Kirolak 2010-07-21 21:49

Uztailaren 29an abiatuko da Sopelako Pro Junior surf txapelketa

Erabiltzailearen aurpegia Ukberri Uztailaren 29an hasiko da Sopelako Pro Junior surf txapelketaren laugarren edizioa. Proba abuztuaren 1ean bukatuko da eta 21 urtetik beherako 150 kirolari inguru bilduko dira bertan. Gainera, Europako zirkuiturako baliagarria izango da. Peña-Txuri Surf Elkarteak du antolakuntzaren zati bateko ardura, Sopelako Udala, Pro Surf, EHSF, Nikita eta Red Bullen babesarekin. Saria 5.000 eurokoa izango da lehenengoarentzat eta 1.500 eurokoa bigarrenarentzat. Gizonezkoetan, garaipena eskuratzeko hautagaiak dira Jatyr Berasaluze, Mario Azurza, Marcos Sansegundo, Asier Makeda, Igor Muniain, Ander Mendiguren eta Alex Gironi Wildcards euskaldunak; Frantziako Marc Lacomare eta Pierre Laborde; Reunion irletako Damien Chaudoy, Medi Veminardi eta iazko irabazle Maxime Huscenot; Portugaleko Federico Moraisekin; eta Guadalupeko Charly Martin. Argazkian, pare bat neska surfean aritzen.
  Kirolak 2010-07-21 17:31

Irailaren amaieran zabalduko dute Fadura kiroldegiko atletismo pista

Erabiltzailearen aurpegia Ukberri Algortako Fadura kiroldegiko atletismo pista irailaren amaieran egongo da erabilgarri, Getxoko Udalak jakinarazi duenez. Eusko Jaurlaritzak ezarritako protokoloari jarraituz, behin inguruaren aurretiko indusketa amaituta, aurkitutako lur kutsatuak aztertzen eta kentzen ari dira jada. "Toki batean hidrokarburoen hondakinak agertu dira eta horiek biltzen eta zabortegi berezitu batera bidaltzen ari dira, han trata ditzaten", adierazi dute tokiko arduradunek. Lanen ostean, "atletismo pista berria munduko hoberenetariko bat bihurtuko da eta, beraz, nazioarteko mailako lehiaketak eta probak ospatu ahal izango dira bertan", gaineratu dutenez. Pista berriak azken belaunaldiko tartan erako zorua edukiko du, urdin kolorekoa. Argazkian, Algortako Fadura kiroldegia / © Getxo.net.
  Kirolak 2010-07-20 17:59

Cristina Zurbituk eta Aaron Roylek jantzi dute txapela Plentziako akuatloian

Erabiltzailearen aurpegia Ukberri Joan den larunbatean jokatu zen Plentziako Akuatloia, Araba, Bizkaia eta Gipuzkoa mailako txapelketa, alegia. Euskoman tokiko triatloi taldeak eta EAEko Triatloi Federazioak antolatuta, Cristina Zurbitu (SVC Seguridad) suertatu zen irabazle emakumezkoetan, 39 minutu eta 58 segundoko denbora; eta Aaron Royle australiarra gizonezkoetan, 31 minutuko denborarekin. Bestalde, Araba, Bizkaia eta Gipuzkoako Akuatloi Txapelketan garaileak Zurbitu bera eta Jon Unanue (SVC Seguridad) izan dira. Dagoeneko seigarren txapela irabazi du jarraian gizonak. Taldekako sailkapenari dagokionez, emakumezkoetan, Urdaitri Triatloi Taldea; eta gizonezkoetan, SVC Seguridad izan dira irabazleak. Argazkian, 2007an Plentzian ospatutako IV. Akuatloi Txapelketa / © Euskoman.
  Kirolak 2010-07-14 20:32

