Gazteok 2009-01-07 14:39

Plentziako lehenengo inauteri tematikoek etxebizitza eskubidea izango dute oinarri

Erabiltzailearen aurpegia Ukberri Plentziako Gazte Asanbladak deituta, abenduaren 30ean gazte herri batzarra egin zuten Uribe Kostako itsas-hiri-bildu horretan. Batetik, gazte asanbladari babesa eman zioten bildutako neska-mutilek, "lanean eta gazteon eskubideen defentsan" jarrai dezan. Bestalde, bi gaien inguruan ados agertu ziren gazteak: jai herrikoien antolaketa eta etxebizitza duinaren aldeko borroka. Hain zuzen ere, bi horiek izango dira eskuartean daukaten ekimenaren ardatzak. Otsailaren 28rako, larunbatarekin, Plentziako lehenengo inauteri tematikoak ospatuko dituzte Jai Alai pilotalekuan, eta etxebizitza eskubidea izango da ospakizunen oinarria. Eguerdiko 12etan hasita, herri poteoa, bazkaria, Euskaraokea, kalejira, kontzertuak eta gaupasa izango dira. Argazkian, gazte herri batzarrean bildutako lagunak / Gaztesarea.
  Gazteok 2008-12-18 19:00

Gazte herri batzarra egingo dute Plentzian hilaren 30ean

Erabiltzailearen aurpegia Ukberri Plentziako Gazte Asanbladak deituta, abenduaren 30ean, asteartea, gazte herri batzarra egingo dute Uribe Kostako itsas-hiri-bildu horretan. Plentziako gazte guztiak bildu nahi duen bileran, besteak beste, datorren urteko Aratusteak edo Inauteriak eta herriko jaien antolaketaz hitz egingo da. Horretaz gain, "Gazteak batu, herria aldatu!" izeneko ekimenaz ere mintzatuko dira, baita norberak eraman nahi dituen proposamen eta iradokizunez ere. Batzarra arratsaldeko 7etan egingo dute, Astilleron, udaletxeko atarian. "Gazteak batu, herria aldatu!" ekimena azaroaren 8an udaletxean bertan aurkeztu zuten gazteek. Egindako lana aurkezteko, "eta batez ere gaztetxea aldarrikatzeko, bertan gaztetxe proiektu bat aurkeztu baitzen" baliatu zuten ekitaldia gazteek, haien hitzetan. Udal Gobernuaren "erantzuna lehen bait lehen espero" bazuten ere, "ezezkoa ematekotan gazteak lanean jarraituko dugula argi daukagu, herriko gazteentzat udaletxeak egiten ez dituen ekintzak antolatuz, eta noski, gazteon eskubideak defendatuz" argitu zuten orduan PGAko kideek. Bitartean, etzi, larunbata, 13:00etan Bilboko Zazpi Kaleetako Unamuno plazatik irtengo den AHT eta Supersur delakoaren aurkako kalejirara joateko deia luzatu du PGAk. Argazkian, azaroaren 8ko prentsaurrekoa / PGA.
  Gazteok 2008-12-12 13:11

EGIko gazteekin izango da bihar Plentzian Ibarretxe

Erabiltzailearen aurpegia Ukberri Euzko Gaztedi EAJren gazte taldeak abenduaren 12tik 14ra bitartean egingo du bere V. Bilera Nagusia. Bertan, uri erakundeetako ordezkariek bilkuran aurkeztuko diren hiru txostenen inguruan eztabaidatuko dute: Emantzipazioa, Politika eta Antolakuntza. Hilabetea eman dute uri erakundeek txostenak eztabaidatzen eta zuzenketak aurkezten. Denbora honetan, bereziki aztertu da emantzipazioaren inguruko txostena; eta, horren barruan, hezkuntza, enplegua eta etxebizitza izan dira sakonen jorratutako gaiak. EGIren V. Bilera Nagusian, Juan Jose Ibarretxe Araba, Bizkaia eta Gipuzkoako lehendakaria ere izango da, larunbat honetan, 11:00etatik aurrera, Plentziako aterpetxean. Amaierako ekitaldian, berriz, Iñigo Urkullu EAJren EBBren lehendakariak hartuko du hitza, igandean, 11:00etan, Bilboko Erreprodukzio Museoan egingo den ekitaldi irekian. Argazkian, EGIkoak ikurrina altxatzen 2006ko Alderdi Egunean / EGI.
  Kirolak 2008-12-08 19:25

