Jendartea 2008-10-14 22:17

Gorlizek Indiari ematen dion laguntzaren berri emango dute etzi

Erabiltzailearen aurpegia Ukberri Ostegun honetan, urriak 16, Vicente Ferrer Fundazioa eta Uribe Kostako Mankomunitatearen arteko lankidetzari buruzko informazio batzarra egingo dute Gorlizko udaletxeko batzar aretoan, 19:00etatik aurrera. Bertan gobernuz kanpoko erakundearen antolaketa, Anantapur-en (India) zein kolektiboekin lan egiten duen 1969tik, eta Gorlizko Udalak Uribe Kostako Mankomunitatea osatzen duten beste tokiko erakundeekin batera finantziatu duen “Indiako Anantapur distritoan tantakako ureztapenaren jarri eta nekazal dibertzifikazioaren bitarteko garapen jasangarriaren programa” izeneko proiektua zertan datzan azalduko dute. Hizlaria, Araba, Bizkaia eta Gipuzkoan Vicente Ferrer Fundazioko ordezkari Irune Pascual izango da. Argazkian, Pascual eskuinean, Izaskun Zubiaur Berangoko Kultur zinegotziarekin, aipatu udalerrian “Anantapurrekin konprometituak” izeneko erakusketa aurkeztu zuenean.
  Kultura 2008-10-08 19:34

Perretxiko erakusketa eta dastaketa egingo dituzte igandean Gorlizen

Erabiltzailearen aurpegia Ukberri Igande honetan, urriak 12, VII. Perretxiko Jardunaldia ospatuko da Gorlizko Iberre auzoko San Pedro plazan, 10:30etik 14:30era. Larunbatean, Arabako Sarria aldera joateko antolatuta dagoen autobus bat irtengo da perretxiko bila eta, sailkatu ondoren, igandean erakusketa egongo da, tokiko kultur iturriek zehaztu dutenez. Gazteentzako perretxiko lehiaketa ere izango da, aurten zazpigarren aldiz. 3.000 pintxo inguru dastatzeko aukera egongo da, aurreko urteetan bezala. Antolatzailea Gorlizko Perretxikozale taldea da eta Udal Kultur Etxea eta BBK dira laguntzaileak. Auzo berean, baina Iberrebarri plazan, Euskeraz Olgetan egitasmoko jarduerak egingo dituzte, Euskara Zerbitzuaren eskutik. Euria balitz frontoian izango litzateke. 12:00etan hasi eta 14:00etan amaituko da, oraingo astea kreatibitatearena izanik. Gomendatutako adin tartea 1etik 10 urtera da, eta helburua umeek eskolatik kanpo euskaraz jolasteko aukera izatea da. Argazkian, Euskal Herriko txoko askotan egiten dituzte perretxiko erakusketak, Aretxabalan tartean / Larrabetzutik Mundura.
  Kultura 2008-10-02 15:59

Euskal Herriko ohiturak plazara aterako dituzte larunbatean Gorlizen

Erabiltzailearen aurpegia Ukberri Uribe Kostako Zerbitzu Mankomunitateko Euskara Zerbitzuaren bitartez, zenbait euskal tradiziori lotuta dagoen jaia antolatu du larunbat honetarako, urriak 4, Gorlizko Udalak. Oraingo honetan, erakustadia eskainiko dute Portalena euskal pilota taldeak (11:30etik 12:30era) eta Aratz dantza taldeak (12:30etik 13:15era). Arratsaldean ere parranda egiteko aukera paregabea egongo da, sagardo festa izango baita arratsaldeko 19:00etatik 21:00etara. Bertan, edaro gozoa dastatzeaz gain, trikitrixaren musika ere egongo da entzungai. Erakustaldiak zein sagardo festa elizako plazan izango dira. Bestalde, astelehenean, urriak 6, egingo dute Berbalagun egitasmoaren aurkezpen publikoa Gorlizen. Saioa 19:30ean izango da, Eloisa Artaza kaleko 3. zenbakiko erakusgelan. Euskaldun zaharrak ikasi berriekin harremanetan jarriz euskararen erabilera bultzatzea da proiektuaren ardatza. Argazkian, mutikoak dantzan.
  Kirolak 2008-09-29 15:57

