Politika 2005-08-24 12:49

Sopelako PSE-EEren egoitza erasotu izana aldarrikatu dute

Erabiltzailearen aurpegia Ukberri Telefonoz egindako dei baten bitartez ezezagun batek Sopelako PSE-EEren egoitzaren kontrako eraso bat bere gain hartu du, gaur "Gara" egunkariak argitaratu duenez. Egunkari abertzaleak jasotako ezezagunaren hitzen arabera, "PSOEk Euskal Herriaren kontra daraman politika errepresiboa salatu nahi" zuelako erasotu zuen herriko etxea. Aldiz, aipatu ekintza 2005eko martxoaren 26an, larunbata, goizeko 00:45ean kokatu omen du pertsona anonimoak, erasoa ordu horretan baina 2005eko apirilaren 2an, larunbata ere, izan zenean.
  Jendartea 2005-08-23 20:53

Oraindik bukatu gabe zegoen Antzar Potzu iturriko estatua lapurtu egin dute

Erabiltzailearen aurpegia Ukberri Aste honetan bukatzen ari zen Antzar Potzu iturriko estatua dagoeneko desagertu da, Sopelako Udalak prentsa ohar baten bidez salatu duenez. Artelana brontzezkoa zen eta antzar baten irudia osatzen zuen. Imanol Garai Sopelako alkateak estatua jartzean azaldu zuenez, lan horren bitartez aipatu lekua hezegunea zela eta bertatik antzarrak eta beste hegazti migratzaileak usu igarotzen zirela gogoratu nahi zen. Orain, Udalak "ekintza bandalikoa" salatu du. Irudian, estatua desagertu baino lehen.
  Politika 2005-08-16 19:20

Aitor Boresi Internet erabiltzeko debekua berretsi dio Espainiako Auzitegi Nazionalak

Erabiltzailearen aurpegia Ukberri Aitor Bores Gutierrez preso sopeloztarrak ezin izango du ordenagailurik eduki, iragan den ostegunean Espainiako Auzitegi Nazionalak hartutako erabakia dela medio. Auzitegiak Boresi ordenagailua kentzeko Murtziako espetxeko zuzendaritzak eman zuen agindua eta hori berresteko zuzendaritza bera eta espetxe-epaitegiak hartutako erabakiak ontzat jo eta bertan behera utzi ditu preso sopeloztarrak jarritako helegitea.
  Jendartea 2005-07-20 21:46

Marokok Saharan erabiltzen duen errepresioa salatu du Sopelak

Erabiltzailearen aurpegia Ukberri Sopelako Udalak Saharako herriarekiko elkartasun mozioa onartu zuen atzo, asteartea, gai hori dela eta propio egindako Udalbatza berezian. Proposamena EAJ, Sopela Aurrera eta Ezker Batua-Berdeak udal taldeek batera aurkeztu zuten, eta testuan Marokoko Gobernuak Saharako herriaren kontra erabiltzen duen bortxakeria eta giza eskubideen kontrako jarrera salatzen dute: "Marokoko Gobernuak Saharako herria demokraziarantz aurrera egitea oztopatzen du; horraino heltzen saiatzen diren nazioarteko ordezkaritzei sarbidea ukatzen die; saharar herria sitematikoki erreprimitzen du eta biztanleak torturatzen ditu". Proposamena EAJ, SA eta EB-B taldeen botuekin onartu zen. Aldiz, PSE-EE eta PP ez zuten bozkatu. (Jabi Zabalaren argazkian, Saharan egindako protesta ekintza bat).
  Kultura 2005-07-19 21:44

