Jendartea 2005-12-29 21:53

Berria atera bitartean, urtarrilean ere izango da baliagarri Sopelako TAO txartela

Erabiltzailearen aurpegia Ukberri Sopelako Udalak prentsa ohar bidez jakinarazi duenez, urtarril osoan zehar ere izango da baliagarri 2005eko TAO txartela. Bitartean, 2006koa egin nahi dutenek "Los Angeles" auzoan kokatutako bulegora (Akilino Arriola kalea / 94 676 05 40) joan beharko dira. Astelehenetik ostiralera, 9:30etik 13:30era eta 16:00etik 20:00era dago zabalik. Abenduko udal batzarrean onartu bezala, urteko 24 eurokoa izango da TAO txartelaren salneurria. Horren gaineko xehetasunak, www.sopelana.net webgunean daude eskura. Argazkian, TAOren informazio bulegoa.
  Kirolak 2005-12-29 21:31

ETB-1en emango dute Sopelako lau t'erdiko txapelketaren finala

Erabiltzailearen aurpegia Ukberri Euskadiko Euskal Pilota Federazioak antolatuta gaur iluntzean hasi da, Sopelako pilotalekuan, Eskuz Badakako Lau t'erdiko Elite Txapelketako laugarren edizioa. BBVA eta Sopelako Udalaren laguntzaz, Garikoitz Erroizenea (Añorga K.K.E), Iker Etxebarria (Joko-Alai, Zeanuri), Mikel Gonzalez (Oizpe, Berriz), Asier Aurtenetxe (Lezama), Gorka Lopez Aldai (Danok Lagunak, Urtuella), Ugaitz Renobales (Aurrera-Saiaz, Tolosa), Haritz Lasa (Goierri, Urretxu) y Joseba Ollo (Irurtzun) arituko dira txapelaren bila. Hain zuzen ere, urtarrilaren 15ean jokatuko da finala eta, udal iturriek jakinarazi dutenez, ETB-1en egongo da ikusgai norgehiagoka, 12:00etatik aurrera. Argazkian, Imanol Garai alkatea txapelketaren zozketan.
  Jendartea 2005-12-26 22:02

Olentzerok Ganebarri gaztetxea oparitu die Sopela eta Urdulizko gazteei

Erabiltzailearen aurpegia Ukberri Pasa den larunbatean, abenduak 24, Sopelako Udaletxe plazan enkartelada bidez Olentzerori gaztetxea eskatu ostean, gaur goizean "gaztetxea izateko eraikin ezin hobea ate zabalik" aurkitu dute Sopela eta Urdulizko Gazte Asanbladako (SUGA) kideek, iluntzean UKBERRIri adierazi diotenez. Asanbladan bilduta, gazteek Sopelako Sabino Arana kaleko 105. zenbakian dagoen Elorriagane etxea Ganebarri gaztetxea bataiatu dute eta dei zabala egin diete bi herrietako neska-mutil guztiei "gazte topaleku berrira hurbiltzeko, auzolanetan laguntzeko eta gune autogestionatuaz gozatzeko". Horretarako, edozein ordua "ona" izango bada ere, hitzordurik egokiena gaztetxean asteazkenero arratsaldeko 7etan egingo den asanblada izan daiteke.

