Kirolak 2010-06-16 21:27

Skate eguna egingo dute larunbatean Sopelan

Erabiltzailearen aurpegia Ukberri Hirugarren Skate Eguna egingo dute larunbat honetan, ekainak 19, Sopelako Iturrieta parkean (Balearen parkean, Mendieta kalearen amaieran, kultur etxe berritik gertu edo Sabino Arana kalearen alboan, Urdulizerako bidean). Bertan, kirol horren ikastaroak, txapelketa eta sari banaketak izango dira. Skate kurtsoa 11:00etatik 13:00etara egingo dute. Sariketa, berriz, 15:00etan hasi eta 18:00etan bukatuko da. Azkenik, ordu erdi beranduago sari banaketa egingo dute, 18:30ean, hain zuzen. Bertan parte hartzeko, Rider Skate dendan (Zubigane, 5) izena eman beharko dute skate zaleek. Bestela, 944 660 995 telefono zenbakian edota www.guretxokoskatepark.com webgunean egin daiteke. Argazkian, mutil bat Leioako skate pistan / © Leioa.net
  Kirolak 2010-06-11 22:27

Astelehenetik aurrera kirol ikastaroetan izena emateko aukera izango dute Fadura eta Gobelako abonatuek

Erabiltzailearen aurpegia Ukberri Astelehenean, hilak 14, zabalduko dute Getxo Kirolak udal erakundearen 2010/11 denboraldiko ikastaroetan izena emateko epea, abonatuak diren pertsonentzat. Tenis eta padelaren kasuan, ikastaroa errepikatu nahi duten lagunek astelehen, astearte eta asteazkenean eman beharko dute izena. Beste modalitateetako ikasleek, berriz, ekainaren 17tik abuztuaren 31ra arte izango dute zabalik tokia erreserbatzeko epea. Bitartean, izen-ematea ezeztatu edo ordutegia aldatu nahi dutenek irailaren 6an eta 7an egin ahal izango dute. Bestalde, ikastaroetako batean lehenengo aldiz apuntatzen diren abonatuek, arretarako bulegoetan, familia bakoitzeko zenbaki bat eskuratu beharko dute, uztailaren 1etik irailaren 8ra bitartean. Horrekin, izena emateko ordena erabakitzen duen zozketan parte hartuko dute. Zozketa irailaren 9an egingo dute, 10:00etan. Ondoren, zerrendak argitaratuko dira. Horietan, inskribatzeko eguna eta ordua zehaztuko dira. Argazkian, hainbat haur tenisean jokatzen Itzubaltzeta / Romoko Gobela kiroldegian / © Getxo.net.
  Kirolak 2010-06-11 19:06

Kosta Trail lasterketaren ibilaldietan izena ematea badago oraindik

Erabiltzailearen aurpegia Ukberri Igande honetan, ekainak 13, egingo dute bosgarren urtez Forum Sport Kosta Trail lasterketa, Uribe Kostan. 31 kilometroko lasterketan izena emateko epea amaitu egin da jada, aurreko edizioekin alderatuta, parte-hartze errekorra lortu ondoren. Familiarteko Ibilaldian (12 kilometro) eta mendiko ibilaldian (20 kilometro) apuntatzeko epea, berriz, bihar arte egongo da zabalik. Bi modalitate horietako edozeinetan izena eman daiteke Forum Sport dendetan edo www.forumsport.com/kostatrail web-orrian. Horretarako, 4 euro ordaindu beharko dira. Gainera, antolatzaileek erraztasunak emango dizkiete parte-hartzaileei garraio publikoa (Metro Bilbao) erabil dezaten, eta anezka-autobusen doako zerbitzua ere jarriko dute haien esku, helmugatik Plentziako metro geltokira arteko ibilbidea egingo duena. Iaz, 1.600 lagun inguruk parte hartu zuten Kosta Trail lasterketan. Argazkian, Uribe Kosta eskualdeko itsaslabar eta hondartzetan barrena, Forum Sport Kosta Trail lasterketaren laugarren edizioa / © Barrika.net.
  Kirolak 2010-06-04 21:29

