Hezkuntza 2008-03-31 19:38

Datorren urterako haurreskola zabaldu nahi dute Artatza ikastetxean

Erabiltzailearen aurpegia Ukberri Eusko Jaurlaritzaren Haurreskolen Patzuergoarekin elkarlanean, Artatza ikastetxe publikoan 0 eta 3 urte bitarteko haurrentzako ikasgelak jartzeko asmoa du Leioako Udalak, Eneko Arruebarrena alkateak iragarritakoaren arabera. Obretan aurten hasteko asmoa dute, haurreskola berria hurrengo ikasturterako prest egoteko. Hala ere, oraindik erabaki gabe dago zenbat haurrentzako toki egongo den. "Solairu bat edo bi jarri aztertu behar dugu. Bakarra izanez gero, 34 ikasle sartuko lirateke; solairu birekin beraz, 74 ume inguru", dio udal agintariak. Tokiko erakundeak eraikina eta mantenimendua jarriko ditu eta Jaurlaritza irakasleen soldataz arduratuko da. Akabuan, hiru haurreskola berri nahi ditu Udalak. Lehen pausu honekin Pinueta, Ibaiondo eta Lamiakoko auzoak asetuko ditugu, eta bestelako proiektuak erdialderako eta Sarriena zein Basañez eremuetarako izango dira. Dena dela, haurreskola toki batean izateak ez du esan nahi bertako umeak baino ezin direla matrikulatu, zentroak udalerriko ume guztientzat irekia egongo dira", azaldu du Arruebarrenak.
  Hezkuntza 2008-03-26 12:33

Matrikulazio kanpainaren harira sarean jarri dute Getxoko ikastetxeen gidaliburua

Erabiltzailearen aurpegia Ukberri Astelehenean (martxoak 31) abiatu eta apirilaren 11ra arte egongo da zabalik Haur Hezkuntzako (0-5 urte), Lehen Hezkuntzako (6-11 urte) eta Derrigorrezko Bigarren Hezkuntzako (12-15 urte) ikastetxe publikoetan eta itunduetan 2008/09 ikasturterako matrikula egiteko epea, Getxoko Udaleko iturriek jakinarazi dutenez. Horrenbestez, azken eguna heldu baino lehen, hezkuntza zentroetan honako agiriak aurkeztu beharko dira: familiaren errolda ziurtagiria, familia liburuaren fotokopia, errenta aitorpenaren fotokopia eta zentroak emandako eskaera orria, behar bezala betea. Halaber, argibideetarako hainbat telefono zenbakiren berri eman du tokiko erakundeak: Eusko Jaurlaritzaren Hezkuntza Ordezkaritza (944 031 000), udaletxea (944 660 063) eta Berritzegunearena (944 638 500), hurrenez hurren. Ohi bezala, udalerriko ikastetxeen gidaliburua (pdf) ere plazaratu dute.
  Hezkuntza 2008-03-19 12:48

Batxilergoko bigarren mailako ikasleek jarduera praktikoak egiteko aukera izango dute EHUn

Erabiltzailearen aurpegia Ukberri Hezkuntza, Unibertsitate eta Ikerketa Sailak eta Euskal Herriko Unibertsitateak (EHU) sinatutako lankidetza-hitzarmenari esker, EHUko unibertsitate zentroetan orientazioko jarduera praktikoak egiteko aukera ematen ari zaizkie Batxilergoko bigarren mailako ikasleei, tokiko iturriek jakinarazi dutenez. Egitasmoa otsailaren amaieran jarri zen martxan eta, martxoan eta maiatzan, EHUko hiru campusetan garatuko dute. Proiektu berritzaile hori lehenengo aldiz egin da ikasturte akademiko honetan eta bere helburuak, "bi etapetako hezkuntza komunitateen arteko distantzia murriztea, harreman egonkorrak eta iraunkorrak sortzea, Batxilergoko ikastetxeei curriculum akademikoa aberasteko jarduerak eskaintzea eta horiei unibertsitaterako bidea erraztea" dira, EHUtik adierazi dutenez. Argazkian, hiru ikasle praktiketan EHUn.
  Hezkuntza 2008-03-15 16:02

