Politika 2007-11-02 15:36

Presoen estatus politikoa aldarrikatu dute 60 lagunek Leioako campusean

Erabiltzailearen aurpegia Ukberri Hilabeteko azken asteazkenarekin bat eginez, euskal presoentzako estatus politikoa aldarrikatzeko mobilizazioak egin ziren herenegun, urriak 31, fakultate eta eskola unibertsitarioetan, Presoen Aldeko Taldeek (PAT) deituta. Kaleratutako oharrean, gogor salatu zuen erakundeak PSOEren gobernuak ezker abertzalearen kontra darabilen "gerra estrategia": atxiloketak (Batasuneko Mahai Nazionalarena barne), zitazioak, debekuak... jarri zituen adibidetzat PATek, baina bereziki kartzeletako egoera gogora ekarri zuen, horren harira, euskal presoen estatus politiko aldarrikatuz. EHUko Erandio eta Leioako campusean 60 lagun kontzentratu ziren kafetegi nagusiaren aurrean. Argazkian, presoen aldeko elkarretaratze bat Leioako campusean.
  Politika 2007-10-30 20:52

Presoen estatus politikoa aldarrikatuko dute bihar Leioako campusean

Erabiltzailearen aurpegia Ukberri Asteazken honetan, urriak 31, euskal presoentzako estatus politikoa aldarrikatzeko mobilizazioak egingo dira fakultate eta eskola unibertsitario desberdinetan, Presoen Aldeko Taldeek (PAT) deituta. Kaleratutako oharrean, gogor salatu du erakundeak PSOEren gobernuak ezker abertzalearen kontra darabilen "gerra estrategia": atxiloketak (Batasuneko Mahai Nazionalarena barne), zitazioak, debekuak... jarri ditu adibidetzat PATek, baina bereziki kartzeletako egoera gogora ekarri nahi izan du, horren harira, euskal presoen estatus politiko aldarrikatuz. EHUko Erandio eta Leioako campusean, 11:30ean egingo dute elkarretaratzea, kafetegi nagusiaren aurrean. Argazkian, presoen aldeko elkarretaratze bat Leioako campusean.
  Politika 2007-10-30 20:15

Hainbat film antifaxista eta antikapitalista emango dituzte azaroan Udondo gaztetxean

Erabiltzailearen aurpegia Ukberri Udondo gaztetxea, Sare Antifaxista eta Ez Jaun Ez Jabe erakunde ezkertiarrek antolatuta, "Antifaxismoa. Antikapitalismoa" lelopean lau filma ikusi ahal izango dira azaroan zehar Leioako Udondo gaztetxean bertan. Proiekzioak hilaren 8an hasi eta ostegunero emango dituzte, beti ordu berean, 19:30ean. Besteak beste, "Atado y bien atado" (azaroak 8), "No se os puede dejar solos" (azaroak 15), "Nazis: Un aviso de la historia - part 1" (azaroak 22) eta "Nazis: Un aviso de la historia - part 2" (azaroak 29) egongo dira ikusgai. Argazkian, Udondo gaztetxea.
  Politika 2007-10-26 21:55

Getxo eta Berangoko atxiloketek "oinarri juridikorik ez" dute Askatasunaren ustez

