Kirolak 2009-10-13 20:53

Eguraldi txarrak ez du zapuztu Algortako Ibilaldi Neurtua

Erabiltzailearen aurpegia Ukberri Aurreko egunetan euria egin eta gauean ere atertu gabe aritu zen arren, 935 lagunek parte hartu zuten atzo, urriak 12, Algortako XXVII. Ibilaldi Neurtuan. "Ez da iazko errekorra gainditu", Itxartu Taldeko kideek adierazi zutenez. Hala ere, pozik agertu ziren antolatzaileek, "horrelako eguraldia egon eta asteburu luzea izanik, horrenbeste jende inguratu delako". Lehendabiziko proban 173 umek eta 152 laguntzailek (batez ere umeen gurasoek) parte hartu zuten eta ibilaldi nagusian 610 gizon-emakumek. "Goizean zehar euria izan dugu, batez ere eguerdi partean, baina hala ere jendea oso animoso ibili da norbera bere zereginetan", azaldu zuten Itxartukoek. Ume guztiei garaikurra eman zitzaien, denentzako berdina. Izan ere, Eusko Legebiltzarrak, Eusko Jaurlaritzak eta Bizkaiko Foru Aldundiak duten araudiaren arabera, halaxe jokatu behar da. Baina den-denak izan zuten sari banaketan oholtzara igo eta han garaikurra jasotzeko aukera. Nagusien artean, berriz, Gorka eta Gotzon izan ziren irabazleak. Biak Algortan bizi dira eta biak Biotz Alai abesbatzako kideak dira. Bigarren bikotea Iñaki eta Mari Carmenek osatutakoa izan zen, Mungiako Andui Mendi taldeko kideak biak. Eta hirugarrenak, Pedro eta Jose Ramon, Itxartuko kideak. Besteak beste, Imanol Landa Getxoko alkateak, Gotzon Muneta Algortako EAJko presidenteak eta Jose Antonio Romero Itxartu Mendigoizale Taldeko presidenteak banatu zituzten sariak. Argazkian, irabazleetako bat garaikurra altxatzen. Argazki gehiago ikusteko sakatu hemen.
  Kirolak 2009-10-11 22:48

Algortako ibilaldi neurtua izango da bihar goizean

Erabiltzailearen aurpegia Ukberri Algortako Itxartu Taldea kultur elkarteak antolatuta, bihar, astelehena, urriak 12, ibilaldi neurtuaren XXVII. edizioa egingo da Algortan eta inguruko herrietan. Urtero ibilaldi horretan parte hartzaile kopuru handia biltzen da, 17 kilometroko ibilbidea egiteko. Helduak goizeko 8:00etatik aurrera hasiko dira ibiltzen Algortako batzokitik, Sustatxamendi eta Kukullaga-Goikotik igaro eta hamaiketakoa Martiartun hartuko dutelarik. Handik aurrera Karea, Aldaskobaso, Sustatxa, Iturgitxi Estarta eta Faduratik pasatuko dira, eta Algortako batzokira heltzean amaituko dute ibilaldia. Ibilbidea zailtasun gutxikoa da eta gutxi gorabehera hiru ordu eta erdi baino zerbait gehiagotan egin ahal izango da hamaiketakoa hartzeko geldiketa kontatuz. Hamar urte baino gazteagoentzat beste ibilbide bat prestatu dute, 7 kilometrokoa eta errazagoa. 9:30etan irtengo dira Algortako batzokitik, Portu Zaharrera jaitsi eta Ereaga hondartza, Arriluze, Bola hondartza, Avanzada, Bolue eta Fadura zeharkatu ondoren batzokiko helmugara iritsiko dira. Eguraldia lagun izanez gero, bihar 1.000 lagunek parte hartzea espero dute antolatzaileek. Iaz 1.127 partaide izan ziren, inoiz baino gehiago. Argazkian, bizikleta bana irabazi zuten iaz hamarna urteko Josebak eta Alexek, 16 urtetik beherako lehenengoak izateagatik.
  Kirolak 2009-10-08 20:36

