Kultura 2008-12-26 21:52

Udal Gobernuaren borondatean oinarrituko da Getxoko II Euskara Plana

Erabiltzailearen aurpegia Ukberri Getxo Udaleko Euskara Biziberritzeko II Plan Nagusia aurkeztu du gaur goizean Koldo Iturbe Getxo Udaleko euskara zinegotziak. Plan hori ia amaitzear dagoen 2008tik 2011ra egongo da indarrean eta bertan EBPN zein Getxo Udaleko Administrazioaren Erabilera Plana bilduko dira plangintza bakar batean. Plana pasa den astelehenean onartu zuen Gobernu Batzordeak Udalbatzatik pasatu gabe. Gainera, Iturbek azaldu duenez planaren baitan ez da aurreikusten Euskararen Udal Ordenantza abiatzea. Hortaz, plana betetze aldera Udal Gobernuaren borondatea izango da Getxoko euskaldunek izango duten berme bakarra. Aurreko EBPN, Getxoko Udalaren datuen arabera, %81ean bete zen. Getxoko Udal Administrazioaren kasuan, berriz, lau ekintzetatik bat ez zen burutu (%27). Plan berriak 15 ildo ditu, kulturartekotasun ildoa gehitu ondoren, 81 neurri eta 244 ekimenetan zehazten direnak. Helburu nagusia Euskara Biziberritzeko Plan Nagusiaren helburu nagusia da "euskaraz bizi nahi duten herritarrei horretarako aukerak" eskaintzeko hizkuntza politikak garatzea da, arlo ezberdinetan "euskararen berreskurapen osoa lortzeko euskararen aldeko urratsak areagotzen" diren bitartean. Bada ez bada ere, "gaztelania euskara bezain gurea" duela argitu du euskara zinegotziak. Iturberen arabera, plan honekin "ezagutzatik erabilerara" jauzia egin nahi dute.
  Kultura 2008-12-24 20:38

Astelehenera arte dago maitasun gutunen lehiaketan parte hartzeko aukera Leioan

Erabiltzailearen aurpegia Ukberri Astelehen honetan, abenduak 29, amaituko da epea, Leioako Maitasun Gutunen X. Lehiaketan parte hartzeko. Gutuna literatur generoa da berez. Sentimenduak komunikatzea sustatu eta genero horren aberastasuna berreskuratzeko asmoz, ekimena antolatu du berriro Leioako Udalak. Jakin beharrekoa da, lehiaketa lau kategoria desberdinetan banatuko dela parte hartzaileen adinaren arabera: lehen taldea 18 urte beherakoentzat, bigarrena 19 urtetik 30 urtera bitartekoentzat, hirugarrena 31tik 55 urtera, eta azkena 56 urtetik gorakoentzat. Horrela zehaztu dute lehiaketaren oinarrietan (pdf).
  Kultura 2008-12-24 17:55

Bizkaiko Bertsolari Txapelketaren finala osoaren bideo edota audioak eskuragai daude

Erabiltzailearen aurpegia Ukberri Areetako Berantzagik gaur antolatutako goizeko ekitaldietan, Jone Uriak Olentzerori Barbie bertsolari bat eskatu ondoren, ALBEko gaztetxoek bertsotan azaldu dute bihar goizean ikatza ez jasotzeko estrategia. Horien aburuz, urte osoan zehar ona izan ordez, egin beharrekoa errazagoa da: bertsolariak eskuak urratu arte txalotzea, alegia. UKBERRI.NETek irakurleek ikatza jaso dezaten ez duenez gura, guztion eskura jarri du norberak bere etxean eta nahi duenean, etb3ko gaueko programazioari itxaron beharrik gabe, txaloka orduak emateko aukera. Horretarako, pasa den larunbatean BECen jokatutako Bizkaiko Bertsolari Txapelketaren finala osorik eskaintzen du: ia 200 argazki eta UKBERRI.NETek eta Larrabetzu.org-ek grabatutako audioak moztu eta bertso bakoitzak bere aldetik entzuteko parada ematen du. Gainera, Bizkaiko Bertsolari Elkarteak zabaldutako bideoekin estekak eskaintzen ditu, Xabi Payak orain dela aste batzuk "Berria" egunkarian iradokitzen zuenez, bertsoak ikusteko direlako. Bestalde, zuzenean ere txalo zaparradak emateko aukera izango da gaur eta datozen egunotan. Gaur, 18:00ak aldera Villamonten, Algortako Olentzero batzordearen eskutik San Nikolas ikastolako bertsolariek abestuko dute, gai jartzailea Itxaso Paya izango dela. Etzi, ostirala, berriz, Erandion Euskaraz Berbots! taldeak ohiko bertso-jira egingo du Altzagan zehar, San Jeronimo kaleko La Plaza tabernatik abiatuta, 20:30ean, Amets Arzallus eta Sustrai Colina bertsolariekin. Bestalde, 28an, Inuzente Egunean, Abante! Bilboko konpartsak Onintza Enbeita eta Xabi Paya bera jarriko ditu kantari Zazpi Kaleetatik. Hitzordua goizeko 12etan izango da, Abantegunean, Barrenkale 12n. Argazkian, Fredi BECen egindako saio ona eta zaletu apartak dituela ospatzen.
  Kultura 2008-12-24 17:31

