Jendartea 2009-12-22 19:27

Uxerre baserriko erasoa irmoki gaitzetsi eta udalerrian ertzain gehiago ibiltzea eskatu du Urdulizko Udalbatzak

Erabiltzailearen aurpegia Ukberri Uxerre baserrian ostiralean izandako lapurretaren ostean, ez ohiko osoko bilkura egin du gaur goizean, 10:30ean, Urdulizko Udalbatzak. Bertan adostu eta publiko egindako adierazpenean, tokiko agintariek "irmoki" gaitzetsi dute, "bihozmin sakonetik eta, amorrua eutsirik", Ansoleaga sendiak jasandako erasoa; "gure lagun eta auzokide Felisaren heriotza ekarri duena". "Une gogor eta latz hauetan, familia eta gertukoei dolumina agertzea baino ez zaigu gelditzen. Halaber, euren alboan izango gaituztela eta, ekintza anker hau zigorgabe geratu ez dadin, gure esku dauden bitartekoak jarriko ditugula jakinarazi nahi diegu", gaineratu dutenez. Halaber, Urdulizen ertzain gehiago jartzea eskatu diote Eusko Jaurlaritzaren Herrizaingo Sailari, "biztanleria barreiatuta bizi dela eta udaltzainik ez dagoela kontuan izanda". Azkenik, hiru dolu egun deitu dituzte, banderak haga erdian jarriz. Argazkian, Juan Olea Urdulizko alkatea, Getxon emandako prentsaurreko batean.
  Jendartea 2009-12-22 11:45

Hotzak eraginda hil omen zen Urdulizko baserriko emakumea

Erabiltzailearen aurpegia Ukberri Ostiralean Urduliz eta Plentzia arteko errepideko Uxerre baserrian sartu ziren gaizkileen bila jarraitzen du Ertzaintzak. Bertan bizi ziren adineko bi pertsonetatik, 83 urteko emakumea hilik aurkitu zuten atzo eta 70 urteko gizona larriki zaurituta. Eusko Jaurlaritzaren Herrizaingo Saileko iturriak aipatuz, Europa Press albiste agentzia espainolak zabaldu duenez, hotzak eraginda hil omen zen emakumezkoa: "lapurrek eskuak lotuta, ahoa estalita eta lurrean botata utzi zituzten bizilagunak, 64 orduz. Anaiak hipotermiari aurre egin ahal izan zion arren, arreba senide batek atzo aurkitu baino ordu batzuk lehenago —familiarren berririk ez zuen— hil zen", hedabide horren arabera. Hala ere, Herrizaingo Sailak berak onartu zuen, atzo, gutxienez gizonak kolpe ugari dituela gorputzean. Emakumearen heriotzaren zergatiak autopsiak argitu beharko ditu. Argazkian, Ertzaintzaren hainbat ikertzaile aurreko batean.
  Jendartea 2009-12-21 14:53

Urdulizen abuztuan lapurtutako baserri berean sartu eta bizilagunetako bat hil dute

Erabiltzailearen aurpegia Ukberri Urduliz eta Plentzia arteko errepideko baserri batean ezezagunek egindako lapurreta ikertzen ari da Ertzaintza. Bertan bizi ziren adineko bi pertsonetatik, 83 urteko emakumea hilik aurkitu dute eta 70 urteko gizona larriki zaurituta —anai-arrebak dira biak—, Eusko Jaurlaritzaren Herrizaingo Sailak zabaldutakoaren arabera. Dirudienez, ostiral arratsaldean gertatu zen lapurreta: gaur, goizeko 10etan, izan du gertaeraren berri Ertzaintzak, SOS Deiak zerbitzuak abisua jaso ostean. Agudo abiatu dira bertara polizia zein osasun zerbitzuak. Hala ere, emakumezkoaren heriotza egiaztatu baino ezin izan dute egin eta, artatu ostean, Gurutzetako ospitalera eraman dute gizonezkoa. Polizia iturrien arabera, kolpe ugari ditu gizonak eta pronostiko erreserbatukoa da bere egoera. Abuztuaren 17an, lau lagun atxilotu zituen Ertzaintzak, aurreko goizaldean baserri berean ostu eta jabeak jotzea egotzita. Horietatik hiru libre utzi zituzten. Argazkian, Ertzaintzaren hainbat ikertzaile aurreko batean.
  Hezkuntza 2009-11-26 13:54

