Kirolak 2010-09-02 21:51

Atheticeko emakumeen lehen taldeak aurkezpena egingo du bihar Artean

Erabiltzailearen aurpegia Ukberri Athleticeko emakumezkoen lehen taldearen aurkezpen ofiziala bihar, ostiralean, egingo dute babeslea den Leioako Artea merkataritza gunean. Ekimena aipatu zentroko kristal plazan izango da arratsaldeko 6:30ean, jokalariekin batera talde teknikoa ere bertan izango dela, klubak jakinarazi duenez. Iazko denboraldian Espainiako Ligan hirugarren postuan gelditu ostean, gogor hasi dira aurten lehoi emeak, izan ere, abuztuan jokatutako zazpi lagunartekoetatik bi baino ez dituzte galdu. Igandean, berriz, 2010-11 Ligan estreinatuko dira Eibarren kontra Lezaman jokatuko duten partidan. Argazkian, Athletic Clubeko emakumezkoen lehen taldeko argazki ofiziala / © Athletic Club.
  Kirolak 2010-09-02 20:25

Getxo Kiroletako ikastaro berrietan izen emateko epea zabalik dago

Erabiltzailearen aurpegia Ukberri Getxo Kirolak erakundeko ikastaroetan izena eman nahi duenak datorren asteazkenera arte, irailak 8, tramiteak hasteko aukera izango du. Izan ere, data horretara arte, ordena erabakitzeko zozketan parte hartzeko zenbakiak banatuko dituzte erabiltzaileen arreta bulegoetan. Gainera, azken urteotan bezala, sendiko abonamendua dutenek zenbaki bana hartu behar izango dute. Zozketa irailaren 9an izango da goizeko 10etan Fadurako kiroldegian. Ondoren, izena emateko egunak eta orduak zehaztuko dituen zerrendak Algortako Fadura eta Itzubaltzeta / Romoko Gobela kiroldegietako iragarki-tauletan zein udal webgunean argitaratuko dira. Gauzak horrela, lehenengo matrikulazioak irailaren 13an egingo dira. Tramite eta ikastaro guztiak liburuxka honetan (pdf) azaltzen dira. Argazkian, Gobela kiroldegiko instalazioetako bat.
  Kirolak 2010-08-20 03:27

Olatuen zain dago Sopelako munduko bodyboard txapelketa

Erabiltzailearen aurpegia Ukberri Aritz Larrinaga rider sopeloztarrak zorte ona opa zien lehiakide euskaldunei atzo, osteguna, Arriatera hondartzan egindako Sopelana BBK Pro 2010 txapelketaren aurkezpenean. "Emaitza ona lortzea benetan zaila da maila oso altua baita. Nik lortzen ez badut, euskal rider baten bat ikusi nahiko nuke azken itzulietan", adierazi zuenez. Amaury Laverhne bodyboarderra ere probaren mailaz aritu zen: "Urtetik urtera maila altuagoa da eta aurten ere oso gogorra izango da", esan zuenez. Azkenik, Jeff Hubbard iazko munduko txapeldunak ondokoak goraipatu zituen: "Antolakuntza oso profesionala da eta nazioarteko rider onenak lehiatuko dira, oso hunkigarria eta dibertigarria izango da". Txapelketari dagokionez, atzo 16:00etan izandako azken checking-aren ostean, gaur arte atzeratzea erabaki dute antolatzaileek. Hurrengo chekinga goizeko 8etan izango da. Metro bateko olatuak haize onarekin espero dira. Gaurko egitarauan Tow Out erakustaldia programatuta dago: lehiakideak ur-motorrarekin olatuen kontra bultzatzen dira, izugarrizko jauziak eginez. Argazkian, atzoko prentsaurrekoan egon ziren Imanol Garai alkatea, Josu Landaluze alkateordea, Alex Bartolome BBK-ko ordezkaria, Aritz Larrinaga Euskal Bodyboard Eskolako kide eta lehiakide sopeloztarra, Amaury Laverhne egungo rankingaren liderra eta bi aldiz Sopelana BBK Pro munduko probako txapelduna eta Jeff Hubbard iazko munduko txapelduna / © Sopelana.net.
  Kirolak 2010-08-19 20:12

