Kultura 2005-07-13 21:56

Dena prest dago Larrabasterrako jaietarako

Erabiltzailearen aurpegia Ukberri Larunbatean ospatzen den Karmen eguna aitzaki, Karmen jaietan murgilduta ibiliko dira sopeloztarrak, bihartik igandera bitartean. Lau egunetan zehar jolasak, musika, lehiaketa gastronomikoak, kirol txapelketak eta abar egongo dira txiki zein nagusien gozamenerako. Besteak beste, 19:00etan suziria bota eta, Ku-Klux fanfarreak alaitutako koadrila jaitsieraren ostean, "Diskomovida" ikuskizuna eskainiko die txikienei Poco Pico taldeak, Urgitxieta plazan. 22:30ean, berriz, Ciudadano Kain taldeak emango du kontzertua. Azkenik, 23:30etik aurrera, Gatillazo (argazkian) taldeak joko du Urgitxetako agertokian.
  Jendartea 2005-07-06 13:49

Bi urteko neskatila harrapatu zuen atzo auto batek Sopelan

Erabiltzailearen aurpegia Ukberri Bi urteko neskatila zauritu zen atzo arratsaldean Sopelan, zergatik argi ez dagoela, auto batek harrapatu zuenean. DYAk jakinarazitakoaren arabera, 19:30ak aldera gertatu zen ezbeharra, Zubigane kaleko seigarren atari parean. Kolpearen ondorioz, Gurutzetako ospitalera eraman behar izan zuten umea, pronostiko erreserbatuko zauriekin.
  Jendartea 2005-06-21 15:33

TAOren aurkako burrunbada izango da bihar Sopelan

Erabiltzailearen aurpegia Ukberri Sopelako Udalak ezarri berri duen Trafikoa eta Aparkatzea arautzen duen Ordenantzaren (TAO) aurka protesta egiteko, mobilizazio kanpaina abian jarri dute hainbat auzotarrek. Gehienbat, Sopelmar urbanizazioko bizilagunak dira ekimenaren bultzatzaileak. Hala ere, sopeloztar guztiek euren erreibindikazioekin bat egitea lortu nahi dute. Horretarako, sinadurak bilduko dituzte eta, astero, elkarretaratzea egingo dute udaletxe aurrean, Sopelako Udalak TAO jartzeko erabakiari buruz hausnartu bitartean. Kontzentrazioekin hasteko, burrunbada egingo dute bihar 20:00etan.
  Jendartea 2005-06-18 21:08

TAO "dirua biltzeko baino ez" dela diote Sopelako Ezker Batua-Berdeek

Erabiltzailearen aurpegia Ukberri Sopelako Ezker Batua-Berdeak taldearen ustez, udal gobernuak "dirua biltzeko duen irrikiarekin" baino ez dator bat TAO herrian jartzea, "garraio publikoa sustatu beharrean, berazgoztarrak gainesfortsu ekonomikoa egitera behartu eta komertzioa beste udalerri batzuetara aldenduko duelako". Zirkulazioaren gaineko zergaz gain, urteko 30 euro (20 euro geratzen diren 2005eko hilabeteengatik) ordaindu beharko dute sopeloztarrek, azaldu dutenez. (Argazkian, Jose Vicente Ojinana Sopelako EB-Berdeetako bozeramailea).
  Jendartea 2005-06-18 20:09

TAO guneetan bizi diren sopeloztarrentzat baino ez da bizilagun txartela

Erabiltzailearen aurpegia Ukberri Dirudienez, jende ugari hurbiltzen ari da Trafikoa eta Aparkatzea arautzen duen Ordenantza (TAO) berriaren informazio bulegora (argazkian), bizilagun txartela lortzeko asmoarekin, baina asko ez dira TAO guneetan bizi. Hori dela eta, bizilagun txartela zonalde horietako batean bizi diren lagunek bakarrik eskura dezaketela gogoratu du Sopelako Udalak. Aipatu agiria lortzeko, "Los Angeles" auzoan kokatutako bulegoan (Akilino Arriola kalea / 946 760 540) agertu beharko dira horiek. Ekainean zehar, 9:30etik 13:30era eta 16:30etik 19:30era, astelehenetik ostiralera, eta larunbatetan goizez bakarrik egongo da zabalik. Bizilagun txartela eskuratzeko NAN eta zirkulazio zergaren ordainagiria baino ez dira aurkeztu behar, udal arduradunek jakinarazi dutenez. Hortaz, ez da beharrezkoa erroldatze agiria.
  Jendartea 2005-06-17 22:46