Irailaren 18ra atzeratu dute Getxoko Rugby Eguna

Erabiltzailearen aurpegia Ukberri Asteburu honetarako aurreikusita zeukan bigarren Rugby Eguna atzeratzeko erabakia hartu du Getxo Artea klubak, antolatzeko zailtasunak direla eta. Izan ere, larunbat honetan, ekainak 5, okupatuta egongo dira Algortako Telletxe plaza eta Zabala eskola. Gauzan horrela, jaialdia irailaren 18rako utzi dute. Bide batez, 2010-2011 denboraldiko taldeak aurkezteko aprobetxatuko dute egun hori. Horretaz aparte, aurtengo denboraldiari amaiera emateko, Bigarren Seven Tokata jardunaldia antolatu dute hilaren 12rako. Algortako Fadura zelaian izango da eta hurbiltzeko gonbitea luzatu diete herritarrei Getxo Rugbykoek. Izan ere, bertan jarritako arauak edonork parte hartzeko modukoak izango dira. Partiden ostean, hirugarren denbora egingo dute garagardotegi batean, denboraldia amaitu egin dela ospatzeko asmoz. Argazkiak, 2009ko apirilaren 3an ospatutako Rugby Eguna / © Getxo Artea Rugby Taldea.
  Kirolak 2010-06-04 20:57

Getxoko bost kirol taldek neska-mutilentzako jarduerak antolatu dituzte udarako

Erabiltzailearen aurpegia Ukberri Getxo Kirolak udal erakundearekin batera, aisiarako eta kirolerako antolatutako jarduerak eskainiko dituzte uda honetan udalerriko bost klubek. Hurrenez hurren, saskibaloia, futbola, errugbia, eskubaloia eta gimnasia erritmikokoa izango dute aukeran gazteek. Orotara, 254 lagunentzako lekua dago. Izan ere, plaza kopurua mugatua da. Alvaro Gonzalez Kirol zinegotziak adierazi duenez, "gogo handiz gabiltza 5 campuseko eskaintza honekin eta gogotsu herritarrei kalitatezko zerbitzua eman ahal izateagatik, umeek zerbait ikas dezaten, jolas dezaten, eta beren gurasoek familiako eta laneko bizitza bateratzeko aukera izan dezaten”. Argazkian, Alvaro Gonzalez Kirol zinegotziak Athleticeko jokalari ohi Rafa Alkorta eta Patxi Ferreirarekin batera aurkeztu ditu gaur jarduerak.
  Kirolak 2010-06-04 20:30

Erandio, Gorliz, Leioa eta Urdulizek ere ateak zabalduko dizkiote kirolari igandean

Erabiltzailearen aurpegia Ukberri Getxo ez ezik, Erandio, Gorliz, Leioa eta Urduliz ere badaude igande honetan, ekainak 6, "Kirolari ateak zabalik" izeneko jardunaldia egingo duten Bizkaiko 35 udalerrien artean. Gauzak horrela, Erandion, 9:00etatik 14:00etara, Altzaga zein Astrabuduako kiroldegietako igerileku eta kantxara sartzea libre izango da. Gorlizen, berriz, futbol partidak, patinaketa, kirolanitzeko puzgarria (boleibol eta saskibaloia) eta surf taula mekanikoa izango dira kiroldegian, 11:00etatik 14:00etara. Ordutegi berean, eskupilota partidak jokatuko dituzte frontoian. Bitartean, Leioan, spinning-a, aikidoa, pilatesa, aquagym-a, igeriketa eta tai-jia egongo dira aukeran Sakonetan. Azkenik, Urdulizen, futbola (09:00-13:00) eta eskubaloia (10:30-13:00) praktikatuko dituzte Iparralde kiroldegian. Argazkian, hainbat mutiko eskupilotan jokatzen / © Getxoko Udala.
  Kirolak 2010-06-03 20:18

"Kirolari ateak zabalik" jaialdia egingo dute igandean Algortako Fadurako kiroldegian

