Politika 2008-01-14 18:31

Fernando Etxegarairi igandean egingo diote ongi etorria Plentzian

Erabiltzailearen aurpegia Ukberri Urtarrilaren 20an, igandearekin, espetxean 20 urte baino gehiago egindako Fernando Etxegarai Gaztearenari ongi etorri ekitaldia egingo diote Plentzian. Hain zuzen ere, 13:00etan, Astillero plazan jarri dute hitzordua; eta ondoren herri bazkaria ere izango da. Etxegarai urtarrilaren 4an atera zen Pontevedrako A Lamako espetxetik, zigor osoa beteta. Senideentzat ezustekoa izan zen, orain dela hilabeteak data horretan kaleratze eguna finkatuta izan arren, azken aldian horri buruzko berririk ez zutelako, baita egun horretarako bisita eman zietelako ere. Izan ere, beldur ziren azken hileotan hain zabalduta dagoen Parot doktrina plentziarrari ere ez ote zioten aplikatuko. Gauzak horrela, bisitan albistea ezagutu ondoren itxaron zuten 22:00etan kaleratu arte eta berarekin egin zuten itzulera. Etxegarai 1987ko apirilaren 24an atxilotu zuten, eta urte hauetan guztietan espetxe ugaritik pasatu da: "legearen aplikazioaren arabera, baldintzapeko askatasunean 2002ko apiriletik kalean izan beharko litzateke, baina behin eta berriro salatu den bezala, praktikan, euskal preso politikoek ez daukate baldintzapeko askatasunaren eskubiderik ere", Uribe Kostako Amnistiaren Aldeko Mugimenduaren arabera. Argazkian, Fernando Etxegarairi hilaren 6an Barakaldon egindako ongi etorriaren irudi bat / Etengabe
  Jendartea 2008-01-10 11:10

Plentziarrek asteartera arte dute Azurtegiondoko parkingean lekua eskatzeko

Erabiltzailearen aurpegia Ukberri Plentziako Udalak bere webgunean argitaratu du Azurtegiondoko lur azpiko aparkalekuan toki bat eskuratzeko baldintza-agiria (pdf). Bestela, udal bulegoetan ere jaso daiteke, astelehenetik ostiralera, 9:00etatik 14:00etara. Urtarrilaren 15eko 14:00ak arte egongo da zabalik eskaerak aurkezteko epea. Behin eskaera guztiak gainbegiratu ondoren, orotara autoa aparkatzeko 121 toki zozketatuko dira; eskatzaileak hiru multzotan banatuta: minusbaliatuak, eragin eremuan bizi edo bertan lan egiten dutenak; eta Plentziako gainontzeko eskatzaileak edo udalerri barruko beste eremuren baten lanbidea daukatenak. Horietako bakoitzak toki bat baino ezin izango du eskuratu oraingoz. "Alabaina, aparkalekua zabaldu eta bi hilabetera tokiren bat libre badago, bigarren bat eskuratzeko aukera egongo da", adierazi dute udal arduradunek. Toki bakoitzaren salneurria 13.963,49 eurokoa izango da eta 55 urtetarako izango da horren jabetza.
  Kultura 2008-01-08 20:57

Bizikletak konpontzen erakutsiko dute Plentzian

Erabiltzailearen aurpegia Ukberri Bizikletak, beste edozein garraiobidek bezala, gidatze eroso eta seguru bat bermatuko duen mantentze-lana behar du. Otsailaren 26an, 18:00etatik 21:00etara, horren gaineko oinarrizko edukiak landuko dituzte, adibide praktikoz lagunduta (zulaketak, balaztak, kanbioak...), Plentziako Goñi Portal kulturgunean. Horrenbestez, 12 urtetik gorako plentziarrek izango dute ikastaroan parte hartzeko aukera. Hala ere, tokiak sobera egotekotan gainontzekoei ere zabalduko zaie. Lehenengoek euro bakarra ordaindu beharko dute eta Plentziatik kanpokoek 3 euro. Izen-emateko epea urtarrilaren 31ra artekoa izango da. Bestalde, emakumea eta mitologiaren artean dagoen erlazioa ezagutu nahi duten 18 urtetik gorakoei zuzenduta, ikastaroa ere antolatu dute Goñi Portalen. Otsaileko hirugarren astean hasita, 24 orduz luzatuko dira eskolak. Urtarrilaren 21a izango da izena emateko azken eguna. Bestalde, Mikel Garaizabalek ardo daztaketa saioa eskainiko du martxoaren 5ean, 19:00etatik 21:00etara. Argazkian, hainbat neska-mutil bizikletekin / Plazaola.
  Kirolak 2008-01-08 19:44