Bihartik aurrera erabili ahal izango den Sopel-buserako, bi Creditrans txartel jasoko dute familia ugariek

Erabiltzailearen aurpegia Ukberri Uztailetik aurrera, Sopel-busa erabiltzeko Creditrans txartel bina lortzeko aukera izango dute, sosik ordaindu gabe, Sopelako familia ugariek. Izan ere, horiek biltzen dituen EAEko Hirukide elkartearekin harremanetan jarri da Udala, hiru seme-alaba edo gehiago dituzten gurasoek aipatu zerbitzua eskura izan dezaten. Udaletxean dagoen Turismo Bulegoan hartu beharko dira txartelak. Larrabasterra eta Sopelako metro geltoki zein herriguneak eta hondartzak lotzen dituen autobusa larunbat honetatik aurrera egongo da martxan. (Argazkian, Atxabiribileko sarrera).
  Jendartea 2005-06-14 21:20

Ostegunetik aurrera lortu ahal izango da TAOko bizilagun txartela Sopelan

Erabiltzailearen aurpegia Ukberri Hondartza denboraldiarekin batera, bihar Sopelan indarrean sartuko den TAOko bizilagun txartela noiz eta non lor daitekeen jakinarazi dute udal arduradunek. "Los Angeles" auzoan kokatutako bulegoan (Akilino Arriola kalea) lortu ahal izango dute txartela sopeloztarrek, ekainaren 16tik aurrera. Ordutegia ekainean zehar, 9:30etik 13:30era eta 16:00etatik 20:00etara izango da. (Argazkian, TAO eta beste hainbat gairen berri emateko, Imanol Garai alkateak –erdian– eta hainbat zinegotzik ostiralean Atxabiribil ondoko El Sitio tabernan emandako prentsaurrekoa).
  Kirolak 2005-06-10 23:10

Emakumeen Bira dela eta, trafiko aldaketa ugari egongo da larunbat honetan Sopelan

Erabiltzailearen aurpegia Ukberri Iurreta Txirrindulari Elkarteak antolatuta, XVIII. Emakumeen Biraren hirugarren etapa hartuko du Sopelak larunbat honetan. Lasterketa nazioarteko egitarauan onenetarikoa da, Euskal Herriko hainbat udalerrietatik igarotzen da. Baina Sopelan are garrantzi handiagoa edukiko du. Izan ere, Frantziako Tourra hirutan irabazi duen Joane Somarriba (argazkian) herriko semeak parte hartzen du biran. Irteera 16:30ean izango da, Sabino Arana kaletik; 18:55ak aldera toki berean amaitzeko. Sopela ez ezik, Urduliz, Gatika, Maruri, Lemoiz, Gorliz, Plentzia eta Barrika ere zeharkatuko ditu. Horretaz gain, lasterketa dela eta, hainbat neurri hartu ditu Sopelako Udalak. Besteak beste, goratutako oinezkoen pasabideak arindu, zaramontziak kendu eta trafiko aldaketa ugari izango dira udalerrian.
  Jendartea 2005-06-10 22:34

Arrietara hondartzako langa mantenduko dute

Erabiltzailearen aurpegia Ukberri Larrabasterrako Arrietara hondartzara ibilgailuak sartzea eragozteko igaz jarritako langa bere horretan jarraituko duela jakinarazi du Josu Landaluze Zerbitzu eta Hiritarren Segurtasun zinegotziak. Mugatuta egongo da bertatik igarotzea; zamalanetarako ibilgailuak, auzokideenak, anbulantziak eta autobusa baino ezin izango dira sartu. Gainera, udal arduradunak jakinarazi duenez, zamalanen ordutegia murriztuko dute. Joan den udaldian hartutako neurria tirabira ugari sortu zuen, batez ere euren lokala Arrietara ondoan daukaten ostalarien artean.
  Jendartea 2005-06-10 22:10

