Kultura 2010-11-30 18:14

Euskal mitologiari buruzko erakusketa paratu dute Urdulizen

Erabiltzailearen aurpegia Ukberri Abenduaren 12ra bitartean, euskal mitologiari buruzko erakusketa izango da ikusgai Urdulizko kultur etxean, tokiko Udalak antolatuta. Testu eta irudien bidez gure arbasoen mundua, magia eta misterioa eguneroko zereginekin batera bizi zuten garaia ezagutzeko aukera izango dute bertaratzen diren lagunek. Gainera, abenduaren 3ko Euskararen Nazioarteko Egunean kondaira zaharrenetako pertsonaiei bizia emango diete, azalpen antzeztuaren bitartez. Hitzordua 18:00etan jarri dute, kultur etxean bertan. Argazkian, Leioako Lamiako auzoan euskal mitologia birgogoratzen dute urteroko maskaradaren bitartez.
  Kultura 2010-11-25 10:57

Jarduerez beteriko asteburua izango dute txikienek Urdulizen

Erabiltzailearen aurpegia Ukberri Ostiral honetan hasita, ekimenez beteriko asteburua izango dute haur eta gazteek Urdulizen. Biharko, 5 eta 12 urte bitarteko neska-mutilei zuzendutako "Liburu magikoen bila" izeneko gynkana antolatu dute, tokiko probalekuan. Horretaz gain, txikienentzako txokoa eta Kontu Kantoi ipuin kontalarien saioa izango dira, aipatu probarekin batera, 17:00etatik 20:00etara. Gynkanan parte hartzeko Urdulizko kultur etxean eman beharko da izena. Etzi, larunbata, Jakin eta Jolas pailazoak egongo dira 12:00etatik aurrera kultur aretoan. Arratsaldez, 18:00etatik 20:00etara, talo, txorizo eta sagardo festa egingo dute probalekuan. Azkenik, igandean, puzgarri eta tailerrak izango dituzte umeek, 12:00etatik 14:00etara. Argazkia: © Jakin eta Jolas.
  Jendartea 2010-11-22 20:21

Emakumeenganako indarkeria salatuko du ostegunean Urdulizko Inola elkarteak

Erabiltzailearen aurpegia Ukberri Ostegun honetan, hilak 25, bi atalez osatutako ekitaldia egingo du, arratsaldeko zazpietatik aurrera, Urdulizko Inola emakumeen elkarteak. Batetik, emakumeenganako indarkeriaren aurkako adierazpen instituzionala irakurriko dute; eta bestetik, "La riqueza de las mujeres" izeneko ipuin kontalaria izango dute nagusiek. Ekimena tokiko kultur etxean egingo dute. Inola emakumeen elkarteak jakinarazi duenez, "Udalaren laguntasuna eta presentzia eskatu dugu, baita alderdi guztiena, udal elkarteena eta bestelako taldeena ere". Argazkian, hainbat lagun Urdulizko Emakumeen Etxean.
  Ekonomia 2010-11-22 19:47

Langile bat hil da Urdulizen izandako istripuan

Erabiltzailearen aurpegia Ukberri Gaur arratsaldean 57 urteko langile bat hil da Urdulizen, istripu baten ondorioz. Ezbeharra 15:30 aldera jazo da Igeltzera industrialdean dagoen lantegietako batean, Europa Press albiste agentziak Ertzaintzaren iturriak aipatu zabaldu duenez. Antza denez, beharginari karga bat erori zaio gainean eta bertan hilik geratu da. Anbulantzia bertaratu da ezbeharra izan den tokira, baina ezin izan du ezertxo ere egin. 57 urteko langilea momentuan hil da, kolpearen ondorioz. Ertzaintza eta Osalan ari dira ezbehar larri honen inguruko nondik-norakoak aztertzen. Argazkian, J.M.V. 58 urteko gizonezko sopeloztarrari heriotza eragin zion lan istripua salatu zuten irailaren 9an 35 lagun inguruk.
  Jendartea 2010-11-20 10:15