Lehenengo partidan emakumeen euskal ligaren lidergoa eskuratu du Getxo Rugbyk

Erabiltzailearen aurpegia Ukberri Hainbat jokalari beterano eta Nerea Martinez entrenatzailea taldea utzi dutela, zenbait jokalari berriekin hasi du denboraldia Getxo Artea Rugby Taldeak. Baina, egoera "konplexua" izan arren, taldea koordinatu eta Euskal Ligan nagusitu ostean Espainiako Erreginaren Koparen finalera heltzeko anbizioa daukate, Isabel Rodriguez jokalaria eta behin-behineko entrenatzaileak talde aurkezpenean adierazi zuenez. Rodriguezek handicap bezala ikusten zuen orduan Durango, Gaztedirekin batera Euskal Ligan duten ganorazko arerio bakarra, Arrasateko taldearekin batu eta indartu izana. Baina, pasa den igandean, Faduran jokatutako lehenengo partidan 62 eta 5 emaitza sendoak getxoztarrak hasieratik ligako lidergora eraman zituen. Bitartean, Kakarraldo eta Mungiako rugby taldeek osatutako Uribealdeko emakumeek Donostian doi-doi galdu zuten 20 eta 19 Krafft taldearen aurka. Urriaren 18an, Uribe Kostako bi taldeen arteko derbya jokatuko da. Argazkian, Nerea Agirre Moragues, Eva Rincon Ortiz, Mirane Etxebarri eta Silvia Ruiz Getxoko jokalariak Durangoren aurka jokatutako partidan / © Angela Perez Goicoechea.
  Kirolak 2009-10-08 17:24

Asteartean irekiko dute berriro Fadurako kantxa

Erabiltzailearen aurpegia Ukberri Fadurako kiroldegiko kantxa datorren asteartean, urriak 13, zabalduko da publikoarentzat, 2008ko ekaineko uholdeek eragindako kalteak izan eta hamabost hilabeteren ondoren. Dena den, Getxoko udal iturriek aipatu dutenez, lanak pasa den irailean abiatu ziren eta denbora horretan bi izan dira egindako lan nagusiak. Alde batetik, urak izorratutako parketa aldatzea eta, beste aldetik, egitura bera zaharberritzea. Lanen kostea 183.000 eurokoa izan da. Pista berriro zabaldu ondoren tokiz aldatu behar izan ziren ikastaroak aipatutako egun horretatik, asteartetik, aurrera bere ohiko tokian eskaini ahal izango dituzte berriro, Getxo Kiroleko iturriek baieztatu dutenez. Argazkian, Algortako Fadura kiroldegia.
  Kirolak 2009-10-05 16:23

Garaipen batez estreinatu da Getxo Rugby Ohorezko B mailan

Erabiltzailearen aurpegia Ukberri Getxo Artea Rugby taldeko gizonezkoak estreinatu ziren atzo Ohorezko B mailako ligan, iaz kategorian jaitsi ostean. Igoera helburu, atzo lehenengo arri-koxkorra jarri zuten getxoztarrek, Barcelona Universitari Club taldeari 19 eta 18 irabazita. Fadurakoek azaldu dutenez, "garaipen garrantzitsua eta landua" izan zen igandekoa, "partidaren aurretik zeuden urduritasun eta zalantzak alde batera utzi dituelako" eta partida ia amaitu arte irabazlea nor izango ote zen asmatzea zaila egon baitzen. Bi minuturen faltan, Bartzelona aurretik zihoan bi puntu gehiago zituztela. Baina, azken uneetan Gorka Garatek pasatutako zigor-kolpe batek garaipena eman zien Bryce Bevin-en jokalariei. Gainera, hori izan zen partida osoan Getxo aurretik ibili zen une bakarra. izan ere, lehenengo zatian BUC osoago azaldu zen zelaian 8 eta 12ko emaitza eragiten. Bigarren zatian, berriz, getxoztarrek koordinazioa hobetu eta distantzia laburtu zuten azken garaipena eta ligako lehenengo lau puntuak eskuratu arte. Argazkian, pasa den asteazkenean aurkeztu zuten talde berria, Artean / © Getxo Rugby.
  Kirolak 2009-10-02 10:26