Argazki galeria ikusteko sakatu hemen
  Jendartea 2005-12-23 21:59

Truke azoka izango da larunbat honetan Sopelan

Erabiltzailearen aurpegia Ukberri Gabonak heltzear dira (beno, merkatalgune askori begiratzen badiogu, jadanik bi hilabete daramagu Gabonetan) eta betiko lez, senide guztiei opariak egin behar. Urtero arazo berbera; ahalik eta originalena izatea, ahalik eta diru gutxiena xahutzea... Hori dala eta, Sopela eta Urdulizko Gazte Asanbladak alternatiba bat eskainiko die Uribe Kostako herritarrei. Egun sufritzen dogun kontsumismo basatiari aurre egiteko, antzina erabiltzen zen trukea proposatzen dogu. Horrela, larunbat honetan, abenduak 24, 10:00etatik aurrera Udaletxeko plazan zabalik egongo diren postuetan, mota askotariko produktuak (arropak, liburuak, jostailuak, apaingarriak..) egongo dira ikusgai. Funtzionamendua oso erraza da: gauzaren bat gustatuz gero, etxean dozun edozein gauza hartu eta saltzailearekin (gazte asanbladako kideekin) trukatzen saiatzea baino ez dago.
  Jendartea 2005-12-21 22:16

TAO mantentzea erabaki du Sopelako Udalak

Erabiltzailearen aurpegia Ukberri EAJko zinegotzien botoak nahikoak izan ziren atzo Sopelan egindako udal batzarrean, Trafikoa eta Aparkatzea arautzen duen Ordenantzaren gaineko 2006rako tarifa (hilabeteko bi euro / urteko 24 euroko ordainketa bakarra) onartzeko. Gauzak horrela, TAOren aurkako plataformako zein merkatarien ordezkariekin izandako hartu-emanak "amaitutzat" jo ditu Udal Gobernuak. Datorren urteko aurrekontuak aurkezteko emandako prentsaurrekoan, Ricardo Ibarra alkateordeak adierazi duenez, "dagoeneko argi dago bakoitzaren ikuspuntua zein den. Trafikoa eta aparkalekuak arautzeko, topaketetan proposatutako neurrietatik hamalau jaso genituen (erderaz) eta horiek garatzeko konpromisoa hartu dugu Udaletik zein EAJtik; nahiz eta beste alderdien sostengua ez dugun. Hortaz, erabakitzat jo dugu auzia". Horrekin batera, TAOren aurka dauden merkatariak "gero eta gutxiago" direla ziurtatu du zinegotziak. Argazkia: Indarrean sartu zenetik ugariak izan dira TAOren aurkako protestak.
  Jendartea 2005-12-15 19:49

Truke azoka izango da abenduaren 24an Sopelan

Erabiltzailearen aurpegia Ukberri Gabonak heltzear dira (beno, merkatalgune askori begiratzen badiogu, jadanik bi hilabete daramagu Gabonetan) eta betiko lez, senide guztiei opariak egin behar. Urtero arazo berbera; ahalik eta originalena izatea, ahalik eta diru gutxiena xahutzea... Hori dala eta, Sopela eta Urdulizko Gazte Asanbladak alternatiba bat eskainiko die Uribe Kostako herritarrei. Egun sufritzen dogun kontsumismo basatiari aurre egiteko, antzina erabiltzen zen trukea proposatzen dogu. Horrela, abenduaren 24an, 10:00etatik aurrera Udaletxeko plazan zabalik egongo diren postuetan, mota askotariko produktuak (arropak, liburuak, jostailuak, apaingarriak..) egongo dira ikusgai. Funtzionamendua oso erraza da: gauzaren bat gustatuz gero, etxean dozun edozein gauza hartu eta saltzailearekin (gazte asanbladako kideekin) trukatzen saiatzea baino ez dago.
  Kultura 2005-11-25 09:27

Niko Etxarten kontzertuak emango dio hasiera gaur iluntzean Sopelako Euskararen Asteari

Erabiltzailearen aurpegia Ukberri Niko Etxart zuberotarraren abestiek emango diote hasiera, gaur iluntzean, Sopelako Euskararen Asteari. Euskal rockaren aintzindari ezaguna izan arren, oraingoan kantu tradizionalean oinarritutako errepertorioa osatu du "Eperra" diskoan, bere aita Dominika Etxart eta Robert Larrandaburu koinatuarekin batera. Zuberoako kanta zaharrak bildu dituzte eta hainbat eskualdetako ohiturari lotua dagoen ahots hutsean abesten dute. Kantatzeko erabiltzen duten teknikari "bortü botza" deitzen diote eta Pirinioetako artzainen kantatzeko era naturala da. Emanaldia 21:30etik aurrera izango da, udaletxeko karpan. Abenduaren 9ra arte luzatuko da Sopelako Euskararen Astea. Argazkian, ezkerretik eskuinera, Dominika Etxart, horren semea Niko eta Robert Larrandaburu / Aizu.net.
  Kirolak 2005-11-20 23:46