Santa Marina eguna ospatuko dute bihar sopeloztarrek

Erabiltzailearen aurpegia Ukberri Goizeko hamarretan txupinazoa bota eta kalejiran abiatuko dira Imanol Garai Sopelako alkatea eta zinegotziak udaletxeko enparantzatik Santa Marinara, Barinatxe taldeko txistularien doinuez lagunduta. Ordu bete beranduago baselizan meza nagusia egin eta, ordutik aurrera, ohorezko aurreskua eta lore eskaintza, hamaiketakoa, herri bazkaria eta tortilla lehiaketa egongo dira Fernando Ansoleaga plazan. Egunari amaiera bikaina emateko, dantza ikuskizuna eskainiko dute 20:30ean, udal pilotalekuan, Mexikoko Marluz-Tizoc, Hungariako Néptánckör taldeek. Txikiek, berriz, "Shrek 2" filmea ikusteko aukera izango dute bi ordu beranduago. (Argazkian, igazko ospakizuna).
  Kultura 2005-07-13 21:56

Dena prest dago Larrabasterrako jaietarako

Erabiltzailearen aurpegia Ukberri Larunbatean ospatzen den Karmen eguna aitzaki, Karmen jaietan murgilduta ibiliko dira sopeloztarrak, bihartik igandera bitartean. Lau egunetan zehar jolasak, musika, lehiaketa gastronomikoak, kirol txapelketak eta abar egongo dira txiki zein nagusien gozamenerako. Besteak beste, 19:00etan suziria bota eta, Ku-Klux fanfarreak alaitutako koadrila jaitsieraren ostean, "Diskomovida" ikuskizuna eskainiko die txikienei Poco Pico taldeak, Urgitxieta plazan. 22:30ean, berriz, Ciudadano Kain taldeak emango du kontzertua. Azkenik, 23:30etik aurrera, Gatillazo (argazkian) taldeak joko du Urgitxetako agertokian.
  Jendartea 2005-07-06 13:49

Bi urteko neskatila harrapatu zuen atzo auto batek Sopelan

Erabiltzailearen aurpegia Ukberri Bi urteko neskatila zauritu zen atzo arratsaldean Sopelan, zergatik argi ez dagoela, auto batek harrapatu zuenean. DYAk jakinarazitakoaren arabera, 19:30ak aldera gertatu zen ezbeharra, Zubigane kaleko seigarren atari parean. Kolpearen ondorioz, Gurutzetako ospitalera eraman behar izan zuten umea, pronostiko erreserbatuko zauriekin.
  Jendartea 2005-06-21 15:33

TAOren aurkako burrunbada izango da bihar Sopelan

Erabiltzailearen aurpegia Ukberri Sopelako Udalak ezarri berri duen Trafikoa eta Aparkatzea arautzen duen Ordenantzaren (TAO) aurka protesta egiteko, mobilizazio kanpaina abian jarri dute hainbat auzotarrek. Gehienbat, Sopelmar urbanizazioko bizilagunak dira ekimenaren bultzatzaileak. Hala ere, sopeloztar guztiek euren erreibindikazioekin bat egitea lortu nahi dute. Horretarako, sinadurak bilduko dituzte eta, astero, elkarretaratzea egingo dute udaletxe aurrean, Sopelako Udalak TAO jartzeko erabakiari buruz hausnartu bitartean. Kontzentrazioekin hasteko, burrunbada egingo dute bihar 20:00etan.
  Jendartea 2005-06-18 21:08

TAO "dirua biltzeko baino ez" dela diote Sopelako Ezker Batua-Berdeek

Erabiltzailearen aurpegia Ukberri Sopelako Ezker Batua-Berdeak taldearen ustez, udal gobernuak "dirua biltzeko duen irrikiarekin" baino ez dator bat TAO herrian jartzea, "garraio publikoa sustatu beharrean, berazgoztarrak gainesfortsu ekonomikoa egitera behartu eta komertzioa beste udalerri batzuetara aldenduko duelako". Zirkulazioaren gaineko zergaz gain, urteko 30 euro (20 euro geratzen diren 2005eko hilabeteengatik) ordaindu beharko dute sopeloztarrek, azaldu dutenez. (Argazkian, Jose Vicente Ojinana Sopelako EB-Berdeetako bozeramailea).
  Jendartea 2005-06-18 20:09

