Jendartea 2007-10-18 14:59

Autoak "stop" seinaleari kasu ez egitean harrapatu ei zuen Negurin hildako motorista

Erabiltzailearen aurpegia Ukberri Astelehenean Neguriko gasolindegiaren ondoan trafiko istripuan hil zen motor gidaria talka egin zuen autoak "stop" seinale bat saltatu zuelako hil zela diote Getxoko Udaltzaingoaren lehenengo ikerketek. "El Correo Español"ek jakinarazitako datuen arabera, Algortako etorbidean izandako istripuan hainbat irregulartasun izan zen. Motor gidariak 0,65 alkohol tasa zeukan odolean, autopsian jakin denez, legezko tasa 0,25ean dagoenean. Bestalde, motorrak baimendutako abiaduratik gora ei zebilen autoarekin talka egin zuenean. Baina, Getxoko Udaltzaingoaren polizia-atestatuaren arabera, istripua eragin zuen arau urraketa autoaren gidariak "stop" seinalea saltatu izana izan zen. Horren ondorioz, motor gidaria hil eta autoan gidariarekin batera zihoan 90 urteko emakumea zauri arinak jazo zituen. Argazkian, beste istripu bat Getxo I institutu aurrean, 2005eko ekainean.
  Jendartea 2007-10-16 16:12

Motorista bat hil da Negurin auto istripuan

Erabiltzailearen aurpegia Ukberri Motor gidari bat hil da Negurin bart auto batekin aurrez aurre talka eginez izandako trafiko istripuan. Gainera, autoan zihoan 90 urteko emakumezko bat zauritu da istripu berean. Ezbeharra atzo gaueko 21:55ak aldera jazo zen, Algorta Etorbidean, Neguriko gasolidengiaren parean. Errepide laguntza ematen duen DYA elkarteak jakinarazi duenez, motor gidaria airean atera zen autoa jo ondoren, eta lurrera erortzean hartutako kolpe handiaren ondorioz segituan hil zen. Autoan zihoan 90 urteko emakumezkoaren kasuan, zauriak dituen arren ez du larritasun handiko ezer. Istripuaren ondorioz, ordu batez errepidea moztu zuten atzo Getxoko udaltzainek eta ertzainek. Argazkian, beste istripu bat Getxo I institutu aurrean, 2005eko ekainean.
  Jendartea 2007-10-15 23:09

Gizon bat atxilotu dute Getxon neska laguna jipoitu izana leporatuta

Erabiltzailearen aurpegia Ukberri Getxoko Udaltzaingoak udalerri horretako 40 urteko F.F.S.Q. gizonezko auzokidea atxilotu zuen larunbat goizaldean neskalaguna kalean erasotzeagatik, genero indarkeria delitua egotzita Udaltzaingoak jakinarazitakoaren arabera. Atxiloketa Algortako Aretxondo kalean izan zen, udaltzainek gizon bat emakume bat erasotzen ari zela esaten zuen telefono-deia jaso ondoren. Tokiko poliziak bertaratzean, gizon batek beste bat lurraren aurka zuela ikusi zuten. Gainera, handik metro batzuetara beste bi lagun emakume bat artatzen ari ziren. Ustezko erasotzailea geldiarazi zuen laguna zerbitzutik kanpo zegoen Bilboko udaltzain bezala identifikatu eta lurrean zegoen emakumeari ostikoak ematen ikusi zuela esan zuen. Emakumeak kolpe bat zuen bekokian eta makatu batzuk gorputzean, gainera atxilotutakoa identifikatu zuen bere bikotekide bezala eta salatu zuen erasoengatik aurrekariak dituela. Udaltzainek erasotzailea atxilotu eta kolpatutako emakumea Gurutzetako erietxera eraman zuten udaltzainek. Bestalde, eta Getxoko Udaltzaingoak emandako bertsioaren arabera, atxilotutakoa buruan zauri bat zuenez, DYAko kideek artatu zuten. Argazkian, emakumeen aurkako erasoak salatzeko, Getxoko Bilgune Feministak Algortan egindako kontzentrazioetako bat.
  Jendartea 2007-10-15 16:07