Mundu osoko egunkariak irakur daitezke Areetako liburutegian

Erabiltzailearen aurpegia Ukberri Areetako udal liburutegiak bat egin du Munduko Egunkariak izeneko ekimenarekin, irakurzaletasuna bultzatzeko Eusko Jaurlaritzak antolatutako Liburutegiak Topaleku kanpainaren barruan. Hain zuzen ere, abenduak 18ko Etorkinen Eguna baliatu zuen Imanol Landa alkateak berau aurkezteko. Gauzak horrela, Araba, Bizkaia eta Gipuzkoako beste bost udalerritan bezala, Areetako liburutegian, atzerriko zenbait egunkari inprimatuko dira, 200 egunkariko datu-basetik aukeratuak, Getxoko etorkinen profila kontuan izanik. Asteko egun guztietan herrialde desberdinetako egunkari batzuk egongo dira ikusgai, tamaina errealean; tartean, Kolonbiako “El Colombiano”, Alemaniako “Handelsblatt”, Filipinar Irletako “Sunday Times”, Bolibiako “Los tiempos”, Frantziako “Le monde”, Txinako “Tianjin Ribao”, Peruko “El comercio/La republica”, Marokoko “Aujourd'hui Le Maroc” eta Libanoko “Al Nahar”. Bestalde, aipatu egunean, Eusko Jaurlaritzak banatutako saria eman zion Landa alkateak Olatz Izagirre San Nikolas ikastolako ikasleari. Jaurlaritzak EAEn 12 eta 15 urteko gazteentzat deitutako literatur lehiaketako irabazlea izan da euskarazko bakarkako modalitatean. Sari moduan Ipod bat jaso du. Argazkian, Landa eta Izagirre gaztea.
  Kultura 2008-12-24 17:13

Gabonetako dantza ikastaroa emango dute asteburuan Gobela kiroldegian

Erabiltzailearen aurpegia Ukberri Ostiraletik igandera, Getxodantzan egitasmoaren hirugarren edizioa egingo da Itzubaltzeta / Romoko Gobela kiroldegian. Danza Getxo kultur elkarteak antolatuta, udalerriko eta inguruetako dantzarien eta dantza ikasleen prestakuntzarako egokituta dauden ikastaro bereziak egongo dira aipatu egunetan. Matrikularen prezioa 70 eurokoa izango da espezialitate bakoitzeko (60 euroko Danza Getxo kultur elkarteko eta Getxo Kirolak erakundeko bazkideak diren pertsonentzat), eta 60 eurokoa umeentzako klasikoa espezialitatean. Dantzari interesatuek kasuan kasu egokia izango den diru-sarrera egin behar dute 3084 0059 48 6400015374 kontu zenbakian (Ipar Kutxa), eta sarrera horretan izena eta espezialitatea adierazi behar dituzte. Aurtengo edizioan, Ander Zabala (dantza garaikidea), Elvira de Andres (dantza estilizatua eta flamenkoa), Mercedes Villanueva (klasikoa) eta Clara Perez (jazz lirikoa) izango dira gonbidatutako profesionalak.
  Kultura 2008-12-23 21:03