TAO guneetan bizi diren sopeloztarrentzat baino ez da bizilagun txartela

Erabiltzailearen aurpegia Ukberri Dirudienez, jende ugari hurbiltzen ari da Trafikoa eta Aparkatzea arautzen duen Ordenantza (TAO) berriaren informazio bulegora (argazkian), bizilagun txartela lortzeko asmoarekin, baina asko ez dira TAO guneetan bizi. Hori dela eta, bizilagun txartela zonalde horietako batean bizi diren lagunek bakarrik eskura dezaketela gogoratu du Sopelako Udalak. Aipatu agiria lortzeko, "Los Angeles" auzoan kokatutako bulegoan (Akilino Arriola kalea / 946 760 540) agertu beharko dira horiek. Ekainean zehar, 9:30etik 13:30era eta 16:30etik 19:30era, astelehenetik ostiralera, eta larunbatetan goizez bakarrik egongo da zabalik. Bizilagun txartela eskuratzeko NAN eta zirkulazio zergaren ordainagiria baino ez dira aurkeztu behar, udal arduradunek jakinarazi dutenez. Hortaz, ez da beharrezkoa erroldatze agiria.
  Jendartea 2005-06-17 22:46

Bihartik aurrera erabili ahal izango den Sopel-buserako, bi Creditrans txartel jasoko dute familia ugariek

Erabiltzailearen aurpegia Ukberri Uztailetik aurrera, Sopel-busa erabiltzeko Creditrans txartel bina lortzeko aukera izango dute, sosik ordaindu gabe, Sopelako familia ugariek. Izan ere, horiek biltzen dituen EAEko Hirukide elkartearekin harremanetan jarri da Udala, hiru seme-alaba edo gehiago dituzten gurasoek aipatu zerbitzua eskura izan dezaten. Udaletxean dagoen Turismo Bulegoan hartu beharko dira txartelak. Larrabasterra eta Sopelako metro geltoki zein herriguneak eta hondartzak lotzen dituen autobusa larunbat honetatik aurrera egongo da martxan. (Argazkian, Atxabiribileko sarrera).
  Jendartea 2005-06-14 21:20

Ostegunetik aurrera lortu ahal izango da TAOko bizilagun txartela Sopelan

Erabiltzailearen aurpegia Ukberri Hondartza denboraldiarekin batera, bihar Sopelan indarrean sartuko den TAOko bizilagun txartela noiz eta non lor daitekeen jakinarazi dute udal arduradunek. "Los Angeles" auzoan kokatutako bulegoan (Akilino Arriola kalea) lortu ahal izango dute txartela sopeloztarrek, ekainaren 16tik aurrera. Ordutegia ekainean zehar, 9:30etik 13:30era eta 16:00etatik 20:00etara izango da. (Argazkian, TAO eta beste hainbat gairen berri emateko, Imanol Garai alkateak –erdian– eta hainbat zinegotzik ostiralean Atxabiribil ondoko El Sitio tabernan emandako prentsaurrekoa).
  Kirolak 2005-06-10 23:10

Emakumeen Bira dela eta, trafiko aldaketa ugari egongo da larunbat honetan Sopelan

Erabiltzailearen aurpegia Ukberri Iurreta Txirrindulari Elkarteak antolatuta, XVIII. Emakumeen Biraren hirugarren etapa hartuko du Sopelak larunbat honetan. Lasterketa nazioarteko egitarauan onenetarikoa da, Euskal Herriko hainbat udalerrietatik igarotzen da. Baina Sopelan are garrantzi handiagoa edukiko du. Izan ere, Frantziako Tourra hirutan irabazi duen Joane Somarriba (argazkian) herriko semeak parte hartzen du biran. Irteera 16:30ean izango da, Sabino Arana kaletik; 18:55ak aldera toki berean amaitzeko. Sopela ez ezik, Urduliz, Gatika, Maruri, Lemoiz, Gorliz, Plentzia eta Barrika ere zeharkatuko ditu. Horretaz gain, lasterketa dela eta, hainbat neurri hartu ditu Sopelako Udalak. Besteak beste, goratutako oinezkoen pasabideak arindu, zaramontziak kendu eta trafiko aldaketa ugari izango dira udalerrian.
  Jendartea 2005-06-10 22:34

