Jendartea 2006-05-19 20:42

Sahararen alde 24 orduz egongo dira igerian Sopelan

Erabiltzailearen aurpegia Ukberri Asteburu honetan, hots, maiatzaren 20a eta 21a bitartean, "24 ordu igeri egiten" maratoi solidarioaren lehenengo edizioa egingo dute Abadesolon, kirol eta nazioarteko lankidetza arloetan diharduten udalerriko bi elkarteentzako dirua biltzeko. Udalbatzarra osatzen duten alderdi politiko guztien babesarekin, 24 ordutan zehar eta etenik gabe, jendea igerian aritzea da Moreaga Ugerzaleak (MUS) kirol taldearen eta Nuyun Sahararen aldeko elkartearen asmoa. Hartara, hiru modu egongo dira diruz laguntzeko:batetik, egindako kilometro kopurua adina diru eman ahal izango du igerilari bakoitzak. Bestalde, izen-emandako laguntzaileen dirua ere jaso ahal izango dute elkarteek. Hori dela eta, berebizikotzat jotzen dute Sopelako bizilagunen parte-hartzea. Azkenik, kutxa bat jarriko dute antolatzaileek, igeri egin ez arren, nahi duen guztiak dirua emateko. Argazkian, joan den astean egindako aurkezpena.
  Jendartea 2006-05-09 23:48

Iruzur bati buruz ohartarazi ditu merkatariak Sopelako Udalak

Erabiltzailearen aurpegia Ukberri Sopelako Udalak atzo kaleratutako prentsa-oharrean adierazitakoaren arabera, udal pilotalekuak (argazkian) ustez argitaratuko duen aldizkariko saltzaile baten bisita jaso dute herriko hainbat merkatarik. Hain zuzen ere, dendari eta tabernariek frontoiko arduradunekin harremanetan jarri direlako izan omen dute horren berri. Gauzak horrela, inolako argitalpenik kaleratzeko asmorik ez dagoela jakinarazi dute udal ordezkariek eta, aipatu laguna bisitan joan zaienei, Udaltzaingora jotzea eskatu diete, gertatutakoa salatu eta ustezko iruzurtiaren deskribapen fisikoa eman dezaten.
  Jendartea 2006-05-06 23:37

Dozenaka gazte batu dira Ganebarri gaztetxean Okupazioaren Aldeko Eguna ospatzeko

Erabiltzailearen aurpegia Ukberri Goizeko 11etan hasi dute gazte sopeloztar eta urduliztarrek aurtengo Okupazioaren Aldeko Eguna. Sopelako Ganebarri gaztetxea apaindu nahian, tabernaren aurreko horma margozten eman dute goiza, lortutako emaitzaz harro gelditu direla. Ondoren, 15ak aldera, entsaladak eta babajana izan dute, nahiz eta baten bat, gosez edo, mahaitik altxatu eta txuletoi eder batzuekin bueltatu den, beste 70 bat lagunen begirada harrituen artean. Bazkaria bukatuta, Sopelan zehar poteoan artitu dira gazteak eta 21:00etan kontzertua hasi da, Gorlizko All Jazz Erazaleen gozamenerako. Datorren astean berriro hitzordua izango du Sopela eta Urdulizko gazteriak, maiatzaren 13an, larunbata, Kuadrilen Eguna izango baita. Argazkian, gaurko bazkariaren irudi bat.
  Jendartea 2006-05-05 21:47

Parking berriak egiten hasi aurretik, dauden tokiak baliatzea eskatu du Sopelako Ezker Batuak

Erabiltzailearen aurpegia Ukberri Jauregizar plazan (argazkian) lur-azpiko parkinga egitea bezalako lanei hasiera eman aurretik, udalerriko trafikoaren gaineko azterketa “serioa” egitea eskatu du Sopelako EB-Berdeak taldeak. Federalistek atzo kaleratuta prentsa-oharrean aipatzen dutenez, “herrian aparkatzeko arazoak ez dira TAOren edo eraikitzaile eta sustatzaileek soilik etekina ateratzen duten proiektuen bidez konpontzen, bietan interesa duten enpresak egon daitezkeela alde batera utzita”. Besteak beste, hainbat kaleetan, trafikoaren noranzkoa aldatzea eskatzen dute Ezker Batukoek. “Aparkatzeko toki gehiago” egotea ahalbidetuko luke horrek, euren iritziz.
  Jendartea 2006-04-30 17:50

Sopela eta Urdulizko okupazio mugimendua: batasunak egiten du indarra

Erabiltzailearen aurpegia Ukberri 80. hamarkadaren bukaeran sortu zan Sopelako Gazte Asanblada eta hortik gutxira gaztetxe zaharra martxan hasi zen. Asanblearismoa eta autogestioa ziren eguneroko lana aurrera eramateko tresnak eta helburuak ere bai. Urte horietan gazteentzako topaleku bat egoteak ekimen ugari sortzeko aukera eskaintzen zuen: hitzaldiak, kontzertuak, tailerrak... horrelako gune batek herriarentzako duen garrantzia erakutsiz eta beharrezkoa bihurtuz. Gehien iraun zuen gaztetxea izan zan baina urte batzuen ostean eraitsi zuten inolako azalpenik eman gabe eta barruan zegoen dena suntsituz. Argazkian, Igeltsera gaztetxea zena, ezkerrean, eta Ganebarri gaztetxea, eskuinean.
  Kirolak 2006-04-10 21:08

Sopelako Hondartza I. Golf Txapelketa Irekia antolatu dute maiatzaren 14rako

Erabiltzailearen aurpegia Ukberri Maiatzaren 14an Atxabiribil hondartzan jokatuko den "Sopelako Hondartza" izeneko lehenengo golf txapelketa irekia aurkeztu zuten larunbatean udal arduradunek. Ricardo Ibarra Komunikazio zinegotziarekin batera, Gonzalo Elias Bizkaiko Golf Federazioko presidentea, Mark Maconnel Golf Artxandako presidente eta Euskal Herriko Golf Federazioko ordezkaria eta Julio Ibarra Metro Bilbao konpainiako komunikazio zuzendaria ere izan ziren hereneguneko agerraldian. Golfa hondartzan jokatzea "ikusgarritzat" jo zuten antolatzaileek eta ekimen "berritzaile" honek bederatzi zulo izango dituela argitu zuten. Partaideak federatuak egon beharko dute eta 'handicap' zehatz bat eduki beharko dute antolatzaileen gonbidapena jasotzeko. Guztira, 36 partaide lehiatuko direla jakinarazi zuten. Argazkian, ezkerretik eskuinera, Julio Ibarra, Gonzalo Elias, Ricardo Ibarra eta Mark Maconnel, larunbateko aurkezpenean.
  Kultura 2006-04-07 20:30

Jaialdia egongo da bihar Ganebarri gaztetxean

Erabiltzailearen aurpegia Ukberri Zapatu honetarako, Sopela eta Urdulizko Gazte Asanbladak (SUGA) egitarau oparoa antolatu du. Jaialdiari hasiera emateko ATEA (Asociacion para un Trato Etico con los Animales) elkarteko kideek solasaldian arituko dira arratsaldeko 6etatik aurrera Ganebarri gaztetxean. Azken astean, animaliak zituen zirkua egon da Sopelan eta, horren harira, hitzaldi bat antolatu dute ATEAkoek. Bestalde, zezenketak, larrua, esperimentazioa eta, orohar, animaliekin zerikusia duten gaien inguruko mahai-ingurua izango da. Bestalde, 20:00etan musikari emango zaio tartea. Ordu horretan kantautoreek eskainiko dute emanaldia; "Tipiko pero cierto", besteak beste. Argazkian, egun horretan joko duen Libertad Kondizional taldea.
  Jendartea 2006-04-04 21:46

Apirilaren 8an jaialdia egongo da Ganebarri gaztetxean

Erabiltzailearen aurpegia Ukberri Zapatu honetarako, Sopela eta Urdulizko Gazte Asanbladak (SUGA) egitarau oparoa antolatu du. Jaialdiari hasiera emateko ATEA (Asociacion para un Trato Etico con los Animales) elkarteko kideek solasaldian arituko dira arratsaldeko 6etatik aurrera Ganebarri gaztetxean. Azken astean, animaliak zituen zirkua egon da Sopelan eta, horren harira, hitzaldi bat antolatu dute ATEAkoek. Bestalde, zezenketak, larrua, esperimentazioa eta, orohar, animaliekin zerikusia duten gaien inguruko mahai-ingurua izango da. Bestalde, 20:00etan musikari emango zaio tartea. Ordu horretan kantautoreek eskainiko dute emanaldia; "Tipiko pero cierto", besteak beste. Argazkian, egun horretan joko duen Libertad Kondizional taldea.
  Politika 2006-04-04 20:56

Gotzon Alcalde presoak bisita izan du azkenean

Erabiltzailearen aurpegia Ukberri Uribe Kostako Amnistiaren Aldeko Mugimenduak Etengabe bitakoraren bitartez jakinarazi duenez, azkenean, Gotzon Alcalde euskal preso politikoak bere familiarren bisita eduki zuen apirilaren 1ean. "Hau izan da otsailaren 13an atxilotu zutenetik egin ahal izan duen lehen bisita. Aurreko asteburuan ez zieten gurasoei bisita egiten utzi eta etxera bueltatu behar izan zuten semea ikusi gabe. Asteburu honetan, ordea ez dute arazorik izan", azaldu dute errepresioaren aurkako erakundeko kideek. Bestalde, asteazken honetan, apirilak 5, mobilizazioak izango dira, herri guztietan, "Errepresiorik ez, konponbideari bai" lelotzat hartuz. Algortan, Telletxen izango da, 20:00etan.
  Kultura 2006-04-02 01:47

Badok Hamairuk irabazi egin du Esaera Zaharren Txapelketaren XIII. edizioa

Erabiltzailearen aurpegia Ukberri Badok Hamairu Berangoko eta Bilboko taldeak (argazkian, ezkerreko hiru lagunak) “Ez dok hamairu” esaera apurtuz Sopelako Esaera Zaharren Txapelketaren XIII. edizioa irabazi du, 2003an eta 2005ean eskuratutako titulua berrituz. Sopelako Ander Deuna ikastolan egin den finalean, 2004ko irabazleak izan dituzte aurrean, Bilboko Zorrotza auzoko AEKren euskaltegiko Zorrotza taldea, alegia. Lehia gogorra izan da eta finala bihotzekoa eragiten dutenekoa izan da, berdinketaz berdinketa igaro baita Badok Hamairu nagusitu arte. Oihane Pereak eta Jon Maiak abestu dituzte atsotitzen inguruko bertsoak eta Maka sopeloztar ezagunak eta Iker Acero surflariak epaitu dituzte taldeek proposaturiko esaera zaharren zuzentasuna. Lehenengo lana Pozoinak eta Ritxiak taldeak finalerdietatik kanporatzea izan dute. Goizean zehar Algortako Bertsolari Eskolak prestatutako bertsoak entzuten eta musikariek lagundurik 17 taldek hartu dute parte txapelketako kanporaketetan, 70 bat pertsona inguru. Esaera zaharren zaleek Mungian izango dute hurrengo hitzordua, ekaina aldera.
  Jendartea 2006-03-31 19:11

Erandioko Zikloturista Ibilaldiaren aurrean hainbat argibide eman ditu Sopelako Udalak

Erabiltzailearen aurpegia Ukberri Erandioko Txirrindulari Elkarteak antolatuta, larunbat honetan (apirilak 1) ospatuko den Erandio-Erandio XIV. Zikloturista Ibilaldia dela eta, ibilgailuentzako hainbat argibide eman ditu Sopelako Udaltzaingoak. Polizia iturriek iragarri dutenez, 9:30ak aldera igaroko dira txirrindulariak bertatik eta, "herriko zirkulazioan eragin handirik izango ez duen arren", Loiola A. Deuna eta Akilino Arriola kaleen arteko gurutzagunea zainduko dute udaltzainek; baita Loiola A. Deuna eta Loroño artekoa ere. "Sor daitezkeen eragozpenak barkatu eta polizia agente eta antolatzaileek emandako argibideei kasu egiteko" eskatu die gidariei Sopelako Udaltzaindoak.
  Kultura 2006-03-31 18:20

Sopelako Esaera Zaharren Txapelketak hamairu urte beteko ditu larunbat honetan

Erabiltzailearen aurpegia Ukberri Sopelako AEKk urtero antolatzen duen Esaera Zaharren Txapelketaren hamairugarren edizioa ospatuko da larunbat honetan, apirilak 1, Alfabetatze Euskalduntze Koordinakundeak jakinarazi duenez. Txapelketa honen oinarriak bertsoak eta esaerak dira: partehartzaileek esaera zaharretan oinarritutako bertsoak entzun eta esaera horiek zeintzuk diren esan behar dute puntuak irabazteko. Hiru fase izaten dira: eguerdian Sopelako tabernetan zehar ibiliko dira taldeak, Algortako Bertsolari Eskolak prestatutako bertsoak entzuten eta musikariek lagundurik. Ostean, herri-bazkaria egingo dute Ander Deuna ikastolan, eta hau amaitutakoan finalak jokatuko dira, eguerdiko talde onenen artean.
  Jendartea 2006-03-29 23:05

Eguzki-panelak jartzen ari dira Sopelako udal pilotalekuan

Erabiltzailearen aurpegia Ukberri Sopelako Udalak eraikin publikoetan energia sistema berriztagarriak jartzearen aldeko "apustuari" heldu dio eta horrela egiten ari da herriko kultur etxean –argazkian–. Energiaren Euskal Erakundearekin (EEE) egindako hitzarmen baten ondorioz, 36 eguzki-panel jartzen ari dira udal pilotalekuko eraikinaren teilatuan. "Panel hauek urtean 5.300 kilowatt-eko potentzia sortuko dute eta CO2 67 tona atmosferara bidaltzea ekidingo dute, hori baita zentral termiko batek botatzen duen CO2ko tona kopurua, eguzki-panelekin gertatzen ez dena", adierazi dute udal arduradunek.
  Jendartea 2006-03-29 19:44

"Orgia erraldoia" egitekotan, neurriak hartuko ditu Sopelako Udalak

Erabiltzailearen aurpegia Ukberri Adar-jotzea izan ala ez, mezu elektroniko bidez ostiral honetarako (martxoak 31) egindako "orgia erraldoi" deialdiari erantzun dio Sopelako Udalak. Honela dio tokiko erakundeak gaur helarazitako prentsa oharrean: "Interneten bidez, postak bidaliz, Sopelako hondartzan 'makro-jaia' baterako deialdia egin da. Honek sortu duen oihartzunaren aurrean, Sopelako Udalak data horretan hondartza edo honetatik hurbil dauden guneak erabiltzeko ez duela eskabiderik jaso zehaztu nahi du. Dena den, tokiko erakundeak guztien eskubideak bermatzeko lan egingo du deialdia burutzekotan, eta auzokideei zein hondartzako ingurumenari kalteak ekiditen saiatuko da. Hondartza eta honen inguruko guneak erabilera publikoko zonaldeak dira eta guztiok errespetatu behar ditugu".
  Jendartea 2006-03-29 18:29

Hiru urtez emazteari tratu txarrak ematea egotzi diote sopeloztar bati

Erabiltzailearen aurpegia Ukberri Ertzaintzak Sopelako 33 urteko gizonezko bat atxilotu zuen atzo arratsaldean aipatu herrian bertan, ustez, gutxi gorabehera duela hiru urtetik hona, emazteari tratu txar fisiko eta psikologikoak emateagatik, Eusko Jaurlaritzako Herrizaingo Sailak jakinarazi duenez. Polizia iturrien arabera, biktimak astelehen gauean jaso zituen azken aldiz tratu txarrak, familiaren etxean. "Eztabaida bat izan ondoren, senarrak emakumea astindu zuen bortizkeriaz, eta buruan kolpatu zuen armairu batekin. Halaber, besoetatik indarrez hartuz, etxetik botatzen saiatu zen, bultzaka, irainak esaten zizkion bitartean", azaldu dute.
  Jendartea 2006-03-29 11:55

Sopeloztar bat atxilotu dute Santutxun drogak saltzea egotzita

Erabiltzailearen aurpegia Ukberri Bilboko Guardiako Epaitegiak P.L.V. Sopelako 50 urteko bizilaguna espetxeratzea agindu zuen atzo, droga-trafiko delituaren egilea delakoan. Hainbat hedabidek zabaldutakoaren arabera, martxoaren 23an atxilotu zuen Bizkaiko hiriburuko Udaltzaingoko Drogen Aurkako Unitateak 'Perico' ezizenez ezaguna dena. Santutxu erdialdeko tabernetan kokaina saltzen ari zen une horretan, polizia iturriek diotenez. "Aipatu zonaldean droga horren kontsumoa areagotzen ari zela ikusita, Juan de la Cosa kaleko ostalaritza establezimenduetan ikertzen hasi ziren polizia agenteek eta, bertara lagun ugari kokaina erostera joaten zirela antzeman zuten", azaldu dute komunikabideek Udaltzaingoak emandako argibideak aipatuz. Antza, Sopelatik Bilbora joaten zen egunero P.L.V. eta "txikteroa izango balitz aurkeztuz, bere bezeroekin harremanetan jartzen zen eta purutasun handiko kokaina saltzen zien".
  Politika 2006-03-28 23:01