Urdulizen etxebizitza gehiago eraikiko ditu Neinorrek

Erabiltzailearen aurpegia Ukberri Urdulizen etxebizitza berriak altxatzeko lanak Construcciones Ganeko enpresari esleitu dizkio Neinorrek, Europa Press berri-agentziak zabaldu duenez. BBKren menpeko sozietateak aipatu udalerrian garatuko duen bosgarren proiektua da oraingoa. Neinor enpresak azaldu duenez, eraikuntza lanak joan den astean hasi ziren. 2012ko udazkenean amaitzea aurreikusten dute. Bloke berriak bi eta hiru logeletako 20 etxebizitza izango ditu; atiko eta duplexetan banatuta, hurrenez hurren. Horietako bakoitzak altzari, labe eta bitrozeramikarekin hornitutako sukaldea izango du. Bi logela, bi komun, sukaldea, jangela, garajea eta trastelekua duten etxebizitzak izango dira merkeenak: 240.000 eurotan egongo dira. Dagoeneko horien %75a salduta dagoela jakinarazi dute. Argazkian, aurreko obra batzuk Urdulizen / © Urdulizko Udala.
  Jendartea 2010-11-16 17:58

Atzeratu egin dute Urdulizko ospitalearen lehenengo harria jartzeko ekitaldian atxikitako gazteetako baten kontrako epaiketa

Erabiltzailearen aurpegia Ukberri Goizeko 11ak aldera hasi da gaur, Getxoko Justizia Jauregian, Negurin, Urdulizko ospitalearen lehenengo harria jartzeko ekitaldian atxikitako bi gazteetako baten kontrako falta epaiketa. Hala ere, hasi eta gutxira bertan behera utzi du saioa epaileak. Mutilaren abokatuak azaldu duenez, atestatua egiterako orduan ertzaintzek ez dute benetako identifikazio zenbakia jartzen, segurtasun arrazoiengatik edo. Kontua da deklaratu behar zuten bi poliziek gertaeretan esku hartu zutela ziurtatzen duen agirik ez dela magistratuarengana heldu. Letraduaren protestaren ostean, judizioa atzeratzea erabaki du epaileak. Gazte horri "desobedientzia falta" leporatzen diote. Baina, egun berean atxikitako beste mutil bat epaitu behar dute "lehendakariaren kontrako irain delitua" egotzita. Argazkian, atxikitako gazteetako bat.
  Kultura 2010-11-16 09:44

"80 egunean" filma proiektatuko dute ostiralean Urdulizen

Erabiltzailearen aurpegia Ukberri Uribe Kostako zinemaren astearen baitan, ostiral honetan, hilak 19, "80 egunean" izenburuko filma proiektatuko dute Urdulizko kultur etxean. Hitzordua arratsaldeko 8:15ean jarri dute. Proiekzioa euskaraz izango da. Hala ere, tokiko iturriek jakinarazi dutenez, espainolezko azpitituluak ere izango ditu. Sarrera doakoa izango da. Bestalde, jardunaldi horien baitan, Fermin Muguruzak eta Javier Corcuerak zuzendutako "Checkpoint Rock, kantak Palestinatik" dokumentala emango dute, bi ostegun barru, hilaren 25an. Hitzordua 19:00etan jarri dute Sopelako Kurtzio kultur etxean. Ikus-entzunezko lana arabieraz egongo da ikusgai, euskarazko azpitituluekin. Azkenik, hurrengo egunean, toki eta ordu berean, "Izarren argia" filma proiektatuko dute, euskaraz, espainolezko azpitituluekin. Argazkian, "80 egunean" filmaren kartela.
  Jendartea 2010-11-15 10:53

Bihar epaituko dute Urdulizko ospitalearen lehenengo harria jartzeko ekitaldian atxikitako gazteetako bat