Gorlizko XVII. Mountain Bike jaialdian 400 lagunek baino gehiagok parte hartu dute

Erabiltzailearen aurpegia Ukberri Mendibike elkarteak antolatuta, 405 lagunek parte hartu zuten, larunbatean, Gorlizko XVII. Mountain Bike jardunaldian. Herri lasterketako 231 parte hartzaileak izan ziren irteeratik abiatzen lehenak, 9:30ean. Bakar batzuk baino ez zuten osatu ordu eta erditik beheragoko denboran 20 kilometroko ibilbidea. Bitartean, 64 haur eta gaztek 4 kilometro egin behar izan zituzten, pinudi inguruan jarritako ibilbidean. Ondoren, izena emandako 110 profesionalei heldu zitzaien txanda, 11:30ean ekin baitioten Bizkaia XC lehiaketari, lurraldeko txirrindulari onenen izenak emango zituena eta Euskadiko BBT Txapelketarako puntuagarria. Bada, Fanoko zirkuitu gainean egindako proba gogorregia suertatu zen; izen-emandako guztietatik 63 lasterkari baino ez ziren sailkatu. Argazkian, Gorlizen garaipena lortu zuen Elite kategoriako Jose Antonio Diez, beste proba batean / El Pedal del Occidente.
  Kirolak 2008-09-26 23:23

Mountain Bike jaialdia izango da bihar Gorlizen

Erabiltzailearen aurpegia Ukberri Mendibike elkarteak antolatuta, bihar goizeko 9:30etik aurrera Gorlizek ohiko mountain bike martxa hartuko du, aurten 20 kilometroko ibilbidearekin, herriko polikiroldegitik abiatuz. Gainera, XVII. edizioak aurreko urteetan ziren hiru ekitaldiak berreskuratuko ditu eta helduen martxa abiatu eta ordu erdira haurrena hasiko da txikienek lau kilometro egin ditzaten. Ondoren, profesionalen ordua izango da, 11:30ean ekingo baitiote Bizkaia XC lehiaketari. Antolatzaileek 400 lagun baino gehiago espero dituzte, "zale guztiek egutegian markatuta baitute" Gorlizko kontzentrazioa. Soilik umeen martxan 100 bat lagun izaten ohi dira. Ibilbideak "nahiko gogorrak dira" eta sasoi onean egotea eskatzen dutela adierazi dute Mendibike elkartekoek. Argazkian hainbat mountain bike zaleak Gorliztik ibilaldia egiten / Guindeo.
  Kirolak 2008-09-23 22:56

Laster hasiko dira eskupilota, pala eta frontenis eskolak Gorlizen

Erabiltzailearen aurpegia Ukberri Denboraldi berria gainean, eskupilota, pala eta frontenis eskoletan izena emateko epea zabaldu du Gorlizko Portalena Esku Pilota Kirol Elkarteak. Ikasle bakoitzak 20 euroko kuota ordaindu beharko du eta jasotzen den dirua pilotari gazteentzat materiala erosteko izango da, klubeko arduradunek adierazi dutenez. Horrenbestez, kirol taldeak Gorlizko kultur etxean (Uresarantze, z/g) daukan bulegoan, gorliz.kirol[abildua]kzgunea.net e-posta bidez edo 692 731 963 telefono zenbakira deituz apunta daitezke neska-mutilak. Eskupilota eskolak (benjaminak eta kimuak) astelehen eta asteazkenetan izango dira, 18:00etatik 19:00etara. Palan jokatzen (benjaminak eta kimuak), berriz, astearte eta ostiraletan ikasi ahal izango da, 18:00etatik 19:00etara. Azkenik, ostiralero emango dituzte frontenis eskolak (kimuak eta haurrak), 19:00etatik 20:00etara. Bestalde, Mendibike elkarteak antolatuta, XVII. Mountain Bike Gorliz 2008 ibilaldia izango da larunbat honetan, irailak 27. Horrenbestez, irteera (11:30ean) baino 30 minutu lehenagora arte eman ahal izango da izena. Nagusien lasterketarako 10 euro ordaindu beharko dira eta martxa txikirako beste horrenbeste. Akabuan, kirol materiala zozketatuko da eta partehartzaile guztiek kamiseta bat jasoko dute. Argazkian, haur bikotea palan jokatzen.
  Kultura 2008-09-05 21:26