Olentzero eguna ospatzeko antzezpena egingo dute Gorlizen

Erabiltzailearen aurpegia Ukberri Asteazken honetan, abenduak 24, ehun lagunek baino gehiagok parte hartuko dute Olentzero egunerako prestatutako antzerki saioan. Gauzak horrela, lehenengo zatia, "Jentilak" izenekoa, 17:30etik aurrera egingo dute, Laubideta plazatxoan. Bertan, makil-dantza, txotxongilo dantza, musika eta kantak izango dira. Bigarren zatia, “Herritarrak”, berriz, Jose Antonio Agirre plazatxoan egingo dute. Zapatarien dantza, jorrai dantza, musika, txistua eta kantak ere izango dira bertan. Azkenik, kale nagusitik kalejiran joango dira guztiak, Eliz plazaraino, Olentzerorekin egoteko. Mari Domingik Gorlizko emakumeen zapia eramango du buruan.
  Kultura 2008-12-23 20:41

Zortzi urte beteko ditu bihar Koska irratiak

Erabiltzailearen aurpegia Ukberri Asteazken honetan, abenduak 24, zortzi urte beteko ditu Uribe Kosta eta Erandioko irrati libreak. Hori ospatzeko, Koska irratiko lehenengo saioa (2000-12-24) entzungai izango da, bihar bertan, eta etzi, 10:00etatik aurrera. Arratsaldean ere 17:00etan emitituko dute. Aldi berean, nahi duen guztiak Koskairratia.com webgunean dauka eskuragarri aipatu saioaren audioa (hemen ere entzun daiteke). Bitartean, urte guzti hauetan izandako lagun eta entzule guztiei eskerrik beroenak eman dizkiete Koskako lagunek. Baita urte askotarako izan dadila opa ere. Argazkian, Sopelako Ander Deuna ikastolako DBHko 1. mailako ikasleak 2006kooo udan, Koska irratia ezagutzen.
  Kultura 2008-12-23 20:26

Errege Magoen desfilean parte hartzera gonbidatu ditu herritarrak Sopelako Udalak

Erabiltzailearen aurpegia Ukberri Sopelako Udalak Errege eguneko bezperako (urtarrilak 5, astelehena) desfilean esku hartzeko deia luzatu die herritarrei. Laguntzeko prest dauden gazte, haur zein nagusiek, bi modu dituzte harremanetan jartzeko: 944 065 519 telefono zenbakira deituz edo hall-kulturala[abildua]sopelana.net helbidera idatziz. Hala ere, aurretik badaukate zertaz gozatu sopeloztar guztiek. Bihar bertan, Gabon egunean, Olentzerok bisitatuko du Sopela. Horrenbestez, 17:00etan abiatuko da kalejira Larrabasterrako Urgitxieta plazatik. Iberre zubia, Etxebarri zeharkalea eta Zubigane, Landabe eta Sabino Arana kaleak igaro eta Udaletxeko plazara helduko da. Bertan harrera egingo diote ikazkinari. Argazkian, Errege Magoei harrera iaz.
  Kultura 2008-12-23 19:45

Geldirik dago Getxo Antzoki berria egiteko proiektua

Erabiltzailearen aurpegia Ukberri Getxoko PPk eta PSE-EEk gaurko udal batzarrean emandako botoek Algortako Getxo Antzokia, musika eskola eta San Nikolaseko aparkaleku eta plaza berriak egiteko proiektua etenarazi dute. Popularrek eta sozialistek ezetz esan diote Getxo Antzokiaren indusketa lanen lehen fasea egitea onartzeko proposamenari, eta hortaz, fase horretako lanak emateko espedientea zabaltzeko prozesua gelditu dute. Proiektu horretarako, Espainiako Gobernuak onartutako 2.000.000 euroko diru-laguntza "galtzeko arriskua" ere badago, udal agintarien arabera. Erabaki horrek ekarriko du, Joseba Arregi Hirigintza zinegotzi jelkideak azaldu duenez, 8.000.000 euroko aurrekontua eta lanak amaitzeko 22 hilabeteko epea duen proiektu honen fase hori urtebetez atzeratzea. Getxo Antzokiaren indusketa lanen lehen fasea egiteko proiektua agintzeko egindako espedienteak “segurtasun juridiko eza” sortarazten diela adierazi dute oposizioko bi alderdi nagusiek. Argazkian, gaur egin dute urteko azken udal batzarra Getxon.
  Kultura 2008-12-23 17:57