Eski asteburua antolatu du Goñi Portalek

Erabiltzailearen aurpegia Ukberri Plentziako Kultur Etxeak urtarrilaren 25etik 27ra bitarteko astebururako Aragoiko Formigal herrirako bidaia eta egonaldia prestatu du. Tokiko iturriek adierazi dutenez, udalerrian erroldatuek zein kanpokoek dute aukera eskiatzeko irteera horretan parte hartzeko. Horretarako Goñi Portal kulturgunean (Kale barria, 2) eman beharko dute izena, ahalik eta lasterren, tokiak mugatuak baitira. Bidaia 120 euro kostatzen du plentziarrentzat eta 160 euro gainontzekoentzat. Prezioaren barruan daude autobus bidaia, ostatua, larunbatean eta igandean eskiatzeko forfaitak, gidaria, aseguruak, eta larunbateko gosaria eta afaria zein igandeko gosaria.
  Politika 2008-01-05 20:04

Fernando Etxegarai presoa kaleratu dute

Erabiltzailearen aurpegia Ukberri Fernando Etxegarai Gaztearena, Plentziako preso politiko bakarra, atzo gaueko 22:00ak aldera atera zen Pontevedrako A Lamako espetxetik, 20 urte baino gehiago gatibu eman ondoren, zigor osoa beteta. Senideentzat ezustekoa izan zen, orain dela hilabeteak urtarrilaren 4an kaleratze eguna finkatuta izan arren, azken aldian horri buruzko berririk ez zutelako eta baita egun horretarako bisita eman zietelako. Izan ere, beldur ziren azken hileotan hain zabalduta dagoen Parot doktrina Etxegarairi ere ez ote lioketen aplikatuko. Gauzak horrela, bisitan albistea ezagutu ondoren Fernando itxaron zuten 22:00etan kaleratu arte eta berarekin egin zuten itzulera. Gaur goizaldeko ordu txikietan Etxegarai Euskal Herrian sartu da. Uribe Kostako Amnistiaren Aldeko Mugimenduak Etengabe bitakoraren bidez jakinarazi duenez, Fernando 1987ko apirilaren 24an atxilotu zuten, eta urte hauetan guztietan espetxe ugaritik pasatu da: "legearen aplikazioaren arabera, baldintzapeko askatasunean 2002ko apiriletik kalean izan beharko litzateke, baina behin eta berriro salatu den bezala, praktikan, euskal preso politikoek ez daukate baldintzapeko askatasunaren eskubiderik ere".
  Kultura 2007-12-30 19:37

Urtarrilaren 3an eta 4an egongo da irekita Plentziako Erregeetako Umeen Parkea

Erabiltzailearen aurpegia Ukberri Plentziako txikienek Erregeetako Umeen Parkeaz gozatu ahal izango dute urtarrilaren 3an eta 4an, herriko Jai Alai pilotalekuan. Bertan, hainbat jolas, puzgarriak, haurrentzako ludoteka, Santa Fe trena eta aisialdirako beste jarduera asko izango dira, jai-musikak girotuko duelarik. Umeen parkea 11:30etik 14:00etara eta 16:30etik 19:00etara egongo da zabalik eta sarrera doan izango da, Plentziako Udaleko iturriek prentsa ohar bidez jakinarazi dutenez. Argazkian, haurrentzako puzgarriak Uribe Kostako Mankomunitateak antolatzen dituen Euskaraz Olgetan jardueren baitan.
  Kirolak 2007-12-06 17:24