Heldu zein umeentzako ikastaroak antolatu ditu Gorlizko Kultur Etxeak

Erabiltzailearen aurpegia Ukberri Dagoeneko 2008-2009 ikasturteko ikastaroen eskaintza (pdf) ezagutzera eman du Gorlizko Kultur Etxeak. Aurten, eskulanak, graffitiak, grafopsikologia, hunkipen adimena, joskintza, pilates, pintura edota yoga lantzeko aukera edukiko dute helduek. Gazte eta umeentzat, berriz, musika eta piano ikastaroak -Lirain elkartearen eskutik- eta pintura, txikierritmo (psikomotrizitatea, koreografiak…) eta zeramika tailerrak prestatu dituzte. Horrenbestez, fitxa (pdf) bete eta Krutzeta kaleko 5. zenbakira jo beharko dute izena eman nahi dutenek. Kultur iturriek jakinarazi dutenez, familia ugaria daukatenei %15eko beherapena egingo diete eta gazte txartela aurkezten dutenei %10ekoa. Bestalde, Gorlizen erroldatutako 13 eta 28 urte bitartekoak erdia baino ez dute ordaindu beharko ikastaroko. Adinez 65 urtetik gorakoei ere horrenbesteko deskontua egingo zaie yogan. Argazkian, pintura ikastaroa.
  Kultura 2008-08-14 19:26

Begoña Artaberen pintura lanak ikusgai jarri dituzte Gorlizen

Erabiltzailearen aurpegia Ukberri Begoña Artaberen pintura lanak ikusgai daude jada Gorlizko udal erakusgelan (Eloisa Artaza, 3), hilaren 21era arte, egunero 12:00etatik 14:00etara eta 18:00etatik 21:00etara bitarteko ordutegian. Artista "Hodeismo" izeneko kultur korrontea edo pentsamoldearen jarraitzailea da eta artelan hauen erakusketa atzera begirada bat da, eta berria, garaikidea ere bai. "Beti belu" izenburuko erakusketa honek oleoak, narruak, lurrak, xilografia, grabatuak, collage, tintak, argazkiak eta materia organikoak ditu, naturarekin lotura izateko, baita kobazuloetako materialak ere... Bestalde, larunbat eta igandean ospatuko diren Urezarantza auzoko jaietan sardina erreak salgai ere izango dela adierazi dute udal iturriek. Ekitaldia, etzi bertan izango da, 13:00etatik aurrera, kiroldegiko tabernan. Bitartean, jaietako udal zapi bordatuen (argazkian) "arrakasta edo harrera ona ikusi eta gero" berriro jarri dituzte salmentan, kultur etxean eta turismo bulegoan.
  Kultura 2008-08-08 19:04