Erabiltzailearen aurpegia Ukberri "SOS Santa Mariñe" lelopean, maiatzaren 17an kontzentrazioa egin zuten hainbat herritarrek, Urdulizko ospitale berriaren obren aurrean. Patxi Lopez lehendakaria zen joatekoa aipatu azpiegituraren lehen harria jartzeko ekitaldira. Agintarien ingurura hurbiltzeko ahaleginik ez zuten egin protestan zeudenek. Hala ere, ertzainek bi gazte atxiki eta identifikatu zituzten. Egunak pasatzean, horietako baten etxera joan zen Ertzaintza, mutila han topatuko zutelakoan. "Baina han ez zegoenez ezin izan zuten eraman", gaztearen gertukoek UKBERRI.NETi azaldu diotenez. "Bere amari esan zioten komisarian galdera batzuk egitea besterik ez zela euren asmoa", gaineratu dute. Horren berri izatean, bere abokatuarekin jarri zen kontaktuan mutila eta horrek esan omen zion, komisaria ez zela deklaratzeko lekua eta, beraz, hara ez joateko. Gaztearen hurbilekoen arabera, "printzipioz ertzaintzaren nahia, desobedientzia larria delitua sartzea zen, baina epaileak ez zuen onartu eta azkenean leporatzen diotena falta bat baino ez da: desobedientzia". Epaiketa bihar, asteartea, izango da Getxoko Justizia Jauregian, Negurin, 10:30ean. Argazkian, maiatzaren 17an atxikitako lehenengo gaztea.
  Jendartea 2010-11-05 19:14

Emakume gazte bat atxilotu dute Urdulizko baserri batean lapurtzea egotzita

Erabiltzailearen aurpegia Ukberri Ertzaintzak 19 urteko emakumezko bat atxilotu zuen atzo, osteguna, Urdulizen, etxebizitza batean indarrez egindako lapurreta delitua leporatuta. Eusko Jaurlaritzako Herrizaingo Sailak zabaldutako bertsioaren arabera, baserriko jabeak harrapatu zuen gaztea, bertatik irteten, lapurturiko objektuekin: zenbait bitxi eta diruarekin, hurrenez hurren. 14:30ak aldera izan ziren gertaerak. Ertzaintzak baserriko jabearen deia jaso zuen ordu horretan, ustezko lapurra barruan atxikita zu esanez. Patruila-auto batzuk joan ziren bertara eta, baserrira iristeko bidean, poliziek emakume gazte bat ikusi zuten bidetik oinez eta presaka alde egiteko itxurarekin. Ertzainek neska geldiarazi egin zuten. Deia egin zuena bera ote zen galdetzen ari zirela, bidearen atzealdetik, baserri baten ondotik, beste emakume bat irten eta poliziei adierazi zien bera zela lapurretaren abisua eman zuena.
  Ekonomia 2010-10-26 12:43

Hainbat langabetu sei hilabetez kontratatuko ditu Urdulizko Udalak

Erabiltzailearen aurpegia Ukberri Urdulizko Udalak tokiko langabetuei zuzendutako prestakuntza eta enplegu programa berria martxan jarri du. Ekimena iaz ere garatu zuten, lanik ez dutenen profil profesionala hobetze aldera. Izan ere, udal iturrien arabera, langabetuen kopurua "izugarri" handitu da Urdulizen. Tokiko arduradunek tasa hori jaitsi nahi dute, lanik ez daukatenei enpresentzat erakargarriak izateko heziketa emanez. Aipatu programa egoera latzenean dauden langabeei zuzenduta dago bereziki. Behin eskolak bukatu eta 15 eguneko probaldia igarota, gehienez jota, 6 hilabeteko kontratua egingo diete aukeratutako lagunei. Iaz, ekimenean parte hartutako 36 pertsonetatik zortzik udalean lan egiten jarraitzen dute. Tokiko erakundeak 150.000 euro zuzendu ditu horretarako aurten. Argazkian, Urduliz herria.
  Kultura 2010-10-25 20:44

Urdulizerako bidea hartu du berriro Gernikako Azokako barazkien sariak

Erabiltzailearen aurpegia Ukberri Azken bi urtetan bezala, Adela Andikoetxea Urdulizko baserritarrak barazkien saria irabazi egin du gaur, urriko azken astelehenean ospatu den Gernikako azokan. Aurten 353 saltoki izan dira bertan. Udaltzaingoaren arabera, ehun mila lagun inguru batu da azokan, "Busturialdeko Hitza"-k zabaldu duenez. Urtero legez, hainbat lehiaketa egin dira: esan bezala, barazkiena Adelia Andikoetxea urduliztarrak irabazi du, frutena Gatikako Jose Etxeberriak, milalore eztiarena Zornotzako Valentin Llonak, txilar eztiarena Kortezubiko Javier Larrinagak, txakoli beltzarena Bakioko Zabalak eta gaztarena Idiazabalgo Aranburu elkarteak, besteak beste. Enkantean, berriz, gazta erdiagatik 7.700 euro ordaindu ditu Mungiako Taska jatetxeak, inoizko kopururik altuena. Argazkian, barazkien postu bat Algortako San Lorentzo azokan, Andikoetxearentzat lehenengo azoka izan dena.
  Kultura 2010-09-27 19:22