Erabiltzailearen aurpegia Ukberri Gaur goizean prentsaurrekoa egin da Bilbon, joan zen astean Uribe Kosta eskualdean egindako atxiloketa eta espetxeratzeei buruz eta horren gaineko informazioa zabaldu dute Gara.net eta Berria.info agerkariek. Besteak beste, atxilotu zituzten lagunei buruzko autoak (pdf) "oinarri juridikorik ez" duela adierazi du errepresioaren aurkako erakundeak. Baltasar Garzon Espainiako Auzitegi Nazionaleko epailearen erabakiz, Lander Labajo, Josu Rodriguez "Nekora", Txomin Geruzaga, Joseba Elorriaga "Peski", Mikel de Gregorio "Degre" eta Aner Mimenza Soto del Realen (Madril) espetxeratu eta Zigor Goiketxea aske gelditu zen fidantzapean, 6.000 euro ordainduta. Besteak beste, Mimenza eta Labajoren atxiloketen inguruan autoan "baieztapen lotsagarriak” egiten zirela kritikatu du Arantza Zulueta abokatuak: Garzonen arabera bi gazte horiek "kale borroka egiteko argibideak ematen zituzten eta ETAko kide ziren. Baina non daude argibide horiek? Edo zergatik ez dituzte atxilotu lehenago?”, gaineratu du. Espainiako Poliziak nahi zuena entzun ahal izateko atxilotuek “tratu txarrak, presio psikologikoak eta mehatxuak” jaso zituztela ere salatu du Zuluetak, baina epaileak “ez zion kasurik egin" salaketa horri. Argazkian, atxilotuen senide eta lagunak atzean, Julen Larrinaga Askatasuneko bozeramailearekin batera eman du prentsaurrekoa Zuluetak / Etengabe.
  Politika 2007-10-25 19:51

Euskal preso gaixoen aldeko zortzi elkarretaratze egingo dituzte bihar

Erabiltzailearen aurpegia Ukberri Hilero bezala, bihar, hileko azken ostiralerako, hainbat kontzentrazio deitu du Etxerat euskal preso politikoen senideen elkarteak Euskal Herri osoan. "Gaixoak eta espetxe zigorra bete dituztenak askatu! Euskal Presoak Euskal Herrira, dagozkien eskubideen jabe!" aldarrikapen nagusiaren harira, Uribe Kostan zortzi hitzordu izango dira: 19:30ean, Armintzan, bus geltokiaren aurrean; 20:00etan, berriz, Erandion, metro aurrean; Leioan, Boulevardean; Itzubaltzeta / Romon, Xake plazan; Algortan, Telletxe plazan; Berangon, Gudari enparantzan; Sopelan, udaletxe aurrean eta Urdulizen, BBVAren aurrean. Elkarretaratzearen ondoren, Algortako Amnistia tabernan eta Itzubaltzeta / Romoko Branka herriko tabernan presoen aldeko taloak egingo dituzte. Argazkian, Itzubaltzeta / Romon 2006ko irailaren 22an hainbat solidariok egindako ekintza.
  Politika 2007-10-23 21:26

Bonbillak oparituko dituzte Algortan eta Areetan DNI zenbakia aurkeztuz gero

Erabiltzailearen aurpegia Ukberri EAEko Energiaren Euskal Erakundea (EEE) eta Getxoko Udalaren eskutik, kontsumo gutxiko bonbillak doan banatuko dira bihar eta etzi, asteazken eta osteguna, Algortan eta Areetan, hurrenez hurren. Lehenengo hitzordua bihar, hilak 24, izango da Algortako Telletxe plazan, 10:00etatik 14:00ak arte eta 16:00etatik 19:00ak arte. Etzi, berriz, ekimena errepikatuko dute Areetako Xake plazan, ordutegi berean. Kontsumo txikiko bonbilla bakarrarekin batera, erandioztarrek etxean energia aurrezteko aholkuak batzen dituzten liburuak eta ibilgailuentzako bioerregaien gaineko informazio eskuorriak eta turismoak gidatzeko doako ikastaroei buruzko informazio eskuorriak eraman ahal izango dituzte herritarrek. Baina aipatu objektuak jaso ahal izateko, Espainiako Nortasun Agiria, pasaportea, gidatzeko baimena edo Espainiako karnetaren zenbakia jasotzen duen agiri ofizialen bat aurkeztu beharko dute. Argazkian, horrelako bonbillak 3 euro baino gutxiagotan eros daitezke.
  Politika 2007-10-23 20:54