Erabiltzailearen aurpegia Ukberri Igande honetan, ekainaren 6an, Getxo Kirolak udal erakundeak Algortako Fadura kiroldegiko ateak zabalduko ditu, Bizkaiko Foru Aldundiak "Kirolari ateak zabalik" lelopean sustatutako kirol jai horretara hurbildu nahi duten pertsona guztientzat. Jardunaldia 10:30etik 14:30era izango da. Horretan, doako bi ekitaldi antolatu dituzte. Lehenengoa, aerobic ikasteko saioa izango da eta kiroldegiko 3. pilotalekuan egingo dute, 10:30etik 11:30era artean. Ondoren spinning saioa izango da 12:30etik 13:30era. "Kirolari ateak zabalik" jaia Bizkaiko 35 udalerritan egingo da. Alvaro Gonzalez zinegotziak gogoratu duenez, “kirola herritar guztien eskubidea ez ezik, integrazio, hezkuntza eta aisiarako alternatiba osasuntsua ere bihurtzeko helburuarekin, Europako Batasunak abiatutako programaren harira ospatuko da”. Argazkian, Fadura kiroldegia / © Getxoko Udala.
  Kirolak 2010-06-03 17:52

Ekainaren 26an izango da Sopelako lasterketa nudista

Erabiltzailearen aurpegia Ukberri "Patxi Ros Saria" Lasterketa Nudistaren 12. edizioa ekainaren 26an, larunbatarekin, egingo dute Barinatxe hondartzan, Sopela.net agerkari digitalak jakinarazi duenez. Hitzordua eguerdiko 12etan jarri dute. Euskal Naturista Elkarteak (ENE) antolatuta, aurtengo edizioa 5.000 metrokoa izango da helduentzat. Umeek ere parte hartu ahal izango dute. Horrela, nagusiekin batera aterako dira, baina ibilbide laburragoa egin beharko dute. Lasterketa honako sei kategoria hauetan banatuko da: gizonezkoak, emakumeak, beteranoak (40 urtetik gorakoak) eta umeak (14 urtetik beherakoak). Aldi berean, ENEko naturistentzat bi kategoria egongo dira: ginezkoak eta emakumeak (elkarteko kide izatea egiaztatzeko, txartel eguneratua erakutsi beharko da). Izena emateko epea hilaren 24ra arte zabalik egongo da. Horretarako, honako bide hauek erabil daitezke: carreranudista[abildua]ene-naturismo.org posta elektronikoa edo lasterketaren webgunearen bidez. Azkenik, parte-hartzaileek lasterketaren egunean bertan ere izena eman dezakete, goizeko 11:30ak arte, Barinatxe hondartzan. Lasterketan izena ematea eta parte hartzea doakoa dira. Argazkian, iazko lasterketaren irudi bat.
  Kirolak 2010-06-03 16:24

Bihar zortzi Picos de Europara joango dira matrakokideak asteburupasan

Erabiltzailearen aurpegia Ukberri Joseba Sanchez "Matrako" oroitzen duen Plentziako mendi taldeko lagunak Asturiaseko Picos de Europara joango dira hilaren 11tik 13rako asteburuan. Horrenbestez, txangoa ostiralean arratsaldeko 3etan hasteko asmoa daukate eta horretarako Plentziako metro geltokian jarri dute hitzordua. Txangoan parte hartzeko, Goñi Portal kultur etxean izena eman daiteke. Ordutegia 10:00etatik 13:00etara eta 17:00etatik 19:00etara da, eta telefono zenbakia 946 775 541. Argibide gehiago ezagutzeko honako telefonoetara jo daiteke: 667 602 353 eta 629 736 006. Argazkian, Matrako Mendi Taldeko hainbat lagun Txindokin (Gipuzkoa).
  Kirolak 2010-05-28 21:09

Getxoko Kirol Jokoetan parte hartu duten ikastetxeek opariak jasoko dituzte

Erabiltzailearen aurpegia Ukberri Getxoko Kirol Jokoetan parte hartu duten ikastetxeei esker ona emango die bihar Algortako Fadura kiroldegian Udalak. Ekitaldia 13:15ean hasiko da. Maiatzean egindako jokoen helburua udalerriko ikastetxeetako Lehen Hezkuntzako bigarren, laugarren eta seigarren mailetako ume getxoztarren arteko lehiarik gabeko kirol praktika bultzatzea izan da, umeek lehiaketak eskatzen duen presiorik gabe kirol desberdinetan parte hartuz. Joko horietan San Inazio, Andra Mari, Zubilleta, Zabala, Azkorri, Trinitarias, M.D. Pastor eta Larrañazubi ikastetxeetako eta Gobela, Geroa eta San Nikolas ikastoletako 1.150 haurrek hartu dute parte atletismo, herri kirol, igeriketa, saskibaloi, futbol, jolas eta puzgarrietan. Ikastetxe bakoitzak Athleticen elastiko ofizial bat, lehenengo taldeko jokalariren batek sinatuta; Bizkaia Bilbao Basket taldeko entrenamenduetarako elastikoak, oroigarriak eta Unai Basurkoren DVDa jasoko ditu. Yahaira Agirre judoka eta Unai Basurko nabigatzailea ekitaldian izatea aurreikusi dute. Argazkian, Unai Basurko.
  Kirolak 2010-05-26 18:52