Eliz musika kontzertua izango da igandean Gorlizen

Erabiltzailearen aurpegia Ukberri Ostiral honetan, abuztuak 8, zinema emanaldia egongo da Gorlizko udal pilotalekuan, dohain, 22:00etan. Euskarazko filmea izango da gaurkoan ikusgai, “Prot eta Berta” izenekoa. Etzi, berriz, kontzertua izango da elizan, 20:00etan. Vocalia izeneko abesbatza Bizkaiko Orkestra Sinfonikoarekin (BIOS) arituko da, eliz musika eskainiaz. Abesbatzak Basilio Astulezen zuzendaritzapean jardungo du eta orkestrak Ana Uriarteren gidaritzapean. Bestalde, hilaren 13ra bitartean, Elisabete Mendizabal gorliztarraren arte erakusketa egongo da ikusgai Eloisa Artaza kaleko 3. zenbakian dagoen udal erakusgelan. Hogeita hamar bat olio margok osatzen dute erakustaldia, bertan paisaiak eta bodegoiak nagusitu direlarik. Mendizabal Euskal Herriko zenbait arte erakusgelatan eta Madrilen jarri du ikusgai bere lana. 50 urte baino gehiago daramatza pintatzen. Erakusketa 12:00etatik 14:00etara eta 17:00etatik 19:00etara bisitatu daiteke. Argazkian, Elisabete Mendizabalen artelanetako bat.
  Jendartea 2008-08-05 14:51

77 urteko bilbotar bat hilda agertu da Gorlizko hondartzan

Erabiltzailearen aurpegia Ukberri Atzo, abuztuak 4, 77 urteko bilbotar bat hilda aurkitu zuten Gorlizko hondartzan. Hilotza eguerdiko 12ak aldera aurkitu zuten, eta jarraian larrialdietarako zerbitzuak hondartzara bertara hurbildu ziren arren, ezin izan zuten ezer egin bere bizia salbatzeko. Ertzaintzak eitb24.com-i jakinarazi zionez, heriotzaren arrazoia bihotzeko arazo bat izan zitekeen, baina ezin izan zuten esandakoa berretsi. Bestalde, gizonaren nortasunari buruz, Ertzaintzak ez du daturik eduki.
  Kultura 2008-06-26 23:06

Euskararen eguna eta San Pedro ospatuko dituzte asteburuan Gorlizen

Erabiltzailearen aurpegia Ukberri Udako Euskararen Eguna ospatzeko asmoz, larunbat honetarako (ekainak 28) jarduera ugari prestatu ditu, Iberrebarri plazan, Gorlizko Kultur Etxeak. Horrenbestez, 11:30etik 13:30era, sokatira, txinga, zozkor apustua, fardel jasoketa, gurdi jokoa, harri jasoketa, zaku lasterketa edota ingudea bezalako herri kiroletan jarduteko aukera izango dute 5 eta 12 urte bitarteko haurrek. Urte batetik 10era artekoek, berriz, puzgarriak eta tailerrak edukiko dituzte, 12:00etatik 14:00etara, Euskaraz Olgetan ekimenaren barruan. Eta 4 eta 12 urte bitarteko neska-mutilei Mari, Basajaun, Herensugea, Lamia eta beste hainbat Mitologia pertsonai ezagutzeko aukera emango diete, 16:30etik 19:00etara, horretarako espreski prestatutako tailerrean. Ondoren, Kuko, Truko eta Bolenwaider pailazoek eskainiko dute ikuskizuna, 19:30ean; eta, egunari amaiera emateko, disko gaua egongo da 21:00etatik aurrera. Hurrengo egunean, igandearekin, San Pedro eguna ospatuko dute Gorlizko Iberre auzoan. Horretarako, Aratz Dantza Taldearen agerraldia (18:00), sardina jana (19:00) eta Juanchu el Charro mariachi taldearen emanaldi bikoitza (19:00 eta 21:00) antolatu dituzte. Argazkian, iazko ospakizuna Iberre auzoan.
  Kultura 2008-06-17 22:15