Markaidaren kontrako balizko erasoa gaitzetsi du Berangoko Udalak

Erabiltzailearen aurpegia Ukberri Atzo bildu zen Berangoko Bozeramaileen Batzordea ustez Joseba Markaida aipatu udalerriko PSE-EEren zinegotziak duela pare bat aste jasandako Getxoko bere etxearen aurkako eraso saiakera gaitzesteko. Baltasar Garzon Espainiako Auzitegi Nazionaleko 5. Epaitegiko epaileak joan den astean atxilotutako Uribe Kosta eskualdeko gazteei leporatzen die "eraso zapuztua". Garzonen esanetan, "urriaren 13an, gauez, bi molotov koktel botatzen saiatu ziren" Markaidaren etxearen aurka eta "patruila-auto bat bertan egoteak zapuztu zuen erasoa". Horrela jasotzen da, behintzat, kaleratutako espetxeratze autoan (irakurtzeko sakatu hemen). Alabaina, Getxon beharrean, Berangon bertan lekutzen du zinegotziaren etxea epaileak. EAJ, EA, PP, PSE-EE eta EB-Berdeen, hots, ordezkaritza daukaten alderdi guztien aldeko botoekin onartua izan zen adierazpena. Argazkian, Ana Landa Berangoko alkatea.
  Politika 2007-10-23 16:19

Carlos Urquijo PPren legebiltzarkideak hitzaldia emango du Areetan iluntzean

Erabiltzailearen aurpegia Ukberri Carlos Urquijo Gasteizko Legebiltzarreko PPren ordezkariak "Situacion tras el nuevo Plan Ibarretxe" izeneko hitzaldia eskainiko du gaur arratsaldean Areetan. Alderdi Popularrak jakinarazi duenez, hitzordua arratsaldeko 19:30ean izango da, Areetako kultur etxean, Mesedetako Ama kaleko 13. zenbakian, bigarren solairuan. Urquijorekin batera, Marisa Arrue Espainiako Kongresuko diputatua, Getxoko PPren presidente eta bozeramailea eta Getxoko udaldeko zinegotzia dena izango da. Ekimena Getxoko Alderdi Popularrak berak antolatu du.
  Politika 2007-10-22 23:33

Anjel Figueroa Gurutzetako ospitalera eraman dute

Erabiltzailearen aurpegia Ukberri Anjel Figueroa (argazkian) gaur goizean ingresatu dute Gurutzetako ospitalean, bere egoeraren jarraipenerako egin behar dizkioten proba medikoak egiteko, Uribe Kostako Amnistiaren Aldeko Mugimenduak Etengabe bitakoraren bidez jakinarazi duenez. Bestalde, Askatasunak gogoratu duenez, Figueroa 1994tik geroztik dago espetxean eta epilepsia tenporala eta eskuinaldeko esklerosi mesiala gaixotasunak pairatzen ditu, azken hori larria eta sendaezina dena. Presondegi ezberdinetan, konorte galerak, absentziak, memoria galerak eta aluzinazioak izan ditu eta bere osasunak okerrera egin du. Gauzak horrela, 2006ko maiatzean garunetako operazio "korapilatsu eta arriskutsua" egin zioten Gurutzetako ospitalean, espero ziren emaitzak lortu gabe. Egun, Figueroak krisialdi etengabeak ditu, geroz eta maizagoak. Bere medikuen arabera, Figueroak ordutegi aldaketak, loaren gabezia eta estres egoerak ekidin behar ditu derrigorrez, baina "bizibaldintza hauek, ordea, ez datoz bat kartzela erregimenarekin".
  Politika 2007-10-22 22:08