Eskualdeko Ikasle Abertzaleen jaialdia ospatzen ari dira gaur

Erabiltzailearen aurpegia Ukberri Uribe Kosta eta Erandioko Ikasle Abertzaleek eskualdeko jaialdia prestatu dute gaurkoan Itzubaltzeta / Romoko Itzubaltzeta gaztetxean eta dagoeneko egitarauaz disfrutatzen ari dira. Jai egun hau antolatu dute bai Lakuak darabilen DBH eta Batxilergorako dekretu berriaren aurka emandako urratsak ospatzeko eta baita borroka horretan "egin beharreko jauzirako" indarrak hartzeko ere. Den-dena, "Ikasiz, irauliz, eraikiz... borrokak egingo gaitu!" lelopean. Besteak beste, "ikasleen janzkera arautu, soin-heziketarako orduak murriztu eta ikasleek eskola ordutegitik kanpo eta institututik at zentroko arauen aurka egin ditzaketenak gurasoei salatzeko irakasleei aukera ematen dien dekretua da" Hezkuntza Sailak darabilena, Uribe Kostako IAren aburuz. Baina gaur, jai hitzordua dute eskualdeko ikasle guztiek, eta atzean utzitako poteoaren ostean honako ekitaldiak izango dira: 15:00etan bertso bazkaria (bost eurotan) Algortako Bertsolari Eskolako kide gazteekin, ondoren jolasak eta institutuen egoerari buruzko hitzaldi laburra, 20:00etan kontzertua (hiru eurotan), Alambrada eta Okupando Rom@rekin eta 24:00etatik aurrera ikasle-jaia, "jende berria ezagutu eta giro alternatibo batetaz gozatzeko" eremua. Argazkian, eskualdeko ehunaka ikaslek parte hartu zuen Bologna Prozesuaren aurka abenduaren 20an Leioako campusean egindako nazio manifestazioan.
  Hezkuntza 2008-03-12 22:20

Bolognaren aurkako adierazpenarekin bat egin dute Gizarte Zientzietako ikasleek

Erabiltzailearen aurpegia Ukberri Ikasle Abertzaleek eta Eraldatu taldeak otsailaren 20an aurkeztutako Bologna Prozesuaren aurkako ikasle adierazpenari atxikitu zaizkio EHUko Leioa eta Erandioko campuseko unibertsitario ugari. Lehenengo ekimen bateratu modura, ikasgelategi aurrean elkarretaratzea egin dute Gizarte Zientziak eta Zuzenbide fakultateetako 9 ikasle-taldek eta maila pertsonalean bat egin duten beste hainbat neska-mutilek. "Ekimen anitz hau aurreko asteetan landutakoaren emaitza bezala hartu daiteke. Helburua fakultateko ikasgeletara iritsi eta borroka bateratu bat eramateko bultzada bat bilatzea izan da", adierazi dutenez. Gaurkoa "lehenengo pausutzat" jo dute ikasleek. Argazkian, Gizarte Zientzietako ikasleek gaur egindako kontzentrazioa / Gaztesarea.
  Hezkuntza 2008-03-12 18:08

Hiru astez atzerrian ingelesa ikasteko aukera izango dute gazte sopeloztarrek 900 euroren truke

Erabiltzailearen aurpegia Ukberri Sopelako Udalak 2008ko Ingeles Topaketetan izena emateko epea zabaldu berri du. Egitasmoa 14 urteko gazteei zuzenduta dago, 1994an jaiotakoak, eta gutxienez urtebete dela udalerrian erroldatuak daudela. Partaideek Ingalaterrako familia batekin bizitzeko aukera izango dute, uztaileko lehenengo hiru asteetan, euren hizkuntza ikasteko asmoz. Ordaindu beharreko 900 euroek ingeles ikastaroa, garraioa (joan etorria hegazkinez eta bertoko ikastetxera egin beharko liratekeen bidaiak), asegurua, gazteen ardurapean egongo diren begiraleak eta hiru irteera barne hartzen dute. Aurre-matrikula betetzeko epea apirilaren 10era arte luzatuko da. Hala ere, gehien jota 25 neska-mutilek baino ezin izango dute parte hartu, tokiko iturrien arabera. Argazkian, Londresko Big-Ben erlojua.
  Hezkuntza 2008-03-11 16:54