Haur eskola eraikitzen hasi dira Urdulizen

Erabiltzailearen aurpegia Ukberri "Legealdi honetan aurrera atera beharreko proiekturik garrantzitsuenetariko bat" dena gauzatzeko lanak abian ditu jada Urdulizko Udalak. Haur eskola altxatzeko obrak 9,5 hilabetetan bukatuta egotea espero da, eta beraz, zentroa 2010-2011 ikasturterako prest egotea aurreikusi dute. Urdulizko haur eskola Arteta kaleko lursail batean eraikiko da, egungo kultur etxearen eta etorkizuneko osasun zentroaren ondoan. Horrela, "eremu hori topagune garrantzitsua izango da herriko bizilagunentzat, bai eskainiko dituen zerbitzuengatik, bai herriaren erdigunean dagoelako", tokiko agintarien arabera. Eraikin berriaz gain, jolaserako patio bat egingo dute kanpoaldean. Gainera, espazio publiko bat ere atonduko da, etorkizunean parke bat jartzeko eta, bide batez, ingurua urbanizatzeko. Argazkian, Urdulizko kultur etxearen ondoan egongo da haur eskola.
  Ekonomia 2009-11-22 15:42

Kultur Etxea txarto funtzionatzearen errua kaleratutako langile bati botatzea egotzi dio Urdulizko Udalari ELAk

Erabiltzailearen aurpegia Ukberri "Zer gertatzen da Urdulizko Kultur Etxean?" izenburupean, udalerriko kaleak kartelez bete ditu ELA sindikatuak. "Hori da irailetik erabiltzaileek euren buruei egiten dioten galdera, zergatik huts egiten duten bertan antolatzen diren ekimenak, alegia", gaineratu dute. Hain zuzen ere, "gezurretan aritzea" leporatu dio Urdulizko Udalari sindikatu nazionalistak: "erabiltzaileak kexatzen diren bakoitzean, langile bati botatzen diote errua. Udalarena baino ez da funtzionamendu txarraren ardura", azaldu dute. ELAk argitu duenez, duela 20 urtetik hona, Kultur Etxearen ekimenak antolatu eta planifikatu dituen langilea, Oiane Alzibar, uztailaren 30eko alkate dekretu bidez kaleratu zuten, eta abuztuaren 1etik ez dauka horren ardura. "Interes publiko, efikazia eta eraginkortasun arrazoiak argudiatuta bota dute, hori gezurra baino ez denean. Bere lan baldintzak direla eta, Alzibarrek Udalarekin duen auzia da, kaleratua izateko arrazoia", salatu du ELAk. Argazkian, Urdulizko kultur etxeko eraikina.
  Kultura 2009-11-13 19:27

Bigarren eskuko euskarazko liburuen azoka izango da bihar Urdulizen

Erabiltzailearen aurpegia Ukberri Larunbat honetan, azaroak 14, bigarren eskuko euskarazko liburuen azoka egingo dute Urdulizeko Antsonekoa plazan, osasun etxetik gertu. Euria egiten badu, probalekuan izango da. Bisitariek hainbat gaiei buruzko argitalpenak erosteko aukera izango dute, guztiak ezin merkeago: bat, bi edo hiru eurotan egongo dira, Uribe Kostako Mankomunitateko Euskara Zerbitzuak zehaztu duenez. Azoka 11:00etatik 14:00etara eta 17:30etik 20:00etara zabalduko dute. Horretaz gain, hainbat ikuskizun izango dira, egunean zehar. Eguerdiko ordu batean, “Txintxin magikoa” izeneko ikuskizuna eskainiko du Asier Kidam magoak. Iluntzean, berriz, Kantu Kantoi ipuin kontalari eta ilustratzaileaz gozatzeko aukera egongo da, 19:00etatik aurrera. Horretaz gain, parte hartzaileen artean 100 euroko txartela zozkatuko dute, euskarazko liburu, jolas eta CDak erosteko. Argazkian, hainbat lagun liburuak ikuskatzen, beste azoka batean.
  Kultura 2009-11-13 19:11

