Kultura 2008-12-11 18:38

Ogi bila joaterakoan ere euskara erabiltzea gura du Getxo Udalak

Erabiltzailearen aurpegia Ukberri Getxoko Udaleko Euskara Zerbitzuak eguneroko erosketak euskaraz egitea sustatzeko ekintza berriak abian jarriko ditu datorren asteotan, Euskara Merkataritzara egitasmoaren barruan. Besteak beste, okindegiei zuzendutako kanpaina antolatu dute. Koldo Iturbe Euskara zinegotziak gaur azaldu duenez, ekimenak "saltzaileengan zein bezeroengan izan nahi du eragina”. Horretarako, okinen esku honako elementu hauek jarriko ditu Udalak: batetik 23 ogi mota ezberdinen izenak euskaraz erakusten dituzten posterrak, txarteltxoak eta eskuorriak egongo dira okindegietan. Bestalde, ogia euskaraz erosten dutenei oihalezko poltsa oparituko diete. Guztira, mila poltsa atera ditu Udalak eta, horiek berrerabilgarriak izanda, ingurumenari ere onura egingo dio ekimenak, Iturberen hitzetan. Urrian, berriz, herritar euskaldunen artean, errekaduak apuntatzeko libretatxoak banatuko dituzte harategi, arrandegi, fruta eta barazki denda eta okindegietan. Argazkian, Koldo Iturbe Euskara zinegotzia ogi poltsa eskuan.
  Kultura 2008-12-11 15:03

Euskal azoka egingo dute larunbatean Itzubaltzetan

Erabiltzailearen aurpegia Ukberri Erromo eta Pinuetako Jai Batzordeak antolatuta, Gurulako Azoka, edo "gura dogulako" azoka, izango da larunbat honetan, abenduak 13, Getxo udalerriko Itzubaltzeta / Romo herrian. Aurten estreinatuko den ekimen berri hori goizeko 10etan abiatuko da, txupinazoaren ostean. Une horretatik aurrera, Bizkaiko txakolina eta Errioxako ardoa dastatzeko zein erosteko aukera izango da. Era berean, artisauen produktuak ezagutu eta erosteko parada izango da Santa Eugeniako plazaren pean dagoen karparen barruan jarriko diren dozenaka saltokietan. Jai eta baserri giroan, bertako jakiek protagonismoa hartuko dute, taloak, euskal gozogintza eta eusko labeldun bildotsa nagusiki. Azoka Bizkaiko Txakolina arautzeko kontseiluak eta BBK-k laguntzen dute. Bestalde, larunbatean ere baina gauean Itzubaltzeta gaztetxeak kontzertua eskainiko du bere aretoan. Irudian, jai batzordeak plazaratutako kartela.
  Kultura 2008-12-11 13:54

Igandean egingo dute Leioako Nekazaritza eta Abeltzaintza Azoka

Erabiltzailearen aurpegia Ukberri Igande honetan, baserri giroan murgilduko da Leioako erdigunea, bertan egingo baita Nekazaritza eta Abeltzaintza XXI. Azoka. Guztira nekazaritzako 114 erakustoki izango dira kalean, eta 25 abeltzainek 80 abelburu aurkeztuko dituzte. Berrikuntza modura eta, Bizkaian lehendabiziko aldiz, aurten, Mungialde zein Txorierriko indabak dastatuko ahal izango dira. Goizeko 10:00etan zabalduko dute azoka. Horrekin batera, 11:00etatik 15:00etara, hainbat ekintza izango dira Errekalde plazan txiki zein handien gozamenerako. Besteak beste, trikitilariak, haurrentzako talo eta txalaparta tailerrak, poneyak eta herri kirolen erakustaldia egongo dira bertan. Abereak, berriz, banatuta egongo dira herriko hainbat tokitan zehar. Errekalde plazan zaldiak, ahuntzak eta hegaztiak izango dira; eta Boulevardean, behia eta idiak. Bestetik, produktuen dastatzea, salmenta eta erakusketa hainbat txokotan izango da: Jose Ramon Aketxe plazan, Boulevardean eta Errekalde plazan, hurrenez hurren. Leioa Kirol Zaleak taldeko kide Guillermo Bilbaok adierazi zuen bezala, aurtengo abelburu ikusgarriena 1.300 kilo inguru dituen zezena izango da. Animalia Sopuertako abeltzain batena da eta aurten Zamudioko lehiaketako irabazlea suertatu da. Azkenik, nekazal tresneriaren erakusketa eta produktu ugarien salmenta zein dastatzea izango dira. Horien artean, pateak, txerrikiak, ogia, eztia, ortuariak, landareak, txakolina, sagardoa eta gazta. Argazkian, azoka iragartzeko kartela.
  Kultura 2008-12-11 13:34