Bihar bueltatuko da Leioara Olentzero

Erabiltzailearen aurpegia Ukberri Leioako Udalak Gabonetarako antolatutako ekitaldien artean, gaur bertan, adin guztietarako ipuin kontalaria izango da, 18:00etatik aurrera, Kultur Leioan. Txarteldegia ordu bete lehenago zabalduko dute eta euro batean egongo dira sarrerak. Ordu berean, 18:00etan, gaztaina erreak banatuko dituzte Boulevardean eta Euskal Etxeen plazan, doan. Abenduaren 24an, biharko Gabon egunean, Elexalde errotatik abiatuko da, 17:00etan, Olentzeroren kalejira. Boulevard, Sabino Arana, Luis Bilbao Libano, Euskal Etxeen plaza, Boulevard berriro eta Errekalde plazatik igaro ostean, 18:30ak aldera iritsiko da Kultur Leioara. Bertan, liburuak eta opariak banatuko dizkiete txikienei. Txopoeta eta Lamiako arteko bidea ere 17:00etan abiatuta egingo du Olentzerok. Azkenik, 17:15ean irtengo da Itzubaltzeta / Romoko San Jose elizatik, Pinueta auzorako kalejira. Bitartean, bihar arte izango dute Olentzerori gutuna emateko aukera neska-mutilek, horretarako postontzia jarri baitute Kultur Leioan. Argazkian, ostiralean ere egon zen Leioan Olentzero, Mari Domingirekin batera, bertoko kultura topaguneak konbentzituta.
  Kultura 2008-12-23 15:12

Bi euskara plan onartu ditu Getxoko Udal Gobernuak

Erabiltzailearen aurpegia Ukberri Getxoko Udaleko Tokiko Gobernu Batzak, Udal Gobernu Taldea, bi euskara plan onartu ditu aste honetan, eta ostiralean aurkeztuko ditu, prentsaurrean. Onartutako egitasmoak Euskara Biziberritzeko II Plan Nagusia eta Getxoko Udalaren Erabilera Plana dira. Biak ala biak, Getxoko Udalbatzatik igaro gabe onartu dituzte, aurreko planak ez bezala. Izan ere, II EBPN plana 2003an hasi eta 2007ra arte luzatu zen Getxoko I EBPNren jarraipena da. 2008ko otsailaren 14an, Getxoko Udalak, Bizkaiko Foru Aldundiak eta Eusko Jaurlaritzak batera aurkeztu zuten 2008tik 2011ra indarrean izango litzatekeen bigarren planaren zirriborroa Algortan, helburua "euskaraz bizi nahi duten herritarrei horretarako aukerak eskaintzeko behar diren hizkuntza-politikako neurriak erabaki eta bultzatzea" zuela. PPk eta PSE-EEk plana onartzeko asmorik ez zuela adierazi zuten publikoki eta EHEk ere kritikatu zuen. Argazkian, Imanol Landa alkatea eta Koldo Iturbe euskara zinegotzia, Miren Dobaran BFAren euskara arduradunarekin eta Lakuako ordezkariarekin batera otsailean.
  Kultura 2008-12-23 14:32

"Matraka" gazte astekaria paperean argitaratzeari utziko diote

Erabiltzailearen aurpegia Ukberri "Matraka" gazte aldizkariak, "Berria" egunkariaren asteazkeneko gehigarria dena, bere 163. zenbakia argitaratuko du bihar. Hortik aurrera ez da gehiagorik izango paperezko edizioa, nahiz eta Interneten matraka.info webgunea elikatzen jarraituko duten. Horrela jakinarazi du gaur Joanmari Larrarte Euskarazko Komunikazio Taldea SAren kontseilari ordezkariak gaur "Berria" egunkarian. Larrartek adierazi duenez, "Berria"k iaz baino emaitza kaskarragoak izan ditu kioskoko salmentan zein publizitate aldetik eta taldea orekatu duten enpresak banaketa eta aholkularitza zerbitzuenak izan dira. Dena den, "EKTn badakigu krisi garaian gaudela -badakigu, era berean, ia-ia etengabeko krisia dela euskarazko hedabideok duguna-, baina ziur gaude gauza izango garela zailtasun hauei ere aurre egin eta etorkizunari behar bezain sendo eusteko". Argazkian, Itxaso Payaren kolaborazioa, paperean agertzen dena, matraka.info-n barneratuko denetz ikusteko dago, orain arte ez baitzuten elektronikoki argitaratzen.
  Kultura 2008-12-22 19:10