Arrietara hondartzako langa mantenduko dute

Erabiltzailearen aurpegia Ukberri Larrabasterrako Arrietara hondartzara ibilgailuak sartzea eragozteko igaz jarritako langa bere horretan jarraituko duela jakinarazi du Josu Landaluze Zerbitzu eta Hiritarren Segurtasun zinegotziak. Mugatuta egongo da bertatik igarotzea; zamalanetarako ibilgailuak, auzokideenak, anbulantziak eta autobusa baino ezin izango dira sartu. Gainera, udal arduradunak jakinarazi duenez, zamalanen ordutegia murriztuko dute. Joan den udaldian hartutako neurria tirabira ugari sortu zuen, batez ere euren lokala Arrietara ondoan daukaten ostalarien artean.
  Jendartea 2005-06-10 22:10

Sopelan asteazkenetik aurrera egongo da indarrean TAO

Erabiltzailearen aurpegia Ukberri Apirilaren 21eko udalbatzarrean onartu bezala, ekainaren 15etik aurrera egongo da indarrean, Sopelan Trafikoa eta Aparkatzea arautzen duen Ordenantza (TAO). Hain zuzen ere, bainu denboraldia hasten den egun berean. Josu Landaluze Zerbitzu eta Hiritarren Segurtasun zinegotziaren hitzetan, "Kotxea aparkatuta zegoen denbora kontutan hartu gabe, diru kopuru zehatza kobratzeagatik igaz jasotako kexei erantzuna emateko hartu dugu TAO ezartzeko erabakia. Neurririk egokiena dena uste dugu, denboraren arabera ordaindu beharko baita".
  Jendartea 2005-06-10 21:06

Creditrans txartela erabili ahal izango da Sopel-busean joateko

Erabiltzailearen aurpegia Ukberri Hondartza denboraldia heltzearekin batera, Sopel-busa erabiltzeko aukera izango dute, bigarren urtez, Atxabiribil, Barinatxe edo Arrietaran eguzkitan jarri eta bainua hartu nahi duten guztiek. Igaz bezala, Larrabasterra eta Sopelako metro geltoki zein herriguneak eta areatzak lotuko ditu garraio publikoak, ekainaren 15etik irailaren 15era bitartean. Gainera, aurten, (bertan dagoen langa igarota) Arrietara hondartzako sarbidera bertara helduko da Sopel-busa, "mugitzeko zailtasunak dituzten lagunei bertara iristeko erraztasunak emateko", Gonzalo Garcia Ekonomia eta Ogasun zinegotziak aipatu duenez. Beste berrikuntza bat ere aipatu du udal ordezkariak Bizkaiko Garraio Partzuergoari eskerrak emanez. Izan ere, Creditrans txartela erabili ahal izango da uda honetan Sopel-busen bidaiak egiteko.
  Jendartea 2005-06-10 20:14

Astelehenerako egongo da prest Atxabiribil hondartzako sarbidea

Erabiltzailearen aurpegia Ukberri Bete diren agintaldiko bi urteei errepasoa egitearekin batera, sei hilabetez Atxabiril hondartzako sarbidean egin diren aldaketen berri eman du gaur Imanol Garai Sopelako alkateak. "Terraza sistema baten bidez, areatzara oinez iristea eta parkingera modu errazean sartzea ahalbidetu dugu. Baita Sopel-buserako geralekua jarri ere. Horretaz gain, zaramontzi zaharrak berriengatik aldatu eta lurperatu egin ditugu horiek, inpaktu bisuala ahalik eta txikiena eragiteko asmoz", azaldu du udal agintariak. Aipatu lanak 300.000 euroko aurrekontua izan dute eta, kopuru horretatik, Bizkaiko Foru Aldundiak ordaindu du %40a. Atxabiribil hondartzako sarbidea ekainaren 13an inauguratuko dute. (Argazkian, ezkerretik eskuinera; Eukene Nuñez Hezkuntza eta Kultura arduraduna; Ricardo Ibarra Komunikazio, Urbanismo, Turismo eta Ingurumen zinegotzia; Josu Landaluze Zerbitzuen eta Hiritarren Segurtasun saileko arduraduna eta Imanol Garai alkatea; Atxabiribilen).
  Kultura 2005-06-07 14:51