Plentzian zehar ibilaldia eta babarrun jana antolatu ditu hilaren 16rako Matrako mendi taldeak

Erabiltzailearen aurpegia Ukberri Abenduaren 16rako txangoa antolatu du, Plentzian zehar, Matrako mendi taldeak. Horrenbestez, goizeko 10:00etan abiatuko dira metro geltokitik eta, egunari bukaera bikaina emateko, babarrun jana izango dute Plentziako Pauli tabernan, bakoitzak 25 euro ordainduta. Joan nahi dutenek abenduaren 11 baino lehen eman beharko dute izena, Goñi Portalen (Plentziako kultur etxea: 946 775 541). Bestalde, bigarren eskuko mendi material azokarako gaiak (kranpoiak, pioletak, espresak, sokak, dendak, motxilak, galtzak, jaka polarrak, txamarrak, betaurrekoak, liburuak, botak, eskiak, eskularruak, nikiak, txapelak, zapatilak, bastoiak, erlojuak, altimetroak, ortobox-ak, arnesak, aterkiak, argazki kamerak, labanak, sariak, eta bururatzen zaizuen beste edozer) biltzen ibili dira Matrakokoek. Horrenbestez, merkatua abenduaren 21era arte egongo da zabalik, Goñi Portalen.
  Jendartea 2007-11-20 19:01

Abenduaren 2an Plentziako itsasadarra garbitzera deitu du Matrako mendi taldeak

Erabiltzailearen aurpegia Ukberri Plentziako Udala eta Proa ur-kirol elkartearen laguntzaz, itsasadarra garbitzen arituko dira, abenduaren 2an, Matrako mendi taldeko kideek; eta jardueran parte hartzera deitu dituzte nahi duten herritar guztiak. Hitzordua goizeko 10etan jarri dute, zubi berriaren alboan dagoen turismo informazio gunean. Hori bai, parte hartu nahi dutenek aurretik eman beharko dute izena, azaroaren 28a baino lehen, Goñi Portal kultur etxean. Garbitu ondoren, hamaiketakoa edukiko dute guztiek Plentzia Gorri ta Zuri Athletic-en lagunartearen egoitzan. Bestalde, larunbat honetarako, azaroak 24, ingurumena zaintzeari buruzko jardunaldia antolatu dute Sopelako Peñatxuri surf taldeak eta Euskal Herriko Surf Federazioak (EHSF). Besteak beste, Gaztelugatxeko Doniene (Bermeo) inguruko itsasbazter eta labarretako zaborrak garbitzen arituko dira, 11:00etatik aurrera. Argazkian, Plentziako itsasadarraren babesari buruzko ekitaldiak ugaritu egin dira azkenaldian; besteak beste, urriaren 6an, bertoko dragatze lanen aurka azaldu ziren surflariak / Sordos Surf Waves
  Jendartea 2007-11-19 17:23

Plentzian bi gazte atxilotu dituzte metroan bi graffiti handi margotzea leporatuta

Erabiltzailearen aurpegia Ukberri Getxoko ertzain-etxeko agenteek bi gazte atxilotu zituzten atzo arratsaldean Plentzian, metro bagoi batean bi pintada egitea egotzita. Eusko Jaurlaritzako Herrizaingo Sailak zabaldutako oharraren arabera, udalerri horretako geltokian bertan izan zen gertaera, 16:20ak aldera, trena bertan geldirik zegoela. Treneko gidariak bi gazte ikusi omen zituen, bagoi baten ezkerraldean pintadak egiten. "Egiten ari zirena aurpegiratu zien orduan, eta, ikusi zituztela konturatzean, ihes egin zuten", diote polizia iturriek. Metroko arduradunek Ertzaintzari gertakariaren berri eman zioten eta bi susmagarriak bilatzeari ekin zioten. Pixka bat geroago, lekukoek emandako deskribapenarekin bat zetozen bi gazte aurkitu zituen patruila auto batek, geltokitik gertu, inguru basotsu batean. Argazkian, graffitia metro unitate batean / Olakoena.
  Kirolak 2007-11-12 19:51