Sopelako Presoen aldeko bertso-saioa bertan behera utzi dute

Erabiltzailearen aurpegia Ukberri Sopelako Mikelats herriko tabernak antolatuta, gaur, osteguna, arratsaldeko 20:30ean tabernan bertan egitekoa zen bertso saioa bertan behera gelditu da. Antolatzaileek jakinarazi dutenez, azken atxiloketen aurkako Algortako mobilizaziora joaten erraztea izan dute xede aipatu neurri hori hartu dutenean. Dena den, ez dute argitu saioa beste egunen batean egingo den ala ez. Ekimena Mikelats elkarteak antolatutako kultur ostegunen karietara zetorren eta beratn Fredi Paya, Arrate Illaro eta Josu Landeta eskualdeko bertsolariak abestekoak ziren, presoen aldeko bertso-saio horretan. Fredi Payak bere Bizkaiko Bertsolari Txapelketako bosgarren finalari aurre egingo dio datorren hilaren 20an. Illarok, berriz, Euskal Herriko eskolarteko txapelketa irabazi zuen 2006an eta aurten Ipar Uribeko txapela jantzi du, baita Bizkaiko txapelketan estreinatu ere. Josu Landeta, berriz, eskarmentu handia dauka ALBEn zein Bertsozale elkartean irakasle gisa, eta hobeto moldatzen da taberna eta plaza giroan txapelketetan baino. Fredi Payak gaur Koska irratian azaldu duenez, "guztiok ezagutzen ditugun arrazoiengatik ez dira une hoberenak burua bertsoak egiten jartzeko ezta umorerako ere". Argazkian, Fredi Paya Gernika-Lumoko saioan, Iratxe Ibarrarekin batera.
  Kultura 2008-12-11 13:21

Sopelako Olentzeroren postal lehiaketak irabazleak baditu

Erabiltzailearen aurpegia Ukberri Sopelako Udalak antolatutako Olentzeroren posta txartelen lehiaketak arrakasta handia izan du, tokiko iturrien arabera. Orotara 8 eta 12 urte bitarteko 110 haurrek parte hartu dute, 46 mutilek eta 64 neskek, hurrenez hurren. Gehienak sopeloztarrak dira, baina Urduliz, Plentzia, Barrika, Getxo, Gorliz, Lemoiz, Berango, Erandio edota Leioatik ere izan da parte hartzailerik. Gauzak horrela, Olentzero batzordeak "lan oso zaila" izan du irabazlea aukeratzeko, "posta txartelen aniztasuna, kalitatea eta berezitasunak direla-eta", udal arduradunek nabarmendu dutenez. Hiru finalista aukeratu dira. Horien artean, Ane Saitua Esesumaga, 12 urteko sopeloztarra izan da 2008ko posta txartelen lehiaketako irabazlea. Bigarren postua 9 urteko Ane Garcia Elorriega barrikoztarrak eskuratu du. Azkenik, 8 urteko Garazi Eleizalde Urrutia, Sopelakoa hori ere, izan da hirugarren. Aurkeztutako postal guztiak udaletxeko sotoan egongo dira ikusgai, abenduaren 15etik 31ra bitartean. Sari banaketa, berriz, abenduaren 24ean egingo da, Olentzerori harrera egin ostean, udaletxeko plazan. Argazkian, irabazleak euren marrazkiekin eskuetan.
  Kultura 2008-12-10 23:24