David Perez sopeloztarra da Europako bodyboard txapelduna

Erabiltzailearen aurpegia Ukberri Marokon egin behar zen azken proba bertan behera gelditu ostean, amaitutzat eman dute ETB (European Tour of Bodyboard) zirkuitua. Hortaz, David Perez sopeloztarra (argazkian / EHSF) da Europako txapelduna, denbora luzez baitzeraman sailkapeneko lehenengo postuan. Zirkuituko arduradunak saiatu dira beste proba bat antolatzen, Portugalen nahi zuten egin, baina ezinezkoa izan da, ondorioz sailkapena zegoen bezala gelditzen da. Emakumezkoetan sopeloztarra ere den Eunate Agirre laugarren geratu da.
  Jendartea 2005-11-20 23:09

Zapatu goizera arte egongo da Larrabasterrako Ikasle Egunerako sarrerak aldez aurretik erosteko aukera

Erabiltzailearen aurpegia Ukberri Ikasle Abertzaleek (IA) antolatuta, azaroaren 26an (zapatua), izango da Larrabasterran aurtengo Ikasle Eguna, "Sasi guztien gainetik" lelopean. Sarrerak 13 euro kostako dabe aurretik eta 17 euro bertan. Zapatu goizerarte egongo da aurrez erosteko aukera. Uribe Kosta eskualdean honako tokietan egongo dira salgai: Algortako Amnistia tabernan; Gorlizko Xurruten; Itzubaltzeta / Erromoko Brankan; Leioako Kurkudin; eta Sopelako Mikelats, Laiak, Kala eta Erroia tabernetan. Argazkia: Besteak beste, Berri Txarrak taldeak joko du 21:00etatik aurrera izango den kontzertuan.
  Jendartea 2005-11-10 14:49

Sopelako II Txopel Sariak banatuko dituzte iluntzean

Erabiltzailearen aurpegia Ukberri Julio Ibarra ETBko aurkezleak gidatuta, iluntzeko 20:00etan banatuko dira Sopelako Udaletxean herri horretako "izen ona" gehien bultzatu dutenei emango zaizkien II. Txopel Sariak. Bost sari dira guztira eman beharrekoak, ikusentzunezko lan edo webgune, enpresa edo denda, herriko talde, sopeloztar, eta proiektu egingarriei zuzendutakoak, alegia. Hautagaiak guztira 17 dira, haietako hiru bi kategoriatan lehiatzen direla. Hori da TAOren aurkako plataformaren, Sopelbike enpresaren eta Angel Estrada sopeloztarraren kasua. Estradaren haurrentzako webgunea ikusentzunezko lan zein proiektu egingarrien sariak jasotzeko izendatutakoen artean dago. TAOren kontrako plataforma, berriz, bere webgunea ikusentzunezko lanen artean egoteaz gain, kolektibo gisa ere hautagaia da. Sopelbikek aurreko biekin bat egiten du ikusentzunezko lanetan eta enpresa hoberena izateko esperantza ere badauka. Irudian, Barinatxe Txistu Taldea 2004ko irabazleetariko bat / Sopelana.net.
  Kultura 2005-10-25 20:06