Gorbeiarako mendi irteera antolatu du Matrako mendi taldeak

Erabiltzailearen aurpegia Ukberri Joseba Sanchez "Matrako" oroitzen duen Matrako mendi taldeak Gorbeia mendialdeko Itxinako zonalderako irteera egingo du datorren azaroaren 25ean, igandea. Txangoa goizeko 7:30ean hasteko asmoa daukate eta horretarako hitzordua Plentziako metro geltokian jarri dute, autoz mendiaren magaleraino heltzeko. Bertatik, Atxulaur atea igarota, Pagomakurrek, Axkorrigainek eta Supelegorrek zaindutako Itxina alde ederrera igoko dira. Txangoan parte hartzeko izena Plentziako Goñi Portal kultur etxean eman daiteke azaroaren 20a baino lehen. Ordutegia goizeko 10etatik 1etara eta 5etatik 7etara da, eta telefonoa 946 775 541. Matrako mendi taldekoek eskertuko dute autoa dutenek izena ematean hori jakinaraztea. Bestalde argibide gehiagorako, honako posta elektronikora idatzi daiteke: matrakomenditaldea[abildua]hotmail.com. Argazkian, Itxinako zonaldea, Atxulaur atetik ikusita / Inaxio.
  Jendartea 2007-09-18 23:51

Plentzian itsaski-bilketa debekatu du Eusko Jaurlaritzak

Erabiltzailearen aurpegia Ukberri Eusko Jaurlaritzako Nekazaritza, Arrantza eta Elikadura Sailak Plentziako uretan itsaskiak biltzea edo hazkuntzan jardutea debekatu du. Sailak urtero Araba eta Bizkaiko arrantzako guneetako uretan egiten dituen analisiek erakutsi duten kalitate eskasagatik eta horrek itsaskiengan eta kontsumitzaileengan izan ditzakeen eraginagatik hartu du neurri hori. Erabaki bera hartu dute Mundaka eta Hondarribirako ere. Dena den, debekuak salbuespen batzuk izango ditu eta molusku mota batzuk arrantzatzea edo hazkuntzan ibiltzea izango da. Esate baterako, ostrak, datil okerrak, berberetxoak eta txirlak debekutik kanpo egongo dira bi baldintza betez gero: harrapaketaren ostean garbiketa prozesu berezi batean sartzea eta Plentziako estuarioko barnealdetik kanpo arrantzatzea, hots, inolaz ere ez Arrainolatik gora.
  Jendartea 2007-08-30 10:28

20 zentimetroko aizto batez hainbat pertsona mehatxatu duelakoan gizon bat atxilotu dute Plentzian

Erabiltzailearen aurpegia Ukberri Ertzaintzak 37 urteko gizonezko bat atxilo hartu zuen Plentzian pasa den asteartean, hainbat pertsona 20 zentimetroko aizto baten bidez mehatxatu egin zuelakoan. Atxiloketa gaueko 11ak aldera izan zen, Herrizaingo Sailak jakinarazi duenaren arabera. Gertaera Plentziako jatetxe batean hasi zen eta bertan, sukaldeko aizto handi bat ostu eta gero, gizonezko batek establezimendu horretako zenbait bezero mehatxatu zuen, ondoren bertatik alde egiteko. Handik minutu batzuetara taberna batean sartu zen eta emakume bati hurbildu zitzaion, hura erretzen ari zen zigarroari zupada bat ematen utz ziezaion eskatzeko. Emakumearen ezetza jaso ostean, gizonezkoak mehatxu egin zion aiztoaz eta joan egin zen. Ertzaintzaren arabera, jazotakoa ikusi zuten lekuko batzuek larrialdietarako telefonoaren bidez eman zuten gertatutakoaren berri eta handik gutxira Polizia autonomikoak patruila-auto bat bidali zuen zonaldera. Bertaratutako ertzainek lekuko batzuekin hitz egindakoan, inguruetan aurkitu, identifikatu eta miatu zuten mehatxuen ustezko egilea, soinean 20 bat zentimetroko aizto bat zeramana, jatetxean ostutakoa omen zena. Hori dela eta, atxilotu eta Getxoko Ertzainetxera eraman zuten, arma zuri batez mehatxu delitua egin izana egotzita.
  Kultura 2007-06-08 19:59