Akuatloi txapelketa egingo dute larunbatean Plentzian

Erabiltzailearen aurpegia Ukberri Larunbat honetan, hilak 17, Akuatloia egingo dute Plentzian. Goizeko 11etan hasiko da Araba, Bizkaia eta Gipuzkoa mailako proba. Parte-hartzaileen muga ehun kirolaritan jarri dute. Euskoman Triatloi Taldeak eta EAEko Triatloi Federazioak antolatu dute txapelketa, eta besteen artean, esprint distantzian lasterka egingo dute. Irteera, helmuga eta boxak Jai-Alai frontoiaren aurrean kokatuko dituzte, Plazatxoa plazan, eta bertan materialaren ikusketa egingo dute 12:00etatik 12:45era. Lehen oinezko lasterketak 2,5 kilometrotako ibilbidea izango du, Gazteluondo parkean korrika eginez. Lehenengo trantsizioaren ondoren, kirolariek kilometro bateko igeriketa faseari ekingo diote, Plentziako itsasadarrean joan-etorria eginez. Bigarren trantsizioaren ondoren, helmugara iritsi aurretik, beste 2,5 kilometrotako oinezko lasterketa egin beharko dute, ibilbidea lehen atalaren berdina izango delarik. Argazkian, 2007an Plentzian ospatutako IV. Akuatloi Txapelketa / © Euskoman.
  Kirolak 2010-07-12 16:46

Ume eta gazteentzako surf eta skate ikastaroak antolatu ditu Bizarra Lepoanek

Erabiltzailearen aurpegia Ukberri Getxo udalerriko Bizarra Lepoan euskara elkarteak ume eta gazteentzako surf eta skate ikastaroak antolatu ditu abuztuaren lehenengo bi asterako. Zehazki, abuztuaren 2tik 5ra, astelehenetik ostegunera, izango da surf tailerra Getxo eta Sopelako Barinatxe hondartzan, La Salvaje Surf Eskolaren eskutik. Ondorengo astean, abuztuaren 9tik 12ra, izango da skate ikastaroa, Arrigunagako skate parkean, La Kantera skate taldeko kideekin. Biek ala biek egunero arratsaldeko 5etan hasi eta 7etan amaituko diren bi orduko saioak izango dituzte, zortzi orduko ikastaroa osatuz. Ekimena 8 eta 16 urte bitarteko haur eta gazte euskaldunei zuzenduta dago, hiru adin multzo banatuko dituztela. Horrela, 8 eta 10 bitartekoak; 11, 12 edo 13 urte dituztenak; eta 14 eta 16 artekoak multzo ezberdinetan izango dira. Euskara elkarteak izen-ematea dagoeneko abiatu du. Argazkian, Bapirukeko gaztetxoek ere iaz izan zuten skate egiteko aukera.
  Kirolak 2010-07-10 12:12

Espainiako selekzioarekin jokatuko dute Europako Zazpikoa Getxo Rugbyko neska bik

Erabiltzailearen aurpegia Ukberri Barbara Pla e Isabel Rodriguez Getxo Artea Rugby Taldeko jokalariak Espainiako selekzioarekin arituko dira, larunbat eta igandean, Moskun (Errusia) izango den Europako Zazpiko Txapelketan. Jose Ignacio Inchausti "Tiki" hautatzaileak maiz aukeratzen dituen arren, azken ordura arte ez dute jakin Plak ere jokatuko zuenik. "Zorionez garaiz sendatu da orkatileko lesioa eta, seguruenik, hori-beltza berriro nabarmenduko da, partida bakoitzean egin ohi duen bezala", adierazi du Inchaustik. Gaineratu duenez, "oso garrantzitsua da Pla gurekin izatea. Bost astez osatzen egon ostean, hiru entrenamendu baino ez ditu egin taldearekin. Argi dago guztiz errekuperatuta ez dela egongo, baina %80an osatuta badago nahikoa dugu. Gure jokalarien konpromisoaren adierazle argia da". Hala ere, zozketan, zorte handirik ez du izan Espainiako selekzioak. Portugal, Finlandia, Holanda eta Errusia izango ditu aurkariak. Laurak maila handiko taldeak. Argazkian, Barbara Pla / © Getxo Artea Rugby Taldea.
  Kirolak 2010-07-10 00:23