Abiadura kontrolatzeko kanpainari ekin diote gaur ertzainek eta udaltzainek

Erabiltzailearen aurpegia Ukberri Ertzaintzak eta hainbat udalen Udaltzaingoek abiadura kontrolak areagotu dituzte gaur, urriaren 28ra arte iraunduko den istripuak ekiditeko prebentzio kanpaina berrian. Izan ere, Herrizaingo Sailak zabaldutakoaren arabera, Araba, Bizkaia eta Gipuzkoako errepideetan 1.500 bat istripu izaten dira abiadura dela-eta, istripu guztien %13. Kanpainan zehar, abiadura mugak gainditzeak dakartzan arriskuen inguruko mezuen igorpena indartuko dute, gehiegizko abiadura eta errepideetako ezbeharrak gutxitzea xede hartuta. Radar kanpaina indarrean den bitartean, polizia lan honetara bideratutako agenteen eta kontrolen kopurua handitu egingo da, eta radarren aurkako sistema ilegalak aurkitu eta neutralizatzeko kanpainarekin jarraituko du Ertzaintzak. Aurreko kanpaina ekainaren 18tik uztailaren 1era egin zuten, eta Ertzaintzak Getxoko, Bilboko, Donostiako, Gasteizko eta Irungo Udaltzaingoek 176.949 ibilgailuren abiadura kontrolatu zuten eta 5.812 salaketa jarri zituzten abiadura mugak gainditzeagatik. Herrizaingo Saileko Trafiko Zuzendaritzak 79.000 salaketa izapidetu zituen arrazoi horrengatik. Argazkian, Artatza inguruko errepidea.
  Jendartea 2007-10-15 14:58

Edanda gidatzeagatik hirutan atxilotu dute pertsona bat Getxon

Erabiltzailearen aurpegia Ukberri Getxoko Udaltzaingoak azken bi hilabeteotan hiru bider atxilotu du Santurtziko 34 urteko auzokide bat, Trafikoaren Segurtasunaren kontrako hiru delitu egitearen akusaziopean, alkoholaren eraginpean gidatzen zuelakoan. Azken atxiloketa pasa den urriaren 6an izan zen, goizeko 6:30ak aldera, Areetako Zugatzarteko etorbidean. Udaltzainek autoa abiadura mantsoan eta errepidearen erditik joaten ikusi zuten eta, gainera, gidaria ibilgailuaren bolantean lotan zegoela jakinarazi dute, "horrek gainontzeko lagunentzat zekarren arriskuarekin". Udaltzainek gidaria esnatu zuten eta autoa errepidearen albo batean utzi ondoren, alkoholemia froga egin zioten eta, Getxoko Udaltzaingoaren arabera, onartutakoa baino lau bider gehiagoko alkohol kopurua eman zuen. Azken bi hilabeotan beste birritan ere atxilotua izan da alkoholaren eragipean gidatzeagatik. Bestalde, asteburu honetan, hiru gidari atxilotu dituzte Uribe Kostan, edanda joateagatik. Larunbatean, Getxo udalerrian eta Berangon bana, azken horrek biktimarik gabeko auto-istripua eragin zuela. Igandean, berriz, Sopelatik igaro zuen gidari bat atxilotu zuten.
  Jendartea 2007-10-11 23:59

Sabotajea egin dute goizean Bidezabal eta Algortako metro geltokien artean

Erabiltzailearen aurpegia Ukberri Hainbat ezezagunek Bidezabalgo metro geltokitik 30 bat metrora dagoen dorreko elektrizitate kable bat moztu dute goizeko 10:50ak aldera, Herrizaingo Sailak jakinarazi duenez. Sabotaje horren eraginez, elektrizitate sareak indarra galdu du Algorta eta Bidezabalgo metro geltokien artean. Baina, Metro Bilbao garraio enpresak Euskal TeleBistari emandako informazioaren arabera, dorrean eta instalazio elektrikoan izandako kalteek ez dute eragotzi metroa normaltasunez ibiltzea bi geltoki horien artean, ohiko ordutegiak betez.
  Jendartea 2007-10-11 18:53