Espetxeratu zutenetik bisitarik ez du izan Gotzon Alcaldek

Erabiltzailearen aurpegia Ukberri Uribe Kostako Amnistiaren Aldeko Mugimenduak Etengabe bitakoraren bitartez jakinarazi duenez, Gotzon Alcalde sopeloztarraren gurasoak larunbatean joan ziren Fleury-Merogis espetxera semea atxilotu zutenetik lehenengo aldiz ikusteko asmoz. "Baina tramiteren bat falta zela esan zieten eta bisita egin barik bueltatu behar izan zuten etxera", errepresioaren aurkako erakundeak zehaztu duenez. Larunbat honetan berriro joango dira semea ikustera, behar diren tramite guztiak konponduta daudelakoan.
  Kultura 2006-03-28 21:47

Jaietako egitaraua osatzeko ideia lehiaketa deitu du Sopelako Udalak

Erabiltzailearen aurpegia Ukberri San Pedro eta Karmengo jaiei begira, ideia lehiaketa deitu du Sopelako Udalak, "ekimen berritzaileak saritzeko asmoz". Guztira, 600 euro banatuko dituzte irabazleen artean eta ideia proposatzen duen pertsonak edo taldeak hori gauzatzeko egindako ekarpena ere hartuko dute kontutan. Apirilaren 10eko 10:00ak arte egongo da horretarako aukera. Bestalde, jai guneetan txosnak jartzen "utziko" dutela adierazi dute udal arduradunek, "Sopelako gizarte, kultur eta kirol elkarteek euren ekimenak egin ahal izateko dirua lortzeko bitartekoa direlako". Prentsa ohar bidez azaldu dutenez, "festetan txosna jarri ahal izateko, Sopelan legalki osatutako elkarteak izan beharko dira eskatzaileak; eta jaien egitaraua lantzen eta garatzen lagundu beharko dute". Argazkian, Gatillazo taldearen kontzertua igazko Karmengo jaietan, Larrabasterran.
  Jendartea 2006-03-28 13:34

TAOren aurkakoa desegin eta Sopelaren aldeko Plataforma sortu dute

Erabiltzailearen aurpegia Ukberri "Gehiengo absolutua ezarriz eta gobernatzen duen herriari muzik eginik, Sopelako udaletxean EAJk darabilen totalitarismoaren aurrean", TAOren aurkako plataformak "zentzurik ez" daukala ondorioztatu eta taldea bera desegitea erabaki dute bere kideek. Horrela adierazi dute euren bitakoran argitaratutako ohar baten bidez. Hala ere, haietariko batzuk Sopelaren aldeko Plataforma deituriko mugimendua sortu dute. Euren hitzetan, "TAOren aurkako izaera inkonformista areagotuko duen korrente berri honek Sopelako Udalak egin eta egiten duen inkongruentzia sortari aurre egingo dio". Sopelako Auzokideen Elkartea sortu dela ere jakinarazi dute, "herriko auzokideen eta erakunde publikoen arteko zubia izateko asmoz, azken hauen kudeaketak zalantza handiak sortarazten baititu".
  Kultura 2006-03-20 18:44

Astebete geratzen da Sopelako Esaera Zaharren Txapelketan izena emateko

Erabiltzailearen aurpegia Ukberri Sopelako AEKk urtero antolatzen duen Esaera Zaharren Txapelketak badu data: aurtengo edizioa, hamairugarrena, apirilaren 1ean, larunbatarekin, ospatuko da, Alfabetatze Euskalduntze Koordinakundeak jakinarazi duenez. Jada zabalik dago izena emateko epea. Parte hartzeko (10 euro taldeko) edota bazkarira joateko (15 euro) izena eman daiteke martxoaren 27a baino lehen nikola@aeknet.net eta aitor@aeknet.net posta elektronikoetara idatzita edo 946 764 876 telefono zenbakira deituta. Txapelketa honen oinarriak bertsoak eta esaerak dira: partehartzaileek esaera zaharretan oinarritutako bertsoak entzun eta esaera horiek zeintzuk diren esan behar dute puntuak irabazteko.

Nabarmenak

Zorion agurrak