Uribe Kostako euskalkiari buruzko ikastaroa antolatu dute Urdulizen

Erabiltzailearen aurpegia Ukberri Tokiko euskalkiari eta kulturari buruz gehiago jakin nahi dutenentzat, 10 orduko ikastaroa antolatu dute Urdulizko kultur etxean Labayru Ikastegiak eta Uribe Kostako Mankomunitateak. Izena emateko epea urriaren 8ra arte egongo da zabalik. Eskolak urriaren 14an, 21ean eta 28an eta azaroaren 4an eta 11n izango dira 18:00etatik 20:00etara. Egun horietan, "Zer ikusi, ha ikasi!" DVDa izango da ikusgai eta, batez ere, bertan jorratzen diren gai nagusiak landuko dituzte, euskalkiaren eta batez ere hiztegiaren aldeko berezitasunak kontutan hartuz. Gainera, antolatzaileek jakinarazi dutenez, "eskualdeko kulturaren ardatzak" landuko dituzte: kantak, ohiturak, esaera zaharrak eta hiztegi berezia, besteak beste". Argazkian, 2009ko ekainaren 4an eskualdeko hizkuntza ondarea jaso eta zabaltzeko lankidetza hitzarmena sinatu zuten Getxoko Udalak eta Uribe Kostako Mankomunitateak. Imanol Landa alkateak eta Juan Olea Mankomunitateko presidenteak izenpetu zuten akordioa.
  Jendartea 2010-09-09 08:42

Mankomunitateak eta Behargintzak egoitza bana zabalduko dute Urdulizen

Erabiltzailearen aurpegia Ukberri Uribe Kostako Zerbitzu Mankomunitateak eta Behargintza Enplegu eta Tokiko Garapenerako Zentroak bulego berri bana zabalduko dute Urdulizen. "Urduliz Gaur" udal aldizkariak bere 5. zenbakian (pdf) iragarri duenez, "aurreikuspenak betez gero" egoitza biak hartuko ditu 2011ko lehenengo hiruhilekoan eraikitzen hasiko den 800 metro koadroko "eraikin modernoak". Aipatu higiezina Igeltzera industrialdeko parkingean eraikiko da, metrotik, errepide nagusitik eta herrigunetik gertu. Kokapen hori "pribilegiatua" da, Udalaren iritziz. Mankomunitateak eta Behargintzak ordainduko dute eraikina jartzeko lanak eta Urdulizko Udalak, berriz, orubea jarriko du. Egoitzekin batera, lurrazpiko hiru solairuko parkinga egingo dute, 300 ibilgailurako kapazitatearekin. Bitartean, Uribe Kostako Mankomunitatearekin eta Behargintzarekin aritzeko, hurrenez hurren, Larrabasterrara eta Berangora joaten jarraitu beharko dute Urdulizko auzokideek. Argazkian, eraikina altxatuko den oraingo parkinga / © Urdulizko Udala.
  Kultura 2010-09-07 19:08

