Jendartea 2006-02-23 22:32

Kulturgune berria izango du Iturrieta partean Sopelak

Erabiltzailearen aurpegia Ukberri Ricardo Ibarra Hirigintza zinegotziak lagunduta, Kurtzio kulturgunea izango dena aurkeztu du gaur goizean Imanol Garai Sopelako alkateak. Herrigunetik hurbil, Iturrieta parkean egongo den azpiegitura berriak egun beste kokaleku bat daukaten Nikola AEK eta udal euskaltegiak eta Helduen Hezkuntza Iraunkorreko Zentroa hartuko ditu. Horretaz gain, Sopelako Gazte Plana garatuko dute bertan, udal agintariek adierazitakoaren arabera, eta haurrentzako lokalak eta 160 lagunentzako auditorioa ere egongo dira. Garairen hitzetan, "aspalditik asmoa da Sopelan kulturgune berria egitea. Oraingokoa txiki geratu zaigu; duela 25 urte egin zen eta dagoeneko ez dio herritarren eskaerari erantzunik ematen". Energiaren Euskal Erakundearekin izandako hartuemanei esker, eguzki-panelak jarriko dituzte, "zentro berriak bere burua energiaz hornitzeko". Guztira, 900.000 euro baino gehiago inbertituko dituzte eta udaberrian eraikitzen hastea espero dute.
  Kultura 2006-02-23 09:56

Sopeloztarrek lau egun izango dituzte mozorrotzeko

Erabiltzailearen aurpegia Ukberri Sopelako Udalak jarduera ezberdinak antolatu ditu asteburu honetan ospatuko diren Inauteriak direla eta. Bihar bertan, otsailak 24, nagusiei zuzenduta egongo dira ospakizunak: joan den urtean kontua mexikarrez mozorrotzea izan bazen, aurten 20 eta 30eko hamarkadetako jaia egingo dute, herriko tabernetan zehar. Larunbatean, berriz, inauteri-kalegira egongo da Uribe Bazterra musika taldearen eskutik. Azkenik, igandean eta asteartean txikienak izango dira protagonistak: pailasoen ikuskizuna, mozorroen lehiaketa eta desfilea izango dituzte neska-mutilek igandean eta umeentzako jarduerak asteartean. Besteak beste, hiru kategoria jarri dituzte mozorro lehiaketarako: 0tik 6 urtera, 7tik 12 urtera eta 13tik gorakoentzat. Kategoria bakoitzeko irabazleak saria izango du eta partehartzaile guztientzako egongo da goxoki poltsa handia. Desfilean apuntatzeko azken eguna otsailaren 24a izango da. 21:00ak arte egongo da horretarako aukera, Hall-Kulturalean.
  Politika 2006-02-20 18:28

Fleury Merogisen espetxeratu dituzte Alcalde eta Etxebarria

Erabiltzailearen aurpegia Ukberri Joan den astelehenean Auvernen (Frantzia) atxilotu zituzten Gotzon Alcalde sopeloztarra eta Leire Etxebarria basauritarra eta ostiralean (otsailak 17) igaro ziren epailearen aurretik. Uribe Kostako Amnistiaren Aldeko Mugimendiak Etengabe blogaren bitartez jakinarazi duenez, gaizkile elkarteko kide izan, agiriak eta matrikulak faltsutu eta auto bat lapurtzeagatik auzipetu dituzte. Orain, Fleury Merogis espetxean dago bikotea.
  Jendartea 2006-02-19 21:12

Pertsona bat atxilotu dute Sopelan alkoholaren eraginpean gidatzen zuelakoan

Erabiltzailearen aurpegia Ukberri Gidari bat atxilotu zuten ertzainek Sopelan atzo, larunbata, alkoholaren eraginpean autoa erabiltzen zuelakoan. Eusko Jaurlaritzako Herrizaingo Sailak gaur jakinarazi duenez gidari hori izan da EAEn ustezko falta beragatik atxilotu dituzten hamaika lagunetatik Uribe Kostan harrapatutako kide bakarra. Bestalde, Bizkaian haize-bolada bortitzak, tartean Galean (Getxo) jasotako 124 kilometro orduko abiadurakoa, eta euri zaparrada gogorrak izan arren ez da istripu larririk gertatu. Lurralde osoan ur potzuak osatu eta hesi zein bide-seinaleak erori badira ere soilik Lezaman egon da gaur aipatzeko istripua, bi autoren artean. Arratsaldeko 17:00etan N-637 errepidean, Seat Leon eta Renault Laguna auto banak izan dute istripua Lezamako udalerrian Bilboko norabidean. Istripua dela eta bi pertsona eraman dituzte Galdakaoko ospitalera.
  Politika 2006-02-16 21:10