Euskal jaia egingo du bihar Plentzian Gogorregi konpartsak

Erabiltzailearen aurpegia Ukberri Gogorregi Bilboko konpartsa jeltzaleak makina bat jarduera prestatu du bihar Plentziako Astilleroan eta futbito zelaian jarritako karpan burutuko duen euskal jaiaren harira. Bilboko Konpartsak erakundetik at dagoen Gogorregi konpartsan makina bat kide Uribe Kostakoak dira eta haiek bultzatu dute biharko festa, taldeak "Bilbon egiten dugun lana deszentralizatzeko eta eskualdeetara ere eramateko", Gogorregiko Iñaki Ozamizek UKBERRI.NETi azaldu dionez. Horregatik, hain zuzen ere, euskara eta euskal kultura eta ohituren aldeko eguna antolatu dute. Eguna goizeko 10etan hasiko da, Plentziako Astilleroan nekazaritza azokako 50 bat ekoizlek, gehienak Uribe Kostakoak bertakoak, euskal produktuak saltzeari ekingo diotenean. Ondoren, txikienen txanda izango da, futbito zelaian egingo diren hainbat jolas eta tailer tarteko. Eguerdian, berriz, euskal dantzak ikusteko aukera izango da Plentziako Kai-eder eta Algortako Itxartu taldeen eskutik. 14:30ak aldera, herri bazkaria egingo dute, 100 bat lagunek Gogorregiko sukaldarien paella dastatuko dutela, 10 euroko txartela erosita. Bazkalostean, Euskal Herriko kirol nazionalari ekingo diote, mus txapelketa eginez. Gaua, berriz, 20:30ean hasiko da, DJ festarekin. Gainera, egun osoan zehar, trikitilariek eta zintzurra bustitzeko txosnak girotuko dute. Gogorregikoek aitortu dutenez, Plentzia aukeratu zuten "herri lasaia, txikia eta aproposa" izateagatik "eta Plentziako hainbat kide bultzatuta". Argazkian, Gogorregiko hainbat kide Ibaizabalen gora eginez, bihar marinel-uria hartuko duen elastiko urdin-magentak soinean / Gogorregi (cc).
  Politika 2007-05-17 15:25

Bihar aurkeztuko dituzte hautagaiak Plentziako Independenteek

Erabiltzailearen aurpegia Ukberri Erribera kalean duten egoitzan egingo dute ostiral honetan, maiatzak 18, 20:00etan, euren hautagaien aurkezpena Plentziako Independenteek. Isabel Zarauza izango da zerrendaburua, "udal kudeaketa eraginkorragoa" lortzeko asmoz. Horretarako, "demokrazia parte hartzailea" sustatzea proposatzen dute, "herritarren batzarra" osatuz. Euren hauteskunde programan (pdf) aipatzen dutenez, edozein herritarrek izango luke horretan parte hartzeko aukera: "ohikoa (lau hilabetetan behin) edo ez ohikoa (egitasmo garrantzitsu batek horrela eskatzen badu", diote. Horretaz gain, udal batzarrean eztabaidatuko diren gaiak aztertzeko, batzordeak eratzea eskatzen dute. "Alkatea eta zinegotziez gain, zoriz sei auzokide aukeratuko lirateke", azaldu dute. Argazkian, Plentziako Independenteen hautagaiak.
  Jendartea 2007-03-07 20:44