Ostegunera bitartean 300 ikaslek parte hartuko dute Leioako campuseko publizitate jardunaldietan

Erabiltzailearen aurpegia Ukberri "La alfombra roja de la publicidad" izenburupean, gaur eman zaie hasiera, Leioa eta Erandioko campuseko areto nagusian, EMedia Junior enpresako komunikazioko ikasleek antolatutako XIV. Publizitate Jardunaldiei. Ostegunera bitartean, publizitatearen arloko 12 profesionalek beren azken lanak aurkeztuko dituzte eta beraien esperientzien berri emango dute. Jardunaldi hauetan 300 ikaslek hartuko dute parte, EHUko iturrien arabera, eta publizitate agentzia esanguratsuenen estrategien berri izango dute. Horien artean nazioartekoak ere badaude: Coca-Cola-ren Gabonetako "Fabrica de la Felicidad" iragarki saritua egin duen Sylvia Lezama eta "Amo a Laura" kanpaina arrakastatsuaren egile Tiempo BBDO, besteak beste, osteguneko saioan. Horiez gain, J&B España enpresako marketin arduradun Ricardo Tejedorrek eta Doble You-ko erredaktore sortzaile Jesus Revueltak ere hartuko dute parte, bihar eta etzi, hurrenez hurren. Argazkian, campusean egindako beste jardunaldi batzuk.
  Hezkuntza 2008-03-04 21:06

Itsas baliabideei buruzko nazioarteko masterreko tesiak irakurri dituzte EHUn

Erabiltzailearen aurpegia Ukberri Itsas baliabide eta bere ingurumenari buruzko nazioarteko masterreko lehenengo promozioaren tesiak irakurri dituzte gaur goizean Leioa eta Erandioko campuseko Zientzia eta Teknologiako gradu aretoan. Aipatu graduondoko titulua (European Master of Science in Marine Enviroment and Resources) Southampton eta Bordeaux 1 unibertsitateekin batera, baita Azti-Teknalia eta Gipuzkoako Ozeanografia Fundazioarekin, lankidetzan, antolatu du EHUk. Lehenengo promozioa osatzen duten hamaika ikasleek azken sei hilabetetan Europako hiri eta zentro ezberdinetan (Southampton, St. Andrews, Bourdeaux, Archachon, Azti, Santander eta EHU) prestatutako ikerketak aurkeztu dituzten bitartean, nazioarteko master horrek bigarren promozioa geletan dauka jada eta datorren kurtsorako izen-emate epea zabaldu du. Nazioarteko masterrak herri ezberdinetako irakasleak dauzka eta arlo ikasle ezberdinei zuzenduta dago: toxikologia, kimika, ekologia, osasun publikoa, itsas edo ingurune zientziak hain zuen. Argazkian, masterreko mintegi bat.
  Hezkuntza 2008-03-04 18:08

Nuestra Señora de Europa Getxoko ikastetxea jarri dute salgai

Erabiltzailearen aurpegia Ukberri Nuestra Señora de Europa Getxoko ikastetxea salgai jarri du Charo Abad jabeak. Egun, zentroak Haur eta Lehen Hezkuntzan euskaraz, eta ingeleraz apaindutako A eredua eta DBHn ingelerazko murgiltze eredua eskaintzen dizkie 700 bat ikasleei. Erabakiaren berri eman zien orain dela hamar egun irakasleei eta ikasleen gurasoei eta gaur Abadek "El Correo Español" egunkariaren orrialdeetan aitortu duenez, bere 64 urterekin eta gaixorik egonda, ikastetxea utzi eta saltzea erabaki du. Horretarako, Estatu mailako zein nazioarteko hezkuntza arloko taldeei ikastetxeak saldu dizkien Madrilgo enpresa batekin harremanetan jarri da, guraso eta irakasleen balizko kooperatiba baztertu ondoren. Ikastetxea eraikitzen den lurren balio handia kontuan hartuta, Abadek ezeztatu ditu salmentaren atzean eraikuntza-operazioren bat egon daitekeela dioten zurrumurruak.
  Hezkuntza 2008-03-04 14:30

