Berangoko Otxantegi Herri Lurreko ekintzaileek jakinarazi dute Ertzaintzak eskatu duela lurren hustea egitea maiatzaren 7tik 10era bitarterako. "Data zehatzaren hautaketa batzorde judizialaren esku dago, eta baliteke datozen egunetan jakinaraztea", komunikatu dute. Hala, herritarrei eskatu diete deialdietara adi mantentzeko, haiek erresistentzian jarraituko baitute.

EAJ izan da berriro ere Eusko Legebiltzarrerako indar bozkatuena Uribe Kostan; 36.208 boto jaso dituzte jeltzaleek, boz guztien % 40,5 pilatuta. Atzetik, EH Bildu izan da babes gehien izan duena, 22.658 boto pilatuta (% 25,3). Herriz herri, 2020an bezala, udalerri guztiek izan dute EAJ alderdi bozkatuena, Lemoiz izan ezik, 2024 honetan EH Bildu izan baita boto-paper gehien jaso dituena bertan. Bizkaian, hala, jeltzaleek aurreko bozetan baino 22.000 babes gehiago lortu duten arren, eserleku bat galdu dute, eta 11 pilatu, EH Bilduren aurretik, 8 irabazi dituenak, aurrekoan baino bi gehiago (ia 50.000 boto gehiago jaso ditu).