Eliteko lasterkaririk onenek jokatuko dute bihar Berangoko Milia

Erabiltzailearen aurpegia Ukberri Iraupen erdiko espezialista bikainak ariko dira larunbat honetan, urriak 3, Berangoko Nazioarteko Miliaren 22. edizioan. Besteak beste, 1.500 metrotan egungo Espainiako txapeldun Reyes Estevez, txapeldunorde izandako Juan Carlos Higuero, Arturo Casado eta Jose Luis Blanco izango dira Gobelaldeko zirkuituko irteera lerroan, 19:15ean. Horiek guztiak iaz Berangon txapela jantzi zuen Mekonnen Gebremedhin izango dute lagun. Emakumezkoak, berriz, 20 minutu lehenago abiatuko dira. Horien artean, 1.500 metrotan Holandako txapeldun Adrienne Herzo, Eva Arias eta Iris Fuentes-Pila; hiruak Berlingo mundialean parte-hartutakoak. Joan den larunbatean, Getxoko Milian lehenengo eta bigarren izandako Margarita -Berangon irabazi zuen iaz- eta Zulema Fuentes-Pilak ere korrituko dute proba. Bitartean, elite karrereten aurretik etorriko dira eskola eta herri lasterketak, 16:40ean hasita. Hain zuzen ere, gaur izango da horietan inskribatzeko azken eguna, 18:00etatik 20:00etara, Berangoetako kultur etxean. Faxez (946 680 955) edo telefonoz (946 682 143) ere izena eman ahal izango da. Orotara, 300 korrikalarik parte-hartzea espero du Berango Atletismo Taldeak, profesional, herritar eta eskola-umeen artean. Argazkian, Ana Landa alkateak ere parte hartu zuen Berangoko Miliaren aurkezpenean / Berangoko albisteak.
  Kirolak 2009-10-01 20:50

Munduko surflaririk onenak izango dira astelehenetik aurrera Sopelan

Erabiltzailearen aurpegia Ukberri Aurten ere nazioarteko 45 surflaririk onenak izango dira Sopelan. Izan ere, Mundakan ez ezik, Larrabasterrako Arrietara hondartzan ere jokatuko dute bigarren urtez jarraian Billabong Pro Mundaka txapelketa, udal iturriek zehaztu dutenez. Besteak beste, ondoko hauek ariko dira olatu artean: Joel Parkinson, Taj Burrow, Tiago Pires, Kelly Slater, Mick Fanning eta abar. Urriaren 5etik 17ra bitartean egingo dute lehiaketa: Arrietarak hartuko du lehen itzulia eta gainerako saioak Mundakan izango dira. Gainera, azken horretan baldintza egokiak ematen ez badira Sopelara joko dute antolatzaileek. Munduko 45 surflari onenekin batera hiru gonbidatu ariko dira: batetik, Hodei Collazo eta Marcos San Segundo zarauztarrak; eta bestetik, Australiako Dean Bowen. ASP Munduko Surf Txapelketako hamar proben artean zortzigarrena da Billabong Pro. Hain zuzen ere, Europan jokatzen diren hiruetako bat da Sopela eta Mundakakoa. Txapelketa zuzenean jarraitu nahi dutenek www.billabongpro.com webgunean edukiko dute horretarako aukera. Hala ere, ez du euskaraz informaziorik ematen. Argazkian, surflari pare bat uretara sartzeko prestatzen.
  Kirolak 2009-09-30 21:23