Bihar zabalduko dute mendiko materialen azoka Plentzian

Erabiltzailearen aurpegia Ukberri Abenduaren 9tik 19ra bitartean egongo da zabalik bigarren eskuko mendirako materialaren azoka, Plentziako Goñi Portal kultur aretoen. Hain zuzen ere, azaroaren 28ra arte, izan zuten aukera auzotarrek salgai jarri nahi zituzten gauzak bertara eramateko. Kranpoiak, pioletak, sokak, mosketoiak, espresak, katu oinak, arnesak, kanpin dendak, motxilak, galtzak, zamarrak, betaurrekoak, liburuak, botak, eskiak, eskularruak, kamisetak, txapelak, bastoiak, erlojuak, altimetroak, ortobox-ak, aterkiak, argazki kamerak, labanak, eta abar jaso dituzte Goñi Portalen. Kultur iturriek azaldu dutenez, behin gauzak bertara eramanda, eurek bitartekari lana egingo dute, materiala salmentan jarriz. Materiala dakarrenak jartzen die prezioa bere ondasunei. Saltzen ez diren gauzak abenduaren 22an eta 23an jaso ahal izango dituzte jabeek. Ordutegiari dagokionez, 11:00etatik 13:00etara eta 16:30etik 20:00etara egongo da zabalik azoka.
  Kirolak 2008-12-04 12:02

Abenduaren 14an Udalatx mendira joango dira matrakokideak

Erabiltzailearen aurpegia Ukberri Joseba Sanchez "Matrako" oroitzen duen Matrako mendi taldeko lagunak Gipuzkoa eta Bizkaia arteko mugan dagoen 1.117 metroko Udalatx mendira joango dira abenduaren 14an, igandearekin. Horrenbestez, txangoa goizeko 9etan hasteko asmoa daukate eta horretarako Plentziako metro geltokian jarri dute hitzordua. Txangoan parte hartzeko, Goñi Portal kultur etxean izena eman daiteke, hilaren 10a baino lehen. Ordutegia 10:00etatik 13:00etara eta 17:00etatik 19:00etara da, eta telefono zenbakia 946 775 541. Salneurriari dagokionez, 5 euro ordaindu beharko dituzte matrakokideek. Haurrek ez dute ordaindu behar izango. Argazkian, Matrako Mendi Taldeko hainbat lagun Txindokin (Gipuzkoa).
  Kirolak 2008-11-20 14:34

Mendiko materialaren azoka prestatzen dabiltza jada Plentzian

Erabiltzailearen aurpegia Ukberri Abenduaren 19tik 28ra, bigarren eskuko mendirako materialaren azoka jarriko dute Plentziako Goñi Portal kultur aretoen. Hain zuzen ere, azaroaren 28ra bitartean eraman behar izango da bertara salgai jarri nahi diren gauzak: kranpoiak, pioletak, sokak, mosketoiak, espresak, katu oinak, arnesak, kanpin dendak, motxilak, galtzak, zamarrak, betaurrekoak, liburuak, botak, eskiak, eskularruak, kamisetak, txapelak, bastoiak, erlojuak, altimetroak, ortobox-ak, aterkiak, argazki kamerak, labanak... Kultur iturriek azaldu dutenez, "nahi duen guztiak ekar dezake mendiarekin erlazionatutako etxean daukan edozein gauza. Goñi Portalen uzten du, gero, guk bitartekari bezala egingo dugularik bere materiala salmentan jarriz. Materiala dakarrenak jartzen die prezioa bere ondasunei". Saltzen ez diren gauzak abenduaren 22an eta 23an jaso ahal izango dituzte jabeek.
  Kultura 2008-11-11 13:55

