Politika 2007-07-09 23:17

Larunbat eta igandean egingo dizkiete ongi etorri ekitaldiak Terrones eta Perez del Riori

Erabiltzailearen aurpegia Ukberri Atzo 21:00ak aldera iritsi zen Jagoba Terrones Berangora (argazkian), espetxe zigorra osorik beteta, Jaen II espetxetik irten ondoren. Horrenbestez, ongi etorri ekitaldia larunbat honetan, uztailak 14, egingo zaio, herriko frontoian, arratsaldeko 8etan, Uribe Kostako Amnistiaren Aldeko Mugimenduak Etengabe bitakoraren bitartez jakinarazi duenez. Igandean (uztailak 15) beste horrenbeste egingo zaio Marian Perez del Riori Algortan. Ekitaldia Txiki-Otaegi plazan egingo da, 13:00etan. Ondoren manifestazioa egingo da bertatik hasi eta herriko kaleetan zehar, Amnistia tabernan amaitzeko. Azkenik, 14:30ean herri bazkaria egingo da. Bazkariko txartela ohiko lekuetan har daiteke, 15 euroren truke. Perez del Rio uztailaren 1ean irten zen kalera.
  Politika 2007-07-09 22:49

Luis Maria Zuluaga “Zulu” Pinuetako errefuxiatuaren heriotzaren 13. urteurrena izango da ostiralean

Erabiltzailearen aurpegia Ukberri Luis Maria Zuluaga “Zulu” Pinuetako errefuxiatua 1994ko uztailaren 13an hil zen Venezuelan 63 urte zituela, Uribe Kostako Amnistiaren Aldeko Mugimenduak Etengabe bitakoraren bitartez gogoratu duenez. Heriotza burmuinetako isurketa baten ondorioz izan zen, baina erbestean igaro zituen bederatzi urteetan Zuluagaren osasuna asko makaldu zen eta giltzurrunetako gaixotasun bat dela medio astean bitan hemodialisia egiten zioten. Izan ere, saio baten ostean pairatu zuen heriotza eragin zion burmuinetako isurketa. Uribe Kostako Amnistiaren Aldeko Mugimenduak “Zuluren duintasuna eta justizia sozialaren alde bizitza osoan egindako borroka” goraipatu nahi izan du ekimen horrekin.
  Politika 2007-07-09 22:41

Iker Beristain Espainian epaitzea aztertzen ari dira

Erabiltzailearen aurpegia Ukberri Iker Beristain Gutierrez "Beris" algortarraren (argazkian) kontrako euroagindua eman du Baltasar Garzon Espainiako Auzitegi Nazionaleko epaileak, 20 minutos egunkariak zabaldutakoaren arabera. Hala, Frantziako Ministerio Publikoa biltzen ari den informazioa esku artean duenean, Fiskaltza espainiarra aipatu atxilotze agindua zabaldu edo zaintzako epaileari jurisdikzio-eskumena eskatzeko agindua ematea aztertzen ari dela adierazi du agerkariak, iturri judizialak aipatuz. Azken erabaki horren arabera, Espainian epaituko lukete Beristain. Bitartean, Fleuryn dago espetxeratuta Algortako gaztea, ostiralean bertan, Laurence Le Vert epailearen aurrean egon ondoren, Uribe Kostako Amnistiaren Aldeko Mugimenduak Etengabe bitakoraren bitartez jakinarazi duenez.
  Politika 2007-07-09 21:41

Getxoko Udalaz gaindiko erakundeetan ere ordezkaritza izango dute oposizioko alderdiek