Areetako estropada eta emakumeen liga jokatuko dira bihar eta etzi Ibaizabalen

Erabiltzailearen aurpegia Ukberri Kantabrikoko Arraun Elkarteak eta Areetako Raspas arraun taldeak antolatuta, Areetako estropada burutuko da bihar, larunbatean, 12:00etan, Ibaizabal itsasadarrean. Areetako kaiaren lehorretik itsasora jauzi egingo dute bihar KAEren 2. mailan dauden hamaika taldeak, 3 itsas-miliak edo 5.556 metroak denborarik laburrenean egiteko xedearekin. Hiru estropaden ostean azken postuetan kokatu diren Erandioko Lutxana Arraun Elkartea eta Areetako bertako Raspas taldea lehenengo txandan irtengo dira. Beste 14 talderen artean aipagarria da buruan dauden, eta bihar laugarren txandan irtengo diren Getaria, Ondarroa, Portugalete eta Zumaiaren artean oraingoz lau puntuko aldea baino ez dagoela eta, beraz, garrantzitsuak izango direla bihar metatuko ditzuten puntuak. Banderaz gain, 9.000 euro banatuko dituzte sarietan. Bestalde, etzi, igandean, 11:30ean Euskotren Emakumeen Arraun Ligako Kaiku bandera jokatuko da Ibaizabalen uretan, baina kasu horretan Portugaleten antolatuta. Argazkian, Raspas taldea 2008an / © Deustu Arraun Taldea.
  Kirolak 2010-07-09 22:56

Bolueko futbol zelaiak lehiaketa ofizialak hasterako prest egongo dira

Erabiltzailearen aurpegia Ukberri Algortako Bolue 1 eta 2 futbol zelaiak prest egongo dira irailaren amaieran hasiko den futbol denboraldi ofizialerako. Getxo Kirolak udal erakundeak jokalekuen belar artifiziala zaharberritzen ari da, 13 urteren ostean. Belar naturalaren ordez artifiziala ipini zuen Bizkaiko kirol instalazioen artean lehenengoetarikoa izan zen hori. Zelai horietako belarra aldaketaz gain, ezaugarri berdineko beste zelai bat jarriko dute, Fadurako antzinako lur zelaian kokatuko dena. Gauzak horrela, Arrautzaldeon, Iturgitxi, Getxo, Andra Mari, San Nikolas ikastola eta Bizkerre taldeek aurre denboraldirako erabilgarri izango dute gune berri hori eta gainontzeko instalazioak. "Horrela, lehiaketa ofizialak era onenean prestatu ahal izango dituzte", adierazi dute Udalekoek. Argazkian, bi neskato Bolueko zelaietan jolasten.
  Kirolak 2010-07-08 23:41

Bizikleta irteera egingo dute igandean Algortatik Sopelara

Erabiltzailearen aurpegia Ukberri Euskadi Txirrindularitza Erakundeak eta Bizkaiko Foru Aldundiko Herri Lan Sailak bizikleta irteera desberdinak antolatu dituzte aurtengo udarako, lurraldeko bizikleta bideen sarean dauden ibilbideak sustatze aldera. Hurrengo irteera igandean egingo dute, uztailaren 11n. Algortako Fadura kiroldegia izango da abiapuntua eta Sopela helmuga. Irteerok 8 urtetik gorakoei zuzenduta daude, gehienez, 30 pertsona egongo direlarik talde bakoitzeko. Bizikleta eta kaskoa eramatea nahitaezkoa da. Izen ematea doakoa da, eta horretarako modu desberdinak daude: 944 545 127 telefonora deituz, 9:00etatik 13:30era; postaz aula[abildua]fundacioneuskadi.net helbidean edota www.bizkaia.net webgunean, Herri Lan Saila-Bizikletak orrian. Informazio gehiagorako www.bizkaia.net eta www.fundacioneuskadi.com. Argazkian, bizikleta martxa bat Itzubaltzeta / Romoko kaleetan.
  Kirolak 2010-07-01 21:32