PPko zinegotziaren euskararekiko jarrera "aitzakiatzat eta umekeriatzat" jo du Sopelako Udalak

Erabiltzailearen aurpegia Ukberri Berta Rodriguez Sopelako PPko zinegotziak atzo egindako adierazpenei erantzunez, "hizkuntza ofizial bata ala bestea erabiltzeagatik", ez dituztela inoiz herritarrak diskriminatu adierazi dute udal arduradunek. "Sopelako Udala beti bereiztu egin da, adina edozein izan eta edonondik etorrita, jendea elebitasunera eta hiruelebitasunera ere batzera animatzeagatik, herriko hezkuntza zentroetan jadanik lantzen ari den bezala", azaldu dute gaur plazaratutako komunikatuan. Maiatzaren 26ko osoko bilkuran Rodriguezek izandako jarrerari buruz, ”ezgaitasun politikoak bakarrik eraman dezake pertsona bat umeena den aitzakia bilatzera”, Ricardo Ibarra Komunikazio, Turismo eta Hirigintza zinegotziak adierazi duenez, “euskaraz mintzatzen den pertsona bat ez ulertzeagatik hitz egiteari uko egitea, udalbatza hartan eztabaidarako eta ondorengo onarpenetarako aurkeztu ziren proposamen ezberdinen aurrean bere aukera falta izkutatzen saiatuz, umeen aitzakia delako”.
  Kultura 2005-06-07 14:06

Udalbatzarretan aldi bereko itzulpen sistema jartzea eskatu du Sopelako PPk

Erabiltzailearen aurpegia Ukberri Hedabideetara atzo helarazitako idatziaren bidez, osoko bilkuretan euskaratik gaztelerarako aldi bereko itzulpen sistema jartzea eskatu du Berta Rodriguez Sopelako PPko zinegotziak, "udalbatzako kideen arteko komunikazioa hobetze aldera". Popularren bozeramaileak adierazi duenez, "udalbatzarrean zer esan den ere ez dakigu itzulitako aktak bidaltzen dizkiguten arte, zinegotzi batzuek euskaraz baino ez dutelako hitz egiten". Hori dela eta, Euskararen Erabileraren Normalkuntzari buruzko Oinarrizko Legea "urratzen" ari dela uste du Rodriguezek, "baita hizkuntz horretan hitz egiterik ez dugun udal ordezkariei kaltetzen ere". Hori aitzaki hartuta, hitza hartzeari uko egin zion zinegotzi popularrak maiatzaren 26an egindako azken osoko bilkuran.
  Jendartea 2005-06-01 23:08

Euskal Bizikletan protestaldia burutu du Sopela eta Urdulizko Gazte Asanbladak

Erabiltzailearen aurpegia Ukberri Sopela eta Urdulizko Gazte Asanbladako 50 bat lagunek Euskal Bizikletako helmuga hartu dute, Igeltsera gaztetxea gogoratzeko eta gaztetxe berria aldarrikatzeko. Lasterketa baino askoz puntualagoak izan dira SUGAkoak helmugara hurbiltzen, eskuetan okupazioaren aldeko ikurrak sostengatzen zituztela. Azken 500 bat metrotan zehar sakabanatu dira, aldiro-aldiro okupazio ikurrak ikusi direla. Tropela helmugatik pasa denean gazteak sari banaketaren zain izan dira, tartean "Igeltsera aurrera", "herri bat, gaztetxe bat" eta "okupazioa" bezalako leloak oihukatu dituztela. Sari banaketan tarkekatu dituzte haien leloak, oso nabarmenak Imanol Garai Sopelako alkatea oholtzara igo denean, eta txirrindulariei eskaini dizkieten txaloak.

Nabarmenak

Zorion agurrak