Seme-alabekin euskaraz jolasten irakatsiko diete aita-amei Urdulizen

Erabiltzailearen aurpegia Ukberri Gorlizen bezala, Urdulizko Udalak "Katramila" izeneko ikastaroa eskainiko die, 0 eta 6 urte bitarteko haurren guraso zein hezitzaileei, Uribe Kostako Mankomunitateko Euskara Zerbitzuaren bitartez. Urtxintxa astialdiko eskolak berriki plazaratutako "Katramila, goizetik gauerako abesti-jolasak" liburu-diskoan bildutako euskal jolas eta kantak aita-amei eta irakasleei erakustea da ekimenaren helburua, umeekin euskaraz jolastu ahal izateko. Horrenbestez, 7 eta 20 lagun arteko taldea osatuko dute, bi orduko eskola emateko. Saioa azaroaren 30ean, astelehena, izango da, 18:00etatik 20:00etara, Urdulizko kultur etxean; nola ez, euskaraz. Interesatuta egonez gero, informazio eta izen-emate orria Uribe Kostako Mankomunitateko Euskara Zerbitzuan eta aipatu kultur etxean izango dira eskuragarri. Izena emateko epea hilaren 24ra arte egongo da zabalik. Argazkian, orain bi ostegun aurkeztu zuten "Katramila, goizetik gauerako abesti-jolasak" liburu-diskoa.
  Ekonomia 2009-11-04 19:54

Herriko langabetuak trebatu eta kontratatuko ditu Urdulizko Udalak

Erabiltzailearen aurpegia Ukberri 2009ko Enplegu Prestakuntza Programaren barruan, langileak prestatu eta, ondoren, kontratatzeko hautaketa prozesua abian jarri du Urdulizko Udalak. Gauzak horrela, dagoeneko zabalik dago eskariak aurkezteko epea, tokiko iturriek adierazi dutenez. Azaroaren 30era arte egongo da izena emateko aukera. Prozesuan parte hartu ahal izateko, ondoko baldintza hauek jarri dituzte: Urdulizen erroldatuta egotea, gutxienez 2007ko urtarrilaren 1etik aurrera; 18 urte beteta izatea; eskariak aurkezteko epea amaitzen denerako langabe egotea; eta azkenik, horretarako egingo den balorazioaren arabera, egoera ekonomiko larrian egotea. Udalbatzak onartutako oinarriekin bat, sei hilabetekoak izango dira kontratazioak. Izena emateko baldintza guztiak interesatuen eskura daude honako leku hauetan: udal bulegoetan, Udalaren web orrian (www.urduliz.net) eta Uribe Kostako Behargintzan. Argazkian, Juan Olea Urdulizko alkatea.
  Politika 2009-11-02 20:28

Andoni Muñoz Urduliztik kanpo 15 urte daramatzala gogoratu dute lagunartean

Erabiltzailearen aurpegia Ukberri Andoni Muñoz de Vivar Berrio Urdulizko euskal preso politikoak herritik kanpo 15 urte egin dituela gogoratu dute azken egunotan dozenaka auzokidek. Etxeratek eta Iretargi kultur elkarteak antolatutako ekimenetan herri giroa izan da nagusi, antzinako gogorapenak eta amorrua ere ez direla falta izan. Horrela, ostegunean "15 urte Urduliztik kanpo" hitzaldi eta bideo-forumera 40 lagun hurbildu ziren. Bertan, Muñozek zein 1994an ihes egiteari ekin zioten Gorka Martinezek eta Iñaki Bilbaok pairatutako sakabanaketaren berri eman zuten. Ostiralean, berriz, hileko azken ostiraleko elkarretaratzea berriro egiteari ekin zioten, 16 lagun bildu zirela. Baina, herrikideen omenez, ospakizunak ere egin zituzten, eta horrela, 61 pertsona bildu ziren larunbatean herri bazkarian, aurretik triki poteoa eta ondoren antzerkiaz gozatu zutenak. Iluntzean ere, Auskalo Non taldearen erromeriarekin dantza egiteko aukera izan zuten.
  Ekonomia 2009-10-27 20:33

