte hartu nahi dutenek Gorlizko Kultur Etxean jaso ditzakete datu gehiago, baita 946 774 000 telefono zenbakira deituz ere. Argazkian, 2005eko Mendibike Egunaren irudia.
  Politika 2006-04-10 22:25

Alkatearen eta Hirigintza zinegotziaren dimisioa eskatu dute Gorlizko Independenteek

Erabiltzailearen aurpegia Ukberri "Larderiaz jokatzeagatik, gardentasun faltagatik, behin eta berriz abisatu dugulako epaileak erabaki arte itxaron behar zela, bat ez zetozen alegazioak onartzeagatik, erabateko egiaren jabe dela uste duelako, jauntxokeriagatik, kaltetuei sortutako arazo guztiengatik, zergak ordaintzen dituzten gorliztarrei eragindako gastuengatik, beti ahazten dutelako Udala denok garela. Iruzur egin eta akatsak ez aitortzeagatik", salaketa larri horiek mahaigaineratuz, EAJko Jon Landa Hirigintza zinegotziaren dimisioa eskatu zuen, azken udalbatzarrean, Emma Calzada Gorlizko Independenteak taldeko ordezkariak, Blogorliz bitakorak zabaldutakoaren arabera. Horren ostean, eskaera berretsi zuen alderdi bereko Jon Fernandezek eta zera galdetu zion Patxo Igartua (argazkian) alkate jeltzaleari: "Patxo, zuk bazeneukan honen guztiaren berri?". Udal mandatariaren baiezkoa entzunda, "ba, zure dimititzea ere nahi dugu", adierazi zion Fernandezek Igartuari.
  Jendartea 2006-04-06 23:26

Armintza Bidean egingo duten errotonda berriak bertoko trafikoa "arinduko" du

Erabiltzailearen aurpegia Ukberri Gorlizko Udalak onartu berri duenez, errotonda eraikiko dute Armintza Bidea aldean, hain zuzen ere, Tribiñu, Orbeta eta Itsasbide kaleen elkargunean. Patxo Igartua alkateak adierazitakoaren arabera, “lotura berri honekin, arindu egingo da udalerri barruko trafikoa eta hondartzara doana, batez ere Armintzako errepidetik datorrena”. Dagozkion lanak bi alditan egingo dituzte, “ibilgailuen eta oinezkoen joan‑etorriak ahalik eta gutxien eteteko”. Errotonda berriak, 8,50 metroko erradioa izango du, eta 3,75 metro zabaleko bi erreik inguratuko dute. Horren kostua 571.872,83 eurokoa da, eta aurreikuspenaren arabera, lanok lau hilabete eta erdi iraungo dute. Argazkian, Gorlizko udaletxea.
  Jendartea 2006-04-05 19:05

Hainbat zerbitzu hartuko ditu Gorlizko udal eraikin berriak

Erabiltzailearen aurpegia Ukberri Udaltzaingoa, Bake Epaitegia, Gizarte Ongizate Zerbitzuak eta hartuko dituen Kontsumitzaileen Informaziorako Udal Bulegoa (KIUB) hartuko dituen egoitza berria eraiki du, Elexalde inguruan, Gorlizko Udalak. Orotara, 375,7 metro koadro erabilgarri dituen eraikinak "Eusko Jaurlaritzak ezarritako irisgarritasun neurriak betetzen ditu", tokiko erakundeko arduradunek prentsa ohar bidez jakinarazi dutenez, eta aparkalekua du sotoan eta beste bi solairu. Behekora, kanpotik zuzenean sartzeko aukera dago arrapala baten bidez, eta ezinduentzako komuna ere badago bertan. "Gainera, beheko solairua gainontzekoekin komunikatuta dago zortzi lagunentzako igogailu baten bidez", aipatu du Patxo Igartua alkateak. Argazkian, Gorlizko udaletxea.
  Ekonomia 2006-04-03 20:01

Administrazio-laguntzaile baten bila dabil Gorlizko Udala

Erabiltzailearen aurpegia Ukberri Tokiko Gobernu Batzordeak 2005eko abenduaren 27an egindako bileran erabaki zuen administrazio-laguntzaile postua betetzeko oinarriak eta deialdia onartzea. Udal agintariek adierazi dutenez, herritarren arreta behar dute langilea, "Udaleko funtzionarioen lanpostu-zerrendan hutsik baitago lanpostua eta lehiaketa-oposizio sistema erabiliko da". Eskabideak aurkezteko epea amaitzen den egunean 18 urte beteta izatea; graduatua edo Eskola Graduatu, Lanbide-Hezkuntzako 1. mailako titulua edo baliokidea izatea; eta zigor espedienteren baten bidez edozein administrazio publikotako zerbitzutik baztertuta ez egotea eskatzen diete, besteak beste, izena eman nahi dutenei. Baita euskara-ezagutza ere. Eskabideak behar bezala beteta aurkeztuko dira Gorlizko Udaleko erregistro orokorrean (Eliz plaza, 1) deialdia Estatuko Aldizkari Ofizialean agertu eta hurrengo egunetik hasita 20 eguneko epean; apirilaren 14ra arte, beraz.
  Jendartea 2006-04-03 19:25

