Jendartea 2008-02-04 23:01

Leioako udal aholkularitza psikologiko zerbitzuak astean bederatzi ordu eta erdiz egongo da zabalik

Erabiltzailearen aurpegia Ukberri Leioako Udal Gizartekintza Sailak erabaki berri duenez, 2007an astean ordu bi eta erdian zabalik zegoen bitartean, aurten bederatzi ordu eta erdiz eskainiko du arreta udal aholkularitza psikologiko zerbitzuak. Gauzak horrela, ordutegi berria hurrengokoa izango da: astelehenetan 9:00etatik 13:30era, eta asteartetan 9:00etatik 14:00etara. Besteak beste, azken Berdintasun Planak islatutako datuak kontutan izan dituzte udal arduradunek zerbitzua areagotzeko. Horien arabera, gero eta lagun gehiagok eskatzen dute aholkularitza psikologikoa, Isabel Garcia Gizartekintza zinegotziaren arabera. Aholkularitza psikologikoko udal zerbitzuaren iazko txostenak ere argia ikusi du jada: datuen arabera, 2007an 20 izan ziren landutako kasuak, horietatik zortzi 2006an eta gainontzeko 12ak iaz zabaldutakoak. Guztira, 102 aholkularitza saio egin ziren.
  Jendartea 2008-02-04 22:14

Ume eta gazteak eskolara "seguruago joateko bideak" aztertzen ari da Leioako Udala

Erabiltzailearen aurpegia Ukberri Zilborhestea sarea jarri zuen abian joan den ikasturtean Leioako Udalak. Horren bitartez, "ikasleentzat zuzendutako eskolarako bide seguru, osasungarri eta jasangarria" eratu nahian dabiltza tokiko Hezkuntza arduradunek. "Modu horretan, Leioako eskola-ume orok etxetik hezkuntza zentroetara bitarteko bidea inongo arriskurik gabe egin dezaketela ziurtatzen da", azaldu dute udal iturriek. Solasgune taldeko hezitzaileez gain, merkatari elkartearen laguntza ere izango dute ekimena aurrera ateratzeko. Dagoeneko hainbat batzar egin dituzte, eragile bakoitzak har ditzakeen konpromisoak finkatzen hasteko. Eta martxoan izango den hurrengo bileran iradokizun guztiak batuko dituzte, proiektuaren funtsa osotu eta leioaztar guztiei horren berri emateko. Apirilerako, berriz, kale ekintzak antolatu dituzte, kalea "jolas-toki eta harreman-toki" aldarrikatzeko asmoz. Argazkian, Barandiaran instituturako bidea.
  Jendartea 2008-02-04 20:12

Erandioko itsuek urrutiko agintea izango dute semaforoen soinuari eragiteko

Erabiltzailearen aurpegia Ukberri Ikusmen arazo handiak dituzten berrogeita hamar bat erandioztarrek urrutiko aginterako tresna bat erabili ahal izango dute semaforoetako seinale akustikoak aktibatzeko. Erandioko Udalak ONCE Espainiako Itsuen Erakunde Nazionalarekin elkarlanean sustatutako ekimen horri esker, itsuek segurtasunez zeharkatu ahal izango dituzte kaleak, udal iturriek zehaztu dutenez. Astrabudua, Altzaga eta Erandio Landako 13 semaforotan jartzen dabiltza, oraingoz, tresna horri erantzuten dioten sentsoreak. Berriztatze lanak amaitzean, Astrabuduako Obieta eta San Inazio kaleen artean jarriko duten semaforo berriak ere izango du prestazio hori. Argazkian, Ategorritik Altzagara arteko errepidean dagoen semaforoetako bat.
  Jendartea 2008-02-04 19:53