Presoen aldeko bertso-saioa egingo dute bihar Sopelan

Erabiltzailearen aurpegia Ukberri Sopelako Mikelats herriko tabernak antolatuta, bihar, osteguna, arratsaldeko 20:30ean maila handiko bertso saioa izango da tabernan bertan. Elkarte horrek antolatutako kultur ostegunen karietara Fredi Paya, Arrate Illaro eta Josu Landeta eskualdeko bertsolariak abestuko dute, presoen aldeko ekimene horretan. Fredi Payak bere Bizkaiko Bertsolari Txapelketako bosgarren finalari aurre egingo dio datorren hilaren 20an. Payak orain arte lortu duen sailkapenik onena 3. izan da, baina aurten hor dauka eskura txapela, hura lortzeko azken hiru txapeldunak, tartean Xabi anaia, eta beste lau bertsolari garaitu behar baditu ere. Illarok, berriz, Euskal Herriko eskolarteko txapelketa irabazi zuen 2006an eta aurten Ipar Uribeko txapela jantzi du. Josu Landeta, berriz, eskarmentu handia dauka ALBEn zein Bertsozale elkartean irakasle gisa, eta hobeto moldatzen da taberna eta plaza giroan txapelketetan baino. Horretaz guztiorretaz hitz egingo du Fredi Payak Koska irratiko "Ukberri magazinean" bihar, osteguna, goizeko 12etatik aurrera. Argazkian, Fredi Paya Gernika-Lumoko saioan, Iratxe Ibarrarekin batera.
  Kultura 2008-12-09 16:35

Antzinako irudiak "Fotorretro" erakusketan ikusgai daude Itzubaltzetan

Erabiltzailearen aurpegia Ukberri “Fotorretro Getxo 2008” argazki erakusketa abiatuko da gaur, asteartea, Itzubaltzeta / Romoko Santa Eugenia plazan. "Fotorretro"n, 300 bat argazki egongo dira ikusgai, San Nikolas Liburutegiko bildumatik hartuak. Erakusketa herri horretan izango da abenduaren 14ra arte. Hurrengo egunetik aurrera eta urtarrilaren 9ra arte, berriz, Areetako Xake plaza eramango du Getxoko Kultur Etxeak. Hain zuzen ere, erakunde horretako arduradunek zabaldu dutenez, "erakusketan bisitariak Getxo eta getxotarrak aro ezberdinetan ezagutuko ditu: XX. mendeko lehen urteetatik egunera arte". Bertan, Getxoko argazkien artxiboan partikularrek eginiko ekarpenak eta dohaintzak daude. Nahi duenak San Nikolas Plazako liburutegian eman ditzake argazkiak. Bertan, kopia digitalizatua egingo dugu eta originala itzuliko dizugu. Argazki-artxiboa, sortu zenetik, apurka-apurka hazi da. Gaur egun milaka argazkiak dauzka. Getxotarren laguntza ezinbestekoa da erakusketako argazkietan ageri diren pertsonak eta lekuak identifikatzeko. Horretarako, erakusketan koaderno bat jarriko dugu. Bertan, jendeak informazioa eman dezake, datak zehaztu, pertsonak identifikatu, eta abar. Argazkian, andra batzuk erakusketa ikusten pasa den irailean Algortako Telletxe kalean.
  Kultura 2008-12-09 14:59