Katenatxio izan da aurtengo Sopelako areto-futbol txapelketako irabazlea

Erabiltzailearen aurpegia Ukberri Sopelako areto-futbol txapelketako finala jokatu zuten ekainaren 25ean, San Pedro jaien barruan, Urko kiroldegian. Partida arratsaldeko 7etan hasi zen. Bertan, Katenatxio eta Mugi taldeak lehiatu ziren. Norgehiagoka 3-2 bukatu zen, Katenatxioren alde. Beraz, aipatu taldea dugu aurtengo edizioko txapelduna, bigarren postua Mugi taldearentzat utziz. Finala jokatu baino ordu bat lehenago, 18:00etan, hirugarren eta laugarren postuak erabakitzeko partida aurreikusita zegoen, baina Maritimo taldea ez zenez aurkeztu, hirugarren postua Beti Mugan taldearentzat izan zen, eta laugarrena agertu ez zen taldearentzat. Sari banaketa 20:00etan egin zuten. Argazkian, hainbat gazte futbolean jolasten.
  Kirolak 2010-06-30 22:26

Aurten 64 lagunek parte hartu dute Sopelako lasterketa nudistan

Erabiltzailearen aurpegia Ukberri Joan den larunbatean egin zuten "Patxi Ros Saria" Lasterketa Nudistaren 12. edizioa, Sopelako Barinatxe hondartzan. Iaz, irailean jokatu zen proba. Batzuen arabera, "egun aldaketa horrek partaideen kopuruan eragina izan du, batzuk enteratu ez direlako". Hala ere, guztira, 64 lagunek parte hartu zuten. Euskal Naturista Elkarteak (ENE) azaldu duenez, "lasterketa egiteko data mareen arabera finkatzen dugu, ura maila baxuan egon behar duelako eta ekimena beti larunbat eguerdian egin delako". Gaineratu dutenez, "lasterkari gehienak gizonezkoak izan dira. Soilik hiru emakume parte hartu dute". Bitartean, aipatu behar da 5 umek ere lasterketaren erdia egin zutela, 2.500 metrotako distantzia hain zuzen. Aurten, gizonezkoen artean, egiptiarrak, irlandarrak eta frantsesak izan dira. Argazkian, iazko lasterketaren irudi bat.
  Kirolak 2010-06-25 20:59

Bihar jokatuko dute Sopelako lasterketa nudista

Erabiltzailearen aurpegia Ukberri Larunbat honetan, hilak 26, "Patxi Ros Saria" Lasterketa Nudistaren 12. edizioa egingo dute Sopelako Barinatxe hondartzan. Hitzordua eguerdiko 12etan jarri dute. Euskal Naturista Elkarteak (ENE) antolatuta, aurtengo edizioa 5.000 metrokoa izango da helduentzat. Umeek ere parte hartu ahal izango dute. Horrela, nagusiekin batera aterako dira, baina ibilbide laburragoa egin beharko dute. Lasterketa honako sei kategoria hauetan banatuko da: gizonezkoak, emakumeak, beteranoak (40 urtetik gorakoak) eta umeak (14 urtetik beherakoak). Aldi berean, ENEko naturistentzat bi kategoria egongo dira: ginezkoak eta emakumeak (elkarteko kide izatea egiaztatzeko, txartel eguneratua erakutsi beharko da). Izena emateko epea atzo amaitu zen arren, bihar ere egongo da horretarako aukera, goizeko 11:30ak arte, Barinatxen. Lasterketan izena ematea eta parte hartzea doakoa dira. Argazkian, iazko lasterketaren irudi bat.
  Kirolak 2010-06-21 18:33