Haurrentzako ipuin kontalariak izango dira astelehenean Plentzian

Erabiltzailearen aurpegia Ukberri Azaroaren 25ean, asteartearekin, izango den Emakumeenganako Indarkeriaren Aurkako Nazioarteko Egunaren harira, euskarazko ipuin kontalari saioa antolatu du astelehenerako (hilak 17) Plentziako Kultur Etxeak. Goñi Portal aretoan, 18:00etan hasita, Apika taldearen "Akabo!" ikuskizunaz gozatzeko aukera eduko dute 6 eta 12 urte bitarteko haurrek. Abenduaren 19tik 28ra, berriz, bigarren eskuko mendirako materialaren azoka jarriko dute Goñi Portalen. Hain zuzen ere, azaroaren 19tik 28ra bitartean eraman behar izango da bertara salgai jarri nahi diren gauzak: kranpoiak, pioletak, sokak, mosketoiak, espresak, katu oinak, arnesak, kanpin dendak, motxilak, galtzak, zamarrak, betaurrekoak, liburuak, botak, eskiak, eskularruak, kamisetak, txapelak, bastoiak, erlojuak, altimetroak, ortobox-ak, aterkiak, argazki kamerak, labanak... Kultur iturriek azaldu dutenez, "nahi duen guztiak ekar dezake mendiarekin erlazionatutako etxean daukan edozein gauza. Goñi Portalen uzten du, gero, guk bitartekari bezala egingo dugularik bere materiala salmentan jarriz. Materiala dakarrenak jartzen die prezioa bere ondasunei". Saltzen ez diren gauzak abenduaren 22an eta 23an jaso ahal izango dituzte jabeek. Argazkian, Apika taldearen ipuin kontalari saioa.
  Kultura 2008-11-10 22:52

Gabonetan Sopuerta Abentura parkera egingo dute irteera Plentzian

Erabiltzailearen aurpegia Ukberri Datozen Gabonetan hainbat aisialdi ekintzatan parte hartzeko aukera izango dute haur eta gaztetxoek Plentzian. Besteak beste, abenduaren 29rako, astelehena, Sopuerta Abentura parkera txangoa antolatu du bertoko Kultur Etxeak. Goizeko 9:30ean aterako dira herritik, 14:00etan etxera bueltatzeko. Izena ematen duten neska-mutil guztiekin bi talde osatuko dituzte: bata 5 eta 7 urte bitarteko umeekin; eta bestea 8 eta 10 urte artekoekin. Horrenbestez, plentziarrek 15 euro ordaindu beharko dituzte eta bost euro gehiago kanpokoek. Bitartean, urtarrilaren 5ean eta 7an, kometa tailerra egingo dute Goñi Portal kultur aretoan, 10:00etatik 13:00etara, 8 eta 12 urte bitarteko haurrei zuzenduta. Ikastaroa 10 eurotan aterako zaie udalerrian erroldatuei eta 12 euro gainontzekoei. Aipatu bi ekintzetarako, azaroaren 17ra arte dago izena emateko aukera. Argazkian, bi ume zuhaitzetatik zintzilik, Sopuerta Abentura parkean.
  Jendartea 2008-11-05 13:16