Erabiltzailearen aurpegia Ukberri Lau urte atzera eginez, behintzat, aurrekaririk ez du ostiraleko ez ohiko osoko bilkuran (argazkian) gertatutakoa: aurkeztutako proposamen guztiak aho batez onartu zituzten, Alderdien Legearen eraginpean, Getxoko Udal Batzarrean ordezkaritza duten talde guztiek. Gauzak horrela, oposizioko udal alderdietako (PP, PSE-EE eta EB-Aralar, hau da, EAJ ez beste guztiak) bozeramaleek udalean erabateko arduraldia izango dute legegintzaldi honetan, baita administrari laguntzaile eta aholkulariren laguntza ere. "Eskaera hori aspalditik egiten ari ziren oposizioko alderdiak eta orain errealitate bihurtu da Eusko Alderdi Jeltzalearen Gobernu Taldeak eta oposizioak lortutako hitzarmenari esker. Hitzarmen horrek, beraz, oposizioko alderdien lan baldintzak hobetuko ditu eta horren ondorioz, Udalaz gaindiko erakundeetan ordezkaritza ere edukiko dute, hain zuzen ere, Bilbao Bizkaia Ur Partzuergoan, Bizkaiko Garraio Partzuergoan eta Abra-Getxo Kirol Portua enpresako administrazio kontseiluetan eta erakunde autonomoetako zuzendaritza batzordeetan eta kontratazio udal mahaian ere", azaldu dute udal iturriek.
  Politika 2007-07-09 21:05

"Pastelaren zatia" ezean, "getxoztarrek aukeratutakoa" eskatu du Eusko Abertzale Ekintzak

Erabiltzailearen aurpegia Ukberri Ostiral goizeko ez ohiko osoko bilkuran alkate ordeak, udal batzordeen eta erakunde autonomoen buruak eta kideak eta udalez kanpoko erakundeetarako ordezkariak izendatu zituen ekainaren 16an osatutako Getxoko Udal Batzarrak. Bilkura formalki bukatu ondoren, Mariespe Fuertes Eusko Abertzale Ekintzako ordezkariak (argazkian) "apartheid egoera" salatu eta "irtenbide legala" proposatu zuen, LOREG hauteskunde legearen 182.2 artikulua aplikatzea eskatuz: "Guk pastelik ez dugu nahi. Herriak agindu diguna da bete nahi duguna eta duintasun osoz aurrerantzean bete nahi duguna beste zinegotziok dituzuen baldintza berdinetan. Getxoztarrek aukeratutako EAEko bi ordezkariok gure lekua eduki behar dugu Getxoko Udal Batzarrean, eta badaude horretarako legeak ematen dituen aukerak", adierazi zuen eledun ekintzaileak. Imanol Landa alkateak, ordea, "eskubide batzuk urratzen dituzuen bitartean, beste batzuk eskatzea" egotzi zion EAEri. Besteak beste, Algortako batzokiak jasotako azken erasoaren artean "mutu" geratzea leporatu zion ezker abertzaleko alderdiari. Pintaketak eta tirabirak izan ziren ostegunean hainbat lagunek "Ertzaintzaren salataritzat" jo zituztenean EAJko egoitzan zeuden batzuk. "Faltsukeria eta entzugabekeria" iturri jeltzaleen arabera.
  Politika 2007-07-06 15:48

Iker Gallastegi epaitu egingo dute

Erabiltzailearen aurpegia Ukberri Iker Gallastegi (argazkian / Etengabe), Irantzu Gallastegi preso berangoztarraren osaba, epaitu egingo dute Espainiako Auzitegi Nazionalean, Europa Press albiste agentziak atzo jakinarazi zuenez. Fernando Grande-Marlaska epaileak erabaki hori hartu zuen apirilaren 30ean egindako epaian. Horren arabera, Tele5 telebistako erreportaje baterako ezkutuko kameraren bidez hartu zizkioten hitzak direla eta "terrorismoaren gorazarrea" leporatuko diote Iker Gallastegiri. Fiskaltza, Ermuako Foroa eta Espainia Ta Askatasuna akusazioek urte bat eta hiru hilabete eta bi urte bitarteko eskaerak egin dituzte. Epaiketa burutu bitartean, Grande-Marlaskak 3.000 euroko fidantza ere ezarri zion Gallastegiri. Epaiketa Espainiako Auzitegi Nazionaleko Penalerako Aretoaren Lehenengo Atalean burutuko da. Iker Gallastegiren aurkako salaketak eta ikerketaren hasiera iaz izan ziren eta berangoztarrak pasa den otsailaren 22an deklaratu zuen. Bere aldetik, Uribe Kostako Amnistiaren Aldeko Mugimenduak salatu du "'El Correo Español'-ek dagoeneko kondenatu" duela Gallastegi.
  Politika 2007-07-05 20:19