Gorlizko 39 umek parte hartuko dute aurtengo udalekuetan

Erabiltzailearen aurpegia Ukberri Iaz bezala, Uribe Kostako Mankomunitateko Euskara Zerbitzuak udaleku irekiak antolatu ditu Gorlizko 3 eta 5 urte arteko umeentzat, uztailaren 1etik 24ra bitartean. Hasiera batean, 20 plaza eskaini baziren ere, azkenean, izena emandako 39 neska-mutilek parte hartu ahal izango dute, Udalak egindako ahaleginei esker. Udalekuak Gorlizko ikastetxean izango dira, astelehenetik ostiralera, 10:30etik 13:30era. Bertan umeek zenbait jarduera egingo dituzte hainbat balio sustatzeko asmoz, hala nola, sorkuntza, soziabilitatea, sentsibilitatea eta norberaren autonomia. Ikastetxean bertan egingo dituzten ekintzez gain, neska-mutilek hiru irteera egin ahal izango dituzte: uztailaren 2an eta 16an Maruri eta Mungiako igerilekuetara joango dira, eta uztailaren 23an Olentzeroren etxea (Mungia) bisitatzeko aukera izango dute.
  Jendartea 2008-04-07 15:20

Alkoholemia kontrol batean ertzain bat ia harrapatu ei duen gidaria atxilotu dute Gorlizen

Erabiltzailearen aurpegia Ukberri Ertzaintzaren Bizkaiko Trafiko Unitateko poliziek R M.C.V. 34 urteko gizonezkoa atxilotu zuten atzo, igandea, goizaldean Gorlizen, ausartegi gidatzearen delitu baten ustezko egilea izatea egotzita. Herrizaingo Sailak emandako bertsioaren arabera, pertsona horrek alkoholemia-kontrol batean gelditu gabe aurrera egin zuen eta kontroleko polizia bat "ia-ia harrapatu" zuen. "Trafiko arauak hautsita, gainerako gidarien bizitzak arrisku larrian jarrita gidatu" zuela uste du Ertzaintzak. Aipatu gertaera goizaldeko 4:30ak aldera hasi ziren, beti Herrizaingo Sailak jakitera emandako bertsioaren arabera, BI-637 errepidean Sopela udalerrian. Alkoholemia-kontrol bat egiten ari ziren Ertzaintzaren poliziek bertan gelditzeko agindua eman zioten Madrilen matrikulatutako BMW turismo bateko gidariari, alkohola detektatzeko proba egiteko. Baina, "autoak gelditu beharrean, abiadura azkartu zuen bat-batean, agenteetako batek bere burua paretik kendu behar izan zuen harrapa ez zezan" eta gidariak ihesari ekin zion, Plentziarako bidean, "abiadura bizian". Ertzaintzaren patruila batzuk ibilgailu horren atzetik abiatu ziren eta, minutu batzuk geroago, kostaldeko herri horretako aparkaleku batean aurkitu zuten; gidaria barruan zegoen oraindik. Argazkian, Ertzaintzako errepide kontrol bat artxiboko irudi batean.
  Gazteok 2008-04-03 14:41

Gazteentzako txalaparta, lehen sorospen eta irristaketa ikastaroak antolatu dituzte Gorlizen

Erabiltzailearen aurpegia Ukberri Ikastaro berriak antolatu ditu Gorlizko Gazte Informazio Guneak. Horien artean, Amaia Arce Uribe Kostako Txalaparta Ekimenetarako Sustapen Taldeko (UKTEST) kideak euskaraz emango duena izango da lehendabizi abiatuko dena. Apirilaren 16tik 30ra bitarteko asteazken (19:45-21:45) eta larunbatetan (11:00-13:00), ttakuna eta herrena, txalapartaren historia, oholaren soinuak, egur eta makila desberdinak eta neurriak... ikasteko aukera edukiko dute 13 eta 28 urte bitarteko neska-mutilek, Urezarantzako eskolan. Parte-hartzaileen kopurua mugatua da, tokiko iturriek zehaztu dutenez. Gauzak horrela, aipatu adin tarteko gazteekin tokiak ez betetzekotan baino ez zaie eskaintza gainontzekoei zabalduko. Gainera, lehentasuna izango dute Gorlizen erroldatutakoek. Horiek 12 euro ordaindu beharko dituzte eta kanpokoek 24 euro. Horretaz gain, lehen sorospen eta irristaketa ikastaroak prestatu dituzte. Guztietan finkatu dute izena emateko azken eguna apirilaren 10ean. Informazio gehiago jasotzeko, berriz, 946 774 000 telefono zenbakira deitzea badago. Argazkian, UKTESTeko bi lagun txalaparta jotzen, hainbat umeren begiradapean.
  Jendartea 2008-03-08 19:49