Alcalde eta Etxebarria inkomunikatuta jarraitu bitartean egunero egongo da manifestazioa Algortan

Erabiltzailearen aurpegia Ukberri Albiste agentziek zabaldu dutenez, Gotzon Alcalde sopeloztarra eta Leire Etxebarria basauritarra Parisera eraman zituzten atzo epailearen aurrean deklaratu dezaten. Bestalde, atzo Algortan egin zen manifestazioaren hasieran jakinarazi zenez, bien umea senitartekoak jaso ahal izan zuten hamaika tramite eta itzuli egin ondoren. "Umea jasotzerakoan Leireren ahizpak amarekin egoteko eskatu zuen, eman ziotena pakete bat ez zela argudiatuz. Hartara, berarekin izan zen une batez eta 'ondo' zegoela egiaztatu ahal izan zuen", azaldu zuten Uribe Kostako Amnistiaren Aldeko Mugimenduko kideek. Bien bitartean, Algortan manifestazioak egunero egingo direla adierazi dute, inkomunikatuta jarraitzen duten bitartean.
  Kultura 2006-02-16 19:53

Apirilaren 1ean izango da Sopelako Esaera Zaharren Txapelketa

Erabiltzailearen aurpegia Ukberri Sopelako AEKk urtero antolatzen duen Esaera Zaharren Txapelketak badu data: aurtengo edizioa, hamairugarrena, apirilaren 1ean, larunbatarekin, ospatuko da, Alfabetatze Euskalduntze Koordinakundeak jakinarazi duenez. Jada zabalik dago izena emateko epea. Parte hartzeko (10 euro taldeko) edota bazkarira joateko (15 euro) izena eman daiteke martxoaren 27a baino lehen nikola@aeknet.net eta aitor@aeknet.net posta elektronikoetara idatzita edo 946 764 876 telefono zenbakira deituta. Txapelketa honen oinarriak bertsoak eta esaerak dira: partehartzaileek esaera zaharretan oinarritutako bertsoak entzun eta esaera horiek zeintzuk diren esan behar dute puntuak irabazteko.
  Politika 2006-02-15 22:20

Alcalde eta Etxebarria Parisera eraman dituzte

Erabiltzailearen aurpegia Ukberri Gotzon Alcalde sopeloztarra eta Leire Etxebarria basauritarra duela bi egun atxilotu zituzten Montluçonen (Frantzia erdialdea) eta gaur Parisera eraman dituzte epailearen aurrean deklaratu dezaten, ikerketaren iturriak aipatuta EFE albiste-agentziak zabaldu duenez. Iturri horien arabera, "Alcaldek eta Etxebarriak auziren bat zabalik dute Espainian". "Montluçonen joan den udazkenetik alokatzen zuten etxebizitzan ez zuten armarik aurkitu, aitzitik Espainiako agiri faltsuak atzeman zituen poliziak", dio EFEk. Atxiloketaren unean ere ez zeramaten armarik soinean eta urtebeteko haurrarekin zeuden etxean. Umea senitartekoekin dago jada. Aipatzekoa da azkeneko bi egunetan familiak ez duela haurraren berririk izan.
  Politika 2006-02-15 17:54

Alcalde eta Etxebarriaren urtebeteko haurra senideekin dago

Erabiltzailearen aurpegia Ukberri Astelehenean Montluçonen (Auvergne, Frantzia) atxilotutako Gotzon Alkalde sopeloztarra eta Leire Etxebarria basauritarraren senideek urtebeteko umea beraiekin eraman ahal izan zuten bart gauean tramitazio luzeen ostean. Bi egun igaro dituzte haurraren berri izan gabe baina gaur dagoeneko Euskal Herrian daude. Operazioaren berri gehiago Sopelan izan zen iluntzean. Alkalde herri horretako bizilaguna da, eta manifestazioa zein bide mozketa egin zuten 150 lagunek hari elkartasuna adierazteko. Bertan jakinarazi zuten haurraren bila goizean abiatu zirela senitartekoak. Atxilotuen egoeraren inguruan, baina, berririk ez zutela esan zuten. Gaur, 20.00etan, Algortako Telletxe plazan egingo dute mobilizazioa.
  Politika 2006-02-14 13:41