Gaur zozketatuko dituzte Azurtegiondoko aparkalekuko tokiak

Erabiltzailearen aurpegia Ukberri Plentziako udaletxeko osoko bilkura aretoan izango da gaur, iluntzeko 7etan, Azurtegiondoko lur azpiko aparkalekuan tokiak banatzeko jendaurreko zozketa. Orotara autoa aparkatzeko 121 toki zozketatuko dira; eskatzaileak hiru multzotan banatuta: minusbaliatuak, eragin eremuan bizi edo bertan lan egiten dutenak; eta Plentziako gainontzeko eskatzaileak edo udalerri barruko beste eremuren baten lanbidea daukatenak. Horietako bakoitzak toki bat baino ezin izango du eskuratu oraingoz. "Alabaina, aparkalekua zabaldu eta bi hilabetera tokiren bat libre badago, bigarren bat eskuratzeko aukera egongo da", udal arduradunen arabera. Toki bakoitzaren salneurria 13.963,49 eurokoa izango da eta 55 urtetarako izango da horren jabetza. Argazkian, lurrazpiko parking bat / Nelson Biagio Jr.
  Jendartea 2008-10-30 15:45

Lau gazte atxilotu dituzte Plentzian lapurtzen saiatu direlakoan

Erabiltzailearen aurpegia Ukberri Ertzaintzak 16 eta 19 urte bitarteko lau mutil atxilotu zituen atzo, asteazkena, Plentzian, itxitako ostalaritza establezimendu baten barruan zeudela. Gazteei ondarearen kontrako delitu bat egotzi diete. Herrizaingo Sailak jakinarazitakoaren arabera, gertaera atzo arratsaldeko 4etan jazo zen, Plentziako zenbait herritarrek egun itxita dagoen ostalaritza establezimendu batean lapurreta egiten ari zirela salatzeko Ertzaintzara deitu zutenean. Lekukoek lau gazte ikusi zituzten barrura sartzen, atzeko aldeko leihoetako bat hautsi ostean. Bertaratu ziren polizia autonomikoek lokala miatu zuten eta 16 eta 19 urte arteko lau gazte harrapatu zituzten geletako batean. "Bertan ezkutatzen saiatu ziren" dio Herrizaingo Sailak bidalitako oharrak. Gazte guztiak atxilotu zituzten ondarearen kontrako delitu bat egotzita.
  Jendartea 2008-10-29 23:04

Gaizki tratatutako txakurra Lemoizkoa dela dio Plentziako Udalak

Erabiltzailearen aurpegia Ukberri Txakur batek jasotako tratu txarren inguruan argitaratutako informazioak sortutako oihartzunaren aurrean, erantzun bat ematea "beharrezkoa" ikusi du Plentziako Udalak. "Lehenengo eta behin argitu beharra dago gertaera ez zela gure herrian gertatu, baizik eta Lemoizen", adierazi dute tokiko arduradunek. Bestalde, gertakizuna ezagutu bezain laster, Udalak txakurraren kokalekua zehaztu zuen informazio hori egiaztatzeko, eta, "esan bezala, txakurra gure udalerrian ez zegoela" berretsi zuen, gaineratu dutenez. Nahiz eta udal iturriek ez aipatu, dirudienez "El Correo Español" egunkariak urriaren 5ean argitaratutako albisteaz ari dira agintariak. Egun horretan, Plentziako Isuskitza auzoko finka pribatu batean "egurrez egindako lepoko batekin" lotutako mastin txakurkumea zegoela ohartarazi zuen hedabideak eta horren oihartzun handia izan du, Internet bidez batez ere. Argazkian, leioaztar bat 360 euro ordaintzera kondenatu zuten iraila hasieran bere txakurrei tratu txarra ematea egotzita / Derecho Animal.
  Kultura 2008-10-22 13:18