Izen-ematea zabalik dute udan saharar umeak hartu nahi dituzten familia gorliztarrek

Erabiltzailearen aurpegia Ukberri Gorlizko Udalak Güerako kanpamenduarekin 2001ean egindako adiskidetzearen ondorioz, abian dira zenbait proiektu, eta horietako bat “Oporrak bakean” deritzona da. Proiektu horren bidez, aukera eman nahi zaie Saharako umeei udako hilabeteetan (uztailaren 7tik irailaren 7ra, gutxi gora behera) familia gorliztarrekin bizi daitezen. Hori dela eta, seme-alabak eduki eta udan 7 eta 12 urte bitarteko ume sahararrak etxean hartu ahal dituzten familiei dei egin diete izena emateko. “Haurrok basamortu idorretik ateratzea da asmoa, uda sasoian 50 gradoko tenperaturara ere iristen baita termometroa Sahara aldean”, adierazi dute udal arduradunek. Apirilaren 10ra arte dago izena emateko aukera. Argazkian, Saharako ume eta euskal elkartasun elkarteko kide batzuk orain bi urteko udan Loiuko aireportuan Aminetu Haidar giza eskubideen ekintzalaria itxaroten / Saharatik.com.
  Jendartea 2008-03-08 19:38

Hilaren 14ra arte dute gorliztarrek haurrentzako masaje tailerrean izena emateko

Erabiltzailearen aurpegia Ukberri Haurrentzako masaje tailerra eskainiko dute Gorlizen, martxoaren 29tik apirilaren 26ra bitarteko larunbatetan, 2 eta 10 hilabete arteko umetxoak dituzten gurasoei zuzendua. Guztira, bost saio izango dira, 11:00etatik 12:30era, Eloisa Artaza kaleko 3. zenbakiko erakusketa aretoan egingo dituztenak. Udal iturri gorliztarrek nabarmendu dutenez, erdaraz izango dira eskolak. Interesatuek 946 774 000 telefono zenbakira deituz eska dezakete informazio gehiago. Horrenbestez, hilaren 14ra arte egongo da zabalik izena emateko epea, gehienez 10 familientzako tokia baino ez dela egongo. Gorlizen erroldatutakoek 40 euro ordaindu beharko dituzte; kanpotarrek, berriz, horren bikoitza.
  Iritzia 2008-03-04 17:05

Jabi Zabala: "zu non bizi zaren? Ondotxo dakite alderdiek"

Erabiltzailearen aurpegia Ukberri Lehengoan etxera etorri zitzaidan EAJk bidalitako propaganda gutun hau. Edo hobeto publizitatea esan beharko dugu? Ez dakit. Egia esan, aspertuta nengoen publizitate banatzaileek tinbrea jo eta erantzutean “propaganda” zela entzuteaz, gero postontzia zabaltzean Lourdeserako txangoen, MediaMarkten edo audifonoen publizitatea aurkitzeko. Baina akaso hauteskundeetako propagandak gehiago du publizitate komertzialetik… Tira, ez da hori gaur hemen plazaratu nahi dudan gaia. “Zu, non bizi zara?” galdetzen du gutunak, galdera tontoa inondik inora. Izan ere gutunean bertan datorren datua baita, nire izen-abizenak eta helbidea. Datu berberak datoz (aurkeztu ahal izan diren) gainontzeko alderdien gutunetan. Eta horrek zer pentsatua eman dit. Argazkia: Jabi Zabala. Erabilpena: cc lizentzia honen arabera.
  Kultura 2008-02-05 16:17