Itxinatik ibilaldia egingo du urrian Matrako mendi taldeak

Erabiltzailearen aurpegia Ukberri Joseba Sanchez "Matrako" oroitzen duen mendi taldeko lagunak Gorbeiako natura parkearen barruan dagoen Itxina goi-lautadara, Orozkon, joango dira urriaren 11n, igandearekin. Txangoa goizeko 9etan hasteko asmoa daukate. Horretarako, Plentziako metro geltokian jarri dute hitzordua. Ibilaldian parte hartzeko, Goñi Portal kultur etxean izena eman daiteke, urriaren 9a baino lehen. Ordutegia 10:00etatik 13:00etara eta 17:00etatik 19:00etara da, eta telefono zenbakia 946 775 541. Salneurriari dagokionez, 5 euro ordaindu beharko dituzte matrakokideek. Argazkian, Matrako Mendi Taldeko hainbat lagun Txindokin (Gipuzkoa).
  Kirolak 2009-09-30 20:54

Field Target txapelketa egingo dute igandean Barrikan

Erabiltzailearen aurpegia Ukberri Igande honetan, urriak 4, Barrikako Field Target Txapelketaren bigarren edizioa jokatuko dute Zabaletxe zelaian, Meñakoz hondartza ondoan. Hain zuzen, Bizkaiko zein Euskal Herriko lehiaketetarako puntuagarria da proba. Ehizan egongo balira bezala, aire konprimituko karabinekin diana batzuei tiro egitean datza modalitate hori eta, aste bukaerako saioa, Barrikako Udalarekin elkarlanean antolatu du Euskadiko Field Target Elkarteak. Gauzak horrela, goizeko 10etan hasiko dira tiratzaileak armak doitzen eta beroketak egiten. Eta ordu erdi beranduago hasiko da lehiaketa. 30 lagun inguruk parte hartuko dute, udal iturrien arabera. Sari banaketa, berriz, 13:30ean egingo dute. Eta ondoren, tiro erakusketa egingo dute, zeinean nahi duen guztiak parte hartu ahal izango duen. Argazkian, Field Target txapelketa Zumarragan / Otamotz, Urretxu eta Zumarragako Atari Digitala.
  Kirolak 2009-09-28 20:33

Getxoko Milian 170 korrikalarik baino gehiagok parte hartu dute

Erabiltzailearen aurpegia Ukberri Eguraldi ederra lagun herenegun, larunbatarekin, egin zuten Algorta erdigunean Getxoko Miliaren hirugarren edizioa. Itxartu eta Getxo Atletismo taldeek antolatuta, lasterketetan 170 korrikalarik baino gehiagok parte hartu zuten kategoria ezberdinetako lasterketetan, txikietatik hasi eta elite mailako helduetara arte. Azken lasterketa horietan, hots, eliteko lasterketetan, Manuel Pena lortu zuen garaipena gizonezkoen artean, 353 metroko zirkuituari lau buelta eta erdi emanez, 4 minutu eta 31 segundotan. Francisco España eta Sergio Sanchez segundo bat beranduago heldu ziren helmugara. Emakumezkoen artean, berriz, Margarita Fuentes izan zen lehenengoa, 5 minutu eta 13 segundoko denbora eginez. Aurrekoaren ahizpa Zulema izan zen bigarren, segundo batera; eta Elena Moreno 3 segundotara. Bitartean, Ivan Fernandez (4 min. 39 seg.) izan zen lasterketa amaitu zuen lehenengo euskalduna. Emakumezkoen artean, Leyre Medina (5 min. 21 seg.) egin zuen beste horrenbeste. Sailkapen guztiak Itxartu Taldearen webgunean daude ikusgai. Argazkian, Getxo Atletismorekin batera, herri krosa ere antolatu ohi du Itxartuk. Urriaren 12an, berriz, ibilaldi neurtua egiten dute.
  Kirolak 2009-09-25 20:45