Bangladeshko haurren lan-esplotazioari buruzko erakusketa amaitzear da Urdulizen

Erabiltzailearen aurpegia Ukberri Ostiralean amaituko da Intervida fundazioak Urdulizko kultur etxean jarritako Bangladeshko haurren lan-esplotazioari buruzko argazkien erakusketa. Hortaz, Jose Alfonso argazkilariaren 30 irudiak galdu nahi ez duenak azkar ibili beharko du. Aita Gotzon kaleko 16. zenbakian dago erakusketa aretoa eta honako ordutegian bisita daiteke: goizeko 10:30etik 13:30era eta arratsaldeko 4etatik 8etara. Bertan ikus daitezkeen argazkietan, Bangladeshko hiriburuan, Dhaka, milak umek pairatzen duten lan baldintza gogorrak jasotzen da. Izan ere, askok eta askok eskola joateari uzten diote familiaren beharrak asetzeko dirua behar dutelako eta errazagoa baita behin-behineko lana topatzea oinarrizko hezkuntza jasotzea baino. Guztira, mundu osoan 5 eta 14 urte bitarteko 218 milioi ume lan egitera behartuta dago eta seietatik batek lan-esplotazioa pairatzen du. Argazkian, gaztetxo bat lanean / © Jose Alfonso - Intervida fundazioa.
  Kultura 2009-10-26 19:42

Urdulizerako bidea hartu du berriro Gernikako Azokako barazkien sariak

Erabiltzailearen aurpegia Ukberri Iaz bezala, Adela Andikoetxea Urdulizko baserritarrak barazkien saria irabazi egin du gaur, urriko azken astelehenean ospatu den Gernikako azokan. Aurten ia 300 saltoki izan dira bertan. Udaltzaingoaren arabera, 105.000 lagun batu dira azokan, "Busturialdeko Hitza"-k zabaldu duenez. Urtero legez, hainbat lehiaketa egin dira: esan bezala, barazkiena Adelia Andikoetxea urduliztarrak irabazi du, frutena Gatikako Jose Etxeberriak, eztiarena Barakaldoko Igor Merinok, brezo eztiarena Kortezubiko Javier Larrinagak, txakoli beltzarena Bakioko Zabalak eta Idiazabalgo gaztarena Elgoibarko Mausitxa baserriak, besteak beste. Calzada egoitzaren aldeko enkantean, berriz, gazta erdiagatik bost mila euro ordaindu ditu Bilboko Porrue jatetxeak, inoizko kopururik altuena. Argazkian, barazkien postu bat Algortako San Lorentzo azokan, Andikoetxearentzat lehenengo azoka izan dena.
  Politika 2009-10-21 13:51

Andoni Muñozek 15 urte preso daramatzala salatzeko ekitaldiak egingo dituzte Urdulizen

Erabiltzailearen aurpegia Ukberri Andoni Muñoz de Vivar Berrio (argazkian) Urdulizko euskal preso politikoak 15 urte egingo ditu espetxean, datorren astean. Herritik kanpo horrenbeste urte daramatzala gogoratzeko, hainbat ekitaldi antolatu dituzte Etxeratek eta Iretargi kultur elkarteak. Urriaren 29an, osteguna, hitzaldia eta bideo emanaldia egingo dituzte Urdulizko kultur etxean, 19:00etatik aurrera. Larunbat horretan (hilak 31), berriz, egun osoan izango dira ekimenak. Ordu batetik aurrera, triki-poteoa egingo dute, herriko tabernatik abiatuta. Bertan izango dute bazkaria 14:30ean. Oturuntzarako txartelak hilaren 29 baino lehen hartu beharko dira, 12 eurotan. Bazkalostean, berriz, antzerkia egongo da herriko tabernan bertan, 16:00etan. Halere, ordu bete beranduago, Antsonekoa plazara mugitu beharko dira bildutakoak, bertan izango baitira haurrentzako puzgarriak (17:00) eta Auskalo Non taldearen erromeria (20:00).
  Politika 2009-10-13 22:57