"Latxaga" euskalkien aldeko hizkuntzalaria hil da

Erabiltzailearen aurpegia Ukberri Jose Maria San Sebastian "Latxaga" hizkuntzalaria pasa den ostiralean hil zen Donostian, gaur "Berria" egunkariak zabaldu duenez. San Sebastian euskalkien alde eta euskara batuaren aurka dagoen Euskerazaintza akademiako kidea zen eta euskaraz gain espainolez, frantsesez eta ingelesez 600 artikulu eta 18 liburu idatzi zituen. "Latxaga", Donostian jaio zen 1933an eta txikitan eraman zuten Berara gurasoek Berara. Inguru horretan sortu zitzaizkion euskararekiko amaitasuna eta prentsan idazteko erabakia. "Goiz Argi", "Zeruko Argia", "Herria", "Principe de Viana" eta "Diario de Navarra" komunikabideek argitaratu zituzten bere artikuluak. San Sebastian, hizkuntzalaria eta idazlea izatearekin batera apaiza sartu zen, Sorbona unibertsitatean Teologia, Antropologia eta Hizkuntzalaritza doktoregoak egin ondoren eta hainbat urtez New Yorken bizi aurretik. Bere lanaren zatirik handiena euskara galdu den lekuen ingurukoa izan zen, eta "Argia" astekariari 2001ean aitortu zionez, "Errioxa euskalduntzea izan da nire maitasun ezkutua". Argazkia: euskaraz.org.
  Kultura 2008-12-09 14:40

Bertsotan aitzindariak izan diren emakumeak sarituko dituzte igandeko Ahobien Galan

Erabiltzailearen aurpegia Ukberri Algortako Bertsolari Eskolaren (ALBE) eskutik, igande honetan, abenduak 14, izango da IX. Ahobien Gala, Areetako Andres Isasi Musika Eskolan. Jaialdian euren bizitzan bertsolaritza sustatu dutenak saritu ohi dituzte. Gauzak horrela, aurten, bertsotan aitzindariak izan diren hainbat emakumeri emango diete Ahobi saria: Kristina Mardaras, Bizkaitik; Arantzazu Loidi, Gipuzkoatik; Oihane Perea, Arabatik; Estitxu Arozena, Nafarroatik; eta Nagore Fernandez, Ipar Euskal Herritik, hurrenez hurren. Ekitaldirako prestatutako bertso-saioa ere ez da makala. Andoni Egaña, Igor Elortza, Jon Maia eta Maialen Lujanbio arituko dira nor baino gehiago. Horretaz gain, lunch-a, bideo emanaldia eta eskolako gazteek prestatu duten "ikuskizuna" ere izango dira 19:00etatik aurrera, sarrera doan. Argazkian, Ahobi saria.
  Kultura 2008-12-08 19:09

Haur eskola izango du Sopelak

Erabiltzailearen aurpegia Ukberri Sopelako Udalak azaroaren 27ko osoko bilkuran onartu zuen Haurreskolak partzuergoa eratzea. Egitasmoa Eusko Jaurlaritzaren eta tokiko erakundearen arteko lankidetza hitzarmenaren baitan dago. Gauzak horrela, Sopelako haur-eskola Zaldu sektorean egongo da, irakaskuntzarako mugatuta dagoen eremuaren barruan eta 550 metro koadroko azalera beteko du denera. Horrek oraindik urte bete egin ez duten 32 haurrentzako eta urte bat baino gehiago duten 52 umeentzako tokia izango du. Bestalde, Zipiriñe eskola publikoak hartuko ditu 2 urtetik gorako neska-mutilak. Hizkuntza ereduari dagokionez, D eredua jarraituko du. Halaber, bereizitako 8 gune izango ditu: erabilera anitzetarako gunea, jolaserako gunea, jatekoa prestatzeko beharrezkoa den hornikuntza duen esparrua, zuzendaritza eta idazkaritza bulegoa, langileentzako komuna eta aldagela, biltegia, zirkulazio eta sarbide zonaldeak, eta azkenik, kanpoko jolastokia, hurrenez hurren. Argazkian, hainbat ume haur-eskolan.
  Kultura 2008-12-08 15:58