Sopelako webgune berrituak euskaldunak baztertzen ditu

Erabiltzailearen aurpegia Ukberri Atzo aurkeztutako eta gaur sarean abiatutako Sopelako Udalaren webguneak bigarren mailako herritartzat ditu erabiltzaile euskaldunak sopelana.net helbidean egiazta daitekeenez. Kolektibo baztertu ezberdinak integratzeko asmoa zuen webgune antolakuntza berriak ez du lortu euskaldunak itsu, daltoniko edota software askearen erabiltzaileekin berdintzea. Izan ere, “Asteko argazkia” eta “Albumeko argazkia” atalen argazki-oinak, kultur ekitaldiak iragartzeko “euskarazko bannerra” eta azalean agertzen diren 18 berrietatik 15 gaztelera hutsean daude. Era berean, eta azalan bertan, Bizkaia.net webguneko esteka, pantaila-babesa, eta argazkiak bidaltzeko zein webguneari buruzko iritzia emateko bannerrak Cervantesen hizkuntzan irakurtzeko aukera baino ez dago. Halaber, webgunean zehar hainbat esteka apurtuta daude edo, zuzenean, ez dira jarri erabiltzaileari deserosotasuna sortzen. Argazkian, sopelana.net ataria.
  Jendartea 2005-10-24 19:43

Sopelako Udalak bere webgune berria aurkeztu du

Erabiltzailearen aurpegia Ukberri Internauta sopeloztarrek bihartik aurrera errazagoa izango dute udal webgunea erabiltzea, izan ere, udal agintariek gaur aurkeztu duten webgune berrian hainbat hobekuntza egin dira oraindik gaur sarean eskegita dagoenaren gainean. Itsuak, mugikortasun arazoak dituztenak, software askearen aldekoak zein daltonikoak izango dira aldaketari atarramendu handiena aterako diotenak, baina Sopelana.net webguneko arduradunen iritziz Sopelako internauta guztiek nabarituko dute diseinutik haratago doan berriztapena. Gaur goizean udaletxean egindako ekitaldian, Imanol Garai Sopelako alkateak oso labur aurkeztu du webgunearen "bertsio berria" eta Udalak "teknologia berrien aldeko apustu sendoa" egiten jarraitzen duela nabarmendu du. Argazkian, ezkerretik eskuinera, Imanol Garai, Ricardo Ibarra eta Jon Vazquez webguneko aurkezpenean.
  Jendartea 2005-10-20 23:39

Etxebizitzaren eskubidea ez da bonolotoa

Erabiltzailearen aurpegia Ukberri Urriaren 17an, babes ofizialeko 75 etxebizitzaren zozketa egin zen Sopelan, etxebizitza baten eskubidea zorte ona edo txarraren pean balego bezala. Gure agintariak, udal zein autonomia mailakoak, pintxo-pintxo atera dira argazkietan eta haien burua goratu dute, baina datu batzuk ezkutatu nahi digute: jadanik 1998an, Sopelako Arau Subsidiarioak ezarri zirenean 870 BOE onartu zirela; eta Lurralde Zatikako Plana eztabaidatu zenean, hirigintza plan berriak kontuan harturik, Sopela Aurrerak aipatutako kopurua 1.000ra igotzea proposatu zuela –proposamen horrek "arrazoi ezberdinengatik" ez zuen jaso ez PNVren ezta IUren babesik–. Hau horrela izanda, 7 urtetako epe eskandalagarriak igaro behar izan du, lehen pausutxo hau emateko eta ahaztu gabe beste bizpahiru itxaron beharko dugula etxe hauetan bizi ahal izateko.
  Kultura 2005-10-20 23:11

Sopelako 75 BOEn zozketan euskara baztertu zela salatu dute Sopela Aurrerak eta SUGAk

