Jendartea  Uribe Kosta 2018-03-14 14:24

Kukularrako lotunea egokitzeko proiektuaren lehenengo fasea esleitu du Aldundiak

Bizkaiko Foru Aldundiak Construcciones y Promociones Balzola enpresari esleitu dio Kukularrako lotunea eraberritzeko proiektuaren lehenengo faseko obrak. Lanon helburua da Arrontegi eta Txorierriko korridorearen arteko zirkulazio-pilaketak gutxitzea.

Kukularrako lotunea egokitzeko proiektuaren lehenengo fasea esleitu du Aldundiak
BI-637 errepidea Erandioko Kukularran. © BIZKAIKO FORU ALDUNDIA. | Ikusi handiago | Argazki originala

Kukularrako lotunea egokitzeko proiektua obra handia da; horregatik, lanak fase bitan banatu dira. Bidesarea Planaren bigarren biurtekoan daude sartuta biak, Bizkaiko errepideen foru sarea hobetu eta modernizatzeko. Proiektuaren helburua da zirkulazio-pilaketak gutxitzea BI-637 eta N-637 errepideen artean, Arrontegi-Enekuri-Erletxetarako noranzkoan.

Aurreikuspenaren arabera, obrak uda baino lehen hasiko dira eta hamabi hilabeteko epean amaituta egongo dira. Esleipenaren zenbatekoa 5.122.513 eurokoa da.

Proiektuaren fase biak

Lehenengo faseko obrek errepideko 1,2 kilometro hartuko dituzte. Proiektuan, zehazki, honako hau dago jasota, Aldundiak adierazi duenez: Enekuriko jaitsieraren azpian dagoen pasagunean hiru errei egingo dira; Kukularran, Deriorako noranzkoan, lau errei zabalduko dira; eta Arrontegi-Kukularra adarrean bi errei egingo dira. Azken zabaltze horren ondorioz, lau errei egongo dira Arrontegin, Asuerarako irteeratik Kukularrarako irteeraraino.

Bigarren fasea 2019an hastea aurreikusita dago, eta honako lan hauek egingo dira: bi errei egingo dira Avanzada-Kukularra adarraren azken zatian; Arrontegi-Kukularra errepidean adar berria eraikiko da, Avanzada-Arrontegi adarraren azpian; eta, azkenik, Avanzada-Kukularra adarra erabat zabalduko da.

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa