Jendartea 2006-09-25 19:31

Gaurtik aurrera Sopelan ere birziklatu ahal izango dira CD eta DVDak

Erabiltzailearen aurpegia Ukberri CD eta DVDak bildu eta birziklatzeko zerbitzua estreinatuko dute gaur goizean Sopelako udaletxeko sarreran. Zerbitzua tokiko udalak, Bizkaiko Foru Aldundiak eta Garbiker enpresa jarri dute martxan, dagoeneko hainbat udaletan martxan dagoen Cederika ekimenaren bidez. Auzotarrak goizeko 9:00etatik 13:30era eta 16:00etatik 21:00etara hurbildu ahal izango dira horra CD eta DVD erabiliak botatzera. Diskoak txikitu egingo dira bertan egon litezkeen datu konfidentzialez inork jabe ez ditzan eta ondoren Garbigunera garraiatuko dira. Azkenik, CD eta DVDen lehengai nagusia, polikarbonatoa, metalezko produktu berriak egiteko erabiliko da.
  Politika 2006-09-25 14:58

Poza nagusi Sopelan Tokeroren askatasuna dela eta

Erabiltzailearen aurpegia Ukberri Juan Mari Tokero Sopelako preso ohia larunbatean, goizeko 09:30ak aldera, irten zen Terueleko espetxetik. Irten orduko, bertan izan zituen zain senideak eta lagunak, autobusez Aragoiko kartzelaraino joanak. Alabaina, musuak eta besarkadak trukatu eta berehala Sopelarako bidea hartu zuten. Herrian harrera hunkigarria egin zioten Tokerori. Autobusetik jaitsi eta lagunak besarkatu eta agurtu ondoren, ikurrinen lerroen artean herriko tabernara joan zen emaztea eta ilobarekin batera (argazkian). Bere omenez egindako agur dantzari so egon ostean, herriko tabernaren hormatik jaso zuen argazkia Tokerok. Sopeloztarrak berreskuratutako askatasuna ospatzeko, brindisa, pintxoak eta ardoaren artean lagun arteko giroa nagusitu zen inguruan. Uribe Kostako Amnistiaren Mugimenduak Etengabe bitakoraren bidez zabaldu duenez, datozen egunotan zehaztuko da ongi etorri ekitaldiaren data. Argazkia: Etengabe.
  Politika 2006-09-22 15:23

Juan Mari Tokero sopeloztarra bihar askatuko dute

Erabiltzailearen aurpegia Ukberri Sopelako Juan Mari Tokero presoa bihar, larunbata, kaleratuko da Teruelgo espetxetik. Uribe Kostako Amnistiaren Aldeko Mugimenduak Etengabe bitakoraren bidez jakinarazi duenez, bihar bertan harrera egingo diote Sopelan, printzipioz 17:30ean, herrira iritsiko den ordua oraingoz zehazterik ez badago ere. Gaur gauean, berriz, senide eta lagunen autobusa irtengo da Sopelatik Teruelera Juan Mari espetxeko atarian besarkatzeko eta herrira ekartzeko. Espetxean oraindik ez dute zehaztu zein ordutan utziko dute libre, baina goizean irtengo dela espero da. Hartara, autobusa goizeko 9:30erako Teruelen bertan izatea espero dute.
  Hezkuntza 2006-09-12 16:47

Ander Deunako ikasleak, euskeraren inguruan

Erabiltzailearen aurpegia Ukberri Sopelako Ander Deuna ikastolako Derrigorrezko Bigarren Hezkuntzako (DBH) 1. mailako A eta B taldeen ikasleak euskeraren egoera aztertzen ari dira egunotan, bi lantaldetan banatuta. Gaur, Algortara joan dira, eta “gauza asko” ikasi dituzte. Egizu Getxo Euskaldun! elkartean egon dira eta heldu, nagusi zein umeentzako ekintzak daudela azaldu diete. Bertan irteera mota asko antolatzen direla jakinarazi diete, besteak beste “ikastaro asko, eskia (neguan), surfa (udan)”, eta abar. Geroago, UKBERRI.NETen egon dira, baita Koska irratian ere. Bihar, berriz, Sopelara joango dira “dendetan euskaraz hitz egitera”, eta “dendariek nolako erreakzioa duten ikustera”. Datu horiekin atzo egin zuten plano batean, zonaldeetan euskeraren erabilera kokatuko dute. Etzi, txandak aldatuta, berriro izango dira Egizun zein eskualdeko komunikabide elebidun eta euskaldunetan, Boluntzarreta elkarteak argitaratzen duen “UK” aldizkaria barne.
  Jendartea 2006-09-03 14:09