Gorlizko Turismo Bulegoak 3.712 lagun artatu zituen 2005ean

Erabiltzailearen aurpegia Ukberri Guztira, 3.712 argibide-eskaera jaso zituen joan den urtean zehar, Uribe Kostako udalerriko iturrien esanetan. Informazio-eskaera horietatik, %78a Euskal Autonomia Erkidegoko turistenak izan ziren, "%11 Estatuko beste zenbait eskualdetik etorri ziren eta gainerako %11 nazioarteko bisitariek luzatu zituzten", aipatu dute. Udal agintarien hitzetan, "datu zehatzagoek adierazten dute Estatuko bisitarietatik %48a Katalunia eta Madrildik etorri zirela Gorlizera; bestalde, nazioarteko turistetatik %54a Frantzia eta Erresuma Batutik hurreratu ziren eta %24a Alemania eta Italiatik". Bestalde, bi liburuxka berri argitaratu ditu Gorlizko Turismo Bulegoak: irudi-liburuxka eta zerbitzuen gida.
  Kultura 2006-03-13 22:22

Los Moñas mungiarren kontzertua izango da ostiral honetan Xurrut tabernan

Erabiltzailearen aurpegia Ukberri Los Moñas rock talde mungiarra izango da kontzertuan aste honetako ostiralean, martxoak 17, Gorlizko Xurrut tabernan, 22:00etatik aurrera, Baga-biga musika ideiak disketxeak prentsa-ohar bidez jakinarazitakoaren arabera. Los Moñas taldea 2004an osatu zuten, Mungian, Aitor Ganboa, Ibon Celaya eta Ivan Hernandezek. Disketxeak adierazi duenez, "pop-rocka lantzen dute nagusiki, doinu freskagarriak erabiliz. Kantu errazak dira, konplikaziorik gabeak, lelo jakin baten inguruan sustraitutakoak. Erresuma Batuko gitarren filosofiari jarraitzen diote, mod ukitu batez eta popa, rocka eta Amerikako surf-punk itxurara egindako abestiez, baita ska-pop ere; baina den dena poparen galbahetik pasatua".
  Jendartea 2006-03-13 22:06

Gorlizko nagusien etxeko taberna alokatzeko lehiaketa deitu dute

Erabiltzailearen aurpegia Ukberri Gorlizko Udalak udalerri horretako nagusien etxeko (argazkian) taberna zeini alokairuan eman erabakitzeko lehiaketa publikoa deitzea erabaki du, "herrian ohiko taberna izanik", udal iturriek jakinarazi dutenez. Egitasmo honetan interesatuta daudenek, Udal Idazkaritzan baldintzen plegua har dezakete 9:00etatik 13:00etako ordutegian, eta eskaintzak aurkezteko epea martxoaren 24a bukatuko da, ordu batetan.
  Jendartea 2006-03-13 21:53

Arrantza-ontzia jarri dute Gorlizko Tribiñu bideko apaingarri

Erabiltzailearen aurpegia Ukberri Gorlizko Udalak arrantza-ontzi bat jarri du apaingarri gisa Tribiñu kaleko biribilgunean. Ontziak Gure Ana Mari du izena eta, Javier Garrido Obra eta Zerbitzuetako zinegotziak azaldutakoaren arabera, "Alejandro eta Rafael Madariaga herriko marinelek udalari laga diote, inolako kosturik gabe, berria eraikiko dutelako". Itsasontzia Armintzako Santo Tomas kofradiarena da eta Olazidegi ontzioletan egin zuten 1989an. Kroskoa poliester-zuntzezkoa dauka eta ainguralekuak altzairu herdoilgaitzezkoak dira. Gainera, bizkarrean 2,5 tona arrainerako edukiera du eta 9 metroko luzeera eta 3 metroko zabalera. Lekeitiotik Santoñara ibili da eta "20 milia sartu da itsasoan barrena, besteak beste lupiak, hegaluzea, berdela eta itsas aingirak harrapatzeko".
  Kirolak 2006-03-08 20:15

Gaur eman daiteke izena Gorlizko Talde Independenteak antolatutako eski asteburuan

Erabiltzailearen aurpegia Ukberri Gorlizko Talde Independenteak datorren martxoaren 31 eta apirilaren 1 eta 2ko astebururako Aragoiko Formigal herrirako bidaia eta egonaldia prestatu du. Talde soziopolitikoak jakinarazi duenez Gorlizen erroldatutako adin nagusiko guztiek daukate aukera parte hartzeko eskiatzeko irteera horretan. Horretarako gaur eman behar dute izena 19:00ak eta 20:00ak bitartean Gorlizko Talde Independentearen bulegoan (Talaia bidea 1, behea). Bidaia 129 euro kostatzen du baina bidaiariek 99 baino ez dute ordaindu behar izango GTIk berak beste guztia bere gain hatuko baitu. Prezioaren barruan autobus bidaia, ostatua, larunbatean eta igandean eskiatzeko forfaitak eta aseguruak, eta larunbateko gosaria eta afaria zein igandeko gosaria.

Nabarmenak

Zorion agurrak