Erabiltzailearen aurpegia Ukberri Sopela Aurrera ezker abertzaleko plataformako kideek iragan den astelehenean Etxebidek burututako 75 Babes Ofizialeko Etxebizitzen zozketan euskara "dekoraziorako" hizkuntza gisa erabili izana salatu dute UKBERRI.NET-i egindako adierazpenetan. Sopelako herri kandidaturak gaineratu duenez, Sopelako Udal Gobernuaren jarrera "betikoa" da, "azken hamarkadetan" izan dutena. Sopela Aurreraren arabera, Imanol Garaik zuzentzen duen taldearentzat Euskal Herriko hizkuntza "ez da bizi harremanetarako hizkuntza, dekorazioa baizik". Sopela eta Urdulizko Gazte Asanbladako kideek ere "dena erdaraz izatea" salagarria delakoan daude, "are gehiago hiruko Gobernua eta Eusko Jaurlaritza tartean izanda". Gorrek itzultzaile baten bidez jarraitu ahal izan zuten zozketan, errotulazio gehiena elebidunez irakur zitekeen eta Javier Madrazo sailburuak hasierako azalpen batzuk ere euskaraz eman zituen. Hortik landa, Gaztelako hizkuntza izan zen jaun eta jabe. Argazkian, gorrentzako itzultzailea zozketaren datuak ematen.
  Jendartea 2005-10-20 12:58

Metroen maiztasuna areagotzea nahi du Sopelako Ezker Batuak

Erabiltzailearen aurpegia Ukberri Sopela, Urduliz eta Plentziako geltokietatik igarotzen den metro kopurua "ez da nahikoa", EB-Berdeak taldearen ustez. Hori dela eta, Metro Bilbaori zerbitzuaren maiztasuna handiagotzea eskatzeko proposamena egingo diote Sopelako udalbatzari, urriaren 25ean egingo den osoko bilkuran. Horretaz gain, lanegunetako ordutegiaren hasiera 5:00etara aurreratzea eta, egun horietan, zerbitzuak gaueko hamabiak arte iraun dezala ere eskatuko dute. "Laster hamar urte beteko ditu metroak. Ordutik hona, erabiltzaileen kopurua handitu bada ere, ordutegiak eta maiztasunak ez dituzte aldatu", diote Sopelako EB-Berdeek. Horren harira, sinadura bilketa egingo dute larunbat honetan.
  Jendartea 2005-10-17 20:45

Sopelan eraikiko diren 75 babestutako etxebizitzak zozketatu dituzte

Erabiltzailearen aurpegia Ukberri Javier Madrazo Eusko Jaurlaritzako sailburua, Sopelako Udaleko Imanol Garai alkatea, Ricardo Ibarra hirigintzarako zinegotzia eta Jose Vicente Ojinaga EB-Berdeen zinegotziaren babespean Jose Antonio Gonzalez notarioak Etxebidek antolatutako 75 Babes Ofizialeko Etxebizitzen (BOE) zozketa eraman du aurrera Larrabasterrako Urko polikiroldegian gaur goizean. EAJ eta EB-Berdeen politikarien aurrean zozketaren emaitza jakiteko irrikitan zeuden 300 bat bizilagun eta bere protesta agertu duten Sopela Aurrera herri plataforma zein Sopela eta Urdulizko Gazte Asanbladako kideak izan dira. Bere aldetik, Madrazok 650 eta 800 arteko BOE berriak eraikitzeko asmoa azaldu du. Argazkian, erdian, Imanol Garai eta Javier Madrazo.
  Jendartea 2005-10-15 14:31

Babes ofizialeko 75 etxebizitza zozketatuko dituzte astelehenean Sopelan

Erabiltzailearen aurpegia Ukberri Urriaren 17an zozketatuko dira, Sopelako metro geltokitik hurbil, trenbidea eta Olabide kalearen artean dagoen 9.1 eremuan egingo dituzten babes ofizialeko 46 etxebizitzak; eta Sipiri kaleko plazatik –"balearen parkea" izenarekin ezaguna– hurbil dagoen Zaldu zonaldeko gainontzeko 29ak. Horietako bat eskuratu ahal izateko 300 lagun baino gehiagok eman dute izena Etxebiden, udal iturrien arabera. Bere garaian, "onartutako eskaeren artean, sopeloztarrek lehentasuna izatea" eskatu zitzaion Eusko Jaurlaritzako Etxebizitza eta Gizarte Gaietarako Sailari, gogoratu dutenez. Zozketa 12:00etan egingo da, Urko kiroldegian. Zorioneko direnek bi urte barru jasoko dituzte etxeko giltzak. Izan ere, poligono biak 2007rako amaituta egotea aurrikusten dute.
  Jendartea 2005-10-14 12:57