Egun batez odol emaile egin dira Getxoko udal ordezkariak

Erabiltzailearen aurpegia Ukberri Imanol Landa Getxoko alkateak, bere gobernu taldekideek eta Marisa Arrue (PP), Luis Almansa (PSE-EE) eta Iñaki Urkiza (Ezker Batua) oposizioko alderdietako buruek, Biotz Handi odol emaileen elkarteak egindako deialdiarekin bat egin zuten joan den ostiralean. Besteak beste, udaletxera eraman zuten unitate ibiltaria erauzketak egiteko eta tokiko agintariak bertan izan ziren, udal langileekin batera. Getxoko alkateak eta Isabel Atxa Biotz Handi elkartearen presidenteak adierazi zutenez, “udalerriko biztanleak kontzientziatu nahi ditugu ekimen honen bitartez”. Udal ordezkariek ideia oso positiboa dela adierazi zuten, baita odol emaileen elkarteak ere. Halaber odola emateko behar diren baldintzak zeintzuk diren gogoratu zuten; dena den azpimarratu dute garrantzitsuena gogoa izatea dela, eta ekimen altruista batekin kolaboratu nahi izatea. Ostiral goizean, udaletxe aurrean burututako ekimena baliteke urte honetan errepikatzea. Izan ere, beste toki batzuetan, esate baterako Bilboko udaletxean, Bizkaiko Foru Aldundian eta Euskal Herriko Unibertsitatean erauzketak egiten dituzte maiztasun erregularrarekin. Argazkian, Imanol Landa alkatea odola ematen.
  Jendartea 2008-02-04 19:23

Sahararako 18.000 euro eman ditu Getxoko Udalak

Erabiltzailearen aurpegia Ukberri Getxoko Udal Gobernu Batzordeak Sahararen Aldeko IV. Euskal Karabanarako 18.000 euroko diru-laguntza ematea erabaki du, kamioi eta atoi bat erosteko hain zuzen ere; otsailaren 16an Bilbotik aterako den karabanan azken bi hilabetetan bildutako lehen mailako produktuak eramatera joateko. Karabana Aljerian dauden saharar errefuxiatuen kanpamentuetara joango da. "Diru-laguntzaren helburuak Atfal Getxoko Sahararen aldeko elkarteak udalerrian aurrera eraman duen jakien bilketarekin kolaboratzea, udalerrian saharar herriaren alde egiten diren ekimenekin bat egitea eta Udalak Sahararekin duen konpromisoan beste urrats bat ematea dira", Imanol Landa alkateak gaurko prentsaurrekoan azaldu duenez. Horrela, Getxo udalerrian lehen mailako 8.500 kilo produktu batu dira, atuna oliotan, azukrea, arroza, dilistak eta konpresak, besteak beste; Udalarekin, 16 ikastetxerekin, jaki dendekin eta hainbat banketxeekin elkarlanean. Argazkian, elikagaiak eramateko Euskal Karabanak erabiltzen duen kamioietako bat.
  Jendartea 2008-02-02 16:49

Sutea izan da Areetako etxebizitza batean

Erabiltzailearen aurpegia Ukberri Iluntzeko 8:15ak aldera piztu zen sua Areetako Zugatzarte etorbideko 26. atariko etxebizitzan. Hala ere, ez zen zauriturik izan. Bestalde, joan den ostegunean, urtarrilak 31, gizon batek erredurak egin zituen eta kea arnastu zuen Sopelan, jantoki batean piztu zen sutea amatatzen saiatzean, DYAk eta Ertzaintzak jakinarazi dutenez. S.G.H. 28 urteko Plentziako bizilaguna jantokiko langilea da. Sutea zartagin batean eratu zen, Ertzaintzaren arabera. Sua piztu eta 10 minutura, 9:25ean hain zuzen, DYAko anbulantzia bat Gatxarriñe kalera bertaratu zen (han dago jatetxea), eta langilea Gurutzetako ospitalera eraman zuen. Argazkian, suhiltzaileak beste batean Areetan piztutako sutean.
  Jendartea 2008-02-02 14:08