Astelehenetik aurrera mikologoa astea egingo dute Plentzian

Erabiltzailearen aurpegia Ukberri Nabaria da perretxiko garaian gaudela. Joan den larunbatean onddoak bildu eta igandean erakuste eta dastaketa saio bana egon zen Algortan eta Astrabuduan, Basozaleak elkarteak eta Atxazpe mendi taldeak antolatuta, hurrenez hurren. Bada, urriaren 27tik azaroaren 2ra bitartean, Plentziako Perretxiko Taldeak antolatutako XII. Aste Mikologikoa egingo dute Batetik, bi saiotan (hilak 27 eta 30) “El mundo de las setas" ikusentzunezko lana proiektatuko dute, 19:00etan, Goñi Portal kultur aretoan. Bitartean, 28an eta 29an, perretxikoak sukaldatzen irakatsiko dute: asteartean Jon Larrabeti izango da irakaslea. Eta hurrengo egunean, Urko Zarauzak emango du eskola. Biak ala biak, 19:00etan, Goñi Portalen. Azkenik, azaroaren 2an perretxiko erakusketa, haur lehiaketa, perretxikoz egindako jakien dastaketa eta aurreko bien sari banaketa izango dira. Argazkian, Basozaleak elkarteak Algortako San Nikolas plazan egin ohi du perretxiko erakusketa eta dastaketa. Aurtengo jardunaldiak urriaren 29ra arte luzatuko dira.
  Kirolak 2008-10-11 19:30

Urriaren 26an Karrantza haranera joango dira matrakokideak

Erabiltzailearen aurpegia Ukberri Joseba Sanchez "Matrako" oroitzen duen Matrako mendi taldeak Karrantza haranera (Bizkaia) egingo du irteera urriaren 26an, igandearekin, Ranero, Pozalagua eta Carpin arteko bidea egiteko. Horrenbestez, txangoa goizeko 9etan hasteko asmoa daukate eta horretarako Plentziako metro geltokian jarri dute hitzordua. Txangoan parte hartzeko, Goñi Portal kultur etxean izena eman daiteke, hilaren 21a baino lehen. Ordutegia 10:00etatik 13:00etara eta 17:00etatik 19:00etara da, eta telefono zenbakia 946 775 541. Salneurriari dagokionez, 10 euro ordaindu beharko dituzte matrakokideek. Haurrek ez dute ordaindu behar izango. Argazkian, Matrako Mendi Taldeko hainbat lagun Txindokin (Gipuzkoa).
  Hezkuntza 2008-10-03 21:43

Plentziako sendategi zaharrak hartuko du EHUren Itsas Estazioa

Erabiltzailearen aurpegia Ukberri Gaur sinatu dute Plentziako itsas sendategia EHUri erabiltzen uzteko hitzarmena Isabel Zarauza alkateak eta Juan Ignacio Perez Iglesias errektoreak. Bertan itsas estazioa egingo dute. Ekitaldian izan dira Jose Luis Bilbao Bizkaiko ahaldun nagusia, Jon Mancisidor BBKko zuzendariorde nagusia eta Fernando Perez Burgos Euskal Autonomi Erkidegoko Itsasertz Mugapeko burua. Etxaldea Plentziako eta Gorlizko hondartzen elkargunean kokatuta dago. 2005ean BBKk doan lagatu zion Udalari Plentziako Itsas Estazioaren (PIE) proiektua garatzeko. 2007an Itsasbazterretako Zuzendaritza Nagusiak erabaki zuen sendategia itsas biologiaren eta ingurumenaren azterketa eta esperimentaziorako zentro moduan prestatzeko baimena ematea. Bestade, Bizkaiko Foru Aldundiak, Ingurumen sailaren bitartez, egitasmoa bultzatu eta sustatzeko konpromisoa hartu zuen iragan martxoan, ia 7 milioi euroko ekarpen ekonomikoa eginez. Egokitze lanak aurten hastea eta gutxi gorabehera bi urtetan bukatzea aurreikusita dago. Argazkian, Perez Iglesias hitzarmena sinatzen Zarauzaren begiradapean.
  Kultura 2008-10-02 19:18