Francisco Javier de Castro Leioako zinegotzi ohia hil da

Erabiltzailearen aurpegia Ukberri Francisco Javier de Castro Esteban 1995 eta 1999 bitartean Leioako zinegotzi izandakoa zendu da gaur goizean bere etxean. Ezker Batua Berdeak jakinarazi duenez, De Castro lan gaixotasun batek jota hil da, amiantoarekin hainbat urtez lan egitearen ondorioz. De Castrok egun 63 urte zituen eta 1995 eta 1999 bitartean Izquierda Unida alderdiaren zinegotzia izan zen Leioan. Era berean, 1990ean EAEko lehendakarigaia ere izan zen, alderdi beraren zerrendetan. Lanari dagokionez, Altos Hornos de Vizcaya enpresako behargina izan zen eta enpresa horrek ixtean zegokion baino aurretik jubilatu zen. Tartean, EAEko CCOO sindikatuan ere ardura karguak izan zituen. Igande honetan, irailak 14, bere emazteak, bi semeek, bestelako senideek, lagunek eta alderdikide zein sindikatukideek omenaldia egingo diote Ondiz auzoan, arratsaldeko 6etan.
  Jendartea 2007-10-01 10:18

Harrapatzeen aurkako kanpaina hasiko du gaur Ertzaintzak Uribe Kostan

Erabiltzailearen aurpegia Ukberri Gaur eta hilaren 17ra arte bitartean, Getxo udalerria, Leioa eta Erandiora eramango du Herrizaingo Sailak harrapatzeei aurrera hartzeko kanpaina. Kale-antzerkiaz baliatuz, semaforoko panpina gorriz eta berdez mozorrotutako bi aktore oinezkoek errepide eta kaleetatik ibiltzean erakusten dituzten jarrera positiboak indartzen saiatuko dira. Gaur Andoni Arriola Trafiko zuzendariak inauguratuko du ekimen hori Bizkaiko Zubiaren plazan, Areetan, goizeko 12:30ean. Arratsaldean, berriz, kanpaina Algortan izango da, Algortako etorbidea eta Mariandresenaren arteko gurutzebidean. Bihar Areeta eta Algortan izango dira berriro, hilaren 15ean Leioarako jauzia emateko, goizean Iparragirre etorbidean eta arratsaldean Sabino Arana kalean. 17an, berriz, Astrabuduako metro geltoki ondoan izango da, Aldaieta-Etxegorrin.. Herrizaingo sailak harrapatzeak ekar ditzaketen jarrerez ohartarazi nahi ditu oinezkoak kanpainaren bidez: errepidea semaforoa gorri dagoela gurutzatzea eta behar ez den tokitik edo arreta jarri barik egitea, besteak beste. Espaloian, panpina gorriaz eta berdeaz mozorrotutako aktoreek horrelakoak egiten dituzten oinezkoak ohartaraziko dituzte, modu atseginez, eta gainerako oinezkoen jarrera positiboak txalotuko dituzte.
  Jendartea 2007-09-27 21:35

Getxo aldeko etxebizitzak biharko udalbatzarreko gai bihurtu dira

Erabiltzailearen aurpegia Ukberri "Bilbao Metropolitarreko Lurralde Zati Planak (LZP) Getxo aldean 8.000 eta 7.000 etxebizitzen arteko kopurua eraikitzera behartzen du Udala", Marisa Arrue bozeramaile popularraren hitzetan. Imanol Landa alkateak, ordea, aipatu hitzak gezurtatu ditu. "Gobernu taldeak ez du ezta Marisa Arruek aipatzen duen 7.000 etxebizitzen gutxieneko kopurua egiteko asmorik", udal agintariak zehaztutakoaren arabera. Landak adierazpen horiek egin ditu gaur goizean, biharko udalbatzarrean, PPk eta PSE-EEk batera aurkeztuko duten mozioaren aurkako jarrera azaltzeko. Izan ere, bi alderdi horiek Udalari eskatuko diote LZPri desadostasuna agertzea eta Hirigintzako Antolaketarako Plangintza Orokorraren (HAPO) berrazterketa "inolako loturarik gabe" egitea. Argazkian, Getxoko udaletxea. Argazkian, Andra Mari auzo elkarteak deituta urtarrilaren 28an egin zen manifestazioa.
  Jendartea 2007-09-27 20:56

Itzubaltzeta eta Areeta "banatu" nahi izatea egotzi die PP eta PSE-EEri Getxoko EAJk