Pirritx, Porrotx eta Marimotots pailazoen saio bikoitza izango da Leioan

Erabiltzailearen aurpegia Ukberri Publikoaren aldetik izandako eskari handia dela eta, Leioako Udalak ahalegin berezia egin du Pirritx, Porrotx eta Marimotots pailazoen saio berri bat eskaintzeko herrian, eta horrela ahalik eta leioaztar gehienen eskariari aurre egiteko. Dagoeneko agortuta dauden sarrerak ekainaren 2an, 18:30ean, Kandelazubieta kiroldegian izango den emanaldirako dira. Saio berria, egun berean, baina 16:45ean izango da. Emanaldi horretarako txartelak Kultur Leioako leihatilan baino ezin izango dira euro, 6 eurotan. Atzo jarri zituzten salgai. Horrenbestez, leihatilaren ordutegia ondokoa izango da: gaur, asteazkena, 17:00etatik 21:00etara; eta bihar zein etzi, 11:00etatik 13:00etara. Gehienez, lau sarrera salduko dizkiote pertsona bakoitzari. Honetaz gain, jakin beharrekoa da ez direla sarrerarik gordeko. Argazkian, Porrotx.
  Kirolak 2010-05-26 09:49

Bilboko Nazioarteko Maratoiak erbi sopeloztarrak izango ditu

Erabiltzailearen aurpegia Ukberri Igande honetan, hilak 30, burutuko da Bilboko Nazioarteko Maratoiaren 28. edizioa, Bilbo, Erandio, Leioa eta Getxoko udalerriak zeharkatuko dituela. Krisialdian jokatu arren, probak ohiko ikuskizun mailari eutsi nahi izan dio, Tewodros Zewdu etiopiar ezaguna ekarriz. Gainera, Zewduren presentzia nabarmentzeko erronka bat jarri diote: egun Komen atleta kenyarrak duen lasterketaren marka gainditzea. Hots, maratoia 2 ordu, 16 minutu eta 30 segundo baino arinago egitea. Horretarako, Zewduk Kahfkay Tadele atleta etiopiarraren laguntza izango du lehenengo 21 kilometrotan. Baina ez da erbia izango duen Izan ere, antolakuntzak hiru erritmorako erbiak prestatu ditu. Maratoia bi ordu eta 48 minututan, hiru ordutan eta hiru ordu eta erditan bukatzeko asmoa dutenek errazago izango dute horrela. Bigarren erritmoa markatzeko arduradunak Sopelako Munarri Atletismo Taldeko Michael Gonzalez, Borja Jimeno, Iñaki Palomar, Jose Angel Tres eta Jose Felix Gomez izango dira. Ibilbidean zehar erreleboa emango diote elkarri. Argazkian, Josefa Cruz atleta espainiarra Erandiotik igarotzen 1993ko lasterketan, atzean AHV enpresa duela. Berak irabazi zuen lehenengo edizio hura / © Bilboko Nazioarteko Maratoia.
  Kirolak 2010-05-24 19:36