Maila handiko korrikalariak izango dira bihar Getxoko Milian

Erabiltzailearen aurpegia Ukberri Larunbat honetan, irailak 26, Getxoko Miliaren hirugarren edizioa jokatuko da Algortan, 11:45etik aurrera, Itxartu eta Getxo Atletismo taldeek antolatuta. Lasterketa gizonezko zein emakumezkoen maila guztietan korrituko da, umeekin hasi eta junior, senior eta elite kategorietaraino, eta nazioarteko izaera du. Elite kategoriako karreretan iraupen-erdiko euskal korrikalari onenek Espainia zein beste herrialde batzuetako maila handiko kirolariak izango dituzte aurkari. Horiek guztiak gonbidatuta parte hartzen dute. Ildo horretatik, Dimas Ramos Getxo Atletismoko buruak ziurtatutakoaren arabera, besteak beste, Sergio Sanchez, Manuel Penas, Francisco España, Zulema Fuentes, Paula Gonzalez eta Sonia Saizena izango dira biharko proban. Argazkian, iaz Iris Fuentes Pila kanpabriarrak irabazi zuen emakumezkoetan, Frehiwot Gosho (Etiopia) eta Suzanne Elise Hasler (Britainia Handia) lagun izan zituela.
  Kirolak 2009-09-22 21:21

Bizkaia Bilbao Basketen autobusa Leioan eta Erandion izango da bihar eta etzi

Erabiltzailearen aurpegia Ukberri Bizkaia Bilbao Basket taldeak lurralde historikoan abonatuak lortzeko martxan jarri duen autobus ibiltaria Leioara eta Erandiora iritsiko da bihar, asteazkena, eta etzi, hurrenez hurren. Taldeak bere webgune erdaldunean iragarri duenez, "Orain... basket" kanpainaren barneko Leioako hitzordua Sabino Arana etorbideko 77. zenbakian izango da, Sakoneta polikiroldegiko autobus geralekuan. Leioaztarrek 2009-2010 denboraldiko partidentzako bonoa eskuratu ahal izango dute bertan. Horretarako, goizeko 11etatik arratsaldeko 3ak arte eta 5etatik 9etara izango dituzte saskibaloi taldeko kideak haien zain. Erandiotik, berriz, ostegunean igaroko dira, taldeko ibilgailua udaletxearen aurrean paratuko dutela, eguerdiko 1etatik gaueko 9ak arte. Oraindik datarik aurreratu ez badute ere, Getxo eta Sopela udalerrietara zein Leioa eta Erandioko campusera ere autobusa bidaliko dutela aurreratu du klubak. Bonoak 80 eta 504 euro artekoak izan daitezke, EHUko ikasleei edo akziodunei egindako eskaintzak merkeenak direla. Argazkian, Erandioko Bilbao Basketen zaleen elkartea.
  Kirolak 2009-09-22 14:43

Sanchez eta Canales surflariek garaipen bana eskuratu dute Euskal Herriko Surf Txapelketan

Erabiltzailearen aurpegia Ukberri Garazi Sanchez algortarra eta Letizia Canales sopeloztarra asteburu honetan jokatu den Euskal Herriko Euskaltel Surf Txapelketan proba banatan nagusitu ziren. Txapelketaren hemeretzigarren edizioa Donostiako Zurriola hondartzako uretan burutu zen, Bizkaiko, Gipuzkoako eta Lapurdiko 168 kirolarik parte hartu zutela. Emakumeen atal irekian, 17 urteko Garazi Sanchez Getxo Surf Taldeko kideak garaitu zuen, atzean Letizia Canales Peña Txuri taldeko sopeloztarra sailkatu zela. Aldiz, Peña Txurikoa nagusitu zen bere kategorian, 14 urte azpiko nesken artean, atzean Loiola Canales ahizpa izan zuela. Uribe Kostako surflari gizonezkoei dagokienez, domina txikiagoekin konformatu behar izan ziren. Horrela, Petxa Txuriko Natxo Gonzalezek brontzea lortu zuen 14 urte azpiko mutilen artean, talde bereko Kosme Fernandezek 18 urte azpikoen artean edo Getxoko Borja del Sanzek Senior kategorian bezala. Argazkian, Garazi Sanchez Getxoko Udalak udalerriko kirolaririk onenei 2009ko urtarrilaren 13an emandako sarietan / cc-by-sa Palazio.
  Kirolak 2009-09-20 23:52