KAE ligako proba eta emakumeen estropada jokatuko dituzte larunbatean Erandion

Erabiltzailearen aurpegia Ukberri
Kantauriko Arraun Elkarteak (KAE) eta Lutxana taldeak antolatuta, Erandioko ikurrina jokatuko dute larunbat honetan, hilaren 21ean, eguerdiko 12:30ean. Ibaizabal ibaian, Altzaga parean, egingo dute estropada KAEren 2.mailan dauden hamasei taldeak, hiru itsas-milia edo 5.556 metro denborarik laburrenean egiteko xedearekin. Bi modalitatetan jokatuko dituzte probak: lehena banakako erlojupekoa izango da, lau luzetan; eta bigarrena lau luze hiru ziabogarekin, bi txandatan. Traineruak, aipatu bezala, bi tandatan aterako dira eta irteeraren hurrenkera Kastroko ikurrina egin ondoren geratu den ligako klasifikazioaren ordenaren alderantzikoa izango da. Beraz, Erandioko Lutxana A.E. eta Areetako Raspas A.E. izango dira lehenak irteten. Banderaz gain, diru-sariak emango zaizkie arraun taldeei, klasifikazioaren arabera. Aipatu, berrikuntza gisa, fisioterapeutak egongo direla behar dutenentzako eta janaria parte-hartzaileentzat. Argazkian, Lutxana taldea / © Lutxana Arraun Taldea.
  Kirolak 2010-08-18 18:15

Munduko bodyboarder onenak lehiatuko dira egunotan Sopelan

Erabiltzailearen aurpegia Ukberri Sopelana BBK Pro 2010 munduko bodyboard txapelketa hasteko ordu batzuk baino ez direla falta, ziurtatuta dago munduko hoberenen etorrera, udal iturriek adierazi dutenez. Nahiz eta abuztu honetan olaturik ez egon, badirudi garaiz helduko direla uhinak, ohitura denez, txapelketa horretan benetako ikuskizunaz gozatu ahal izateko. Gainera, munduko bodyboarder onenak uretan ikusteko aukera izango da: Ryan Hardy (Shark Island txapelketa irabazi du pasadan astean), Ben Player (2008ko munduko txapelduna) eta Dave Winchester (2009ko munduko txapeldunordea) australiarrak zein Jeff Hubbard (2009ko munduko txapelduna), Dave Hubbard eta Jacob Romero hawaiiarrak, besteak beste. Eta nola ez, urte guztietan Sopelara gerturatu izan den Reunion irletako Amaury Laverhne; Sopelana BBK Pro-n bi aldiz txapeldun izan dena eta egungo sailkapenaren lehenengoa. Argazkian, iazko txapelketaren irudi bat / © Sopelana BBK Pro.
  Kirolak 2010-08-14 14:48

Irailaren 19an egingo dute Umeen Bizikleta Festa

Erabiltzailearen aurpegia Ukberri Irailaren 19an izango da Umeen Bizikleta Festaren laugarren edizioa, Uribe Kostako bosgarren Bizikleta Ibilaldiarekin batera. Berango, Erandio eta Leioako udalekin batera, Mankomunitateak laguntzen du horren antolaketan. Horrenbestez, irteera udalerri erandioztarrean egingo dute goizeko hamarretan. Ondoren, Leioatik igaro eta Berangora iritsiko dira parte-hartzaileak, jarraian Sopela eta Urdulizera abiatzeko. Bertatik, berriro bueltatuko dira Berangora, helmuga bertan egiteko, 14:00ak aldera. Ekitaldiak ez du lehiaketa izaerarik, parte hartzailea baizik. Guzti horri festa giroa gehitu behar zaio, besteak beste, umeentzako parkea eta txerriki dastatzea izango diren jardunaldiaz gozatzea baita asmoa. Aurreko edizioetan bezala, parte hartzeagatik soilik, oparia jasoko dute bizikleta zaleek. Gogoratu behar da izen-ematea bikoteka egin behar dela. Argazkian, 2008an egindako Berangoko Umeen II. Bizikleta Festa Itzubaltzeta zeharkatzen.
  Kirolak 2010-08-14 14:44

Berangoko Milia urriaren 2an jokatuko dute

Erabiltzailearen aurpegia Ukberri Urriaren 2an, larunbatarekin, izango da Berangoko Miliaren hurrengo edizioa. Aurten, kategoria guztietako 300 atleta inguru parte hartzea espero dute antolatzaileek. Hala ere, "ez da parte-hartzaileen kopuruaren arabera handietsi daitekeen proba. Batez ere egin behar den distantzia da nabarmenena", antolaketaren arduradun Josu Hernandezek azaldu duenez. Muga oso goian jarriko du berriro ere Berango Atletismo Taldeak. Izan ere, bi urtez jarraian, Espainiako hirugarren probarik onena izendatu dute aipatu distantzian Berangokoa. Beti egon da lehenengo bosten artean. Argazkian, Berangoko Nazioarteko Miliaren aurreko edizio bat / © Berangoko Albisteak.
  Kirolak 2010-08-12 00:53