Ekainaren 13an egingo dute bosgarrenez Forum Sport Kosta Trail lasterketa

Erabiltzailearen aurpegia Ukberri Ekainaren 13an egingo dute bosgarren urtez Forum Sport Kosta Trail lasterketa, Uribe Kostan. Mendi lasterketaren zati bat Sopelatik igaroko da, 10:00etatik 11:30era bitartean, aurreikuspenen arabera. Urtero bezala, mendi eta familiarako martxak Sopelako udaletxetik abiatuko dira, 8:00etatik 9:00etara bitartean. Proba horiek pertsona guztiei zuzenduta daude, "norbere ahalmen fisikoa edonolakoa izanda ere", adierazi dute antolatzaileek. Horretarako hiru aukera egongo dira, lehena itsasertzetik doan 30 kilometroko mendi lasterketa, Getxon hasi eta Plentzian amaituko dena. Bigarrena, 12 kilometroko familia martxa, Sopelan hasi eta Plentzian bukatuko dena. Eta hirugarrena, 20 kilometroko mendi martxa. Azken hori Sopelan hasi, Ermuamendi igo (Gorliz) eta Plentzian amaituko da. Izena emateko epe muga ekainaren 6a izango da. Forum Sport dendetan edota www.forumsport.com webgunean egiteko aukera egongo da. Federatuek 15 euro ordaindu beharko dituzte, eta federatugabeek, berriz, 20 euro. Bestalde, martxetan izena emateko 4 euro ordaindu beharko dira. Argazkian, Uribe Kosta eskualdeko itsaslabar eta hondartzetan barrena, Forum Sport Kosta Trail lasterketaren laugarren edizioa / © Barrika.net.
  Kirolak 2010-05-14 19:19

Armando Ribeiro atezain sopeloztarra agurtuko du bihar San Mamesek

Erabiltzailearen aurpegia Ukberri Bihar, larunbata, Athletic-Deportivo partida jokatuko da San Mameseko katedralean, arratsaldeko 6etatik aurrera. Partida hori izango da Athleticeko lehenengo taldeak jokatuko duen ligako azkena, eta bertan ez du zer galdu edo irabazterik izango, Europarako txartelak aurreko jardunaldian ihes egin baitzuen. Dena den, ez da beste partida bat izango, hainbat jokalariren azken lehia ofiziala izango baita. Horietako bat Armando Ribeiro atezain sopeloztarra izango da. Armandok 2008ko otsailaren 10ean estreinatu zen San Mamesen, Levanteren aurrean ate zurigorria babesteko. Aurretik, bederatzi urtez izan zen Cadizeko atezain titularra, bigarren mailan. Athleticen eman dituen bi urte luzeetan jakin izan du lan ona egiten eta zaleen maitasuna irabazten. Estreinatu eta hilabetera, ordea, Betiseko jarraitzaile batek bi astez lesionatu zuen, burura botila bat jaurti ziola. Iaz, berriz, Lehoi Bihotz saria eman zioten Zallako zaleek. Argazkian, Armando Ribeiro partidaren batean / © Athletic Club.
  Kirolak 2010-05-14 13:50

Bela sustatzeko hitzarmena izenpetu dute Getxoko Udalak eta Unai Basurkok

Erabiltzailearen aurpegia Ukberri Pakea Munduari Itzulia Getxo Bela Kirol Elkartearen eta Getxoko Udalaren arteko lankidetza hitzarmena sinatu zuten atzo aipatu taldeko presidente Unai Basurko itsasgizonak eta Imanol Landa alkateak. Horren arabera, elkarteak konpromisoa hartu du, Abrako uretan estropada bat antolatzeaz gain, hitzaldi programazioarekin jarraitzeko. Nabigazioaren munduarekin zerikusia duten pertsonek eskainiko lituzkete, doan, solasaldi horiek. Udalaren bitartez ere, berak eskaini beharreko bi hitzaldi-solasaldi antolatzeko hitza eman du Unai Basurkok; Velux, Vendee Globe eta Le Figaro estropadetan izandako bizipenak kontatzeko. Horretaz gain, ikastetxe eta ikastolek bisitaldiak egingo dituzte Pakearen basera eta Open 60 Pakea Bizkaia belaontzira, Kirol Portuan. Bestalde, Udalak sustatutako hainbat ekitalditara Unai bera agertuko da. Tokiko erakundeak, gainera, kirol eskaintzan Pakea Munduari Itzulia Getxo Bela Kirol Elkarteak antolatutako ekitaldiak jaso ahal izango ditu. Horren trukean, 6.000 euroko diru laguntza emango dio aipatu kirol taldeari, 2010ko udal aurrekontuaren kontura. Argazkian, Landa eta Basurko atzoko agerraldian.