Athleticekin lehenengo mailan egin du debuta gaur Aketxe getxoztarrak

Erabiltzailearen aurpegia Ukberri Arenas eta Athletic futbol taldeek indarrean daukaten hitzarmenari esker, denboraldi hasieran heldu zen Lezamara Isaac Aketxe Barrutia jokalari getxoztarra, Bilbao Athleticekin Espainiako Futbol Ligaren 2. B mailan jokatzeko. Bada, kategoria horretan bi partida egin ostean, gaur egin du debuta lehenengo mailan Aketxek. Vila-real taldearen aurka San Mamesen jokatutako norgehiagokan, gandor iliakoan kolpea hartu duen Fernando Llorenteren ordez sartu da futbol zelaian 20 urteko jokalaria, 79. minutuan. Minutu gutxi eman badizkiote ere bere joko ona erakutsi du aurrelari getxoztarrak. Esaterako, 90. minutuan Gaizka Toquerori eman dio azken pasea Aketxek, talde osoak harilkatutako jokaldi bati amaiera emateko asmoz. Hala ere, balio Vila-realeko ateko zutoinetik urrun joan da. Luzapenaren hirugarren minutuan, berriz, falta egitez gelditu behar izan du Aketxe Angel Lopezek. Horregatik, txartel horia atera diote atzelari vila-realdarrari. Azkenean, Athleticek 3-2 irabazi dio Vila-reali. Argazkian, Aketxe Lezaman entrenatzen (eskuineko azkena), Bilbao Athleticen aurkezpenean / © Athletic Club
  Kirolak 2009-09-20 20:27

KAE 1 ligan izango da Getxo Arraun Taldea

Erabiltzailearen aurpegia Ukberri Ametsa egia bihurtu da azkenean: Getxo Arraun Taldea Kantauriko Arraun Elkarteen (KAE) Ligako lehenengo mailan izango da datorren denboraldian. Gaur jokatu da Portugaleten, itsasadarreko uretan, Traineru Kluben Elkarteko (TKE) ligako play-offen bigarren eta azken estropada. Estutasunak igaroz, azkenean Koxtapek eta Astiilerok lortu dute TKEra igotzea. Atzo lortutako errenta oso garrantzitsu suertatu da pasaitarrentzat. Gaurko estropada Astillerok irabazi du, atzo bigarrena izan zen, 19:23.21 denbora eginez. Bigarrena, Meira izan da. Galiziarrek egundoko estropada egin dute eta Astillerori bi segundoko aldea atera diote. Hirugarrena Koxtape izan da, atzoko garailea, Astillerori 15 segundo eta Meirari 13 segundo ateraz. Bermeon izandako atzoko estropadan, Koxtapek 19 segundotako atera atera zion Meirari. Bi jardunaldiko denborak kontutan hartuta zazpi segundotako tartea izan da azkenean gipuzkoarren alde. Bestalde, Astillerok irabazita, galiziarrek ez daukate inolako aukerarik TKE ligan mantentzeko eta mendebaldeko ligara jaitsi dira. Ondorioz, Getxo Arraun Taldea KAE ligako lehenengo mailan izango da datorren denboraldian, Zierbena, Isuntza, Santurtzi, Busturialdea, Deustu, Arkote, Trintxerpe, Camargo, Hondarribia B, Orio B eta Donostiarra traineruekin batera. Argazkian, "Goizeko Izarra" traineru getxoztarra.