Aurten 8.500 bisitari inguru izan dira Getxoarten

Erabiltzailearen aurpegia Ukberri Getxoko Kultur Etxeak jakinarazi duenez, 8.500 bat bisitari izan dira Getxoko Arte Berrien Aretoan. Erakusketa gaur bertan amaituko da, parte hartu duten 57 artista gazteren lanak lau egunez erakutsi eta gero. Artistak, galerietako arduradunak eta artearen hainbat profesional bildu dira arte berrien topagune bilakatu den erakusketa horretan. "Originaltasuna, freskotasuna eta ausardia" izan dira parte hartzaileen lanen ezaugarri nagusiak. Halaber, "aurten ere konfirmatu da erakutsitako obren kalitatea gora doala eta gaur egungo artearen joerak jarraitzen dituztela", tokiko kultur iturrien arabera. Lanen aberastasunaz, hetereogeneotasunaz eta bitxitasunaz gain, artista gazteek erakutsi dute erakustokien lekua eta beren eskura izan dituzten baliabideak ondo aprobetxatzen dakitela, ahalik eta itxurarik erakargarriena lortzeko. Honek adierazten du partaideen profesionaltasun maila handia dela, nahiz eta artisten batezbesteko adina 21 eta 25 urte artekoa izan. Horietako askorentzat publikoaren aurrean beren lanak erakutsi dituzten lehenengo aldia izan da. Argazkian, aurtengo Getxoarten parte hartu duten artistak.
  Kultura 2008-12-08 01:45

Xabi eta Fredi Paya izango dira BECen Itzubaltzetan durangarrak nagusitu arren

Erabiltzailearen aurpegia Ukberri Xabi eta Fredi Paya algortarrak Bizkaiko Bertsolari Txapelketako finalean izango dira datorren abenduaren 20an Barakaldoko BECen. Izan ere, atzo jokatu zen Itzubaltzeta / Romoko Santa Eugenia plazan hirugarren eta azken finalaurrekoa eta finalean egongo diren zortzi bertsolariak finkatuta gelditu ziren. Atzoko saioa Unai Iturriagak irabazi zuen 575,5 punturekin. Bere atzean, Igor Elortza (563,5), Xabi Paya (551) eta Etxahun Lekue (529) sailkatu ziren finalerako. Gorka Ostolaza "Potxis" (500) eta Eñaut Intxaurragarentzat (492), berriz, Itzubaltzetan bukatu zen txapelketa. Finalisten zerrenda Arkaitz Estiballes, Iratxe Ibarra, Fredi Paya eta Onintza Enbeitak osatuko dute. Estiballes Gernika-Lumon nagusitu zen eta Ibarra, berriz, Markina-Xemeinen. Fredi Payak 524,5 puntu eskuratu zituen Gernikan eta Onintza Enbeitak 514 Markinan. Saio ona eta beroa izan zen atzokoa, 1.200 bat ikuslek lehenengo unetik batari zein besteari animo pila eman eta txalo zaparradak jo zizkiola, bertso ale ederrak jaso zutela erantzunean. Bertsolariek Mikel Laboa omendu zuten, Igor Elortzak propio "Izarren hautsa" kanta bertso doinu bihurtu zuela. Bestalde, abenduaren 20an ez ezik hilaren 13an ere BECera jaotera deitu zuten, "Euskaraz Bai" Kontseiluaren ekitaldira. Argazkian, Unai Iturriaga eta Xabi Paya, pentsakor.
  Kultura 2008-12-06 21:18

Durangoko Azokan eta Bilbon ere eskura daitezke Euskaraz Bai ekitaldirako sarrerak