Emaztea jo eta errepidean bakarrik uztea leporatu diote plentziar bati

Erabiltzailearen aurpegia Ukberri Ertzaintzak 41 urteko gizonezko bat atxilotu zuen astelehen arratsaldean, bikotekidearen aurkako genero indarkeria delitua egotzita, Eusko Jaurlaritzako Herrizaingo Sailak zabaldutako bertsioaren arabera, gertakariak joan den ostiraleko goizaldean jazo ziren, Plentzian, elkarrekin bizi ziren etxean. Biktimak salatu duenez, eztabaida baten ostean, bikotekideak ahal izan zuen indar handienaz lepotik heldu eta ukabilkada bat eman zion ahoan. Une horretan, emakumea gela batera sartu zen, atea itxi zuen eta zainak ebaki zituen. Bikotekideak benda bat jarri zion zauri odoleztatuen gainean eta gurasoen etxera eraman zuen. Hara zihoazela, eztabaidan jarraitu zuten eta, bikotekidearen irainen eta egoera hartzen ari zen itxuraren aurrean, emakumezkoa ibilgailutik jaitsi zen eta Unbeko errepidean gelditu zen bakarrik. Larrialdi zerbitzura deitu zuen handik, eta Ertzaintzaren patruila auto bat bertaratu zen. Argazkian, emakumeen aurkako erasoak salatzeko, Getxoko Bilgune Feministak Algortan egindako kontzentrazioetako bat.
  Kultura 2006-12-20 13:42

Urtarriletik aurrera egunero bi orduz emitituko du PTBk

Erabiltzailearen aurpegia Ukberri UK aldizkariaren 111. zenbakian jakinarazi dutenez, urtarrilean hasiko dira Plentzia Telebistaren emisioak, Nerea Ibargurengoitia, Edurne San Pelayo eta parte hartu nahi duten herritar guztien eskutik. Bi orduz emitituko dute egunero eta programazioa hiru atal nagusitan banatuta egongo da. Alde batetik, kirolak: honetan, herriko taldeen denboraldien errepasoa eta partiden erretransmisioa izango dira nagusi. Bestetik, "Atzokoak gaur" saioa, antzinako kontuak gogora ekarri nahi dituztenentzat. Honetan, berreskuratutako 3.500 grabazio orduak ipiniko dituzte ikusgai. Gainerako denbora, ekoizpen propiorako izango da: erreportajeak, informazio lagungarria eta saio bereziak. Argazkian, Plentziako irudi bat.
  Politika 2006-12-06 19:31

Plentziako Erribera kaleko hiru kutxazain eraso egin dituzte

Erabiltzailearen aurpegia Ukberri Bart gauerdi aldera hainbat ezezagunek molotov koktelak jaurti dituzte Plentziako Erribera kaleko hiru kutxazainen aurka, Lakuako Herrizaingo Sailak jakinarazi duenez. Bertsio horren arabera, Erribera kaleko 23, 27 eta 34 zenbakietan dauden, hurrenez hurren, BBVA, BBK eta La Caixako kutxazainen kontra 23:55ean bota zituzten hainbat koktel, BBVAkoa zein BBKkoa erabat kiskalita utziz eta hirugarrenean kalteak sortuz. Era berean, BBVA eta BBK erakundeen bulegoak hartzen dituen eraikinaren fatxada belztuta gelditu da. Argazkian, pasa den azaroaren 27an eraso egin zuten Algortako Banco Sabadellen bulegoa.
  Jendartea 2006-11-23 14:48