Zauritu bana izan da Sopelan jazotako bi trafiko istriputan

Erabiltzailearen aurpegia Ukberri DYA elkarteko zerbitzu medikuek J.M.S.G. 33 urteko Berangoko gizonezkoa artatu zuten atzo motorrez izandako trafiko istripuaren ostean. Ezbeharra goizeko 5ak aldera gertatu zen Sopelako Loiola Ander Deuna kalean gidariak motorretik erori zenean. Berangoko bizilaguna Gurutzetako ospitalera eraman behar izan zuten sortutako hezur haustura bat artatzeko. Kale berean baina pasa den astelehenean, gaueko 10:15ak aldera, auto batek B.G.M. 45 urteko emakume bilbotarra harrapatu zuen. Istripuaren ondorioz DYAko osasun-boluntarioek emakumea Gurutzetara eraman behar izan zuten.
  Jendartea 2006-09-02 20:43

Barinatxeko duna babestea aldarrikatu du Sopelako Ezker Batuak

Erabiltzailearen aurpegia Ukberri Sopelako Ezker Batua-Berdeek Barinatxeko berezko duna babestea eta defendatzea eskatu dute, garrantzi handiko ingurumen horretako ekosistema manten dadin. Zentzu horretan eta Jose Vicente Ojinaga Sopelako EBBko zinegotzi eta bozeramaileak iragarri duenez, taldeak proposamen bat aurkeztuko du hurrengo hirigintza batzordean, hondartza babesteko asmoz. Bi dira proposamenak zehazten dituen ekimen nagusienak: alde batetik, duna babesteko ez zaio jendeari bertan egoten utzi behar eta bestalde, landareak jarri beharko lirateke. Ojinagaren arabera “beharrezkoa da duna bera finkatzea egokia den landaretza landatuz”. Era horretan, Sopelako Ezker Batua-Berdeek Getxoko Udalak Barinatxe hondartzako bere aldean martxan jarritako ekimenei segida eman nahi diete, Agenda 21 markoaren barruan. Argazkian, bi emakume Barinatxen surf egin ostean / Ondacaracola.
  Gazteok 2006-08-30 15:23

Bihar da azken eguna Euskal Herriko III. Graffiti Lehiaketan izena emateko

Erabiltzailearen aurpegia Ukberri Bihar, abuztuaren 31, bukatuko da Euskal Herriko III. Graffiti Lehiaketan izena emateko epea. Duda-mudan dauden 15 urtetik gorako sprayzale euskaldunek parte hartzeko aukera daukate oraindik, Euskara Elkarteen Topaguneak Abadiñon duen egoitzara egin nahi duten graffitiaren zirriborroa bidaltzen badute, gaur edo bihar askoz jota. Jasotako zirriborroen artean, epaimahaiak hamar aukeratuko ditu, eta horiek izango dira irailaren 16an marraztuko direnak, Tolosan egingo den gazteen sormena eta ekoizpen artistikoa sustatzeko lehiaketa honen finalean.
  Jendartea 2006-08-30 14:15