Erabiltzailearen aurpegia Ukberri Euskararen Gizarte Erakundeen Kontseiluak abenduaren 13an BEC-eko Bizkaia Arenan gauzatuko duen ekitaldira joateko deia luzatuko du Durangoko Azokan, azken asteotan Uribe Kostan, Erandion eta beste hainbat herri eta hiritan egin duen moduan. "Euskaltzaleontzat galdu ezinezko zita izango da BECekoa, benetako mugarria", adierazi dute Kontseiluko kideek. Horrela, gaur, abenduak 6, euskalgintzaren nazio elkargune hori sortu zeneko 11. urteurrena bete den egunean, beren konpromisoa berretsi eta euskararen aldeko lanean "pauso bat harago" joateko eskatuko die Kontseiluak herritarrei Durangoko Liburu eta Disko Azokaren baitan. Agerraldia 13:00etan egin dute, Landakon, "Pauso bat harago, Euskaraz bai" goiburupean. Bertan, euskalgintzako ordezkariek eta herritarrek hilaren 13an BEC-era joateko deia luzatu dute. Horretarako, oraindik doako sarrera eskuratu ez dutenentzat hainbat aukera zabaldu dituzte. Durangoko azokan bertan, "Berria" eta EHEren saltokietan har daitezke, baita Bilboko Elkar Megadendetan ere. Eskualdean, berriz, Getxo udalerriko Euskal Herrian Euskaraz taldeak hurbilduko dizkie egun hauetan Durango eta Bilbotik igarotzeko aukera ez dutenei. Eskaerak guehe[abildua]euskalerria.org posta elektronikoan egin daitezke.
  Kultura 2008-12-05 18:26

Guztira 24 gaztek parte hartuko dute gaur Izarren Distira galan

Erabiltzailearen aurpegia Ukberri Sei taldetan banatuta, 24 gaztek parte hartuko dute gaur iluntzean, 19:30etik aurrera, Areetako Andres Isasi Musika Eskolan izango den "Izarren Distira. Egin dakizuna!" galan, Getxoko Udaleko Euskara zerbitzuak antolatutako Euskal Kulturaren X. Jardunaldien barruan. Neska-mutilak 13 eta 18 urte artekoak dira eta, talentu ikuskizun horretan, bi taldek bertso-antzerki ikuskizuna eskainiko dute; beste bi taldek abestu egingo dute; beste kantari bat ere izango da eta azken bi taldeek abestu eta musika joko dute. Nerea Alias aurkezle ezagunak gidatuko du gala eta besteak beste, Lain bikotea izango da. Epaimahaikideen artean Xabier Paya bertsolari algortarra izango da. Lehenengo sarituek ikas-bidaiarako 1.000 euroko diru-laguntza edo 6 pertsonentzako abentura asteburu baten artean aukeratu ahal izango dute. Bigarrenek San Mamesen futbol partida bat ikusteko 6 sarrera jasoko dituzte. Ekitaldi berean, “Baduzu ametsik?” lelopeko SMS eta bideo lehiaketaren sariak ere banatuko dira. Argazkian, igandean izango diren Txirri, Mirri eta Txiribiton junior pailazoak.
  Kultura 2008-12-05 17:55

"Hor al zaude?" antzezlana eskainiko dute gaur Kultur Leioan

Erabiltzailearen aurpegia Ukberri Aurtengo Udagoieneko Ostera kultur zirkuitu arrakastatsuaren hurrengo eta azken geltokia Leioa izanik, Uribe Kosta eta Erandioko euskaldun zein euskaldun berriak "Hor al zaude?" antzezlana ikustera gonbidatu ditu Topagunea Euskara Elkarteen Federazioak. Izan ere, gaur bertan, abenduak 5, Asier Hormaza aktore algortarra eta Ainhoa Aierbe izango dira Kultur Leioa auditorioan, Joseba Apaolazaren gidaritzapean. Umorea eta fantasia lagun, bikote baten elkarbizitzan agertzen diren mamuak, ezbaiak eta beldurrak taularatuko ditu "Hor al zaude?" lanak. "Bi aktoreak eszenatokiaren jaun eta jabe bihurtzen dira, mamuen munduan murgiltzen gaituzte, hirugarren bat dagoela sinestaraziz", antolatzaileek azaldu dutenez. Saioa 20:00etan hasiko da eta sarrerak 6 eurotan egongo dira (bertan zein BBKren orotariko kutxazainetan). Argazkian, Aierbe eta Hormaza taula gainean.