Urdulizen taxi bat lapurtu eta Barrikan su eman diote

Erabiltzailearen aurpegia Ukberri El Correo Digital webguneak argitaratutakoaren arabera, ostegun gauean Urdulizen izandako taxi baten lapurreta ikertzen ari da Ertzaintza. Taxi-gidariak 23:05ak aldera ohartarazi zion polizia autonomikoari autoa ostu ziola tipo batek, arma batekin mehatxatuz, "taxilariak ikusi ezin izan zuen pistola alegia", Eusko Jaurlaritzako Herrizaingo Sailak dioenez. Bost minutu eskasera, taxia sutan aurkitu zuten Barrikako Goierri auzoan –lapurreta jazotako lekutik kilometro gutxitara– ertzainek. Herrizaingo Sailak azaldu duenez, "ezer baztertzen ez duen arren, lapurra delitugile arrunta zela" uste du Ertzaintzak. Argazkian, hainbat ertzain auto, artxiboko irudi batean.
  Jendartea 2008-02-01 12:05

Tasak eta zergak jaisteko asmoz ez ohiko udal batzarra eskatu du Getxoko PPk

Erabiltzailearen aurpegia Ukberri Getxoko PPk asteartean (urtarrilak 29) aurkeztu zuen, udal erregistroan, ez ohiko osoko bilkura egiteko eskaera, egungo tasa eta zergen ordenantza eztabaidatzeko asmoz. "Data jartzeko 15 egun ditu orain alkateak; eta epe horretan deitzen ez badu, hamabostaldi hori amaitu eta hamar egunera egingo da udal batzarra", azaldu zuen orain hiru egun Marisa Arrue tokiko popularren bozeramaileak. "Behin tasa eta zergen jaitsiera onartu ostean" –PSE-EEren laguntza edukiko omen du horretarako PPk–, "alkateak bete beharko du eta, egin ezean, ez dugu baztertzen berriro ere auzitegietara eramatea", amaitu zuen Arruek. Bestalde, Areetako Andres Larrazabal kaleko obretarako jarritako segurtasun horma kentzea eskatu du Getxoko PPk, "dagoeneko lanak amaituta daudelako". Argazkian, Imanol Landa alkate jelkidea eta Arrue aurrez aurre aurrekoak alkatetza hartu zuen egunean.
  Jendartea 2008-02-01 10:19

Gabonetako txikizioek 60.000 euroko galera ekar diezaioekete Sopelako Udalari

Erabiltzailearen aurpegia Ukberri Gabonetan izandako hainbat txikizioen bitartez, zenbaitzu berezi eta kuttun diren egunak mikazten saiatu" zirela eman du jakitera bi hilabete igarota Sopelako Udalak. Abenduaren 26an, asteazkena, Iturrietako parkean dauden hainbat kale altzari apurtzeari ekin zioten. Hain justu ere, Sabino Arana kalean dauden zenbait farola puskatu zituzten, seguruenik petardoekin, tokiko agintariek zehaztutakoaren arabera. Horretaz gain, hurrengo egunean, ostegunean, parke bereko paperontzi bat lehertuta agertu zen, hori ere materiale piroteknikoaren bidez. "Herritar gehienak urte zaharreko ospakizunetan buru lepo zebiltzanean, 2008ari ongietorri egiten, beste zenbaitzuk txikizioekin jarraitu zuten", jarraitu dute udal arduradunek. Beste bost paper ontzi hondatu zituzten, farola baten goiko aldea eta haurrentzako bi jostatoki. Gabon garaian izandako txikizio guztiak konpontzeko 50.000 eta 60.000 euro artean gastatu beharko dituztela diote.
  Jendartea 2008-01-30 20:57