Sopelako Udalak Batxilergo eta DBHrako ikastetxea eskatu dio Eusko Jaurlaritzari

Erabiltzailearen aurpegia Ukberri Sopelako Udalbatzak herrian Batxilergoa eta Derrigorrezko Bigarren Hezkuntza (DBH) ikasketak eman ahal izateko zentroa jartzeko eskatu dio Eusko Jaurlaritzako Hezkuntza Sailari, 12 eta 18 urte arteko gazteei zuzendua. Sopelako Bigarren Hezkuntza Institutuaren bitartez bideratu da eskaria, eta onesten bada "herriak hezkuntza publikoko programa osoa edukiko luke, hezkuntza mapa berriaren baitan", udal iturriek nabarmendu dutenez. 1996ko urtarrilaren 30eko dekretuaren bidez onartu zen egun indarrean dagoen hezkuntza mapa, Euskal Autonomia Erkidegoan (EAE) unibertsitatez kanpoko hezkuntza zentroen mapa egonkortzen zuelarik. Horrela, tokiko arduradunen esanetan, "12 urte joan dira eta aldaketa asko gertatu dira, ez bakarrik hezkuntza sisteman, baita Sopelan bertan ere". Argazkian, Imanol Garai alkate jelkidea.
  Hezkuntza 2008-02-29 20:33

Graduondoa bukatu duten ikasleak omendu ditu gaur EHUk

Erabiltzailearen aurpegia Ukberri Araba Bizkaia eta Gipuzkoan jarduten duen Euskal Herriko Unibertsitateak omenaldia egin die gaur goizean 2007an graduondoren bat amaitu duten ikasleei. Horrela, Leioa eta Erandioko campuseko areto nagusian, doktoretza amaitu ebrri dutenak izan dira ekitaldiaren protagonista, bertan doktore izendatu baitituzte, baina bertan Ikasketa Aurreratuen Diplomak eta doktoreak prestatzeko lehenengo master ofizialen diplomak ere banatu dira. Guztira 233 tesi irakurri ziren EHUn iaz, hau da, ia eskola egun bakoitzeko tesi bat irakurri zen. Ekitaldian 80 doktore izendatu dira, eta 2005eko doktoregoko 10 sari berezi iragarri dira. Sari horiek ematen zaizkie nazioartean goraipamenik handiena izan duten tesiei, bi urtean egindako bidea aztertu ondoren. Halaber, ekitaldian doktoregorako sarrera ematen duten master ofizialen lehenengo promozioei diplomak eman zaizkie eta ikertzeko gaitasuna gainditu dutenei Ikasketa Aurreratuen diplomak banatu zaizkie. Argazkian, Juan Ignacio Perez errektorea doktore berri bat zoriontzen.
  Hezkuntza 2008-02-21 11:20

Bologna Prozesuaren aurkako ikasle adierazpena aurkeztu dute

Erabiltzailearen aurpegia Ukberri Bologna Prozesuaren aurkako ikasle adierazpena aurkeztu zuten atzo (otsailak 20), Donostian, Ikasle Abertzaleek eta Eraldatu taldeak. "Euskal Herriak behar duen unibertsitate eredua eztabaida zabal eta parte hartzaile baten bidez erabakitzeko" pauso berriak emateko helburu du dinamika berriak. Bi eragile horiez gain, dagoeneko 30 bat ikasle, bertsolari (Xabi eta Fredi Paya tartean), musikari eta abarrek babestu dute adierazpena, eta atxikimendu bilketa abiarazi dute www.ikasleabertzaleak.org web orrian. Ekimen berri honek Bologna Prozesuaren aurka aurretik egindakoak osatzera dator. Besteak beste, Leioa eta Erandioko campusean egindako Klaustroko azken batzarrean protesta burutu zuten hainbat ikaslek eta horiei oldartu zitzaizkien segurtasun zaindariek eta ertzainek (argazkian). Hain zuzen ere, "istiluetan parte hartu zuten hainbat ikasle" identifikatu eta "horien aurkako neurriak" hartuko direla adierazi zuen orain hamar egun Juan Ignacio Perez Iglesias EHUko errektoreak.
  Hezkuntza 2008-02-15 11:17