Frantziara joan dira Alcalde eta Etxebarriaren senideak haurraz arduratzera

Erabiltzailearen aurpegia Ukberri Uribe Kostako Amnistiaren Aldeko Mugimenduak Etengabe blogaren bitartez jakinarazi duenez, Frantziara abiatu dira atzo atxilotutako Gotzon Alcalde Etxeandia sopeloztarra eta Leire Etxebarria Simarro basauritarraren senideak bikotearen haurraren kargu egitera. Alcalde eta Etxebarria atzo atzeman zituen Frantziako Poliziak, Montluçon herrian (Allier departamendua, Frantzia erdi aldean), "ETAko faltsifikazio taldeko kideak direlakoan". Berri agentziek polizia iturriak aipatuz jakinarazi dutenez, euren haurrarekin bizi ziren ustezko bi etakideak Montluçonen. Atxilotzeko unean ere, euren haurrarekin zeuden biak. Askatasunak salatu duenez, hasiera batean, "ez dute jakinarazi, ezta ere, haurrarekin zer egin duten".
  Politika 2006-02-14 11:04

Gotzon Alcalde sopeloztarra atxilotu dute Frantzian

Erabiltzailearen aurpegia Ukberri Frantziako Poliziak atzo Montluçon herrian (Allier departamendua, Frantzia erdi aldean) egindako operazioan bi ustezko ETAko kide atxilotu zituen arratsaldeko 18:30ak aldera, etxetik irtetzen ari zirela. Frantziako berri agentziek zabaldutakoaren arabera, atxiloketa Espainiako Poliziarekin koordinatuta egon da. Kaleratutako argazki eta datuen arabera, atxilotuak Gotzon Alcalde Etxeandia sopeloztarra eta Leire Etxebarria Simarro basauritarra dira. Biei leporatu diete ETAko faltsifikazio taldeko kideak izatea. Komunikabideek nabarmendu dute biak bikotea direla, armarik ez zeramatela eta abuztuaz geroztik Poliziaren zaintzapean zeudela. Atxiloketak Espainiako Estatuak emandako euroagindu baten harira egin dituzte. Gaur goizean Frantziako poliziak miatuko du bien etxea eta gaur iluntzeko 20:00etan Alcalderen atxiloketa salatzeko mobilizazioa egingo dute Sopelako udaletxe aurrean.
  Jendartea 2006-02-07 22:33

Tindufera bi bidai egingo ditu Sopelako Nuyum elkarteak

Erabiltzailearen aurpegia Ukberri Sopelako Udalak 68.095 euro emango dizkie nazioarteko lankidetza egitasmoetan diharduten Adeco, Nuyum, Mugarik Gabe eta Euskal Fondoa erakundeei, udalbatzak azken osoko bilkuran aho batez erabaki bezala. Dirulaguntzetako bat udalerriko Nuyum elkartearentzat izango da, saharar herriaren aldeko ekintzak burutzeko erabiliko duena. Elkarte horrek bidai bi egingo ditu Tindufeko (Aljeria) errefuxiatuen kanpamentuetara, hurrengo hilabeteetan, laguntza humanitarioa eta sendagaiak eramateko. Udal iturriek jakinarazitakoaren arabera, "horrelako egitasmoak laguntzeko, aurrekontuen %0,7a ematen du tokiko erakundeak". Argazkian, Sopelako Udalak eta bertoko Nuyum elkarteak antolatuta, Sahararen aldeko astearen barruan egin zen elkarretaratzea, 2005eko irailaren 28an.
  Jendartea 2006-02-06 14:47

Ganebarri gaztetxearen inguruetan identifikatutakoak gaur epaitzea ez du lortu Herrizaingo Sailak

Erabiltzailearen aurpegia Ukberri Pasa den ostiralean Elorriagane etxea bereganatu zutelakoan Ertzaintzak hiru lagunen kontra zabaldutako premiazko epaiketa gelditu du gaur gazteen defentsak. Getxoko 4. instrukzio epaitegian bildu dira goizeko 10:00etan hiru salatuak eta etxeko jabeak diren Elorriagatarrak. Gazteen abokatuak epaileari jakinarazi dio dagoeneko 2. epaitegian gertaera berberagatik prozedura judiziala abian dela, Elorriaga familiak urtarrilaren 18an jarritako salaketaren harira, eta hortaz 4. epaitegiak jarduerak bertan behera utzi beharko lituzkeela, beste epaitegiaren alde. Gauzak horrela, epaileak ez du epaiketa egin baina saiatu da deklarazioa hartzen alde ezberdinei. Salatzaileek deklaratu dute baina ez horrela gazteek, nahiago izan dutela 2. epaitegian egitea. Defentsaren arabera, Ertzaintzak erabilitako prozedura zein gaur egindako jarduerak indargabe gelditu behar izango dira. Bestalde, Elorriagatarrek asteazkenean berriro deklaratuko dute 2. epaitegian. Tartean, ez du ematen momentuz epaitegi batek edo besteak gaztetxea husteko agindurik emango dutenik. Argazkian, deklarazioak iraun bitartean epaitegien aurrean egindako kontzentrazioa.
  Jendartea 2006-02-05 22:07