Sevillako espetxean bakartuta daukate Gorka Martinez

Erabiltzailearen aurpegia Ukberri Gorka Martinez Ahedo Urdulizko euskal preso politikoa uztailaren 3an eraman zuten Zuerako (Zaragoza, Espania) espetxetik Sevillara, Uribe Kostako Amnistiaren Aldeko Mugimenduak Etengabe bitakoraren bitartez baieztatu duenez. Europa Press albiste agentziak igandean zabaldutakoaren (espainolez) arabera, "ETAko presoak saritu edo zigortzeko, Espainiako Barne Ministerioak abiatutako politikaren barruan" dago aipatu kartzela aldaketa. Besteak beste, Aitor Bores sopeloztarra Euskal Herritik hurbilago ekarri eta Aiboa Casares astrabuduarra urrunago eraman zuten udan. Oraingo honetan, Gorka Martinez urduliztarra Eduardo Puelles polizia-inspektorearen hilketa "ospatzen" harrapatu zutela dio Europa Pressek, espetxeko iturriak aipatuz. Hedabide horren hitzetan, "ez zen erakundeko beste preso batzuek ekintza terroristaren bat dagoenean egiten duten ospakizun arranditsu horietako bat izan, komentario batzuk baizik. Hala ere, horiek ez ziren oharkabean joan. Kartzelariek horren berri eman eta berehala erabaki zuten (Gorka Martinez) ahalik eta lasterren Sevillako espetxera aldatzea, Zueran lau hilabete baino ez eman ondoren". Argazkian, presoen aldeko mobilizazioa eskualdean.
  Kultura 2009-09-03 19:56

Musika doinuak eta kirol ekitaldiak tartekatuko dituzte Urdulizko jaiek

Erabiltzailearen aurpegia Ukberri Ostiral honetatik aurrera, jai giroak beteko du Urduliz, zazpi egunez. Aurten, Iretargi kultur elkartea izango da pregoia irakurri eta txupina botatzearen arduraduna, 19:00etan, udaletxeko balkoitik. Ondoren, Kakarraldo maskotaren jaitsiera egin eta eliz alboko landaraino abiatuko dira kalejiran koadrilak, txistulariak eta buruhandiak lagun dituztela. Gauez, Demencia, A Pelo y Tu eta Auskalo Non taldeek eskainiko dute kontzertua, ohiko karaokea egin ostean. Urtero bezala, bi asteburu hartuko dituzte jaiek: irailaren 4, 5 eta 6a, eliz inguruan; eta hilaren 11, 12 eta 13a, Elortza auzoan. Tartean, asteartean, irailak 8, Andra Mari egunarekin, ohorezko aurreskua egingo dute landan, 11:45ean, mezaren ostean. Eguerdiko 12etatik aurrera, berriz, herri kirol saioa izango da: Urrezko Aizkolari Txapeldunaren Liga eta Perurena bikotearen erakustaldia, hain zuzen. 20:15etik aurrera, Pergola taldean eskainiko du dantzaldia; 22:30eko su artifizialak baino lehen. Argazkian, Ziortza Azpiazu Alonsok irabazi du aurtengo kartel lehiaketa.
  Jendartea 2009-07-17 18:10