Puntako pilotariek jokatuko dute Sopelako San Pedro jaietan

Erabiltzailearen aurpegia Ukberri Sopelan hogeita hirugarrenez jokatuko duten areto futbol txapelketako finala San Pedro jaietako ostiralean jokatuko dute, hau da, hilaren 25ean. Hitzordua Urko kiroldegian izango da, arratsaldeko 7etan. Aurtengo sariketan 21 taldek parte hartu dute eta partidak datorren asteko astelehenetik ostiralera jokatuko dituzte, 19:00etatik aurrera. Aurtengo berrikuntza bezala, Ugeraga taldea arduratu da zuzendaritza teknikoaz, Udalaren Kirol Sailaren laguntzarekin. Hala ere, kirol ekitaldi gehiago izango dira Sopelako San Pedro jaietan (pdf). Urtero lez, pilotari profesionalek jardungo dute udal frontoian. Esku-pilotari dagokionez, Aspe enpresak antolatuko ditu partidak. Ostiral honetan, 22:00etatik aurrera, lehen norgehiagoka jokatuko dute Idoate-Larrinaga eta Olazabal-Galartza VI bikoteek. Ondoren, Irujo-Beroiz eta Gonzalez-Barriola arituko dira. Momentu oro, ETBko kamerak egongo dira partidak grabatzen. Bestalde, larunbatean, hilak 26, 20:00etatik aurrera, pala profesionaleko jaialdia egingo dute, Asfedebi-Pilota enpresak antolatuta. Argazkian, telebistan emango dituzte esku-pilota partidak / © Sopelana.net.
  Kirolak 2010-06-18 14:16

Asteburuan hasiko da Euskal Bodyboard Zirkuitua

Erabiltzailearen aurpegia Ukberri Azkenaldi honetan pairatutako olatu falta deigarria izan da benetan. Izan ere, bi hilabeteko atzerapena jasan du El Diario Vasco Euskal Bodyboard Zirkuituak. Baina, badirudi, orain dela egun batzuk finkatutako data berria mantenduko dela eta Euskal Herriko Surf Federazioko (EHSF) Sail Teknikoak konfirmatu berri duenez, asteburu honetan, ekainak 19 eta 20, hasiko da zirkuitua, Sopelako Atxabiribil hondartzan. 2009an maila goreneko txapelduna izandako Aritz Larrinaga sopeloztarra dugu rankineko buru. Gure bodyboarderrik onenetarikoa etxean jokatuko du gainera! Open A maila honetan beste izen handiko lehiakideak izango dira: euskaldunak ez ezik, Kantabria, Portugal eta Frantziatik etorritakoak ere, besteak beste. Goizeko 9tan hasiko da txapelketa eta olatuen arabera garatuko da asteburu osoan zehar. Argazkian, azkenaurreko proban garaipena eskuratu zuen iaz Aritz Larrinagak / © EHSF.
  Kirolak 2010-06-17 11:12

Bizikletak dohainik probatzeko aukera emango du Mankomunitateak

Erabiltzailearen aurpegia Ukberri Gaurtik ekainaren 26ra bitartean, Bizimeta zerbitzuko bizikletetan dohainik ibiltzeko aukera eskainiko du Uribe Kostako Mankomunitateak. Kanpainak sei eguneko iraupena du, bi astetan zehar, ostegunetik larunbatera. Gauzak horrela, ate irekiko jardunaldia egingo dute udalerri bakoitzean, bultzatu nahi dituzten tokian tokiko txirrindu-mailegu puntuetan, Sopelan hasi eta Berangon bukatuta. Horretarako, bi begirale egongo dira batera egun eta leku berean: batek kanpainaren informazio‑orriak banatzen dituen bitartean, besteak bizikleten maileguak egingo ditu. Aipatu bezala, horietara doazenek doan erabili ahal izango dituzte bizikletak. Baldintza bakarra da horiek puntu horretan hartu eta utzi beharko direla. Bizikletak erabili ahal izateko, nork bere datuak eman beharko ditu, baita emango zaion dokumentua izenpetu ere. Bizikleta, gehienez ere, 30 minutuz erabiliko da. Ate irekiko jardunaldien ordutegia ondokoa izango: 10:00etatik 14:00etara eta 16:00etatik 20:00etara. Argazkian, Sopelako Kurtzio kultur etxeko mailegu-lekua / © Joseba Zubiaur - Sopelako Udala.