Ganebarri gaztetxeko hiru gazte epailearen aurretik pasatuko dira astelehenean

Erabiltzailearen aurpegia Ukberri Sopelako Ganebarri gaztetxean identifikatutako hiru gazte Getxoko Justizia Jauregian deklaratu behar izango dute bihar, otsailak 6, goizeko 10etan etxebizitza usurpatu izana leporatuta. "Gara" egunkariak SUGAko iturrietan oinarrituta, gazteak bihar bertan epaituak izango direla iragarri du, baina antzeko kasuetan ez da horrela izaten eta litekeena da bihar soilik deklaratu behar izatea. EAEko poliziek ostiralean identifikatu zituzten 3 gazteak, Ganebarri gaztetxeko inguruetan, eta horrezkero etxebizitza usurpatzeagatik salatu zituzten. Argazkian, SUGAko kideen kontzentrazioa iaz, Getxoko epaitegietan geroago aske geldituko ziren gazte batzuek Igeltserako okupazioagatik deklaratzen zuten bitartean.
  Jendartea 2006-01-26 20:34

Aenorren bandera jasoko du bihar Arrietara-Atxabiribil hondartzak

Erabiltzailearen aurpegia Ukberri Bizkaiko Foru Aldundiak gaur igorritako prentsa oharraren arabera, sei hondartza bizkaitarrek jasoko dute ostiral honetan, urtarrilak 27, Madrilgo Fitur azokan, Aenorren bandera edota ingurumen ziurtagiria, "ingurumenaren alde eginiko ekarpena saritzeko". Gauzak horrela, Areatza (Muskiz), Bakio, Laida (Ibarrangelu), Laga (Ibarrangelu) eta Karraspiorekin (Mendexa) batera, Sopelako Arrietara-Atxabiribil izango da sarituetako bat. Iosu Madariaga Ingurumen ahaldun; aipatu beste herrietako udal agintari; eta Ingurumen Saileko, Eusko Jaurlaritzako eta Bizkaiko Salbamendu eta Sorospeneko Federazioko ordezkariekin batera.
  Politika 2006-01-24 19:16

Iñaki Aurrekoetxea “Sope” gogoan

Erabiltzailearen aurpegia Ukberri Iñaki Aurrekoetxea orain 9 urte hil zen Bordelen, Aitor Elortzaren antzeko egoera batean. Espetxetik irten eta ihes egin behar izan zuen 1979ko urtarrilan. Hamazazpi urte egin zuen herritik kanpo, iheslariaren bizimodu eta tentsio latzetan. Azkenean, ospitalean hil zen, gaixotasun kroniko baten ondorioz. Etengabe.org bitakorako orri honetan baduzu, garaiko hemerotekatik artutako artikuluen bidez, bere bizitza eta heriotzaren gaineko testuak irakurri eta argazkiak ikustea. Iñaki, gogoan zaitugu!
  Kirolak 2006-01-17 14:42

Aste osoan zehar egongo da itxita Sopelako frontoia

Erabiltzailearen aurpegia Ukberri Sopelako udal pilotalekua urtarrilaren 22ra arte egongo da itxita, bertan hobekuntza eta garbiketa lanak egiten ari direlako. Besteak beste, tabernaren egitura aldatuko dute, arkupe ondoko eremuan barra zati bat jartzeko. Horretaz gain, harmailen azpian dauden aldagelak eta gimnasioa "sakonki" garbituko dituztela ziurtatu dute udal kiroldegiak eta frontoia kudeatzen dituen Serviocio enpresako arduradunek. Dutxak, txorrotak, elektrizitate-sarea eta beste hainbat kontu ere konponduko dituzte. Gauzak horrela, Sopelako udal arduradunek adierazitakoaren arabera, "lanek kirol aretoan egiten diren ekintzak zein aisialdiko aktibitateak baldintzatuko dituzte". Argazkian, lau t'erdiko txapelketako iazko finala.
  Jendartea 2006-01-12 19:06