Sopelan asteazkenetik aurrera egongo da indarrean TAO

Erabiltzailearen aurpegia Ukberri Apirilaren 21eko udalbatzarrean onartu bezala, ekainaren 15etik aurrera egongo da indarrean, Sopelan Trafikoa eta Aparkatzea arautzen duen Ordenantza (TAO). Hain zuzen ere, bainu denboraldia hasten den egun berean. Josu Landaluze Zerbitzu eta Hiritarren Segurtasun zinegotziaren hitzetan, "Kotxea aparkatuta zegoen denbora kontutan hartu gabe, diru kopuru zehatza kobratzeagatik igaz jasotako kexei erantzuna emateko hartu dugu TAO ezartzeko erabakia. Neurririk egokiena dena uste dugu, denboraren arabera ordaindu beharko baita".
  Jendartea 2005-06-10 21:06

Creditrans txartela erabili ahal izango da Sopel-busean joateko

Erabiltzailearen aurpegia Ukberri Hondartza denboraldia heltzearekin batera, Sopel-busa erabiltzeko aukera izango dute, bigarren urtez, Atxabiribil, Barinatxe edo Arrietaran eguzkitan jarri eta bainua hartu nahi duten guztiek. Igaz bezala, Larrabasterra eta Sopelako metro geltoki zein herriguneak eta areatzak lotuko ditu garraio publikoak, ekainaren 15etik irailaren 15era bitartean. Gainera, aurten, (bertan dagoen langa igarota) Arrietara hondartzako sarbidera bertara helduko da Sopel-busa, "mugitzeko zailtasunak dituzten lagunei bertara iristeko erraztasunak emateko", Gonzalo Garcia Ekonomia eta Ogasun zinegotziak aipatu duenez. Beste berrikuntza bat ere aipatu du udal ordezkariak Bizkaiko Garraio Partzuergoari eskerrak emanez. Izan ere, Creditrans txartela erabili ahal izango da uda honetan Sopel-busen bidaiak egiteko.
  Jendartea 2005-06-10 20:14

Astelehenerako egongo da prest Atxabiribil hondartzako sarbidea

Erabiltzailearen aurpegia Ukberri Bete diren agintaldiko bi urteei errepasoa egitearekin batera, sei hilabetez Atxabiril hondartzako sarbidean egin diren aldaketen berri eman du gaur Imanol Garai Sopelako alkateak. "Terraza sistema baten bidez, areatzara oinez iristea eta parkingera modu errazean sartzea ahalbidetu dugu. Baita Sopel-buserako geralekua jarri ere. Horretaz gain, zaramontzi zaharrak berriengatik aldatu eta lurperatu egin ditugu horiek, inpaktu bisuala ahalik eta txikiena eragiteko asmoz", azaldu du udal agintariak. Aipatu lanak 300.000 euroko aurrekontua izan dute eta, kopuru horretatik, Bizkaiko Foru Aldundiak ordaindu du %40a. Atxabiribil hondartzako sarbidea ekainaren 13an inauguratuko dute. (Argazkian, ezkerretik eskuinera; Eukene Nuñez Hezkuntza eta Kultura arduraduna; Ricardo Ibarra Komunikazio, Urbanismo, Turismo eta Ingurumen zinegotzia; Josu Landaluze Zerbitzuen eta Hiritarren Segurtasun saileko arduraduna eta Imanol Garai alkatea; Atxabiribilen).
  Kultura 2005-06-07 14:51

PPko zinegotziaren euskararekiko jarrera "aitzakiatzat eta umekeriatzat" jo du Sopelako Udalak

Erabiltzailearen aurpegia Ukberri Berta Rodriguez Sopelako PPko zinegotziak atzo egindako adierazpenei erantzunez, "hizkuntza ofizial bata ala bestea erabiltzeagatik", ez dituztela inoiz herritarrak diskriminatu adierazi dute udal arduradunek. "Sopelako Udala beti bereiztu egin da, adina edozein izan eta edonondik etorrita, jendea elebitasunera eta hiruelebitasunera ere batzera animatzeagatik, herriko hezkuntza zentroetan jadanik lantzen ari den bezala", azaldu dute gaur plazaratutako komunikatuan. Maiatzaren 26ko osoko bilkuran Rodriguezek izandako jarrerari buruz, ”ezgaitasun politikoak bakarrik eraman dezake pertsona bat umeena den aitzakia bilatzera”, Ricardo Ibarra Komunikazio, Turismo eta Hirigintza zinegotziak adierazi duenez, “euskaraz mintzatzen den pertsona bat ez ulertzeagatik hitz egiteari uko egitea, udalbatza hartan eztabaidarako eta ondorengo onarpenetarako aurkeztu ziren proposamen ezberdinen aurrean bere aukera falta izkutatzen saiatuz, umeen aitzakia delako”.
  Kultura 2005-06-07 14:06