Bihar udaletxean elkartzera deitu du Getxoko EAEk

Erabiltzailearen aurpegia Ukberri Behin udal gobernu taldea osatu eta gero, ostiral honetan, uztailak 6, ez ohiko osoko bilkura egingo da, goizeko 10:30ean, Getxoko udaletxean. Biharkoan udal erakunde eta batzordeetako presidentziak eta soldatak banatuko dira, "pastelaren banaketa", tokiko Eusko Abertzale Ekintza alderdiak salatu duenez. Hain zuzen, ekainaren 16ko udalbatza berriaren osaketa ekitaldian bezala, bihar ere bertan izango direla adierazi dute EAEko ordezkariek. Horrekin batera, herritar guztiak deitu dituzte, "udalbatzarraren osaketa demokratikoa aldarrikatzera joatera". Ekainaren 16an, Eusko Abertzale Ekintzako 50 bat lagunek ekin zioten "Getxon EAEk 3.247 boto, zinegotzi 2" lelopeko kontzentrazioari, bilkura hasi aurretik, udaletxeko inguruetan eta barnealdean makina bat ertzain eta udaltzain zeudela. Areto barruan, Josu Amezaga EAEko hautetsiak besoa altxatuz hitza eskatu zuenean, berriz, udaltzainei agindu zieten hura kanporatzeko. Erresistentziarik egin gabe Amezaga eta Mari Espe Fuertes EAEko beste hautetsia eraman zituzten (argazkian) udaletxearen kanpoalderaino.
  Politika 2007-07-05 18:11

Herri kontsultaren aldeko ekimena uztailaren 15ean jarraituko da Sopelan

Erabiltzailearen aurpegia Ukberri Algortan, Leioan, Plentzian eta Getxon izan ondoren, herri kontsulta baten aldeko deia egiten duen furgoneta uztailaren 15ean helduko da Sopelara, bertako Lokarri taldeak iragarri duenez. "Akordioaren eta kontsultaren aldeko herritarren sare" gisa definitzen den kolektiboak jakinarazitakoaren arabera, autoa bi orduz izango da Udaletxe plazan, Gasteizko eta Nafarroako Legebiltzarrei herri kontsultak egin ditzaten eskariari sopeloztarren sinadurak batzeko. Herri partehartzea eta bake prozesua sustatzeaz gain, Lokarrik azpimarratu dituen hiru helburu nagusiak dira "ETAk biolentzia bazter dezan eskatzea, bazterketarik gabeko elkarrizketaren alde egitea gure arazoak konpontzeari begira eta bakean eta demokrazian oinarritutako akordio bat lortzeko beharra azpimarratzea". Dagoeneko 10.000 bat lagun sinatu ei dute apirilaren 27an martxan jarritako testua. Argazkian, Lokarrik Bilbon egindako manifestazio bat / Lokarri.
  Politika 2007-07-05 14:28

Beristainen aldeko manifestazioan bi lagun identifikatu ditu Ertzaintzak

Erabiltzailearen aurpegia Ukberri Atzo 250 lagun inguru bildu ziren Telletxen Iker Beristain “Beris” gazte algortarraren atxiloketa salatzeko, Uribe Kostako Amnistiaren Aldeko Mugimenduak Etengabe bitakoraren bitartez jakinarazi duenez. "Manifestazioa abiatu orduko Ertzaintzak jendea inguratu eta mehatxuen artean bi pertsona identifikatu zituzten. Bestela ere, denbora guztian mobilizazioan parte hartzen ari ziren guztiak bideoz grabatu zituzten", salatu du errepresioaren aurkako erakundeak. Gaur eta bihar, 20:00etan kontzentrazioak egingo dira Telletxen Beristain eta atzemandako gainerako ustezko ETAko kideen atxiloketak salatzeko. Argazkian, urrian egindago beste mobilizazio bat / Etengabe.
  Politika 2007-07-04 21:07