Gazte sopeloztar bat hil da auto istripuz

Erabiltzailearen aurpegia Ukberri A.F.A. izeneko 28 urteko gazte sopeloztarra hil zen iragan den ostegunean, hilak 26, auto istripu baten ondorioz. Ezbeharra goizaldeko 01:15ean jazo zen Sopelan bertan. Gaztearen Renault Megane autoa Bi-2134 errepidetik zihoan, Urdulizerako noranzkoan, baina errepidetik irten zen, eta gero horma baten aurka talka egin zuen, Eusko Jaurlaritzako Herrizaingo Sailak jakinarazi zuenez. Larrialdietarako langileak biktima artatzeko bertaratu arren, ezin izan zuten ezer egin gidariak zituen zauri larrien eraginez hil baitzen. Era berean, O.C.P. 22 urteko gazte bilbotarra zauritu egin zen ostiraleko ordu txikietan izandako auto istripu batean. Ezbeharra Leioako Abantzadako errepidean gertatu zen, bi autok aurrez aurre talka egin zutenean. O.C.P. Gurutzetako ospitalera eraman behar izan zuten. Bestalde, iragan abuztuaren 20an, igandea, Ertzaintzak pertsona bat atxilotu zuen Erandion alkoholaren eraginpean gidatzen zuelakoan.
  Jendartea 2006-08-15 21:47

Sopelako hondartzetako sarbide berriak "hondamendi ekologikotzat" jo ditu Ezker Batuak

Erabiltzailearen aurpegia Ukberri Uribe Kostako korridoretik Larrabasterra eta Sopelako hondartzetara sartzeko errepide berriak zabaltzeak ingurunean eragiten ari diren "kalteaz" eta "hondamendi ekologikoaz" ohartarazi du, prentsa ohar bidez, Jose Vicente Ojinaga Sopelako EB-Berdeetako bozeramaileak. Ildo horretan, Bizkaiko Foru Aldundiak bultzatutako egitasmoaren hurrengo faseek izan dezaketen eraginaz ere abertitu du zinegotzi sopeloztarrak, "udalerrirako agresio berria dakartelako". Hori guztiagatik, "egitasmoaz falta dena bertan behera uzteko" eskatu du Ojinagak, "kalte handiagoak ekidin aldera" eta, bide batez, aipatu azpiegituraren ezaugarriez "hausnarketa" egiteko. Larrabasterra eta Sopelako hondartzetara joateko bide berriak joan den ostiralean (abuztuak 11) zabaldu zituzten, baita oinezkoentzako zatia eta bidegorria ere.
  Gazteok 2006-08-11 19:33

Uribe Kostako Aralarrek Sopelako gaztetxea itxi izana salatu du

Erabiltzailearen aurpegia Ukberri Sopelako Ganebarri gaztetxea hustu izana salatu du Uribe Kostako Aralarrek. Alderdiak uztailaren 21ean kaleratutako prentsa oharrean nabarmendu zuen "eskualde horretako gazteak elkartzeko leku barik geratu direla". Era berean, Aralarrek kritikatu zuen "Sopelako Udalak ez dituela gazteek euren gestionatuko dituzten lokalik egokitu, hala eskatu arren. Eta gainera, eskariei kasu egin beharrean, gaurko egunean gazteek zuten elkartzeko leku bakarra ixtea erabaki duela Udalak". Horren aurrean, Uribe Kostako Aralarrek "gazteentzako lokalak egoki ditzala eskatzen dio Sopelako Udalari, hori baita bere egitekoa, herritarrei behar dituzten zerbitzuak egokitzea. Hori dela eta Sopela eta Urdulizko Gazte Asanbladaren eskariarekin bat egiten dugu eta Udalak hartu duen erabakia salatzen dugu". Argazkian, SUGAko kideak Sopelako udaletxeko teilatuan egindako protestan.
  Gazteok 2006-07-26 18:22

Ostiralean Sopelako udaletxean gertatutako liskarrei buruz balorazio kontraesankorrak dituzte alkateak eta SUGAk