Udalbatzarretan aldi bereko itzulpen sistema jartzea eskatu du Sopelako PPk

Erabiltzailearen aurpegia Ukberri Hedabideetara atzo helarazitako idatziaren bidez, osoko bilkuretan euskaratik gaztelerarako aldi bereko itzulpen sistema jartzea eskatu du Berta Rodriguez Sopelako PPko zinegotziak, "udalbatzako kideen arteko komunikazioa hobetze aldera". Popularren bozeramaileak adierazi duenez, "udalbatzarrean zer esan den ere ez dakigu itzulitako aktak bidaltzen dizkiguten arte, zinegotzi batzuek euskaraz baino ez dutelako hitz egiten". Hori dela eta, Euskararen Erabileraren Normalkuntzari buruzko Oinarrizko Legea "urratzen" ari dela uste du Rodriguezek, "baita hizkuntz horretan hitz egiterik ez dugun udal ordezkariei kaltetzen ere". Hori aitzaki hartuta, hitza hartzeari uko egin zion zinegotzi popularrak maiatzaren 26an egindako azken osoko bilkuran.
  Jendartea 2005-06-01 23:08

Euskal Bizikletan protestaldia burutu du Sopela eta Urdulizko Gazte Asanbladak

Erabiltzailearen aurpegia Ukberri Sopela eta Urdulizko Gazte Asanbladako 50 bat lagunek Euskal Bizikletako helmuga hartu dute, Igeltsera gaztetxea gogoratzeko eta gaztetxe berria aldarrikatzeko. Lasterketa baino askoz puntualagoak izan dira SUGAkoak helmugara hurbiltzen, eskuetan okupazioaren aldeko ikurrak sostengatzen zituztela. Azken 500 bat metrotan zehar sakabanatu dira, aldiro-aldiro okupazio ikurrak ikusi direla. Tropela helmugatik pasa denean gazteak sari banaketaren zain izan dira, tartean "Igeltsera aurrera", "herri bat, gaztetxe bat" eta "okupazioa" bezalako leloak oihukatu dituztela. Sari banaketan tarkekatu dituzte haien leloak, oso nabarmenak Imanol Garai Sopelako alkatea oholtzara igo denean, eta txirrindulariei eskaini dizkieten txaloak.
  Kirolak 2005-06-01 22:38

Angel Viciosok irabazi du Sopelan Euskal Bizikletaren lehenengo etapa

Erabiltzailearen aurpegia Ukberri Liberty taldeko Angel Viciosok gurutzatu du aurren Sopelako udaletxearen parean kokatutako Euskal Bizikletaren lehenengo etaparen helmuga. Vicioso azkarrena izan da hamar txirrindularien artean, Astarloa, Isasi, Bru, Latasa eta Martinez bezalakoen aurretik sartu dela. 26 segundutara tropel nagusia ailegatu da. Lasterketa gaur hasi da Eibarren eta, besteak beste, Barrika, Urduliz, Plentzia eta Lemoiz zeharkatu ostean Sopelan bukatu da. Viciosok etapa irabazteagatik, liderra izateagatik eta erregularitatean lehenengoa izateagatik sari bana jaso du. Argazkian, Vicioso garaipena ospatzen, soinean Euskal Bizikletako liderraren maillot urdina duela.
  Kirolak 2005-05-31 21:17

Ingurumenaren Egunean inauguratuko dituzte Sopelako frontoi eta eskalada-murru berriak

Erabiltzailearen aurpegia Ukberri Apirilaren 4an ospatuko den Ingurumenaren Egunean inauguratuko ditu Sopelako Udalak, Iturrieta parkean egindako estali gabeko frontoi eta eskala-murru berriak. Pilotalekuak 9 metro luzeerako frontisa, 30 metroko ezkerreko pareta eta 10 metroko altuera ditu. Eskalada-murrua, berriz, frontisaren bestaldean kokatuta dago eta 9 metroko zabalera eta 7 metroko alduera ditu. Besteak beste, 88 metro koadro 3D Real Rock panelez, korrosioaren aurkako inprimazioa daukan metalezko egituraz, 400 heldulekuz eta beste horrenbeste torlojuz osatuta dago. Egiturak hormara finkatzeko ainguralekuak, altzairu herdoilgaitzezko jaistekoak eta segurtasun txapak ere baditu; horientzako torlojuekin batera.
  Kirolak 2005-05-31 16:20