Bihar jarraituko dute Urdulizeko Andra Mari jaiek

Erabiltzailearen aurpegia Ukberri Joan den asteburuan abiatu ziren Urdulizen Andra Mari jaiak. Bada, pare bat egunetako etenaldiaren ostean, asteazken honetan, berriro ekingo diete ospakizunei. Ohi bezala, festen bigarren asteburuan Elortza aldean izango dute gau-giroa parrandazaleek. Biharkoa Andra Mari eguna izanik, lehenik meza nagusia eta, ondoren, ohorezko aurreskua zein herri kirolak izango dira eliza alboko landan. Arratsaldean, berriz, Erdizka Lauetan taldeak gidatuko du dantza emanaldia eta, gauez, suziriak ere izango dira. Ostiraletik igandera, antzerki, musika eta kirol ekitaldiek beteko dute egitaraua, mozorro gaua, areto dantzak eta usadiozko saioak (herri bazkaria, sardina jana, idi probak, mus txapelketa...) ahaztu barik, noski. Ekitaldiren bat nabarmentzearren, ostiralean, Urdulizko Skate Expresion erakustaldia egingo dute hirugarren urtez, 18:00etatik aurrera. Egun berean, Chalwa Band, King Konsul eta Novato taldeen kontzertuez gozatzeko aukera egongo da. Larunbatean, berriz, kick boxing eta boxeo lehiak izango dira Iparralde kiroldegian. Azken egunean, III. Kotxeetako Urduliz Slaloma egingo dute, 16:30etik aurrera, futbol zelai zaharraren alboko parkingean. Argazkian, Aritz Albaizar Martinez de Lezeak eta Alberto de Abajo Gonzalezek irabazi dute aurtengo kartel lehiaketa.
  Kultura 2010-07-20 10:56

Urdulizen ere ospatuko dute Santa Mariñe eguna

Erabiltzailearen aurpegia Ukberri Sopela aldean bezala, gaur, asteartea, Santa Mariñe eguna ospatuko dute Urdulizen. Jaiegun tradizional honetan urduliztarrak Santa Mariñe haitzetako baseliza pean egingo den erromeriaz gozatuko dute. Egun honetan hainbat ekitaldi izaten dira. Horien artean nabarmentzeko modukoak dira euren sustraitzeagatik, meza nagusia, ohorezko aurreskua, fanfarreek alaitutako hamaiketakoa eta tortilla lehiaketa. Udalak galletak, muztioa eta ardoa banatuko dituzte mokadu lez. Horrenbestez, 11:30ean hasiko da ospakizun eguna (kalejiran abiatuko dira baselizara, txistulariek lagunduta), arratsalde partean herrigunera bueltatu aurretik. Izan ere, tortilla lehiaketa aitzakia bikaina bilakatzen da, bazkaria bertan egiteko. Orotara, 80 arrautzopil egiten dituzte 30 talde inguruk. Herrigunera 19:00ak aldera abiatuko dira, buruhandiek eta dantzariek lagunduta, Antsonekoa plazan txokolate jana egiteko. Argazkian, Sopela aldean ere izaten da festa giro itzela / © Sopelana.net.
  Kultura 2010-07-07 22:46

AEBetako armadak Gerra Hotzean ateratako argazkiak jarri dituzte ikusgai Urdulizen

Erabiltzailearen aurpegia Ukberri Ameriketako Estatu Batuetako (AEB) armadak airetik Urdulizko hainbat argazki egin zituen 1956an, tokiko udal erakundeak adierazi duenez. Irudien kopia bi egin zituzten: bata eurentzat eta bestea Espainiako gobernu frankistarentzat. Argazkiak Gerra Hotzaren testuinguruan atera zituzten, "Sobietar Batasunaren inbasio baten aurrean erantzun ahal izateko", adituen arabera. Erakusketa gaur zabaldu dute Urdulizko Kultur Etxean. Bestalde, tokiko leku-izenak gal ez daitezen, toponimo bilketa lana egiten ari dira Urdulizen. Ikerketaren arduraduna ostegunero egongo da, uztailean zehar, kultur etxean, iradokizunak jaso edo zalantzak argitzeko. Horretarako ordutegia 12:00etatik 14etara eta 16:00etatik 18:00etara izango da. Argazkian, AEBetako armadak ateratako argazkietako bat / © Urdulizko Udala
  Kultura 2010-07-05 23:53

Urdulizko leiho eta balkoietako loreen txapelketa abian da

Erabiltzailearen aurpegia Ukberri Leiho eta balkoietako loreen txapelketa antolatu dute hirugarrenez Urdulizen. Bertan parte hartzeko izen-emate epea uztailaren 26an (astelehena) bukatuko da, 13:30ean. Irabazleak zeintzuk diren, berriz, abuztuaren 3an (asteartea) emango dute ezagutzera. Sariei dagokienez, abuztuaren 28an, Baserritarren Azoka Egunean, banatuko dira. Bi atal izango dira: bata, leiho eta balkoiena; eta bestea, terrazena. Batean zein bestean, 150 euro, garaikurra eta Ayoberri sagardotegian bi pertsonentzako afaria jasoko dute irabazleek. Horretaz gain, udal aldizkarian argitaratuko dute horien lore sorten argazkia. Bigarrenei, berriz, 100 euro eta garaikurra emango dizkiete. Argazkian, lorez beteriko balkoi bat / © mikelhervas.
  Kultura 2010-07-05 14:07