Erabiltzailearen aurpegia Ukberri Areetako Xake plaza "atseginagoa" bilakatzeko egindako proposamenari erantzunez, "euren benetako asmoa ezkutatu" nahi izatea egotzi die PP eta PSE-EEri Getxoko EAJk; "Gobela ibaia desestaltzea, alegia". Horrek Itzubaltzeta / Romo eta Areeta arteko "banaketa" ekarriko luke jelkideen hitzetan. Halabaina, euren asmoa argi eta garbi plazaratu dute popularrek eta sozialistek: auzokideek egungo plaza ez dutela gustuko argudiatuz, Gobela ibaia estalgabetu eta ibilgua "etxebizitzetatik ahalik eta gehiago urruntzea". "Ibaia horren hurbil egoteak etxebizitzetan hezetasuna eragiten du eta, hori gutxi balitz, bere arriskua badauka erreka eraikitako gune batetik igarotzea", adierazi du Marisa Arrue Getxoko PPko bozeramaileak. EAJ, ordea, Xake plaza berrantolatzera mugatzen da, "horretarako inguru horren erabiltzaileen eta Itzubaltzeta eta Areetako bizilagunen beharrizanak eta eskaerak ezagutzeko beharrezko bideak ahalbidetuz". Batzuek zein besteek mozio aurkeztuko dute biharko udalbatzarrean. Argazkian, asteartean egin zuten mozioaren aurkezpena Marisa Arrue eta Luis Almansak, Getxoko PP eta PSE-EEko bozeramaileak, hurrenez hurren.
  Jendartea 2007-09-24 21:32

Gizon bat atxilotu dute Algortako banku batean lapurtzen saiatu delakoan

Erabiltzailearen aurpegia Ukberri Ertzaintzak I.A.B. 32 urteko gizonezkoa atxilotu zuen atzo pasa den ostiralean Algortako banketxe batean lapurreta egiten saiatu zelakoan. Herrizaingo Sailak zabaldutako informazioaren arabera, pertsona bera aurreko egunean ere atxilotu egin zuen Euskal Poliziak Algortan, taberna batean lapurtzen zegoelakoan harrapatu zutenean. Banketxeari dagokionez, ostiralean goizeko hamar eta erdiak jota, norbaitek Ertzaintzari ohartarazi zion Algortan kokatutako banketxe bateko bulegoan gizonezko bat lapurreta egiten saiatzen ari zela. Esan zutenez, minutu batzuk lehenago gazte bat banketxera joan zen eta, mehatxuzko idazki baten bidez, langile bati jakinarazi ei zion hori lapurreta bat zela eta berehala diru kopuru jakin bat emateko eskatzen ziola. Antza denez, langileak uko egin zion eskaera onartzeari eta borroka txiki bat izan zuen ustezko lapurrarekin; orduan honek alde egin zuen bere helburua lortu gabe.
  Jendartea 2007-09-21 01:02

EHUk automatrikulan ikasleen laurden bat baztertzen duela salatu dute

Erabiltzailearen aurpegia Ukberri Itsas EHUko software librearen sustapenerako taldeko kide batek UKBERRI.NETi jakinarazi dio Internet bidez automatrikula egiteko unibertsitateak erabiltzen duen softwareak ez duela bermatzen ikasleen laurden batek bere automatrikula Internetez egin ahal izatea. Software askearen aldeko ikasle horrek azaldu duenez, "automatrikularen softwarea ez da bateragarria Firefox eta Konqueror nabigatzaileekin eta seguraski ez da izango ere ez Opera, Camino edo Safarirekin, automatrikulako arduradunek esandakoagatik". Ikasleak etxetik saiatu zen behin eta berriro automatrikula egiten baina azkenean ezintasunez laguntza telefonora deitu zuen: "Microsoft Internet Explorer erabili behar nuela esan zidaten eta nik programa hori ez nuela esatean, lelo moduan esan zidaten 'baina oso erraza baita: inicio-n sakatu...' Windowseko erabiltzailea banintz bezala". Azkenean Linux eta Firefox erabiltzen duen ikasleak matrikula Leioan egin behar izan zuen, bertan ere baztertua izateko, "Zientzia fakultateko eta liburutegiko ordenagailuak erdara hutsean" daudelako. Itsas taldeak neurriak hartzea erabaki du eta laster EHUko webguneko arduradunekin jarriko da harremanetan.
  Jendartea 2007-09-20 23:34