Urtebete egin du Mankomunitateko bizikleten mailegu zerbitzuak

Erabiltzailearen aurpegia Ukberri Bizimeta bizikleta estandar eta elektrikoen mailegu zerbitzuak urtebete egin du. Aipatu zerbitzua Uribe Kostako Mankomunitatea osatzen duten zazpi udalerrietan dago erabilgarri. Lehen urtean, 1.120 lagunek izena eman dute Bizimetan, "batez ere Gorliz eta Plentziakoak", tokiko iturriek adierazi dutenez. "Eskerrak eman nahi dizkizuegu erabiltzaile guztioi, dagoeneko 36.000 kilometro egin dituzuelako zerbitzuko bizikletekin, eta zuoi esker, 5.76 tona CO2 isurtzea ekidin delako". Argazkian, Sopelako Bizimeta puntu bat / © Joseba Zubiaur - Sopelako Udala.
  Kirolak 2010-08-12 00:49

Ehun ontzik baino gehiagok eman dute izena jada Getxotik Bilborainoko kayak zeharkaldian

Erabiltzailearen aurpegia Ukberri Bilboko Herri Maratoia Klubak (BHM) antolatuta, bosgarren edizioa izango du igande honetan (abuztuak 15) egingo den Nerbioi ibaiaren Nazioarteko Kayak Zeharkaldiak. Getxoko Kirol Portutik 11:00etan abiatuta, 12.900 metro luzerako bidea egin beharko dute Bilboko udaletxeraino heldu arte. Izena emateko epea ostiralera arte egongo da zabalik, BHMren bulegoan (Jose Maria Olabarri, 6 - 2 / Bilbo), telefonoz (944 238 659) edo e-posta bidez (bhm[abildua]clubbhm.com). Antolatzaileek jakinarazi dutenez, dagoeneko ehun ontzik baino gehiagok eman dute izena proban. "Sellaren jaitsieraren (Asturias, Espainia) pareko kirol ekitaldia bilakatzeko asmoa dugu", diotenez. Antolatzaileak arduratuko dira parte-hartzaileen ekipajea helmugaraino eramaten. Argazkian, orain hiru urteko jaitsieraren irudia.
  Kirolak 2010-08-10 10:40

Bizikletak mailegatzeko toki berria jarri dute Gorlizen

Erabiltzailearen aurpegia Ukberri Dagoeneko martxan dago Gorlizko hirugarren Bizimeta puntua. Horrenbestez, aurrerantzean Urezarantzan, Kilimanjaro garagardotegiaren aurrean, egongo da bizikletak mailegatzeko aukera. Gogoratu abuztuaren 2tik aurrera ordainpekoa dala aipatu zerbitzua, Creditrans, Gizatrans eta Hirukotrans txartelekin. Ordainketa Bizipuntu guztietan jarri diren txartelak baliogabetzeko makinen bitartez egingo da. Maileguak ezberdinak izango dira, bizikletaren arabera. Bizikleta arrunta hartuz gero, zerbitzua 0,15 eurokoa izango da eta elektrikoa izanez gero 0,30 eurokoa. Erabilera bakoitza gehienez bi ordukoa izango da. Creditrans txartela kiosko, Bizkaibus eta metro geltokietan eta BBK kutxazainetan eros daiteke 5, 10 eta 15 eurotan. Gizatrans, berriz, 65 urtetik gorakoentzat, %65 edo gehiagoko ezintasuna dutenentzat eta erabateko ezintasun iraunkorra edo balioezintasun handia dutenei zuzendutako txartela da. Eta Hirukontrans familia ugarientzat da. Argazkian, Sopelako Bizimeta puntu bat / © Joseba Zubiaur - Sopelako Udala.
  Kirolak 2010-08-10 01:16

Leioako mendi-ibiltari bat erreskatatu dute Huescan

Erabiltzailearen aurpegia Ukberri Atzo, igandea, eguerdian, mendizale leioaztar bat erreskatatu zuten Aragoin Guardia Zibileko Mendi Erreskateko Taldeko kideek, UHEL-41 helikoptero eta 061 zerbitzuko erizain baten laguntzaz, Aragondigital.es agerkariak zabaldu duenez. Antza, Hecho (Huesca) udalerritik gertuko Pico La Cuta tontorretik gertu ibilaldia egiten zebilela, erori eta bere kabuz jarraitzerik ez zuen izan 42 urteko Victor Manuel S. M. gizonak. Hartara, ibiltaria artatu eta Jacako Mendiko Eskola Militarrera eraman zuten erreskate taldeko kideek, gero anbulantziaz bertoko ospitalera aldatzeko. Argazkian, Huescako Guardia Zibilaren erreskate helikopteroa / cc-by-sa Fernando.
  Kirolak 2010-08-09 21:37