Larunbata lan-eguna izango da Ganebarrin

Erabiltzailearen aurpegia Ukberri Larunbat honetarako lan-eguna antolatu dugu Sopela eta Urdulizko Ganebarri gaztetxean. Edozein laguntza, txikia izanda ere, ongietorria izango da. Goizetik, eutsi arte iraungo du lanak. Bazkaria, noski, gure kontu; umore ona eta laguntzeko gogoen truke edukiko duzue. Heltzen ez dakizuenontzat... aurreko Igeltsera gaztetxearen pare-parean dago Ganebarri, hau da, Urdulizeko metro geltokian jaitsi eta ezkerretarako bidea jarraituz, hiruzpalau minutura. Kotxez joan ezkero, Urdulizetik etorrita Sopelako lehenengo etxea da (Sopela jartzen duen kartela etxean bertan dago); eta Sopelatik abiatuta, udaletxetik Urdulizerako bidea jarraituz, minutu pare batean helduko zarete: bi errotonda igaro eta bertan egongo zarete.
  Jendartea 2006-01-09 15:49

Bi gazte atxilotu dituzte Sopelan taberna batean lapurtzen saiatu direlakoan

Erabiltzailearen aurpegia Ukberri Ertzaintzak G.G.I. eta I.A.R. Bilboko gazteak atxilotu ditu gaur goizaldeko 2:30ak aldera Sopelan, Atxabiribilgo hondartzako taberna batean indarra erabiliz lapurtzen saiatzea leporatuta. Ertzaintzak prentsa-ohar baten bidez jakinarazitakoaren arabera, goizeko 2:30ak jo ondoren, Alarma Zentroak Atxabiribil hondartzako ostalaritza-establezimendu batean lapurreta saiakera baten berri eman dio Ertzaintzari. Bertaratu ostean ertzain batzuek tabernan izandako kalteak aztertu dituzten bitartean, beste batzuk handik hurbil dagoen aparkaleku batera joan dira eta argiak piztuta zeuzkan auto bat topatu dute.
  Jendartea 2006-01-05 18:50

Larrabasterran izandako sexu-eraso baten ustezko egilea atxilotu dute

Erabiltzailearen aurpegia Ukberri Sopelako udaltzainen laguntzaz, O.M.O. 18 urteko gizonezkoa atxilotu zuten Getxo udalerriko ertzain-etxeko agenteek, sexu-erasoa egitea leporatuta. Eusko Jaurlaritzako Herrizaingo Sailak prentsa ohar baten bidez adierazi duenez, abenduaren 31an, goizean, 19 urteko neska Larrabasterrako metro geltokian jaitsi eta, bere etxera zihoala, ustez O.M.O. gaztea inguratu zitzaion eta handik gertu dagoen parte bateko eserlekuetara joatera behartu zuen, eta bertan sexu-erasoa egin zion. Neskak salaketa jarri zuen goiz hartan bertan Negurin, Ertzaintzaren bulegoetan. Kasuaz arduratu ziren ertzainek ikerketa hasi zuten eta O.M.O. sopeloztarra identifikatu zuten sexu-askatasunaren kontrako delitu horren egile bezala, polizi iturriek diotenez.
  Jendartea 2006-01-04 21:34

TAO txartela ez ateratzeko eskatu die sopeloztarrei Ezker Batuak

Erabiltzailearen aurpegia Ukberri "Ahal duten neurrian", TAO txartela ez berritzeko eskatu die 2005ekoa daukaten lagunei Sopelako EB-Berdeak taldeak; eta aurten eskatzekotan daudenei horrelakorik ez egiteko. Ezker Batuak prentsa ohar bidez adierazitakoaren arabera, Trafikoa eta Aparkatzea arautzen duen Ordenantza "aldebakarrak" onartu izanak sortutako gatazka konpontzeko deitu zituen biltzera alderdi politikoak, TAOren aurkako plataforma eta merkatari elkartea EAJk osatutako Udal Gobernuak. Hain zuzen ere, elkarrizketa mahai horren "porrota" dela eta, TAO txartela ez egiteko eskatu die garajean edo ordenantza aplikatzen ez den kaleetan ibilgailua aparkatzerik daukaten auzotarrei. EAJk ez beste alderdi politiko guztiek –udalbatzarrean ordezkaririk ez daukan EA barne– eta lehen aipatutako gizarte eragile biek adostutako idazkian (pdf formatuan, erdaraz) jaso bezala, TAOren gaineko erreferenduma egitea aldarrikatu dute EBkoek.

Nabarmenak

Zorion agurrak