Erabiltzailearen aurpegia Ukberri Ostiral goizean, Ganebarri gaztetxea Ertzaintzak hartuta zegoela ikusi ondoren, Sopela eta Urdulizko gazteek Sopelako udaletxearen kanpoaldean ordu erdiz kontzentratu ostean eraikinean sartu izana erabat gaitzetsi du Udal Gobernuak. EAJko politikarien aburuz, “kontrolatu gabeko talde bat” udaletxea “inbaditu” zuen eta Udaltzaingoko kide batzuei “eraso” egin zien. Sopela eta Urdulizko Gazte Asanbladak (SUGA), berriz, salatu du kontrakoa: “gazte asanbladako kide batzuk barrura sartzen ahalegindu direnean desalojoa salatzeko asmoz, txakur udaltzain batek gazte bat eraso du, biak lurrean jira-biraka ibili direlarik”. UKBERRI.NETek, funtsean, SUGAk esandakoa berretsi behar du: lasai asko sartu egin ziren gazteak udaletxera, udaltzain batek gazte informaziorako lehiatilaren aurrean gazte bat lurrera bota eta besoarekin lepoa estutu arte. Ondoren, gazteak polizia gainetik kendu zuen eta giroa berotu zen, beste udaltzainak bere kidea babesteko erasotzailea eta gazteen artean jarri zirela (argazkian). Une horretan, enfrentamendua bultzadetara eta oihuetara mugatu zen, nahiz eta bigarren udaltzain batek borra atera eta gazteek berau ebatsi.
  Gazteok 2006-07-26 14:32

Ganebarriren desalojoa salatzeko kanpaldia kentzera behartu du Ertzaintzak

Erabiltzailearen aurpegia Ukberri Ostiralean Sopela eta Urdulizko Gazte Asanbladak (SUGA) udaletxe ondoko parkean jarritako kanpaldi mugagabea kentzera behartu du gaur goizean EAEko Poliziak. Goizeko 8:30ean heldu dira brigada higikorreko “beltzak”, kalez jantzitako poliziak eta uniformedun ertzainak, guztira 25 bat polizi, une horretan zeuden dozena bat gazte desalojatzera. Kalez jantzitako polizia batek, “polizia onaren planta eginez” gazte bat identifikatu du eta kanpaldia kentzeko agindu judiziala erakutsi arren ez die eman, SUGAko kideek jakinarazi dutenez. Identifikazioaz gain ez da bestelako gertakizunik egon. Gazteek kanpin dendak kendu dituzte baina bertan jarraitzen dute, “beltzen” furgoneta baten ondoan. Arratsaldeko 7etan batzarra egingo du SUGAk. Argazkian, SUGAko bi kide kanpaldiko materiala zaintzen, atzean "beltzak" dituztela.
  Gazteok 2006-07-21 14:11

Sopelako udaletxeko teilatura igo dira Ganebarriko gazteak

Erabiltzailearen aurpegia Ukberri Behin ordu erdiko elkarretaratzea bukatuta, Sopelako udaletxera sartu dira Ganebarri gaztetxea hustu izana salatzen ari ziren neska-mutilak. Orduan hasi dira liskarrik gogorrenak: lau udaltzain gazteei bidea mozten saiatu dira eta bost minutu luzez egon dira bultzadak, irainak, eta abar. Bitartean, beste hainbat gazte kalejiran abiatu dira udaletxean barrena, alkatetza eta idazkaritzatik igaroz. Halabaina, biak ala biak itxita zeuden. Ondoren, teilatura igo, "Ganebarri desalojatuta. PNV, hurrengoa zuena" lelopeko pankarta eskegi eta goian jarraitzen dute neska-mutilak. Bitartean, megafoniaz, gaur 20:00etan, udaletxe aurrean kazerolada egitera deitzen ari da Sopela eta Urdulizko Gazte Asanblada; eta bihar, ordu eta leku berean, manifestazioa izango da.
  Gazteok 2006-07-21 13:32

Sopelako udaletxe aurrean jarri dute hitzordua arratsaldean

Erabiltzailearen aurpegia Ukberri Hogei bat gazte dago kontzentratuta orain Sopelako udaletxe aurrean, Ertzaintzak Ganebarri gaztetxea hustu izana salatzeko. Udaltzainen burua ere atera zaie, bertara sartzeko oztoporik jar ez dezatela eskatuz. Tartean, "alkateak eta beste guztiek udaletxetik ihes egin dute", Sopela eta Urdulizko Gazte Asanbladako (SUGA) kideek UKBERRI.NETi adierazitakoaren arabera. Hainbat pankarta ere egiten jardun dira neska-mutilak. Horietako batean, "Ganebarri desalojatuta. PNV, hurrengoa zuena" irakur daiteke. Tirabirarik ere ez da falta izan udaletxera sartu nahi zuten herritarren eta gazteen artean; laupabost udaltzainen eskuhartzea eragin du horrek, baina inguruan dabiltzan ertzainak hurbildu ere ez dira egin. Tirabirak gora behera bertan ordu erdiz kontzentratuta egotea adostu dute tokiko poliziekin. Bestalde, arratsaldeko 8etarako mobilizazioa deitu dute udaletxe aurrean.
  Gazteok 2006-07-21 12:20