Koadrilen arteko futbito txapelketa egingo dute Gorlizen

Erabiltzailearen aurpegia Ukberri Abuztuaren 16tik 21era bitartean, koadrilen arteko futbito txapelketa jokatuko dute Gorlizko Kirol Sozietatearen instalazioetan. Txapelketa lau kategoria ezberdinetan banatuko da jaiotegunaren arabera. Lehenengoan 2002 eta 2001 urteetan jaiotakoak arituko dira, bigarrenean 2000 eta 1999koak, hirugarrenean 1998 eta 1997koak eta laugarrenean 1996 eta 1995ekoak. Aurkeztutako taldeek 7 eta 14 jokalari artean izan beharko dute. Izena emateko, talde bakoitzak 10 euro ordaindu beharko ditu. Abuztuaren 11 baino lehen egin beharko da inskripzioa arantza[abildua]copenor.e.telefonica.net-en. Txapelketa horren kolaboratzaileak Gorlizko Kultur Etxea, Gorliz Kirol Elkartea, Gorlizko Udala, Athletic Fundazioa eta Gorlizko Merkatariak dira. Argazkian, gazte batzuk futbolean jolasten / © Bizkerre futbol taldea.
  Kirolak 2010-08-05 22:03

Kirolez beteriko bost egun izango dituzte Lemoizko umeek

Erabiltzailearen aurpegia Ukberri Hurrengo asterako, hilaren 9tik aurrera, kirol astea antolatu du Lemoizko Udalak. Egunero bi ordutako kirol saioetan parte hartu ahal izango dute 6 eta 12 urte bitarteko umeek. Ordutegia 10:00etatik 12:00etara izango da eta ekimenak iraungo duen 5 egunetan parte hartzeko, pertsona bakoitzak 50 euro ordaindu beharko ditu. Eguneko kirol bat jorratuko dute: lehenengoan, piragua eta itsas biologia izango dituzte gozagarri; bigarrenean, zaldien gainean ibiliko dira Goikomendin; hirugarrenean, orientazioa landuko dute Ermuan; laugarrenean, urpeko igeriketa ikastaroa izango dute; eta azkenengoan, arrantza piraguan. Antolatzaileek umeak hartu eta utziko dituzten tokia Lemoizko kultur etxea izango da, Goikomendira doazen egunean izan ezik. Tokiko iturriek zehaztu dutenez, haurrek bainujantzia, toalla, ura, urpean igeri egiteko betaurrekoak, tutua eta hegatsak, mendiko arropa eta oinetakoak eraman beharko dituzte; dagokion jarduerarako, noski. Izena emateko Lemoizko kultur etxera jo beharko dute interesdunek. Argazkian, zaldi batzuk.
  Kirolak 2010-08-05 21:45

Getxotik Bilborainoko kayak zeharkaldia izango da abuztuaren 15ean

Erabiltzailearen aurpegia Ukberri Bilboko Herri Maratoia Klubak (BHM) antolatuta, bosgarren edizioa izango du abuztuaren 15ean, igandearekin, egingo den Nerbioi ibaiaren Nazioarteko Kayak Zeharkaldiak. Getxoko Kirol Portutik 11:00etan abiatuta, 12.900 metro luzerako bidea egin beharko dute Bilboko udaletxeraino heldu arte. Izena emateko epea hilaren 14a arte egongo da zabalik, BHMren bulegoan (Jose Maria Olabarri, 6 - 2 / Bilbo), telefonoz (944 238 659) edo e-posta bidez (bhm[abildua]clubbhm.com). Antolatzaileak arduratuko dira parte-hartzaileen ekipajea helmugaraino eramaten. Argazkian, orain hiru urteko jaitsieraren irudia.
  Kirolak 2010-07-21 21:49

Uztailaren 29an abiatuko da Sopelako Pro Junior surf txapelketa

Erabiltzailearen aurpegia Ukberri Uztailaren 29an hasiko da Sopelako Pro Junior surf txapelketaren laugarren edizioa. Proba abuztuaren 1ean bukatuko da eta 21 urtetik beherako 150 kirolari inguru bilduko dira bertan. Gainera, Europako zirkuiturako baliagarria izango da. Peña-Txuri Surf Elkarteak du antolakuntzaren zati bateko ardura, Sopelako Udala, Pro Surf, EHSF, Nikita eta Red Bullen babesarekin. Saria 5.000 eurokoa izango da lehenengoarentzat eta 1.500 eurokoa bigarrenarentzat. Gizonezkoetan, garaipena eskuratzeko hautagaiak dira Jatyr Berasaluze, Mario Azurza, Marcos Sansegundo, Asier Makeda, Igor Muniain, Ander Mendiguren eta Alex Gironi Wildcards euskaldunak; Frantziako Marc Lacomare eta Pierre Laborde; Reunion irletako Damien Chaudoy, Medi Veminardi eta iazko irabazle Maxime Huscenot; Portugaleko Federico Moraisekin; eta Guadalupeko Charly Martin. Argazkian, pare bat neska surfean aritzen.