Traktoreak zapalduta gizon bat hil da Urdulizen

Erabiltzailearen aurpegia Ukberri Traktore batek zapalduta hil zen atzo 55 urteko gizon bat Urdulizko Mendiondo auzoan. Herrizaingo Sailak jakinarazi duenez, Ertzaintzak 22:00ak aldera izan zuen gertaeraren berri eta lehenengo ikerketen arabera, gizonezkoa bere ortuan zebiltzan lanean istripu bat izan zuenean. Oraindik ezagutzen ez diren arrazoiak direla medio, urduliztarra harrapatuta gelditu zen traktorearen behean, eta horren ondorioz zendu zen. Suhiltzaileak, anbulantzia bat eta ertzainak Mendiondoraino gerturatu ziren gizona makinatik askatzeko eta artatzeko asmoz, baina ez zuten aukerarik izan. Osasun-langileak heldu zirenerako heriotza egiaztatzea besterik ezin izan zuten egin. Horren ostean, gorpua atera eta Bilbora eraman zuten, Auzitegiko Medikuntza Patologia Zerbitzura, bertan autopsia burutzeko. Bestalde, LAB sindikatuaren arabera, urduliztarra aurten lan istripuetan hil den 43. behargina litzateke. Dena den, Urdulizko auzokide batek Berria.info-ri ukatu dio gizonezkoa lanean zebilenik. Argazkian, zaldi bi Mendiondo larre batean.
  Kultura 2009-07-15 23:33

Urdulizen ere ospatuko dute Santa Mariñe eguna

Erabiltzailearen aurpegia Ukberri Sopela aldean bezala, heldu den astelehenean, uztailak 20, Santa Mariñe eguna ospatuko dute Urdulizen. Jaiegun tradizional honetan urduliztarrak Santa Mariñe haitzetako baseliza pean egingo den erromeriaz gozatuko dute. Egun honetan hainbat ospakizun egingo dira, horien artean nabarmentzeko modukoak dira euren sustraitzeagatik, meza nagusia, ohorezko aurreskua, fanfarreek alaitutako hamaiketakoa eta tortilla lehiaketa. Udalak galletak, muztioa eta ardoa batuko dituzte mokadu lez. Horrenbestez, eguerdiko 12etan hasiko da ospakizun eguna, arratsalde partean herrigunera bueltatu aurretik. Izan ere, tortilla lehiaketa aitzakia bikaina bilakatzen da, bazkaria bertan egiteko. Orotara, 80 arrautzopil egiten dituzte 30 talde inguruk. Herrigunera 19:00ak aldera abiatuko dira, buruhandiek eta dantzariek lagunduta, Antsonekoa plazan txokolate jana egiteko. Argazkian, Sopela aldean ere izaten da festa giro itzela / © Sopelana.net.
  Kultura 2009-07-11 20:01

Buztan erregosiaren festaz gozatzen ari dira urduliztarrak

Erabiltzailearen aurpegia Ukberri Txori Alai kultur elkarteak antolatuta, Buztanluze Sukalki Txapelketaren XLIII. edizioa ospatu dute dozenaka lagunek gaur Urdulizko Elizalden, Andre Mari eliza ondoan. Baina gisatuaren inguruan aritzeaz gain, jai egunaz gozatzeko parada izaten ari dira bertan. Auzokideak esnatzeko edo, txistulariak aritu dira joka goizeko 9etatik. Ondoren, nahi izan dutenak mezara hurbildu dira, beste askok hamaiketakoarekin lanak izan dituzten bitartean. Jai zaleak berriro baturik, bertoko Iratxo Gorria dantza taldearen emanaldia izan dute ikusgai. Komeriak geroago heldu dira, 13:30ean lapikoak epaimahaiari aurkezteko ordua heldu denean, azken ukituak emateko. Behin puntuazioa emanda, herri bazkariari ekin diote urduliztar eta hurbildutakoek. Bazkalosteaz gozatzeko, koadrilen arteko herri kirolak dituzte orain ikusgai, 19:30ean emango diren sariak ezagutu arte. Era berean, parte hartu duten koadrilek garaikurrak eta opariak batuko dituzte, jai herrikoia izanik, parte hartzea saritzen baita. Argazkian, era askotan aurkez daiteke buztanluzea / cc-by-nc Andrew Huff.
  Hezkuntza 2009-06-30 16:09