Kaskagorri eta Gaztesarea Espainiako Auzitegi Nazionalera deitu dituzte biharko

Erabiltzailearen aurpegia Ukberri Kaskagorri Bilboko gazte mugimenduaren konpartsaren eta Gaztesarearen, gazte mugimenduaren ataria eta Gaztesarea.net-eko argitaratzailea, arduradunak deitu dituzte bihar goizean Espainiako Auzitegi nazionalean deklaratzeko. Izan ere, bi erakundeei aurtengo Bilboko Aste Nagusian burututako Kaskaerrepresaliatuen omenaldiaren harira, "terrorismoa goratzea" eta "biktimak umiliatzea" delituak egotzi diete. Kaskagorri gazte konpartsak azken urteotan aipatutako Kaskaerrepresaliatuen omenaldia antolatzen ibili da eta inoiz ez du inolako arazorik izan orain arte. Gaztesarearen kasuan, berriz, www.kaskagorri.org Kaskagorriren webgunea Gaztesareako zerbitzarian kokatuta egotea, "arrazoi nahikoa" izan da kereila jarri duenaren arabera, Gaztesareari delitua ere leporatzeko, Gaztesareak publiko egin duen idatziaren arabera. Era berean, Bilboko ezker abertzaleak elkarretaratzea deitu du auzia salatzeko eta "erasotzat" jo du. Protesta bihar asteartean arratsaldeko 8etan egingo da, Etxebarrieta Anaien plazan. Argazkian, Kaskagorriko hainbat lagun Aste Nagusiko konpartsen arteko herri kiroletan.
  Politika 2007-10-22 20:24

Areetako PSE-EEren egoitzaren aurkako erasoa gaitzetsi du Getxoko Udalak

Erabiltzailearen aurpegia Ukberri Getxoko Udaleko Bozeramaileen Batzordeak pasa den ostiralean PSE-EEk Areetan duen egoitzaren aurkako erasoa gaitzetsi du. Batzordea alkatearen ekimenez bildu da gaur Getxoko udaletxean eta "indarkeriazko ekintza horiek" gaitzesteaz gain, PSE-EEri eta zauritutako pertsonari bere elkartasuna eta gertutasuna adierazi dizkie. Azkenik, "egile material eta intelektualei" horrelako ekintzak "berehala eta behin betiko" uztea exijitu die, getxoztar eta euskal gizartearen "bake eta bizikidetza nahien aurkakoak baitira". Bozeramaileen Batzordea bildu baino lehen, Imanol Landa alkateak eta batzordea osatzen duten talde guztiek aurretik emana zuten gaitzespen deklarazioa hainbat hedabideen bitartez. Argazkian, 2005ean erre zuten Sopelako PSE-EEko egoitza.
  Politika 2007-10-22 15:09

Espainiako lehiaketa bat egingo dute Itzubaltzetan

Erabiltzailearen aurpegia Ukberri Datorren azaroaren 24an, Pump It Up (PIU) delako jolas-aparatuaren Espainiako Lehiaketaren finala egingo da Itzubaltzeta / Romon, Getxoko Komiki eta Manga Azokaren barruan. Azken urteotan, "jolas horrek arrakasta handia lortu du eta zale asko erakarri ditu" komiki azokara, Getxoko Kultur Etxeak jakitera eman duenez. Horren inguruan hainbat lehiaketa sortu dira eta, horien artean Munduko PIU Lehiaketa da nagusi. Getxoko azokaren aurreko ekitaldietan jolas hori ez da falta izan eta aurten Manga Gunean "gozatzeko aukera" egongo da. Lehiaketaren finalean 30 lehiakide arituko dira 4 orduz baino gehiagoz. Hiru maila ofizialetako irabazleek sarietan 6.000 euro jasoko dituzte eta Mexikon abenduaren 22an ospatuko den munduko finalean parte hartuko dute. Getxoko Kultur Etxeak antolatutako saioez gain, azken urteotan hainbat eskualde lehiaketa burutu dira Leioako Artea merkataritzaguneko Artea Bowling aretoan. PIU dantza simulaziorako bideojokoa da, makina batetaz baliatzen dena. Jokalariek makinak jartzen duen musikaren erritmoa jarraitu behar dute oinak pantailak eta argiek zehazten duten lekuan jarriz. Argazkia: Espainiako Wikipedia.
  Politika 2007-10-22 12:53

PSE-EEren egotzaren aurkakoa bezalako erasoekin "asper-asper eginda" dagoela dio Getxoko alkateak