Euskal Bizikleta dela eta, trafiko aldaketa ugari egingo dituzte egunotan Sopelan

Erabiltzailearen aurpegia Ukberri Eibarren hasiko da bihar, ekainak 1, Euskal Bizikleta eta Elgoibar, Mendaro, Deba, Mutriku, Ondarru, Lekeitio, Ibarrangelu, Gernika, Mundaka, Bermeo, Bakio, Armintza, Plentzia, Barrika, Sopela, Urduliz, Butroe, Plentzia berriro igaro ostean, Sopelan izango du helmuga lehendabiziko etapak. Txirrindulariak 16:45ak aldera bertara heltzea aurrikusten dute antolatzaileek, lasterketari 17:20ak inguruan amaiera emateko. Ostegunean, berriz, irteera neutralizatua egingo dute, 12:50etik aurrera, Sopelan zehar (Sabino Arana, Akilino Arriola, Iberre, Gatzarriñe, E. Urrutikoetxea, Olabide), Urdulizera bidean. Hain zuzen ere, lasterketa dela eta, hainbat neurri hartu ditu Sopelako Udalak. Besteak beste, goratutako oinezkoen pasabideak arindu eta Sabino Arana kaleko zuloak kentzen ari dira txirrindulariek istripurik izan ez dezaten. Horretaz gain, kale horretan zaramontziak kendu eta trafiko aldaketa ugari izango dira egun hauetan udalerrian.
  Kultura 2005-05-28 18:49

Igeltsera gaztetxean egindako lana Sopelan kaleratu du SUGAk

Erabiltzailearen aurpegia Ukberri Sopelako auzokideei Igeltsera gaztetxean kultura herrikoiaren alde egindako lana erakusteko gaur jaialdia eskaintzen ari dira Sopela eta Urdulizko gazteak. Horrela, goizeko 12:00etatik udaletxearen ondoko “anfiteatroan” Igeltserako hamar tailerrek ingurua hartu dute, umeentzako jolasak burutu dituzte eta bi erakusketa ikusteko aukera dago, Irlandako gatazka politikoa eta Saharako herriari buruzkoak, alegia. Ekimena arratsaldeko 18:00etan amaituko da, tartean bazkaltzeko sardinada egin dutela. Era berean, sabel tristerik izan ez dadin txokolate jana prestatzen ari dira askaltzeko. Ondoren, SUGAko kideek Ezkerraldera joko dute, desalojo mehatxupean dagoen Barakaldoko gaztetxearekin elkartasunean. Argazkian, atzo SUGAk egindako manifestazioaren irudi bat.
  Jendartea 2005-05-28 17:40

Igeltsera gaztetxearen desalojoa salatu dute ehunka gaztek

Erabiltzailearen aurpegia Ukberri “Igeltsera bizirik, gaztetxea lortuko dogu” lelopean 250 bat gazte batu ziren atzo arratsaldean Sopela eta Urdulizko Gazte Asanbladak asteazkenean egindako deialdiari erantzunez. Manifestazio kilometrikoa izan zen, eta Sopela-Urduliz-Sopela ibilbidean guztiz hormatuta dagoen Igeltsera gaztetxetik birritan pasatu egin zen. Bizkaiko Foru Aldundiak indarrez berreskuratutako eraikinean hogei bat ertzain egon zen zaintza lanetan oldartzeko tresneria eskuetan zuela. Halere, asteazkenean ez bezala atzo ez ziren gazteen kontra aritu. Urdulizko batzokiaren aurrean, petardo bat bota eta gero, irakurri zuten adierazpenean Kukutza, Itzubaltzeta, Algorta, Leioa eta beste herri eta gaztetxeen laguntza eskertu zuten SUGAkoek. Era berean, azken bi asteotan bizi izandakoa gogoratu zuten eta Bizkaiko Foru Aldundia, EAJ eta Sopela eta Urdulizko agintarien “jarrera” ertzainei leporatu zizkieten desalojoa, identifikazioak eta jipoiketekin berdindu zuten. Dena den, “negoziatzeko prest” agertu zen SUGA, baina “ez gaituztela kikilduko” argi utzi zuen.

Nabarmenak

Zorion agurrak