Islamari buruzko erakusketa zabaldu dute Plentzian

Erabiltzailearen aurpegia Ukberri "Islama, guztion ondarea" erakusketa urriaren 30era arte egongo da zabalik Plentziako Goñi Portal kultur aretoan. Lehen eta Bigarren Hezkuntzako ikasleei zuzendutako eduki pedagogikoa duen kultur egitasmoa da, baina bere informazio izaeragatik jende orori dago zuzenduta. Kultura Islamikoaren Fundazioak eta Alarabetah euskal zentro arabiar-libiarrak antolatu dute eta, astelehenetik ostiralera, 11:00etatik 13:00etara eta 16:30etik 20:00etara bisitatu ahal izango da. Larunbatetan, berriz, 11:00etatik 13:30era eta 17:00etatik 20:00etara. Eta iganderan goizez bakarrik. "Ikusmenaren, ukimenaren, dastamenaren eta usaimenaren bitartez, erakusketa ibiltari honek, hain hedatuta eta aldi berean hain ezazaguna den milaka urteko zibilizazio honen ateak irekiko dizkigu", antolatzaileek adierazi dutenez. Argazkian, apirileko Aniztasunaren aldeko eta Diskriminazioaren aurkako IV. Jardunaldietan ere egon zen ikusgai Algortan, "Islama, guztion ondarea" erakusketa.
  Kirolak 2008-09-24 19:45

Urriaren 5ean Atxondo haranera joango dira matrakokideak

Erabiltzailearen aurpegia Ukberri Joseba Sanchez "Matrako" oroitzen duen Matrako mendi taldeak Atxondo haranera (Bizkaia) egingo du irteera urriaren 5ean, igandearekin. Aipatu dutenez, ibilbide bat baino gehiago dago aukeran: Arrazolako bide berdea eta Anboto tartean. Horrenbestez, txangoa goizeko 9etan hasteko asmoa daukate eta horretarako Plentziako metro geltokian jarri dute hitzordua. Txangoan parte hartzeko, Goñi Portal kultur etxean izena eman daiteke, hilaren 1a baino lehen. Ordutegia 10:00etatik 13:00etara eta 17:00etatik 19:00etara da, eta telefonoa 946 775 541. Salneurriari dagokionez, 5 euro ordaindu beharko dira. Matrako mendi taldekoek zehaztu dutenez, bazkideentzat baino ez da txangoa. Bestalde, Sopelako Munarrikolanda mendi taldeak Pirineoetarako ohiko irteera antolatu du irailaren 27a eta 28ko astebururako. Eta Egizu Getxo Euskaldun! elkarteko berbalagunak Lea ibarreko ibilbidea egitera joango dira, larunbat honetan. Argazkian, Matrako Mendi Taldeko hainbat lagun Txindokin (Gipuzkoa).
  Gazteok 2008-09-22 23:23

Gazte Plana martxan jartzeko batzar irekia egingo dute bihar Plentzian

Erabiltzailearen aurpegia Ukberri Plentziako Udaleko Gazteria Arloak batzar irekia deitu du astearte honetarako, irailak 23, Gazte Plana abian jartzeko asmoz. "Plan bat edukitzea oinarri-oinarrizkoa da edozein jarduera edo proiektu burutzeko. Plan bat edukiz gero, ondo zehaztu behar dira helburu, xede edo amets bat lortzeko jarraitu behar diren pausu guztiak. Plan bat daukagunean ezinbestekoa da baliabide guztiak behar bezala programatu, kudeatu eta koordinatzea, bestela zaila zaigu gure helburuak lortzea. Planak ez dira hutsetik sortzen, ez dira kasualitatez prestatzen, ilusioa eta dedikazioa eta kompromisoa behar dira hasiera-hasieratik eta prozesu guztian zehar. Bestalde, pertsonaren inplikazioaz gain, talde edo kolektiboaren konpromisoa ere behar da", adierazi dute tokiko arduradunek. Biharko batzarra 19:00etan izango, Goñi Portalen. Bestalde, iradokizuzen bat eduki edo foroan beste zerbait gehitu nahi izatekotan mezua bidal daiteke gazteplana.plentzia[abildua]bizkaia.org e-posta helbidera. Argazkian, gazte koadrilak play-backa egiten Astillero plazan, San Antolin jaietan.
  Kirolak 2008-09-21 18:12