Igandean askatuko dute Jagoba Terrones berangoztarra

Erabiltzailearen aurpegia Ukberri Jagoba Terrones berangoztarra igande honetan, uztailak 8, irtengo da kalera Jaengo espetxetik, ezarri zioten 5 urteko espetxe zigorra oso-osorik beteta, Uribe Kostako Amnistiaren Aldeko Mugimenduak Etengabe bitakoraren bitartez jakinarazitakoaren arabera. Lehenengo harreraren ostean, uztailaren 14an (larunbata) egingo zaio ongi etorri ekitaldia Berangon bertan. Bestela ere, Terrones Amnistiaren Aldeko Batzordeen kontra abiarazitako 33/01 sumarioan ere auzipetuta dago, eta azken aurreikuspenen arabera sumario horren epaiketa aurtengo udazkenean hasiko da Espainiako Auzitegi Nazionalean, errepresioaren aurkako erakundeak nabarmendu duenez. Horretan 10 urteko espetxe zigorra eskatzen dio fiskalak, Amnistiaren Aldeko Batzordeen partaidea izateagatik.
  Politika 2007-07-04 20:52

Gaur aurkeztu dute Getxoko udal gobernu talde berria

Erabiltzailearen aurpegia Ukberri "Lan taldea alkatearen figuraren gainean eta alderdi politikoekin eta herritarrekin akordioak lortzea eta elkarrizketak mantentzea" izango dira Getxoko Udaleko gobernu talde berriaren (argazkian) ezaugarri nagusiak, gaur goizean ofizialki adierazi dutenez. Gobernu taldea Imanol Landa alkateak eta EAJeko 9 zinegotzik osatuko dute (Alderdien Legea aplikatu ezean, Eusko Abertzale Ekintzari legokioke jelkideen hamargarren eserleku hori, baita PPren azkena ere). Udal agintari getxoztarrak esan du "oposizioko alderdiekin" harremanak izan dituztela eta berehala hainbat hitzarmen aurkeztuko dituztela. Landak nabarmendu duenez, “helburu batekin koordinatutako lan taldea, hau da, herritar getxoztarren babes handiena jaso duen gobernu taldea sustatzea eta garatzea dela asmoa".
  Politika 2007-07-04 19:53

Beristainen askatasuna aldarrikatuko dute iluntzean Algortan

Erabiltzailearen aurpegia Ukberri Euskadi Irratiak 11:00etan esan duenez Iker Beristain Gutierrez "Beris" algortarra (argazkian) ei da herenegun atxilotutako ustezko bi ETAko kideetako bat. Frantziako Poliziak Parisetik gertu, 30 bat kilometrotara ekialderantz, atzeman zituen biak Saint Thibault-des-Vignesen. Espainiako Polizia Nazionaleko Informazioko Komisaria Nagusiak ETAko kide bilatuenen zerrendan sartu zuen Beristain 2007ko martxoan. "El Correo Español"-ek zabaldutakoaren arabera, Frantziara ihes egin zuen 2004an, Guardia Zibilak Bizkaian egindako polizia operazioaren ondorioz, "non hamabost bat ustezko ETAko kide eta laguntzaile" atxilotu zituzten. Beristainen atxiloketa salatzeko, manifestazioa deitu du gaur 20:30ean, Telletxetik abiatuta, Uribe Kostako Amnistiaren Aldeko Mugimenduak / Etengabe.
  Politika 2007-07-03 18:21