Asteartean abiatuko dituzte ikasleentzako aholkularitza saioak Barrikan

Erabiltzailearen aurpegia Ukberri Otsailaren 19an eta 21ean, "Aukera-tu" izeneko ikasleei zuzenduriko aholkularitza zerbitzua abian jarriko du Barrikako Udalak. Horren bitartez, 14 eta 18 urte bitarteko gazteek ikasketei buruzko zalantzak galdetzeko aukera izango dute, tokiko iturriek zehaztu dutenez. Lehenengo saioa, asteartekoa, unibertsitateko karrerei buruzkoa izango da eta; ostegunekoa, berriz, Batxilergoari eta Erdi eta Goi Mailako ikasketen gainekoa. Saioetan esku hartzeko kultur etxean hitzordua eskatu beharko da. Argazkian, hainbat gazte ikasketa aretoan azterketak prestatzen.
  Hezkuntza 2008-02-13 21:09

Sergio Monge: "komunikazioaren teknologiek ez dute eskola ia-ia aldatu ere egin"

Erabiltzailearen aurpegia Ukberri Euskal Autonomia Erkidegoko (EAE) bigarren hezkuntzan, 1999-2004 artean, Informazio eta Komunikazioaren Teknologien (IKT) ezarpen-prozesua nola gertatu zen aztertu du Sergio Monge Benito ikertzaileak. Horren arabera, eskola "ia-ia aldatu ere ez da egin" azken mendean, nahiz eta telebista, irratia eta informazioaren eta komunikazioaren gainerako teknologiak (IKT) informazioa transmititzeko, sortzeko eta berregiteko baliabide nagusi bilakatu diren egungo gizartean. Gai horri buruzko doktore-tesia egin du Monge Euskal Herriko Unibertsitateko (EHU) Gizarte eta Komunikazio Zientzien Fakultatean. Lan horretan aztertzen du nola ezarri diren IKTak Euskal Autonomia Erkidegoko bigarren hezkuntzan 1999-2004 tartean. Doktore-tesiaren izenburua da "La escuela vasca ante el cambio tecnologico (1999-2004). Tecnologias de la información y la comunicacion en la enseñanza" (Euskal eskola, aldaketa teknologikoaren aurrean (1999-2004). Informazioaren eta komunikazioaren teknologiak irakaskuntzan). Argazkian, Sergio Monge.
  Hezkuntza 2008-02-11 18:03

Industriarako nanoimanen diseinuari buruzko tesia irakurri dute gaur campusean

Erabiltzailearen aurpegia Ukberri Industrian erabilera ugari izan ditzaketen zenbait nanoimanen eta gailu magnetikoren ekoizpen-lerroari buruzko doktore-tesia irakurri dute gaur EHUko Leioa eta Erandioko campuseko Zientzia eta Teknologia Fakultatean. Sonia Moralejo Garcia kimikariak, "Film meheetan oinarritutako nanoimanen nanofabrikazioa eta ezaugarri magnetikoak" izenburuko lana azaldu du, gazteleraz. Unibertsitate publikoak zabaldu duenez, gaur egungo teknologiaren joera da gailu gero eta txikiagoak diseinatzea, eta, horren harira, nahiz eta oraindik ere hastapenetan egon, nanoteknologia modako gaia bilakatzen ari da gizartean. Horren adibide jarri dute nanohodi, nanopartikula edo nanoiman kontzeptuak dagoeneko entzunak izatea. Moralejoren tesian nanoimanak eta gailu magnetikoak ekoizteko zenbait teknika proposatzen dira. Izan ere, nanoiman eta gailu magnetiko horiek hamaika aplikazio dute industrian. Argazkian, Sonia Moralejo Garcia kimikaria / © Irati Kortabitarte.