Ganebarri hustu izana salatzeko Sopelako udaletxe aurrean kontzentratzera deitu dute

Erabiltzailearen aurpegia Ukberri Sopelako Ganebarri gaztetxe ingurura bertaratutako UKBERRI.NETeko kazetariari baieztatu diotenez, barruan gazterik ez zegoen 7:30ak aldera Ertzaintza heldu denean eta, hortaz, "liskarrik eta atxiloturik ez da egon", polizia autonomikoek zein neska-mutilek baieztatu dutenez. Hala ere, agindua zein epaitegitik heldu den "ezin" dutela esan adierazi dute ertzainek. Langileek etxea ixten dabiltzan bitartean, gero eta gehiago dira Ganebarri inguruetara –Brigada Higikorreko bi furgoneta eta beste hainbat polizi gaztetxera hurbiltzea oztopatzen ari dira– hurbiltzen ari diren gazteak. Dagoeneko, Uribe Kosta eskualdeko txoko ugaritatik joandako hogei bat neska-mutil dago bertan eta Sopelako udaletxe aurrean kontzentratzera deitu du Sopela eta Urdulizko Gazte Asanbladak (SUGA). Argazkian, bi langile Ganebarriko leihoak ixten.
  Gazteok 2006-07-21 11:20

Ganebarri gaztetxea desalojatzen ari da Ertzaintza

Erabiltzailearen aurpegia Ukberri Sopelako Ganebarri gaztetxea hustu du Ertzaintza goizean goiz irekitako operazio baten bidez. Sopela eta Urdulizko Gazte Asanbladako (SUGA) kideek esan bezala, une honetan ez dago gazterik gaztetxearen barruan eta inguruan bildu diren dozenaka gazte "oso urrun" daude, Brigada Higikorreko "pila bat" polizi Ganebarrira hurbiltzea eragozten diela. SUGAko kideen arabera, zonaldea kalez jantzitako ertzainez eta "beltzez josita dago". Dena den, deia egin dute jendea bertaratzeko ahalik eta arinen "Bumbo aldera". Bitartean, etxeko jabeak kontratatutako langileek ekin diote Ganebarri gaztetxea ixteari. Argazkian, ertzainek "segurtasun" eremua jarri dute Igeltsera gaztetxe ohiaren parean.
  Gazteok 2006-07-07 17:39

Sopelako gaztetxearen desalojoari data jarri diote filtrazioek

Erabiltzailearen aurpegia Ukberri Ganebarri Sopelako gaztetxea hilaren 19a baino lehen desalojatzeko asmoa daukate Ertzaintzak eta Udalak, Sopela eta Urdulizko Gazte Asanbladako (SUGA) kideek UKBERRI.NETi jakinarazi diotenaren arabera. Gainera, litekeena da operatiboa uztailaren 13an izatea, Larrabasterrako jaien hasierarekin batera. Ganebarri gaztetxea hartzen duen Elorriagane etxearen jabeak leihoen neurriak hartu zituen pasa den asteartean, balizko desalojoaren osteko adreilu hormak egiteari begira. Izan ere, Ertzaintzak, EAEko Herrizaingo Sailak eta Sopelako Udalak ez dituzte bere gain hartu lan horiek. Informazio hori jabearen senideen gertu dauden informazio iturrietatik eskuratu du SUGAk. Bestalde, Imanol Garai Sopelako alkatearen ingurukoek adierazi diete EAJko burukideak udalerri berean ospatzen diren Larrabasterrako jaien lehenengo egunean egin nahi duela desalojoa. Tartean, SUGAk ekimenak antolatzen jarraituko du. Besteak beste, igande honetan Ikasle Abertzaleek Eskola Ibiltaria ekimena aurkeztuko dute 19:00etan eta asteartean Lur Zati Planari buruzko hitzaldia izango da ordu berean. Ganebarri gaztetxetik 72 ordutan irteteko agindua ekainaren 14 eta 20 bitartean jaso zuten abokatuak eta eraikinaren inguruan otsailean identifikatutako 3 gaztek.
  Kultura 2006-06-29 22:49