Fiturren jarri dute ikusgai Uribe Kostako itsasertza

Erabiltzailearen aurpegia Ukberri Gaur abiatu da, Madrilen, Fitur Nazioarteko Turismo Azokaren XVIII. edizioa, otsailaren 3ra arte luzatuko dena. Bertan, Getxon, Gasteizen eta Donostian urtero egiten diren jazzaldiak aurkeztuko ditu Eusko Jaurlaritzak. Horretaz gain, Uribe Kosta eskualdeko aipatu udalerriko zein Gorliz, Sopela eta Plentziako eskaintza turistikoa izango da ikusgai, EAEko Gobernuaren stand-ean (9. pabilioia, 9C06), Bizkaia Euskal Kostaldea erakundearen bitartez. Elkarte horrek 2008ko katalogo berria aurkeztuko du Madrilen. Horretan, eskaintza turistikoaren baliabideak eta informazio praktikoa agertzen dira: ostatuak, jatetxeak, zerbitzu turistikoak eta kultur agenda, hurrenez hurren. "Azoka, aurten ere, nazioarteko eskaintza turistikoaren ardatza izango da, horretarako profesionalei, eta publikoari sektoreak egun lortu duen indarra, berrikuntza, aniztasuna eta espezializazioaren bitartez agerian utziko du. Inguru ezin hobea lortzen da azokan merkataritza-harremanak egiteko, kontaktu berriak lortzeko, berrikuntzak aurkezteko, eta urteko ekitaldi garrantzitsuenean parte hartzeak ematen dituen abantailak aprobetxatu. Etengabe hazi den azoka da Fitur, eta nazioartekoen artean egiten den garrantzitsuena da Madrilgoa", tokiko arduradunek adierazi dutenez. Argazkian, iazko edizioko irudi bat.
  Jendartea 2008-01-26 18:09

Bost lagun toxikatu dira Areetako etxebizitza batean izandako sutean

Erabiltzailearen aurpegia Ukberri Bost lagun toxikatu dira gaur, goizaldeko 4:40ean, Areetako etxebizitza batean piztutako sutean, ETBk jakinarazi duenez. Anaitasuna kaleko eraikin bateko atarian sortu da sua eta ke handia atera du. Ondorioz eraikuntza hustu behar izan dute suhiltzaileek eta Ertzaintzak. Bost lagun Gurutzetako erietxera eraman behar izan dituzte toxikatuta. Horien artean, bi hilabeteko eta bi urteko haur bi eta 11 urteko neskato bat zeuden. Beste biak 20 eta 25 urteko bi gazte ziren. Kea arnasteagatik eraman dituzte Gurutzetara nahiz eta ez dirudien euren osasun egoera larria zenik. Sua eraikinaren atarian piztu da baina Eusko Jaurlaritzako Herrizaingo Sailetik esan dutenez, oraindik ez dakite zerk eragin duen. Osakidetzako langileek lagun ugari artatu behar izan dituzte sua gertatu den tokian bertan, kea arnastu dutelako edo eraikinetik ateratzean hartutako kolpeengatik. Argazkian, Eitb24 webguneak sareratutako bideotik hartutako irudia.
  Jendartea 2008-01-26 12:09

Garabiak kalean bertan behera lagatako 101 ibilgailu eraman zituen igaz Erandion

Erabiltzailearen aurpegia Ukberri Bide publikoan bertan behera lagatako 101 ibilgailu kendu zituen 2007an Erandioko Udalak. 2006an 108 eta 2005ean 99 izan ziren jasotakoak. Udalerrian bertan behera lagatako ibilgailurik ikusiz gero, Udaltzaingoari horren berri emateko eskaria luzatu diete herritarrei Erandioko agintariek, dagoen lekutik kentzeko. Orotara, udal garabiak 704 aldiz jardun zuen 2007an, tokiko iturriek emandako datuen arabera. Aurreko urteei dagokienez, honako hauek ditugu: 2006an garabiak 819 ibilgailu kendu zituen, 2005ean 743, 2004an 491 eta 2003an 366. Ibilgailuak garabiarekin bide publikotik jasotzeko zerbitzuak udalerri osoan funtzionatzen du modu iraunkorrean, goizeko 7etatik gaueko 10etara. Gauetan eta jaiegunetan, berriz, zerbitzua eskatu eta 30 minutuko epearen barruan egiten dute, udal iturrien arabera. Argazkian, kalean utzitako autoa Erandion.
  Jendartea 2008-01-25 17:12