Gorliz irratiko ateak nahi duen orori zabaldu dizkiote

Erabiltzailearen aurpegia Ukberri Gorliz irratia Uribe Kosta Irratiko partaideek zabaldu dutenez, irrati hori FMko 107.8an entzuteaz gain, bertan parte hartzeko aukera ere eskaini diete Uribe Kosta eta Mungialdeko biztanle guztiei. Izan ere, "Batu Gorliz Irratira" lelopean, irratiaren mundua ezagutu nahi, esatari edo kontrol lanak ikasi gura, irratia sostengatzen duen elkartean laguntzeko prest egon edota nahi duen eran eta nahi duenean irratsaioa egiteko asmoa duen lagun orori bidea erraztu eta Gorliz Irratira hurbil dadin lagundu nahi diote. Horretarako, 946 774 575 telefonora deitu edo gorlizirratia@gorlizirratia.com posta elektronikora idatzi baino ez da egin beharko. Argazkian, udan egiten den "Volumen Brutal" saioko Papis esataria.
  Kultura 2008-01-31 21:14

Mielotxinek bisitatuko du larunbatean Gorliz

Erabiltzailearen aurpegia Ukberri Uribe Kosta eskualdeko gainontzeko herrietan bezala, eskola-umeak, irakasleak, zuzendariak, aita-amak... hartuko dituzte ostiral honetan, goizez, Gorlizko kaleak, euren mozorroak erakutsiz ikastetxeko desfilea egiteko. Hain zuzen ere, hori izango da asteartera bitartean luzatuko diren inauteriei hasiera emango dien ekitaldia. Hartara, larunbaterako ere jarduera ugari antolatu ditu Gorlizko Kultur Etxeak: haurrentzako puzgarriak, trikitilariak, Orabai perkusio musika taldearen kalejira... Horretaz gain, ohitura bilakatu den zita ere badute etzi gorliztarrek. Euren txokotik mugitu gabe Nafarroa aldera egingo dute bidaia txki zein nagusiek, Aratz dantza taldekoen eskutik: aurten ere Lantzeko inauteriak antzeztuko dituzte. Horrenbestez, Mielotxinek (erraldoia), Zaldikok, Ziripotek (lodikotea), perretzaileek eta txatxoek hartuko dute Gorlizko kale nagusia, zarataka eta dantza eginez, 17:30etik aurrera. Ondoren, txokolatea banatuko dute. Argazkian, Mielotxin Lantzeko kaleetan barrena.
  Jendartea 2008-01-16 23:10

Dagoeneko sahararrentzako jakiak batzen hasi dira Gorlizen

Erabiltzailearen aurpegia Ukberri Beste urte batez, Sahararen aldeko euskal karabanarekin bat egin du Gorlizko Udalak, "Piztu itxaropena" leloari helduz. Horrenbestez, elikagaiak (azukrea, atuna oliotan, dilistak eta arroza) eta higiene-gaiak (konpresak) batzen hasi dira jada. Horiek urtarrilaren 31ra arte eraman ahal izango dira kultur etxera (Ibarrena etxea, Krutzeta kalea 5), edo udaletxeko bulegoetara (beheko solairuko harrera gelan). Diruz lagundu nahi dutenek, berriz, ondoko Euskadiko Kutxaren kontu zenbakian egin dezakete: 3035-0080-94-0800054177. 2001eko martxoan Saharako Güera herriarekin senidetu zenetik, hainbat ekimenetan hartu du parte Gorlizko Udalak, saharar herriari laguntza emateko. "Hango herritarrak bidegabeko erbestean bizi dira azken 30 urteetan, Aljeriako Saharako basamortu latzean", azaldu dute tokiko agintariek. Argazkia: Saharar Errepublika Demokratikoaren (SEAD) aldarrikapenaren 30. urteurrenarekin bat eginez, bandera sahararra jaso zuten ikurrinarekin batera Gorlizko udaletxean, 2006ko otsailaren 27an.

Nabarmenak

Zorion agurrak