Altzaga eta Erandio Landa bisitatuko ditu bihar Olentzerok

Erabiltzailearen aurpegia Ukberri Asteburuan Goiherri, Arriaga, Kukularra eta Lutxanan egin bezala, astearte honetan, Erandioko beste hainbat auzo bisitatuko ditu Olentzerok. Kilkirtxu elkarteak egindako deiari erantzunez, Altzagan izango da ikazkin zaharra, 17:30ean. Jakina denez, denbora berean hainbat lekutan egoteko kapaz ere bada Olentzero. Gauzak horrela, Erandio Landan zehar ere ibiliko da bihar arratsaldean. Izan ere, 18:00etan abiatzekoa da Goi-alde dantza taldeak antolatutako kalejira. Aipatu dutenez, gabon kantak ere abestuko dituzte. 20:00etan, berriz, “Las pantomimas de Kutxo” antzezlana ikusteko aukera edukiko dute txikiek, Goikolanda ikastetxean. Abenduaren 24an, Gabon egunean, Fanon, Altzagan (18:00etan, Irailaren 23a plazatik abiatuta) eta Astrabuduan (18:30ean, Ignazio Aldekoatik abiatuta) izango dira kalejirak.
  Kultura 2008-12-22 17:40

Hiru egunez ibiliko da Getxo udalerritik Olentzero

Erabiltzailearen aurpegia Ukberri Olentzeroren etorrera ospatzeko, urtero bezala, ekitaldi ugari antolatu dituzte Horra, horra, Algortako Olentzero Batzordeak; Areetako Berantzagi dantza taldeak; Getxoko Itxas Argiak; eta Itzubaltzeta / Romoko Zasi Eskola, Ziztu Bizian aisialdi taldea eta Pinueta ere hartzen duen jai batzordeak; Getxoko Udalarekin elkarlanean. Gauzak horrela, abenduaren 22tik 24ra arte luzatuko dira ospakizunak. Gaur bertan, beraz, Gabonetako Kantaldia izango da Algortako Satistegi kafetegian, 20:00etan hasita, eta sarrera dohainik. Bertan Bermeoko Guruzne Ariztegik eta Maitene Ruizek, Ugaoko eta Bilboko Iraide Bilbaok eta Eneko Martinezek eta Galdakao eta Bediako Estibaliz Asuak eta Iñigo Hernandok osatutako bikoteek euskal abestien aukeraketa eskainiko dute. Bitartean, Areetako Eskoletako plazan, “Egipton gertatuak” ikuskizuna eskainiko dute Potxin eta Patxin pailazoek, 19:00etatik aurrera. Argazkian, Olentzero erretzen Algortako San Nikolas plazan / Joseba Zubiaurre.
  Kultura 2008-12-21 18:10

BECeko finala eta Punta Galeako surf txapelketaz arituko da bihar Koska irratia

Erabiltzailearen aurpegia Ukberri Bihar, astelehena, "Ukberri magazina"ren saio berezia eskainiko du Koska irratiak, Uribe Kostako irrati librea, goizeko 12etatik aurrera. FMk 108.0 dialean, larunbat honetan Bizkaiko Bertsolari Txapelketak emandakoaren berri eman eta horren gaineko hausnarketa egingo dute Koskako esatariek hainbat kolaboratzaileen laguntzarekin, protagonismo berezia emanez Elortzaren garaipenari zein eskualdeko bertsolariek jokatutako paperari. Hortaz, bai Xabi eta Fredi Payak izandako buruz burukoa zein bakarka eta ofizioka egindako lanak entzungai izango ditu bertsozaleak. Bestalde, bertsolaritza ez da irratsaioak izango duen gai bakarra. Behin eta berriro atzeratzen ibili den Punta Galea Surf Txapelketaz ere mintzatuko dira, bertan lehiakide den David Bustamante “Zumo” surflari sopeloztarra elkarrizketatuz. Bera Jaitsiera onenaren atalaren irabazlea izan da. Entzuleek ere zuzenean parte hartu ahal izango dute 944 913 994 zenbakira hots eginez. BECeko argazki gehiago hemen sakatuz ikus daiteke.