Getxoko Udalak ziklomotor eta motorren zaratak ekiditeko kontrolak jarriko ditu

Erabiltzailearen aurpegia Ukberri Getxoko Udalak ziklomotorren eta motozikleten kontrolak areagotu egingo ditu, datorren irailaren 30ean zaratak kontrolatzeko amaituko den kanpainaren bitartez. Imanol Landa Getxoko alkateak azpimarratu du “ulertezina dela oraindik gaur egun gidari batzuek eragiten dituzten eragozpenez kontzienteak ez izatea eta ezta sortzen duten kutsadura akustikoaz ere”. Auzokide batzuek helarazitako kexak ulertu eta "horiekin bat" datorren alkateak udal arautegiak ezarritakoa betearaziko duela nabarmendu du, “dagoeneko informazio eta prebentzio ekintza ugari egin baititugu”. Jadanik udalerriko auzoetan martxan jarritako kontrolak ordutegi luzean egingo dituzte eta mota honetako ibilgailuak ibiltzen diren tokietan jarriko dituzte eta baita herritarren kexak eragiten diren aldeetan ere. Gune horietan kontrolaz tokiz aldatzen joango dira, gidariek elkar abisatzea eta horrela zaintzatik ihes egitea ekiditeko. Argazkian, zarata egiteko manipulatutako motor bat / Pepe Mendoza.
  Jendartea 2007-09-20 17:08

Iluntzean ospatuko dute Leioan Txileko kontsulatuaren zabalpena

Erabiltzailearen aurpegia Ukberri Txilek kontsulatu berria zabaldu du gaur Leioako Ibarrabarri enpresa gunean, Bilboko egoitza utzi ostean. Hori ospatzeko, eta Txilek independentzia eskuratu zueneko 197. urteurreneko mundu egitarauen barruan, ekitaldi bat egingo dute iluntzeko 20:00etan Errekalde plazan, Kultur Leioaren ondoan. Bertan, ikurrinaren ondoan "izar bakartia", Txileko bandera, altxatuko dute, Andeetako folklore erakustaldia izango da ikusgai eta Kultur Leioan urriaren 20ra arte egongo den Mariana Caneparen eskulturen erakusketa inauguratuko dute. Ekitaldian, besteak beste, Juan Carlos Perez de Unzueta kontsula, Patricio Walker (argazkian) Txileko Diputatuen Ganbarako presidentea, eta bertako diputatuak diren Gonzalo Uriarte (Union Democrata) eta Alfonso de Urresti (Partido Socialista) izango dira, Leioako eta euskal politikako zein gizarteko hainbat ordezkarirekin batera. Kontsulatuak Hego Euskal Herria eta Errioxako txiletarrak hartuko ditu bere gain.
  Jendartea 2007-09-20 15:17

Pertsona bat atxilotu dute Algortako taberna batean lapurtzen saiatu delakoan

Erabiltzailearen aurpegia Ukberri Ertzaintzak 32 urteko gizonezko bat atxilotu du gaurko ordu txikietan Algortan, taberna batera ezkutuan sartu eta indarra erabiliz lapurreta delitua egitera zihoalakoan. Herrizaingo Sailak jakinarazitakoaren arabera, gaur goizaldeko laurak jo baino apur bat lehenago herritar batek Ertzaintzara deitu du pertsona susmagarri bat Basagoiti etorbideko taberna batera sartu dela esanez. Hara joan den patruila-autoko ertzainek lokaleko ateburuak kalteak zituela eta beira bat hautsita zegoela ikusi dute. Barruan begiratuta, gizonezko bat ikusi dute, barraren atzean ezkutatzen. Berehala, poliziek irteteko eskatu diote, eta gizonak, kontra egin barik, horrela egin du eta eskuan zeramatzan jaka eta poltsa eman dizkie. Hartu dituen ertzainak jakak pisu handiegia zeukala igarri duenez, poltsikoetan begiratu du eta horietako batean euro bateko txanponez betetako bi poltsa aurkitu ditu, antza lapurretan lortutakoak.