San Miguel Ligatik jaitsi egin da Arkote

Erabiltzailearen aurpegia Ukberri Arkote ez da hurrengo urtean TKE San Miguel Ligan arituko eta KAE 1 kategorian lehiatzen konformatu beharko da derrigorrez. Izan ere, atzo eta gaur Bermeon eta Ibaizabalen jokatutako banderetako play-off-etan Plentzitarrako tripulazioak ez du lortu lehenengo bi traineren artean heltzea. Laredo arerio errazaz gain inor aurreratzeko kapaz ez dira izan Plentziakoak eta gaur Areeta eta Portugaleteko pasealekuetan adi zituzten jarraitzaile asko etsituta utzi dituzte. Bost segundoko abantaila zeukan Meirak atzo eta beste 8 atera dizkio gaur, gauzak argi utziz. Elastiko beltzetakoek ikusi dute beraien ordez, Kaiku sestaoarra eta Meira galiziarra arituko direla arrauneko ohorezko mailan. Portugaleteko banderari dagokionez, Oriok irabazi du nagusitasun handiz eta Urdaibaik baieztatu du Ligako txapelduna dela, Castrok estropada eskasa egin ondoren.
  Kirolak 2008-09-13 03:06

Uribe Kostako familia surfaren hiruburu bihurtuko da Plentzia asteburu honetan

Erabiltzailearen aurpegia Ukberri Gaur, larunbata, eta bihar Plentziako hondartzak Sur Egunaren V. edizioa hartuko du goizeko 9etatik aurrera. Cabo Billano surf eskolak antolatutako jaialdiak eskaintza ludiko osoa egingo die Plentziako eta inguruko surflari, surfzale zein ume ausartak dituzten sendi guztiei. Antolatzaileek onartu dutenez, aurreko urteen arrakastak eta dagoneko ohitura bihurtu izanak eraman ditu bosgarren edizioa prestatzera. Iaz bezalako jende kopurua espero dute, 400 bat, eta gehienak umeak izango direlakoan daude. Surf-a eta surf ikastaroez gain, egitaraua oso kirol anitzetara joko du: boleiboletik herri kiroletara joko nautikoetatik edota igeriketatik igaroz. Gainera, larunbatean kontzertua ere izango da Mr. Shoe talde urduliztarraren eskutik. Bertaratutako guztiek parte hartuko dute surf taula batzuen zozketan. Argazkia: (cc) A. Herrero.
  Kultura 2008-09-01 23:50

Aste bukaerarako musika emanaldi bi eta pintura lehiaketa prestatu dituzte Plentzian

Erabiltzailearen aurpegia Ukberri Musika gustoko duten guztiek emanaldi bana izango dute iraliaren 4an eta 5ean Plentziako Madalenako elizan. Batetik, kontzertu lirikoa eskainiko dute ostegunean Santos Ariño baritonoak, Andeka Gorrotxategi tenoreak, Carmen Aparicio sopranok eta Itziar Barreos pianojoleak. Bestalde, ostiralean, Leioako Kantika Koralaren kontzertua izango da. Biak ala biak 20:30ean izango dira. Bestalde, larunbatean, hilak 6, pintura lehiaketa egingo dute Plentziako ibiltokian. Txapelketa goizeko bederatzietan hasi eta arratsaldeko seietan bukatuko da. Sariei dagokienez, 1.300, 700, 500 eta 400 euro banatuko dira lehenengo lauren artean. Eta 300 euroko accesit sari bat ere egongo da. Argazkian, Leioako udal musika eskolako Kantika Korala abesbatza / La idea del norte.

Nabarmenak

Zorion agurrak