Uraren kontsumoa murrizteko tresneria banatuko du Sopelako Udalak

Erabiltzailearen aurpegia Ukberri Sopelako Udalak etxean kontsumitzen den uraren kopurua murrizteko hainbat kit banatuko diete nahi duten herritarrei. Banaketa udaletxeko sarreran egingo dute, bertan gordeta duten kit kopurua amaitu arte. Udalaren arabera, eko-murriztaileak "ohiko gastuaren kontsumoa %50 txikitzeko gai" da. Pack bakoitzak aurrezpenerako hiru tresna ditu: iturriarentzat 2 airegailu eta dutxarako etorriaren murriztailea. Jarriz gero, uraren kontsumoa minutuko 10 litroraino murriztu daitekeela dio Udalak, zehazki dutxan 7 litro minutuko eta 6 litro iturrietan. Gainera, beste tresneriarekin batera, poltsa bat dakar 10 segundotan aurrezten den ura neurtzeko, lehendabizi sistema murriztailea erabili gabe eta bera jarrita ondoren. Udalak, tresna hauek banatzearekin, energia murrizteko beharraz ohartarazi nahi ditu herritarrak. Argazkia: www.viajar24h.com.
  Jendartea 2008-01-24 21:39

Dagoeneko sahararrentzako jakiak batzen dabiltza Sopelan

Erabiltzailearen aurpegia Ukberri Urtarrilaren 31ra arte, Saharara bidaltzeko jakiak eta konpresak batuko dituzte Nuyum elkarteak eta Sopelako Udalak. Zehazki, konpresez gain, atun oliotan, azukrea, arroza eta dilistak izango dira batuko direnak, basamortuko baldintzetan pisu gutxien eta elikagai gehien dituzten jakiak direlako, era berean erraz kontserbatzen dira ongi. Gauzak horrela, ostegunera arte, 11:00etatik 14:30era eta 16:00etatik 21:00etara, udaletxean eman ahal izango dira aipatutako produktuak. Ekimena Tindufera abiatuko den Sahararen aldeko IV. Euskal Karabanaren "Piztu itxaropena" izeneko kanpainaren barruan kokatzen da, Sahararen Aldeko Euskal Elkarteak antolatuta. Karabana otsailaren 16an abiatuko da. Argazkian, elikagaiak eramateko Euskal Karabanak erabiltzen duen kamioietako bat.
  Jendartea 2008-01-24 20:11

Gobela kiroldegi azpiko aparkalekuak "merkeago" alokatzea aztertzen ari da Getxoko Udala

Erabiltzailearen aurpegia Ukberri Itzubaltzeta / Romoko Gobela kiroldegi azpikoa txandakako aparkaleku bihurtzeko, Getxoko PPk egindako eskaera "bideraezina" dela adierazi du gaur Imanol Landa alkateak. Horretarako, Udalak berak agindutako azterlana izan du eskuan tokiko agintariak. Ikerketaren arabera, "salerosketa guneetan edo lagun askok lan egiten duten tokian baino ez" litzateke "bideragarria" izango txandakako aparkalekua jartzea. Hartara, Gobelakoan "gizarte alokairua" ezartzea aztertzen ari direla aipatu du Landak. Hala ere, Marisa Arrue bozeramaile popularrak emandako datuak ez ditu gezurtatu alkateak, horri buruz aipamenik ere ez baitu egin. Getxoko PPko buruaren hitzetan, "2005eko udaberrian zabaldu zutenetik, 29 toki baino ez dira bete, dauden 286etatik".