Gotzone Mora fitxatu du Valentziako Gobernuak

Erabiltzailearen aurpegia Ukberri Gotzone Mora Getxoko zinegotzi ohia, EHUko Soziologia irakaslea eta PSE-EEko kide espedientatua Valentziako Gobernuko kidea bilakatu zen atzo. Francisco Camps popularrak zuzentzen duen exekutiboan Inmigrazio eta Hiritartasunerako Sailaren idazkaria izango da Mora, eta Rafael Blasco sailburua eta Camps presidentea baino ez du izango bere gainetik. "ABC" egunkariak jakinarazi duenez, Moraren izendapena atzo iragarri zuen Blascok, bere ardura hartzeko ekitaldian. Blascoren aburuz, Mora "inmigrazio gaietan aditua" izateaz gain, "beren lurraldeetatik ateratzen direnean etorkin askok aurrera eraman behar duten giza eskubideen aldeko borrokaren" eredua ere bada. 2005ean Esperanza Aguirrek Madrilgo Autonomiaren Inmigraziorako Erregio Foroaren kide izendatu zuen Gotzone Mora. Bestalde, eta Sare Antifaxistak zabaldutakoaren arabera, azken hauteskundeetan Morak PPren aldeko kanpaina egin zuen, pasa den ekainaren 27an "kontzentrazio sionista" batean parte hartu zuen Madrilgo Iranen enbaxadaren aurrean, eta azken hilabeteotan jeneral kolpistaren omenez sortutako Soriako Yagüe Fundazioan zein CNIren finantzazioa jasotzea eta sekta bezala jardutea hainbatetan leporatu dizkioten UCE alderdiarekin lotutako ateneoetan hainbat hitzaldi eman ditu. Euskal politikariak pasa den apirilean Força Ciutadana alderdia sostengatu zuen. Argazkian, Gotzone Mora ekainaren 27ko kontzentrazioan / Sare Antifaxista.
  Politika 2007-07-01 23:01

Marian Perez del Riori harrera beroa egin diote Algortan

Erabiltzailearen aurpegia Ukberri Atzo gauean, berrehun bat lagunek egin zioten emozioz beteriko harrera Marian Perez del Rio kaleratu berri duten preso politiko algortarrari Algortako Amnistia tabernan. Perez del Rio goizeko 9ak aldera irten zen Martutene espetxetik, 15 urteko zigorra beteta, eta negar artean atzean utzi zituen Maitane Sagastume eta Miren Azkarate preso politikoak zein lagun duen preso sozial bat. Presondegiko zuzendaritzakoek egindako mehatxuak tartean, eta ospakizun apalen ostean, Perez del Rio senideekin bildu eta Txetxu Fernandez bere senarra bisitatzera joan zen Burgoseko espetxera. 21:00etan, berriz, Portugaleteko Izar Gorri herriko tabernan jaso zuen lehenengo harrera eta bertan eta Euskal Etxean bere argazkiak jaso zituen. 22:00etan, Leioako gasolindegitik abiatu zen auto karabanan 50 bat lagun alboan zituela. 22:30ean, Amnistia tabernaren aurrean aurreskua dantzatu eta lore eskaintza egin zioten, "Zai dago ama" abestiaren doinupean. Ondoren, eusko gudariak abestu eta preso eta errefuxiatuen aldeko brindisa egin zuten, geroago Marianek Amnistian eta Gorrondatxen argazkiak batu zituela.
  Politika 2007-06-29 20:33

Presoen aldeko zortzi kontzentrazio izango dira iluntzean

Erabiltzailearen aurpegia Ukberri Hilero bezala, gaur, azken ostirala, hainbat kontzentrazio deitu du Etxeratek Euskal Herri osoan "Estatus politikoa orain. Euskal presoak Euskal Herrira!" lelopean. Uribe Kostan honakoak izango dira hitzorduak: 19:30ean, Armintzan, bus geltokiaren aurrean; ordu erdi beranduago, 20:00etan, Erandion, metro aurrean; Itzubaltzeta / Romon, Xake plazan; Algortan, Telletxen; Berangon, Gudari enparantzan; Sopelan, udaletxe aurrean; Leioan, Boulevardean; eta Urdulizen, BBVAren aurrean. Kontzentrazioen ostean, presoen aldeko taloak izango dira Leioako Kurkudi eta Itzubaltzeta / Romoko Branka herriko tabernetan. Argazkian, Algortan egindako presoen aldeko elkarretaratze bat.