Laugarren urteurrena ospatzen ari da Sopelako Habana

Erabiltzailearen aurpegia Ukberri Sopelako Kubazaleak eta kubatazaleak pozik egon daitezke egunotan. Izan ere, laugarren urteurrenera ailegatu deneko aitzakian, Sopelako metro geltoki ondoan dagoen Rincon Habana kafe-tabernak hainbat ekitaldi antolatu ditu egunotan. Gaur iluntzean sardina janaz goza daiteke. Bihar, berriz, 22:00etan Flamenco Jazz Fussion musikaren txanda izango da Kandela taldearen eskutik. Urteurrenaren ospakizunei amaiera emateko Egiptoko dantzak ikusgai izango dira etzi, larunbata, iluntzeko 9etan. Argazkian, Habanako ume batzuk auto baten gainean jolasten / Malias.
  Kultura 2006-06-29 21:20

Imanol Garai: “jaietan aldarrikapenak ez du lekurik”

Erabiltzailearen aurpegia Ukberri Imanol Garai Sopelako alkateak, lasaitasunez baina dozena erdi bat udaltzainek zainduta, parte hartu du goizean zehar eliza eta udaletxe artean burutu diren jaietako jarduera ofizial guztietan. Udal mandataria pozik agertu da jaietan egiten ari den eguraldiarekin eta atzoko ekitaldietan parte hartu zuen jende kopuruarekin. Aldiz, ez du hitz onak izan txosna desobedientzialarientzat. Bere aburuz, “jaietan aldarrikapenak ez du lekurik, jai-giroa baino ez da egon behar. Gauzak aldarrikatzeko jaiak ezik urte osoa dago eta Gobernu Taldeari zuzenean helarazten bazaigu, askoz hobeto”. Dena den, argi utzi du jaiak apurtzearen aldeko apustua ez duela egingo: “ez gaude neurriak hartzearen alde, ondo pasatzearen alde gaude”. Argazkian, Imanol Garai alkatea, atzean txosna ilegal bat duela.
  Kultura 2006-06-29 20:48

Txosna bat eraman eta beste bat ekarri dute Sopelan

Erabiltzailearen aurpegia Ukberri Sopelako San Pedro jaiak aurrera jarraitzen dute eta udaletxearen ondoko landako bi txosna ilegalek ere bai. Azken kasu horretan aldaketa txiki batekin: atzo enpresa batek jarritako txosna, goizeko 5ak arte ehunaka auzokide eta parrandazaleentzat irekita egon dena, eraman dute gaur arratsaldeko 2etan langileek Udalaren presioei kasu eginez, baina hori egin eta ordu erdira dozenaka auzokideek beste txosna bat paratu dute leku berean (argazkian). Txosna Batzordeko kideak horretan zeudela, udaltzainak bertaratu dira “hori debekatuta dagoela” gogoratzeko eta bertako arduradunen identifikazioa egiteko. Txosna muntatzen ari ziren auzokideek Udal Gobernuari galdetzeko esan diete, udaletxean bertan baitaukate Txosna Batzordeko elkarteen eta ordezkarien datu guztiak. Bestalde, arratsaldean San Pedro Esku Pilota Lehiaketaren Azkenak eta Oliver magoaren ikuskizuna egiten ari dira frontoian eta plazan, hurrenez hurren. 20:00etan Arantza ta Panxok erromeria egingo dute kioskoan eta 23:00etan Habeas Corpusen kontzertua izango da plazan.

Nabarmenak

Zorion agurrak