Buztan erregosiaren festaz gozatuko dute larunbatean Urdulizen

Erabiltzailearen aurpegia Ukberri Larunbat honetan, uztailak 10, Buztanluze Sukalki Txapelketaren 44. edizioa egingo dute Urdulizen. Urtero legez, sukaldari, profesional eta zaleak elkartuko dira lapiko gozoen inguruan, Eleizalden, Andra Mari elizaren ondoko zelaietan. Batez ere Urduliz eta Uribe Kostako herrietakoak izan ohi dira parte-hartzaileak baina, bertokoez gain, badira bestelako tokietatik etorritakoak ere, Bilbotik esaterako, udal iturriek zehaztu dutenez. Txori Alai Kultur Elkarteak antolatzen du txapelketa, eta Urdulizko Udalak babesa ematen dio ekimen honi. Aurtengo edizioan, antolatzaileen ustez, 50 lapiko inguru aurkeztuko dira, aurreko urteetan izandako joera aztertuta. Guztiz ekimen herrikoia da, eta, hori horrela, ez da saririk ematen dirutan. Parte-hartzea da saritzen dena: koadrilei garaikurrak eta opariak ematen zaizkie, baina dirurik ez. Izan ere, lehiaketa horrek ez du irabazi asmorik. Aisialdiko proposamen gastronomiko hutsa da, herritarren partaidetzan oinarritutakoa. Argazkian, era askotan aurkez daiteke buztanluzea / cc-by-nc Andrew Huff.
  Jendartea 2010-06-21 20:51

Logotipoa sortzeko lehiaketa jarri du martxan Urdulizko jai batzordeak

Erabiltzailearen aurpegia Ukberri Urdulizko jai batzordeak logotipoa sortzeko lehiaketa jarri du martxan. Horretan edonork parte har dezake, eta nahi adina irudi mota bidal daitezke. Adierazi duenez, logotipo guztiek izan beharko dute "Urdulizko jai batzordea" leloa. Formatuari dagokionez, bi motatan bidali beharko dira: bata nahi diren koloreekin, eta bestea kolore bakarrarekin. Lanak bidaltzeko azken eguna ekainaren 30a izango da, eta posta arruntaz zein elektronikoz egin daiteke. Batetik, Urdulizko kultur etxera bidaltzerik badago, Aita Gotzon kaleko 16. zenbakira, 48610 posta kodearekin. Bestela, urdulizkojb[abildua]urduliz.net helbidera zuzendu beharko da. Epaimahaia tokiko jai batzordeak osatuko du eta erabakia uztailaren 6an jakinaraziko dute. Irabazleak 100 euroko saria jasoko du. Argazkian, Urduliz herria.
  Jendartea 2010-06-08 18:42

Bi gizon atxilotu dituzte Urdulizen "diru tindatuaren" maula egiten saiatzea egotzita

Erabiltzailearen aurpegia Ukberri Ertzaintzak bi gizonezko atxilotu zituen atzo Urdulizen, iruzur delitu bat leporatuta. Bizkaiko udalerri ezberdinetan ustez "billete tindatuen" iruzurra egin izana egozten diete bi atxilotuei, Eusko Jaurlaritzako Herrizaingo Sailak gaur jakinarazi duenez. Kasu guztietan, biktimek ondasunen bat (lokalak eta ibilgailuak, batez ere) saltzeko edo negozioren bat eskuz aldatzeko iragarkiak jarriak zituzten internet bidez edo hedabide idatzietan. Horrela, iruzurgileek Areetako saltzaile bati egin zioten maula eta bere autoa saldu nahi zuen Urdulizko gizonezko bati gauza bera egiten saiatu ziren, polizia iturrien arabera. Egin berri diren atxiloketei esker, autoak konpontzeko enpresa bat salgai jarri zuen Getxoko enpresari bati iruzur egin ziezaioten ere galarazi omen du Ertzaintzak.

Nabarmenak

Zorion agurrak