Erabiltzailearen aurpegia Ukberri “Benetan asper-asper eginda gaude indarkeria adierazpen hauek ikustean, ez dute inolako justifikaziorik eta, gainera, Getxoko auzokideen gehiengoak errefusatu egiten ditu”, azpimarratu zuen Imanol Landa alkateak (argazkian) larunbat goizean egindako adierazpenetan, PSE-EEk Areetako Ibaigane kalean duen egoitzari egindako erasoa gaitzezteko. Udal agintaria ostiral gauean izan zen bertan eta elkartasuna adierazi zien zauritutako 62 urteko emakumeari eta Alderdi Sozialistaren militantei. Getxoko alkateak gaineratu zuen "kontradikzioa eta koherentzia falta izugarria" dutela pertsona horiek (erasoaren egileei zuzenduz), "ustezko eskubide batzuk defendatzen dituzten bitartean pertsonen oinarrizko-eskubideak urratzen dituztelako, biolentzia, indarkeria, mehatxua eta gogorkeria erabiliz".
  Politika 2007-10-22 12:22

Azken atxiloketen erantzuntzat bere gain hartu dute Areetako PSE-EEren egoitzaren aurkako erasoa

Erabiltzailearen aurpegia Ukberri "Gara" egunkariak atzo plazaratutakoaren arabera, Uribe Kosta eskualdean izandako atxiloketen "erantzun zuzentzat" jo du ezezagun batek, ostiral gauerdian Areetako PSE-EEren egoitzaren aurka bi "molotov" koktelekin egindako erasoa. Garak larunbatean jazotako deiaren bitartez, aipatu ekintza bere gain hartu eta "Espainiako Gobernuko alderdia den PSOE" egin zuen atxiloketen erantzule lagunak. Horrekin batera, "borroka bidea" dela aldarrikatu eta espetxeratutako sei gazteen askatasuna exijitu zuen. Eusko Jaurlaritzako Herrizaingo Sailak adierazitakoaren arabera, gaueko 12ak jota gertatu zen erasoa PSE-EEren egoitza barruan 30 bat lagun zeudela. Koktelak sozialisten egoitzan sartu ez ziren arren, 62 urteko emakume bat zauritu zen eta erredura bat du lepoan. Osasun zerbitzuek jazoera izandako tokian artatu zuten, nahiz eta zauri arinak izan. Argazkian, 2005ean Sopelako PSE-EEko egoitzak jazo zuen erasoa.
  Politika 2007-10-20 08:17

Josu Rodriguez "Nekora" Soto del Realgo erizaindegira eraman dute

Erabiltzailearen aurpegia Ukberri Baltasar Garzon Espainiako Auzitegi Nazionaleko 5. Epaitegiko epaileak presondegira bidalitako sei gazteak (autoa (doc) irakurtzeko sakatu hemen), Madrilgo Soto del Realgo espetxean daude informazio iturri ezberdinek jakinarazi dutenez. Lander Labajo, Josu Rodriguez "Nekora", Txomin Geruzaga, Joseba Elorriaga "Peski", Mikel de Gregorio "Degre" eta Aner Mimenza sei ordutako deklarazio egin ostean eraman ditzute presondegira. Josu Rodriguez "Nekora"ren kasuan, Baltasar Garzonek agindu du espetxeko erizaindegira eramatea "baldintza egokietan" egon dadin, mutikoak pairatzen dituen arazo psikiatrikoak direla eta. Dena den, deklarazioa inkomunikazio egoeran egin behar izan zuen. Bestalde, Askatasunak salatu du Baltasar Garzonek agindutako protokoloaren ezarpena ezerezean gelditu dela. Izan ere, konfidantzako medikuek behin baino ez dute atxilotuak bisitatzeko aukera izan eta abokatuei ez dizkiete erakutsi kalabozoetan grabatu omen diren bideoak. Gainera, atxilotuek beren senideei baieztatu diete torturatuak izan direla. Argazkian, atzo atxilotuen egoeraren berri emateko Algortan egindako asanblada.