Haur eskola izango du Urdulizek

Erabiltzailearen aurpegia Ukberri Urdulizko haur eskola eraikitzeko lanek 1.974.840,82 euroko oinarrizko lizitazio-aurrekontua izango dute. Orain aste batzuk, lehiaketa iragarri eta abian jarri zuen Udalak, prozedura mugatuaren bidez, berau eraikitzeko obren esleipendun izan nahi zuten enpresek beren proposamenak aurkez zitzaten. Lizitazio-iragarkia joan den ekainaren 10ean argitaratu zen Bizkaiko Aldizkari Ofizialean (BAO), eta hilaren 21ean itxi zen proposamenak aurkezteko epea. Pleguetan jasotako esleipen-irizpideekin bat etorriz, Urdulizko Udalak aurkeztutako eskaintzak aztertuko ditu orain, lanak esleitzeko asmoz. Ondoren, enpresa esleipendunak hamar hilabeteko betearazpen epea izango du. Tokiko erakundearen asmoa da haur eskola 2010/2011 ikasturterako egotea prest. Arteta kaleko lursail batean eraikiko dute, egungo kultur etxearen eta etorkizuneko osasun zentroaren ondoan. Horrela, eremu hori "topagune garrantzitsua" izango da urduliztarrentzat, udal iturrien arabera, "eskainiko dituen zerbitzuengatik zein herriaren erdigunean dagoelako". Argazkian, Juan Olea Urdulizko alkatea osasun zentroa aurkezteko prentsaurrekoan.
  Politika 2009-06-30 01:04

Andoni Muñoz presoa eskualdean izan da aitaren heriotza dela eta

Erabiltzailearen aurpegia Ukberri Andoni Muñoz de Vivar Berrio preso urduliztarra Algortan izan zen pasa den ostegunean, ama bisitatzen, segurtasun neurri handien artean. Familiaren lagun batzuek UKBERRI.NETi azaldu diotenez, aurreko astelehenean, hilak 22, Dionisio Muñoz de Vivar, Andoniren aita zendu zen 78 urte zituela. Dionisioren lagun eta senide askok azken agurra eman zioten Burgosko Terradillos de Esgueva herriko elizan. Andonik, berriz, ez zuen horren aukera izan eta amarekin izateko baimen berezia eskatu zuen Langraizko kartzelan. Azkenean, ostegunean amarekin eta gertuko bakan batzuekin bi orduz egon ahal izan zen preso urduliztarra, amarenean, Algortan. Berriotarren etxean 10 bat ertzain izan ziren uneoro Muñoz de Vivar zelatatzen, "tentsio uneak" bizi zirela. Era berean, hainbat lagunek "kalez jantzitako poliziek gazte bat eramaten" ikusi zutela eta, Espainiako Polizia Nazionalak Algortako batzokiaren inguruan gazte bat atxilotu zueneko zurrumurrua zabaldu zen. Andoni Muñoz de Vivar presoa zen pertsona hori, berriro Langraizera eramaten zutela.
  Jendartea 2009-05-25 21:07

Bihar bilduko da herritarrek parte hartzeko foroa Urdulizen

Erabiltzailearen aurpegia Ukberri Tokiko Agenda 21 egitasmoaren ezarpen prozesuarekin jarraituz eta "auzokideekin komunikazio etengabe eta bizia mantentzeko helburuarekin", herritarrek parte hartzeko foroa deitu du Urdulizko Udalak. Astearte honetan bertan, maiatzak 26, jarri dute hitzordua, kultur etxean. Gauzak horrela, 19:00etan hasita, Urdulizko mugikortasunerako ahulezia eta sendotasunak aztertuko dituzte, "batez ere mugikortasun iraunkorrarekin zerikusia dutenak, bai herri mailan, bai eskualde mailan ere", udal iturriek zehaztu dutenez. Argazkian, Juan Olea Urdulizko alkatea.

Nabarmenak

Zorion agurrak