Pertsona bat zauritu da Sopelan furgoneta batek eta auto batek talka egitean

Erabiltzailearen aurpegia Ukberri Pertsona bat zauritu da gaur goizean Sopela udalerri parean, furgoneta batek eta auto batek BI-2122 errepidean talka egin dutenean, Plentziarako norabidean, Ertzaintzak jakinarazi duenez. Auto-istripua gaur goizeko 8:40an gertatu da Volkswagen furgoneta baten eta Peugeot 406 baten artean. Ibilgailu bateko gidaria barruan harrapatuta gelditu da eta suhiltzaileek atera behar izan dute. Ondoren Gurutzetako ospitalera eraman dute.
  Jendartea 2005-10-05 14:55

Lonjen auzia dela eta, "hedabideetan nabarmendu nahi izatea" egotzi dio Ezker Batuari Sopelako Udalak

Erabiltzailearen aurpegia Ukberri Lonjak etxebizitza bihurtu ahal izateko udal-ordenantza berria eskatuz, EB-Berdeak taldeak aurkeztutako mozioari erantzun dio gaur, prentsa ohar bidez, Sopelako Udalak. "Azken aldian mantentzen ari den jokabideari eutsiz, hedabideetan funtsik gabeko titular arranditsuak izatea da beraien asmoa", EAJk osatzen duen Tokiko Gobernu Batzordeak adierazi duenez. Udal agintarien hitzetan, "proposamen horrek ez luke etxebizitzen prezioa behera egitea lortuko, lonjena garestitzea baizik; eta espekulazioa ekarriko luke horrek". Hori dela eta, arazoari konponbidea bilatzean arreta jartzea eskatu diote Ezker Batuari, "alokatzeko etxebizitza gehiago eta Babes Ofizialeko Etxebizitzen zozketa gutxiago eskainiz, eta Eusko Jaurlaritzaren diru-laguntza jasotzen duten pisuak herritar kopuru handiagoari zabalduz". (Argazkian, Imanol Garai Sopelako alkatea).
  Ekonomia 2005-10-04 12:26

"Zergak ez igotzea bezalakoa da" %3,3 gehiago ordaintzea, Sopelako Udalaren ustez

Erabiltzailearen aurpegia Ukberri Nahiz eta EAJk osatzen duen Sopelako Gobernu Batzordeak gehiengo osoa izan, PSE-EEren aldeko botoak ere jaso zituen, osteguneko osoko bilkuran, 2006rako udal zergak %3,3 (Kontsumorako Prezioen Indizearen igoerarekin bat) igotzeko proposamenak. "Zergak ez igotzea bezalakoa da", adierazi zuten tokiko erakundeko kideek. Tasak ere beste horrenbeste egingo dute gora, zaramari dagokiona izan ezik. Horretan %6koa izango da igoera, "egindako txosten ekonomikoak aurreko tasarekin zerbitzuaren kostuaren %83ra baino ez ginela heltzen agerian utzi zuelako". "Egindako moldaketarekin, berriz, zerbitzuaren %90a ordainduko dute auzotarrek, eta Sopelako Udalak berak hartuko du beregain gainontzeko %10a", azaldu zuen Gonzalo Garcia Ekonomia eta Ogasun zinegotziak. (Argazkian, aurreko osoko bilkura bateko argazkia).

Nabarmenak

Zorion agurrak