Bi gazte atxilotu dituzte Plentzian tabakodenda batean lapurtu zutelakoan

Erabiltzailearen aurpegia Ukberri Ertzaintzak A.M. eta S.M. 22 eta 29 urtetako gazteak, hurrenez hurren, atxilotu zituen atzo, Plentziako tabakodenda batetik 1.000 euro indarrez eraman zutela egotzita. Gertaera goizeko 12ak aldera hasi zen, bi lagun takabodendan sartu eta haietako batek erakusmahaiaren barrukaldera pasatu eta tiradera batetik poltsa bat hartu zuen, barruan 1.000 euro baino gehiago, 50 bat telefono-kabinetarako txartel eta eskuko telefonoak birkargatzeko hainbat bono zeudela. Biek ala biek di-da utzi zuten atzean tabakodenda, langilearen oihuen artean. EAEko Herrizaingo Sailaren arabera, “ingurutik zebilen eta zerbitzuz kanpo zegoen euskal Poliziako agente batek” lapurrak ikusi, langilea entzun eta susmagarrien atzetik korrika egin zuen, haietako bat harrapatu arte. Bertsio horren arabera, ustezko lapurrak harrapakina lurrera bota zuen eta ertzainari aurre egiten saiatu zen kuter batez, baina udaltzainak eta ertzain gehiago bertaratuta atxilotu zuten. Ondoren, lapurrek Plentziara heltzeko Ford auto bat erabili zuteneko balizko zantzua ikertu zuten poliziek eta 13:20ak aldera auto hori topatu zuten Plentziako metro geltoki ondoko parkingean. Autoa miatzean, 50 bat metrora dagoen oinezkoentzako zubitik ibiltzen zihoan gazte bat bigarren lapurraren deskripzioa bat zetorrelakoan gelditu eta gainean zeramana arakatu zuten. Gazteak, Ford autoko giltzak zituela eta inolako identifikaziorik eramaten ez zuela, poliziei “etengabeko aitzakiekin” erantzun zienez ertzain-etxera eraman zuten. Ustezko lapurrak gaur dira epailearen aurretik igarotzekoak. A.M. astelehenean ere atxilotu zuten Gernikan kiosko batetik 365 euro eraman zituelakoan.
  Jendartea 2006-08-11 00:37

Lau gazte atxilotu dituzte Plentzian gizonezko bat jo zutelakoan

Erabiltzailearen aurpegia Ukberri Ertzaintzak 20 eta 25 urte arteko lau gazte atxilotu zituen pasa den astean Plentzian, motorreko kasko bat erabilita, gizonezko bat jo egin zutelakoan. EAEko Herrizaingo Sailaren arabera, abuztuaren 3an, osteguna, goizeko 9ak aldera, Ertzaintzak Plentziako Plazatxoan gertatzen ari zen eraso baten berri ematen zuen deia jaso zuen. Poliziak bertaratu zirenean anbulantzia bat ikusi zuten non gorputz osoan zehar kolpeak zituen gizonezko bat artatzen ari ziren. Agenteek jakin ahal izan zutenez, minutu batzuk lehenago, inguruko taberna batean zegoen neska bat gogaitzen aritu ziren lau gazte. Gizonezko bat neska laguntzen saiatu zen, eta gazteek jo egin omen zuten, euretako batek zeraman motorreko kaskoarekin eta guzti kolpatu zutela. Gizona herriko osasun-etxera eraman behar izan zuten zauriak artatzera.
  Kultura 2006-08-10 12:26

Primital taldeak bere funk eta jazz soinuak eskainiko ditu larunbatean Plentzian

Erabiltzailearen aurpegia Ukberri Primital taldeak bere zuzeneko indartsua eskainiko du abuztuaren 12an Plentziako Astillero plazan, gaueko 11etan hasita. Funk eta jazz soinuak performancearekin uztartzen dituen seikotearen buru Santi Ibarretxe (argazkian) da. Musikari bilbotarra taldeko abeslari nagusia den arren, beste bost kideek ere ahotsa lantzen dute bere abestietan. Horrela, abestu eta jo egiten dute aldi berean eta polifonian errepertorioko kantu guztietan. Errepertorio oso originala da, konponketa harrigarriekin eta inprobisazioz beterik. Abestien testuak "sistema onomatopeiko-ludikoan" daude idatzita, "primital" delako hizkuntza, hain zuzen ere.

Nabarmenak

Zorion agurrak